1. Kodi ni bzinthu bziponi bzomwe bzimbatikondwesa?

MPSAKUKONDWESA kwene-kwene kudziwa kuti atumiki wa Yahova ankuwonesa ceza cawo! Mwa ciratizo, gole lamalali, Mboni za Yahova zidacitisa mapfunziro ya Bibliya yakupitirira 10.000.000. Ndipo wanthu azinji adagumanika pa msinda wa Cikumbuso, acipfunza bza nsembe ya cakulombolera yomwe ni njira yomwe Yahova adalatizira lufoyi lace kwa wanthu wensene.—1 Juwau 4:9.

2, 3. (a) Kodi n’ciyani comwe cingatitazise lini kuyetima ninga ‘mibvuniko ya dzikoli?’ (b) Kodi tin’cezerana ciyani mu nkhani ino?

² Kuzungulira dziko lense la pansi, Mboni za Yahova zimbalewalewa bzirewedwe bzakusiyana-siyana. Tsono bzimwebzi bzimbatitazisa lini kutumbiza Yahova mwakuphatana ninga banja. (Cibvumbulutso 7:9) Ndipo bziribe basa cirewedwe comwe timbalewalewa ayai komwe timbakhala, ifepano timbayetima ninga ‘mibvuniko ya dzikoli.’—Wafiripo 2:15.

³ Kodi tingawonese tani ceza cathu kwa wanthu? Mu nkhani ino tiniwona mbali zitatu za momwe tingacitire bzimwebzi, zomwe ni  utumiki bwathu, ciphatano cathu na kukhala tceru.—Werengani Mateu 5:14-16. *

4, 5. (a) Kuthumizira pa basa lakupalizira, kodi tingacite ciyani kuti ceza cathu ciwonekere kwa wanthu? (b) N’thangwe ranyi tin’funika kukhala wansangala na wakudeka mtima? (Onani cithunzi-thunzi pa tsamba 21.)

⁴ Kupalizira bzipsa bzabwino na kupfunzisa wanthu, ni njira yakufunika kwene-kwene yakulatizira ceza cathu kwa wanthu. (Mateu 28:19, 20) Mwa ciratizo, Nsanza ya Mulindiri ya cingerezi ya 1 Junho, 1925, pa msolo wakuti: “Ceza mu Mdima” idalewa kuti m’nsiku zakumalizira, palibe omwe angadapitiriza kukhala wakukhulupirika kwa Mbuya angadasaya kucitisa ceza cace kuyetima. Ndipo idathumizira pomwe kuti: “Munthuyo angadafunika kupalizira bzipsa bzabwino kwa wanthu wense na kucita bzinthu mwakubverana na cezaco.” Kuthumizira pa basa lathu lakupalizira, makhalidwe yathu yabwino yambapasambo mbiri Yahova. Ndipo wanthu azinji ambatiwona tikambapalizira. Tenepo tikambawamwetulira na kuwamusa, iwo ambakomedwa nafe pabodzi na Mulungu omwe timbamunamata.

⁵ Jezu adauza anyakupfunza wace kuti: ‘Mukafika pa mui, musanani na wanthu wa pa muipo.’ (Mateu 10:12) Magawo yomwe Jezu akhapalizira, wanthu akhana cizolowezi ca kumbauza alendo kuti apite m’nyumba mwawo. Koma ndibzo lini bzomwe bzimbacitika na magawo mazinji nsiku zino, wanthu azinji kawiri-kawiri akafikiridwa na alendo kumui kwawo, ambakhala na mantha ayai na thupo. Tsono tikakhala wansangala na wakudeka mtima, iwo ambatsudzuka nafe. Ndipo bzimwebzi ndibzo bzomwe bzimbacitika tikambacita upalizi bwa padeca mwakuphatisa basa kangolo kakucita kupfuwa. Tikambamwetulira wanthu na kuwamusa mwa nsangala, iwo ambakhala wakutsudzuka kutenga mabukhu yathu ndipo winango mpaka ambabvuma kuceza nafe.

