NFUNDO ZA M’BIBLIYA: ‘Pitirizani kupirirana na kulekererana na mtima wense napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wense, imwepo mucitembo tenepoyo.’—Wakoloso 3:13.

Kodi bzimwebzi bzimbathandauza ciyani? M’Bibliya, pikado imbandendemezedwa na mangawa ndipo kukhululukira kumbandendemezedwa na kulekerere munthu wamangawa. (Luka 11:4) Bukhu linango limbalewa kuti m’Bzinembo, fala lakusandulizidwa lakuti ‘kukhululukidwa’ n’cigerego limbathandauza ‘kulekerera mangawa mwa kuleka kusunda pomwe mangawaya.’ Tenepo, tikafuna kukhululukira munthu omwe watiphonyera, timbalekerera bzinthu bziri bzense bzakufunika bzomwe watiphonyerabzo. Kufuna kwathu kukhululukira kumbathandauza lini kuti takomedwa na khalidwe lakuipalo ayai tacepesa bzakuipa bomwe aticitira. Kusiyana na bzimwebzi, timbandosankhula kuleka kukoya ca mumtima, napo kuti bzingakhale “bzikunesa kuti tibzicoseretu.”

Kodi bzimwebzi mpsakuthandiza nsiku zino? Ninga wanthu wakuperewera, tinsenefe tina pikado. (Waroma 3:23) Na tenepo, mpswanzeru kulekerere winango, napo nsiku ziwande ayai zicepe tin’funika kulekerera winango. Tenepo, tikambakhululuka, timbagumana phindu. Kodi tingacite tani bzimwebzo?

Tikambakhala wakukalipa ticikoya bza mumtima—ndipo tikaleka kukhululuka—timbabzipweteka tekha. Ndipo bzimwebzi bzingaticitise kuleka kukhala wakukondwa, kucepesa moyo wanthu na kusaya mtendere. Bzingacitise pomwe kukhala na mabvuto makulu mu mtima. Nkhani inango yomwe idafotokozedwa mu Jornal ya American College of Cardiology, na Dotolo Yoichi Chida pabodzi na mpfunzisi wa omwe ambawona bza makumbukidwe ya wanthu wakucemeredwa Andrew Steptoe idati: “Bzakutewera bzatsapano bzinkulatiza kuti matenda makulu yomwe yankuwoneka yankuyambisidwa na ukali pabodzi na kuwengana.”

Ku mbali inango yabwino, kukhululukira kumbabweresa bzisimo. Tikambalekerera anzathu na mtima wense, timbakhazikisa ciphatano na mtendere, timbakhotcerera pomwe mbvereno wathu. Kuposa bzimwebzi, timbalatiza kuti timbatewezera Mulungu, omwe ambakhululuka na mtima wense anyakuphonya womwe ambakungula ndipo ambadikhira kuti ifembo ticitembo bzibodzi-bodzi.—Marko 11:25; Wayefezo 4:32; 5:1.