1. Kodi n’ciyani comwe cimbatisiyanisa na bzirombo?

WANTHUFE tidasiyana kwene-kwene na bzirombo. Thangwe ranyi? Thangwe Yahova adatipasa cinthu cinango cakufunika kwene-kwene comwe cimbaticitisa kukhala wakusiyana na bzirombobzo. Cinthuco ni cikumbu-mtima. Yahova akhadapasambo Adamu na Eva cikumbu-mtima. Kodi timbadziwa tani bzimwebzi? Timbadziwa thangwe pomwe iwo adapandukira Mulungu, cikumbu-mtima cawo cidayamba kuwanesa ndipo adakabisala.

2. N’thangwe ranyi tingandendemezere cikumbu-mtima cathu na giyadori? (Onani cithunzi-thunzi pa tsamba lino.)

² Cikumbu-mtima ni unthu bwathu bwa mkati, bomwe bumbatithandiza kusiyanisa cabwino na cakuipa ndipo cimbatitsogolera pa moyo wathu. Ndipopa wanthu omwe ana cikumbu-mtima cakusaya kupfunzisidwa bwino angandendemezeredwe na xitima ya m’madzi yomwe ina giyadori yakudzongeka. Kucita ulendo na xitima imweyi kungabwerese ngozi ikulu, thangwe conzi na mabimbi ya m’nyanza bzingagwinyire xitimayo ku mbuto yakuphonyeka ndipo nyakufambisa anganeseke kuiyendesa komwe akufuna. Tsono giyadori yomwe iri bwino ingathandize nyakufambisayo kukafika komwe an’funa. Mpsibodzi-bodzimbo na cikumbu-mtima cathu. Ico ciri ninga giyadori, tsono  kuti cititsogolere bwino, ifepano tin’funika kucipfunzisa.

3. Kodi n’ciyani comwe cingacitike tikasaya kupfunzisa bwino cikumbu-mtima cathu?

³ Tikasaya kupfunzisa bwino cikumbu-mtima cathu, cingatithandize lini kusiyanisa cabwino na cakuipa. (1 Timotio 4:1, 2) Ndipo pinango ico cingafike pakuticitisa kuwona cakuipa kukhala cabwino. (Zaiya 5:20) Jezu adauza ateweri wace kuti: ‘Inkufika nthawe yakuti omwe an’dzakuphani an’dzakumbuka kuti ankucita basa lakupambulika kwa Mulungu.’ (Juwau 16:2) Bzimwebzi ndibzo bzomwe akhakumbuka wale omwe adapha Sitefano. (Mabasa 6:8, 12; 7:54-60) Ndipo mwakubverana na mbiri ya wanthu, wanthu azinji wa bzipembedzo akhapha anzawo m’dzina la Mulungu. Tsono cadidi n’cakuti bzomwe iwo akhacitabzo bzimbabverana lini na malamulo ya Mulungu. (Kufuluka 20:13) Kulewa cadidi, cikumbu-mtima ca wanthu amwewa ciribe kuwatsogolera bwino!

4. Kodi n’ciyani comwe tingacite kuti cikumbu-mtima cathu cimbatitsogolere bwino?

⁴ Malamulo na mitemo ya m’Bibliya ‘njaphindu pakupfunzisa, pakutsimula, pakulungamiza bzinthu na pakulanga m’cirungamo.’ (2 Timotio 3:16) Tenepo, kuti cikumbu-mtima cathu cimbatitsogolere bwino, ifepano tin’funika kumbapfunza Bibliya mwakukhazikika, kukumbukira bzomwe tapfunzabzo, ticimbabziphatisa basa pa moyo wathu. Ndipo tikacita bzimwebzi, ifepano tin’dzakwanisa kumbakumbuka ninga momwe Yahova ambakumbukira ndipo cikumbu-mtima cathu cin’dzatitsogolera bwino. Tsapano mbatiwoneni momwe tingapfunzisire cikumbu-mtima cathu mwakuphatisa basa malamulo na mitemo ya Yahova.

5, 6. Kodi malamulo ya Mulungu yambatithandiza tani?

⁵ Tikafuna kuti malamulo ya Mulungu yambatitsogolere, tin’funika kucita bzizinji kuposa kundoyawerenga ayai kuyadziwa. Ifepano tin’funika kumbayafuna na kuyalemekeza. Bibliya limbati: ‘Wengani comwe n’cakuipa, mucifuna comwe n’cabwino.’ (Amosi 5:15) Kodi tingacite tani bzimwebzi? Mwa kumbawona bzinthu ninga momwe Yahova ambabziwonera. Onani ciratizoci: Tiyezeze kuti imwepo mumbaneseka kugona. Tenepo, mwayenda kwa dotolo ndipo iye wakuuzani kuti mun’funika kumbadya cakudya ca thanzi, kumbacita masenzeka yakulimbisa thupi na kucinja bzinthu bzinango pa moyo wanu. Tsono imwepo mwateweza malango yense ndipo tsapano munkukwanisa kugona. Kodi imwepo mungayawone tani malango ya dotolo umweyu?