6. Kodi n’ciyani comwe banja linango lidacita kuti ceza cawo cipitirize kuyetima?

⁶ Banja linango lacikulire la ku Inglatera, limbakwanisa lini kucita bzizinji pa basa lakupalizira nyumba na nyumba, thangwe ra bvuto la kukalamba. Tenepo iwo ambaphatisa basa njira inango kuti ceza cawo cipitirize kuyetima. Pakuti banjali limbakhala pafupi na xikola inango, iwo ambaikha meza ya mabukhu kutsogolo kwa nyumba yawo, kuti abereki omwe ambabwera kudzatenga wana wawo ambayawone. Abereki winango ambatenga mabukhuyo, kuphatanidzambo mabukhu ya Mayankho a Zimene Achinyamata Amafunsa. Mpfumakazi inango yomwe inkutumikira ninga mpainiya, kawiri-kawiri imbapalizira pabodzi na banjali. Ndipo thangwe ra nsangala za mpfumakaziyi pabodzi na za banjali, m’bereki munango adayamba kupfunza Bibliya.

7. Kodi tingathandize tani alendo omwe ali m’gawo lathu?

⁷ M’magole yakumalizira yano, wanthu azinji athawa m’madziko yawo ndipo ankukhala m’madziko manango ninga alendo. Tsono tingawathandize  tani kuti adziwe bza Yahova? Cakuyamba, tin’funika kupfunza momwe tingawamusire m’cirewedwe cawo. Ndipo programa ya JW Language, ingatithandize kudziwa mafala manango yomwe yangacitise alendowo kubvuma kuceza nafe. Patsogolo pace, tingawalatize mavidiyo na mabukhu yomwe yalipo m’cirewedwe cawo pa saite yathu ya jw.org.—Bzakutonga 10:19.

8, 9. (a) Kodi mitsonkhano yathu ya pakati pa mdzinga imbatithandiza tani? (b) Kodi n’ciyani comwe abereki angacite kuti athandize wana wawo kumbapereka mitawiro mwa mafala yawo?

⁸ Yahova ambatipasa bzinthu bzomwe timbafunikira kuti tikwanise kupalizira. Mwa ciratizo, bzomwe timbapfunza pa mitsonkhano ya pakati pa mdzinga bzimbatithandiza kukhala wakukonzeka kucita ulendo bwakubwereza na kuyambisa mapfunziro ya Bibliya.

⁹ Napo wana ang’ono angacitisembo kuti ceza cawo ciyetime mwa kupereka mitawiro. Kawiri-kawiri, alendo ambadabwa kwene-kwene akabwera pa mitsonkhano yathu, thangwe ra mitawiro yomwe wanawo ambapereka. Penu imwepo ndimwe m’bereki, kodi mumbapfunzisa wana wanu kuti ambapereke mitawiro mwa mafala yawo? Wanthu winango adabvuma cadidi thangwe ra kubva mitawiro ya wana yomwe adaipereka mwa mafala yawo na mwa kucokera pansi pa mtima.—1 Wakolinto 14:25.

10. Kodi n’ciyani comwe cingacitise kuti mabanja yakhale yakuphatana?

¹⁰ Njira inango yakuwonesera ceza cathu ni kucita nyongo kuti pa banja pakhale na mtendere na ciphatano, ndipo kucita bzimwebzi bzingatumbizise Yahova. Mwa ciratizo, penu ndimwe m’bereki, kuti banja lanu likhale lakuphatana mun’funika kumbacita kunamata ninga banja  mwakukhazikika. Ndipo mabanja manango yambacita makonzedwe yakumbawona pabodzi programa ya JW Broadcasting, ndipo pambuyo pace ambacezerana momwe angaphatisire basa bzomwe abvabzo. Tenepo, mbacitani nyongo ya kuthandiza ali-wense m’banja mwanu kugumana phindu na kunamata ninga banja, mucithandiza mwana ali-wense mwakubverena na msinkhu wace.—Psalymo 148:12, 13.

11-13. Kodi tingacite ciyani kuti gwere lathu likhale lakuphatana?

¹¹ Maswaka yangacitisembo kuti gwere likhale lakuphatana. Ndipo njira ibodzi yakucitira bzimwebzi ni kucita uxamwali na abale pabodzi na mpfumakazi zacikulire. Tenepo, mukambaceza nawo mbawabvunzani kuti n’ciyani comwe cidawathandiza kupitiriza kutumikira Yahova kwa magole mazinji. Iwo an’dzakufotokozerani bzinthu bzizinji bzomwe bzin’dzakuthandizani, ndipo kucita bzimwebzi kun’dzalimbisa iwo pabodzi na imwepo. Ndipo cinthu cinango comwe tensenefe tingacite ni kumbatambira na manja mawiri alendo omwe ambabwera pa mitsonkhano yathu, bziribe basa penu ndife mkhalamba ayai maswaka. Ndipo tingamusane nawo mwa nsangala, kuwalatiza mbuto yakukhala na kuwadziwikisa kwa abale winango. Tikacita tenepo, iwo an’dzabzibva kuti atambiridwa bwino.

¹² Mukambatsogolera mtsonkhano wakukonzekera utumiki bwakumunda, mungathandize acikulire kupitiriza kuwonesa ceza cawo, mwa kumbawapasa gawo lakuthemerana na thanzi lawo. Ndipo mungawagawembo pabodzi na maswaka kuti ambayende nawo. Acikulire azinji pabodzi na abale omwe ana bvuto la thanzi, kawiri-kawiri ambasunama thangwe ra kuwona kuti ankukwanisa lini kucita bzinthu ninga momwe akhacitira kale-kale. Tsono iwo angatsangalazidwe akambawona kuti imwepo munkuwasamalira na kubvesesa bvuto lawo. Ndipo kucita bzimwebzi kun’dzawalimbisa kuti apitirize kupalizira na nyongo, bziribe basa msinkhu wawo ayai magole yomwe anayo m’cadidi.—Mwambo 19:32.

¹³ Ajirayeri akhakomedwa kwene-kwene akambatsonkhana pabodzi kuti anamate Yahova. Ndipo nyakunemba bukhu la psalymo adati: ‘Mpsabwino, ndipo mpsakudekeza abale kukhala pabodzi mwakuphatana!’ (Werengani Psalymo 133:1, 2.) * Iye adandendemezera ciphatanoci na mafuta yabwino na yakununcira. Mpsibodzi-bodzimbo na ifepano, tingatsangalaze abale na mpfumakazi zathu mwa kumbawalatiza nsangala na kumbawadekera mtima. Kucita bzimwebzi kumbacitisa gwere kukhala lakuphatana. Kodi munkucita nyongo yakudziwana bwino na abale wa m’gwere mwanu?—2 Wakolinto 6:11-13.

14. Kodi tingawonese tani ceza cathu komwe timbakhala?

¹⁴ Tensenefe tingawonese ceza cathu komwe timbakhala. Tikakhala wakudeka mtima tin’dzacitisa kuti wanthu omwe timbakhala nawo pafupi afune kupfunza bzizinji pakulewa bza Yahova. Mungabzibvunze kuti: ‘Kodi wanthu omwe ndidafendererana nawo nyumba ambandiwona tani? Kodi pa mui pangu pana khonkho? Kodi iwo ambapawona tani? Kodi ndimbawathandiza akafuna thandizo?’ Ndipo mbabvunzani abale winango kuti akuuzeni momwe kudeka mtima kwawo na ciratizo cawo cabwino cimbatokonyera  azibale wawo, wanthu wakufendererana nawo nyumba, anzawo wakubasa ayai wa ku xikola.—Wayefezo 5:9.

15. N’thangwe ranyi tin’funika kupitiriza kukhala tceru?

¹⁵ Kuti ceza cathu cipitirize kuwonekera, tin’funika kuzindikira nthawe yomwe tinkukhala ino. Jezu adauza anyakupfunza wace kazinji kense kuti: ‘Pitirizani kukhala tceru.’ (Mateu 24:42; 25:13; 26:41) Tikambakumbuka kuti ‘citsautso cikulu’ cinkucedwa kufika, tin’dzaneseka kuthandiza winango kuti adziwe bza Yahova. (Mateu 24:21) Ndipo bzimwebzi bzin’dzacitisa kuti ceza cathu cireke kuwonekera, ndipo pang’ono na pang’ono cin’dzambombowa mpaka kufika pakuthima.

16, 17. Kodi n’ciyani comwe tingacite kuti tipitirize kukhala tceru?