⁶ Mpsibodzi-bodzimbo na Mulengi wathu Yahova. Iye adatipasa malamulo yomwe yambatithandiza pa moyo wathu na kutikhotcerera ku bzakutewera bzakuipa bza pikado. Mwa ciratizo, Bibliya limbalewa kuti tin’funika lini kumbanama, kukhala wakusaya kukhulupirika, kuba, kucita upombo, ciwembo ayai kucita bzinthu bzakubverana na bzamizimu. (Werengani Mimwani 6:16-19; Cibvumbulutso 21:8) * Tikambateweza malamuloya na kuwona bzakutewera bzace bzabwino, ifepano timbafika pakufuna Yahova pabodzi na malamulo yace.

7. Kodi bziratizo bza m’Bibliya bzingatithandize tani?

⁷ M’Bibliya muna bziratizo bza wanthu azinji omwe alibe kubvera malamulo ya Mulungu, ndipo adakhala na bzakutewera bzakuipa. Tenepo, na bziratizobzi ifepano tingapfunze kusiyanisa bzabwino na bzakuipa. Pa Mimwani 1:5 pambati: ‘Munthu wanzeru ambatetekera ndipo ambapfunza malango mazinji.’ Kodi malango yamweya yambacokera kuponi? Yambacokera kwa Mulungu  ndipo njabwino kwene-kwene kuposa malango yense. Mwa ciratizo, ndokumbukirani momwe Davide adabonerera pomwe iye alibe kubvera Yahova mwakucita upombo na Bate-Seba. (2 Samuweri 12:7-14) Mukambawerenga nkhaniyi, mbabzibvunzani kuti: ‘Kodi Davide angadatcenkha tani bvuto limweri? Kodi ndingadakhala ine, ndingadacita tani? Kodi ndingadacitambo upombo ninga Davideyo ayai ndingadatewezera Zuze?’ (Ciyambo 39:11-15) Tikambakumbukira mwakusamala bzakutewera bzakuipa bza pikado, ifepano tin’dzakwanisa ‘kuwenga comwe n’cakuipa.’

8, 9. (a) Kodi cikumbu-mtima cathu cingatithandize kucita ciyani? (b) Kodi mitemo ya m’Bibliya ingathandize tani cikumbu-mtima cathu?

⁸ Bibliya limbalewa bzinthu bzomwe Yahova ambabziwenga ndipo bzimbakhala bzakusaya kunesa ifepano kubziwengambo. Tsono pana bzinthu bzinango bzomwe Bibliya limbalewa lini ciri-cense comwe tingacite. Tenepo, n’ciyani comwe tingacite pa cakucitika ninga cimweci? Ndipo tingadziwe tani bzomwe Mulungu an’funa kuti ticite? Tingadziwe mwakuphatisa basa cikumbu-mtima cathu cakupfunzisidwa na Bibliya. Ndipo tikacita bzimwebzi, tin’dzacita cakusankhula canzeru.

⁹ Yahova ambatifuna, ndipopa iye adatipasa mitemo yomwe ingatsogolere cikumbu-mtima cathu. Iye ambatiuza kuti: ‘Ine Yahova ndine Mulungu wako, omwe ndimbakupfunzisa kuti ugumane phindu, ule omwe ndimbakutsogolera mu njira yomwe un’funika kufamba.’ (Zaiya 48:17, 18) Tikambakumbukira mitemo ya m’Bibliya na kubvuma kuti itokonye mtima wathu,  ifepano tin’dzakwanisa kulungamiza na kupfunzisa cikumbu-mtima cathu. Ndipo bzimwebzi bzin’dzatithandiza kucita bzakusankhula bzanzeru.

10. Kodi mitemo n’ciyani, ndipo n’thangwe ranyi Jezu adaphatisa basa mitemoyo?

¹⁰ Mitemo ni nfundo zacadidi zomwe zimbatsogolera makumbukidwe yathu ndipo zimbatithandiza kucita bzakusankhula bzabwino. Ndipo kudziwa mitemo ya Yahova kumbatithandiza kubvesesa makumbukidwe yace na thangwe lomwe iye ambaperekera malamulo. Jezu adaphatisa basa mitemo kuti athandize anyakupfunza wace kuwona kuti cinthu ciri-cense cimbakhala na bzakutewera bzace. Mwa ciratizo, iye adawathandiza kuwona kuti ukali bungacitise munthu kucita bzinthu bzakuipa ndipo kukhala na makumbukidwe ya unzazi kungacitise munthu kucita upombo. (Mateu 5:21, 22, 27, 28) Tenepo, tikambabvuma kutsogoleredwa na mitemo ya Yahova, cikumbu-mtima cathu cin’dzakhala cakupfunzisidwa bwino ndipo tin’dzacita bzakusankhula bzomwe bzin’dzalemekezesa Mulungu.—1 Wakolinto 10:31.

11. Kodi n’kusiyana kuponi komwe kungawoneke pa nkhani ya cikumbu-mtima?

¹¹ Nthawe zinango, Akristau angasiyane makumbukidwe pa nkhani inango, napo kuti wense ana cikumbu-mtima cakupfunzisidwa na Bibliya. Mwa ciratizo, pinango iwo angasiyane makumbukidwe pa nkhani ya kumwa. N’cadidi kuti Bibliya limbaletsa lini kumwa, koma iro limbaticenjeza kuti tin’funika kumbamwa na malire. (Mimwani 20:1; 1 Timotio 3:8) Tenepo, pinango Mkristau omwe cikumbu-mtima cace cimbamubvumiza kumwa angakumbuke kuti palibe bvuto liri-lense kucita bzimwebzo. Tsono kodi bziridi tenepo? Ne. Napo kuti ana ufulu bwakucita bzomwe an’funa pa nkhaniyi, iye an’funika kumbakumbukirambo bza cikumbu-mtima ca winango.

12. Kodi mafala ya pa Waroma 14:21, yangatithandize tani kumbalemekeza cikumbu-mtima ca winango?

¹² Pakufotokoza bza kumbalemekeza cikumbu-mtima ca winango, Paulo adati: ‘Kuli bwino kuleka kudya nyama, ne kumwa vinyu ayai kucita ciri-cense comwe cingakhukhumudwise m’bale wako.’ (Waroma 14:21) Tenepo, napo kuti tina ufulu bwakucita bzomwe tin’funa pa nkhani ya kumwa, ifepano tin’funika kumbakumbukirambo bza wale omwe cikumbu-mtima cawo cimbawabvumiza lini. Mwa ciratizo, pinango pana m’bale munango omwe pakuyamba akhamwa, koma pomwe adapfunza Bibliya adadzasiya kumwako. Pa cakucitika ninga cimweci, tin’funika kumbasamala kwene-kwene kuti tireke kucitisa m’baleyo kukhala pomwe na cikhumbo cakufuna kumwa. (1 Wakolinto 6:9, 10) Tsono tani penu tacemera m’baleyo kumui kwathu, kodi tingamungingimize kuti amwe pomwe iye ankulamba? Tin’funika lini kucita tenepo.

13. Kodi Timotio adalatiza tani kuti akhalemekeza cikumbu-mtima ca winango?

¹³ Timotio n’ciratizo cabwino pa nkhani ya kulemekeza cikumbu-mtima ca winango. Mwa ciratizo, pomwe iye akhali tswaka, adabvuma kucita mgwatidwe thangwe akhadziwa kuti imweyi ikhali nkhani yakufunika kwene-kwene kwa Ajuda omwe iye angadakawapalizira. Ninga Paulo, Timotio akhambalemekeza cikumbu-mtima ca winango. (Mabasa 16:3; 1 Wakolinto 9:19-23) Tsono tani imwepombo, kodi mumbalemekeza cikumbu-mtima ca anzanu?

14, 15. (a) Kodi tingacite ciyani kuti tikhale wakukhwima mwauzimu? (b) Kodi n’ciyani comwe munthu wakukhwima mwauzimu ambacita?

¹⁴ Tensenefe tin’funika kucita nyongo ‘yakukhala wakukhwima mwauzimu,’ m’mbuto mwakumbandokomedwa na ‘cipfunziso cakuyambirira cakulewa bza Kristu.’ (Wahebereu 6:1) Kukhala wakukhwima mwauzimu kumbathemba lini magole yomwe munthu wakhala m’cadidi, koma nyongo yomwe iye ambacita. Tenepo, tin’funika kucita nyongo yakuthumizira cidziwiso cathu na kumbabvesesa nfundo za m’Bibliya. Ndipopa tin’funika kumbawerenga Bibliya nsiku zense. (Psalymo 1:1-3) Ndipo tikacita bzimwebzi, ifepano tin’dzakwanisa kubvesesa malamulo na mitemo ya Yahova.