¹⁶ Bzinthu bza m’dzikoli bzinkuyenda bziciipiratu. Ndipopa tin’funika kukhala tceru kwene-kwene kuposa kale lense. Koma timbadziwa kuti Yahova an’dzamalisa kuipa kwense pa nthawe yomwe adaikhazikisa. (Mateu 24:42-44) Ndipo pomwe tinkudikhirira nthawe imweyi, tin’funika kupirira ticimbapitiriza kukhala tceru. Tenepo, mbawerengani Bibliya nsiku zense, ndipo lekani kusiya kumbapemba kwa Yahova. (1 Pedru 4:7) Mungapfunzembo nkhani za abale na mpfumakazi zomwe zinkutumikira Yahova kwa magole mazinji, zomwe  zimbafotokozedwa mu Nsanza ya Mulindiri pa msolo wakuti “Nkhani ya Moyo Wangu.” Mwa ciratizo, mungawerenge nkhani yomwe iri mu Nsanja ya Olanda ya 15 Abril, 2012, matsamba 18-21 pa msolo wakuti “Ndagwira Chovala cha Myuda kwa Zaka Zoposa 70.”

¹⁷ Phatisani basa nthawe yanu kuti mutumikire Yahova na kuthandiza abale wanu. Mukacita bzimwebzi mun’dzakhala wakukondwa ndipo mun’dzawona kuti nthawe yanu inkuthamanga. (Wayefezo 5:16) M’magole dzana mbuyomu, atumiki wa Yahova adacita bzinthu bzizinji pa basa la Yahova. Koma nsiku zino, ife tinkucita bzizinji kuposa kale-kale ndipo basa la Yahova linkuyenda patsogolo kwene-kwene, bzomwe bzinkucitisa kuti ceza cathu ciwonekere mwamphanvu!

18, 19. Kodi akulu wa gwere angatithandize tani kupitiriza kukhala tceru? Fotokozani ciratizo.

¹⁸ Yahova ambabvuma kuti timutumikire napo kuti kawiri-kawiri timbamuphonyera thangwe ra kuperewera. Tsono kuti atithandize, iye ambatipasa ‘amuna ninga mphaso,’ omwe ni akulu wa gwere. (Werengani Wayefezo 4:8, 11, 12.) * Tenepo, akulu akakuzungirani mbawonani mpata umweyu kukhala wakufunika kuti mugumane phindu na malango yawo.

¹⁹ Mwa ciratizo, banja linango la ku Inglatera lidagumana na bvuto, tenepo iro lidakakumbira thandizo kwa akulu. Pakufotokoza bza bvutolo, mkazi adalewa kuti mwamuna wace akhatsogolera lini banja lace mwauzimu. Ndipo mwamunayo adatawiriza bzomwe mkazi waceyo adalewa, ndipo adalewambo kuti akhacita lini kunamata ninga banja mwakukhazikika. Tsono akuluwo adathandiza banjali mwakuphatisa basa ciratizo ca Jezu. Iwo adalimbisa mwamunayo kuti akhafunika kutewezera momwe Jezu akhasamalirira anyakupfunza wace. Ndipo adalimbisa mkaziyo kuti akhale wakupirira ninga Jezu. Pakumalizira pace, akuluwo adapereka malango ya momwe banjali lingadambacitira kunamata ninga banja na wana wawo awiri. (Wayefezo 5:21-29) Mwamunayo adacita nyongo kuti akhale msolo wabwino wa banja. Akuluwo adamuuza kuti apitirize kuteweza malangoyo na kukhulupira mzimu wa Yahova. Lufoyi na kudeka mtima kwa akuluwo bzidacitisa kuti ceza ca banja lire ciwonekere!

20. Kodi n’ciyani comwe cingacitike tikambawonesa ceza cathu?

²⁰ Nyakunemba bukhu la psalymo adati: ‘An’kondwa ni ali-wense omwe ambagopa Yahova na omwe ambafamba m’njira zace.’ (Psalymo 128:1) Imwepo mun’dzakondwa kwene-kwene mukambawonesa ceza canu. Tenepo, mbapfunzisani winango bza Mulungu, citani bzense bzomwe mungakwanise kuti muthandize banja lanu pabodzi na gwere kukhala lakuphatana, ndipo pitirizani kukhala tceru. Dziwani kuti wanthu winango akawona ciratizo canu cabwino an’dzafika pakutumbiza Baba wathu, Yahova.—Mateu 5:16.