¹⁵ Kodi ndiponi lamulo lakufunika kwene-kwene kwa Akristau? Ni lamulo la lufoyi. Jezu adauza ateweri wace kuti: ‘Na bzimwebzo, wense an’dzadziwa kuti ndimwe anyakupfunza wangu, mukambafunana.’ (Juwau 13:35) Bibliya limbalewa kuti lufoyi ni khalidwe lakufunika kwene-kwene nakuti ‘cakutonga cimbakwanisidwa mu lufoyi.’ (Tiyago 2:8; Waroma 13:10) Ifepano timbadziwa kuti lufoyi ndakufunika thangwe Bibliya limbalewa kuti ‘Mulungu ni lufoyi.’ (1 Juwau 4:8) Ndipo kwa Mulungu, lufoyi limbaphatanidza bzizinji, sikuti kokha momwe iye ambabvera mu mtima, ndipo iye ambalilatiza mwa bzicito bzace. Juwau adati: ‘Lufoyi la Mulungu lidawonekera kuna ife mwa kutumiza Mwana wace wakuyamba kubadwa kubwera m’dziko, kuti tikhale na moyo mwa iye.’ (1 Juwau 4:9) Tenepo, tikambafuna Yahova, Jezu, abale wathu wauzimu pabodzi na wanthu winango, timbalatiza kuti ndife wakukhwima mwauzimu.—Mateu 22:37-39.

16. Kodi kukhala wakukhwima mwauzimu kungatithandize kucita ciyani?

¹⁶ Kukhala wakukhwima mwauzimu, kungatithandize kumbafuna kwene-kwene mitemo ya Mulungu. Thangwe ranyi? Thangwe malamulo yambaleweratu padeca bzomwe munthu an’funika kucita, tsono mitemo imbalewa lini, ndipo ingaphatisidwe basa pa bzakucitika  bzakusiyana-siyana. Mwa ciratizo, mwana ambabvesesa lini ngozi yomwe ingabwere thangwe ra kucita uxamwali na wanthu wakuipa, tenepo abereki wace ambafunika kumuuza bzakucita kuti amukhotcerere. (1 Wakolinto 15:33) Tsono mwanayo akakula, ambayamba kuphatisa basa mitemo ya m’Bibliya ndipo bzimwebzi bzimbamuthandiza kusankhula axamwali wabwino. (Werengani 1 Wakolinto 13:11; 14:20.) * Mpsibodzi-bodzimbo na ifepano, tikambaphatisa basa mitemo ya m’Bibliya, cikumbu-mtima cathu cimbapfunzisidwa bwino, cimbakwanisa kutitsogolera ndipo timbabvesesa bzomwe Mulungu an’funa kuti ticite pa cakucitika ciri-cense.

17. Kodi ni bzinthu bziponi bzomwe bzingatithandize kucita bzakusankhula bza nzeru?

¹⁷ Ifepano tina bzinthu bzense bzakufunikira kuti timbacite bzakusankhula bzomwe bzingakondwese Yahova. Ndipo m’Bibliya muna malamulo na mitemo yomwe ingatithandize kukhala ‘wakuthemera na wakukonzeka kuti ticite basa liri-lense labwino.’ (2 Timotio 3:16, 17) Mitemoyo ingatithandize kubvesesa makumbukidwe ya Yahova. Tsono kuti bzimwebzi bzikwanisike ifepano tin’funika kucita nyongo. (Wayefezo 5:17) Ndipo tina bzinthu bzizinji bzomwe bzingatithandize ninga Buku Lofufuzira Nkhani la Mboni za Yehova, Watchtower library, BIBLIYOTEKA YA PA INTERNETI na programa ya JW Library. Tikambaphatisa basa bzinthu bzimwebzi, tin’dzakwanisa kugumana phindu pa pfunziro lathu la patekha ayai la banja.

18. Kodi n’ciyani comwe cimbacitika tikambaphatisa basa malamulo na mitemo ya Yahova pa moyo wathu?

¹⁸ Tikambaphatisa basa malamulo na mitemo ya Mulungu pa moyo wathu, ifepano timbakhala na moyo wabwino kwene-kwene. Pa Psalymo 119:97-100 pambati: ‘Ndimbafunadi lamulo lanu, nsiku yense ndimbalikumbukira. Cakutonga canu cimbandicitisa kukhala wanzeru kwene-kwene kuposa anyamadulanthaka wangu, pakuti cina inepano nthawe zense. Ndakhala wakuzindikira kwene-kwene kuposa apfunzisi wangu wensene, thangwe ndimbakumbukira bzikumbuso bzanu. Ndimbacita bzinthu mwakuzindikira kwene-kwene kuposa wanthu wacikulire, thangwe ndimbabvera malamulo yanu.’ Tenepo, tikambapambula nthawe yakumbakumbukira malamulo na mitemo ya Mulungu, tin’dzakhala wakuzindikira ndipo tin’dzacita bzinthu mwanzeru. Ndipo tikambaphatisa basa malamulo na mitemoyi pakupfunzisa cikumbu-mtima cathu, ifepano tin’dzafika ‘pa msinkhu wa munthu mkulu, msinkhu omwe Kristu akhanawo.’—Wayefezo 4:13.