Kodi Mukukumbukira?
Kodi mungakwanise kutawira mibvunzo yakutewerayi, mwakuphatisa basa nkhani za mu Nsanza za Mulindiri za 2019?
Kodi mafala ya Yahova yakuti: ‘Cifuzo ciri-cense comwe cidakonzedwa kuti cikudzonge, cin’dzakunda lini’ yambathandauza ciyani? (Zaiya 54:17)
Ifepano tina citsimikizo centse cakuti Yahova an’dzatikhotcerera ku mphanvu zakudzonga ayai kwa ‘wanthu waciwembo.’ (Zaiya 25:4, 5) Anyamadulanthaka wathu an’dzakwanisa lini kutikunda, thangwe Yahova an’dzatikhotcerera pa cinthu ciri-centse comwe iwo angaphatise basa kuti atidzonge naco.—w19.01, matsa. 6-7.
Kodi Mulungu adalatiza tani kuti ngwakulungama na momwe akhacitirira bzinthu na Akanani na Ajirayeri wakupanduka?
Yahova adapereka cirango kuna wale omwe akhalimbikisa kugonana kwakusaya kubvumizika ayai omwe akhazunza akazi na wana. Koma iye adasimba wale omwe akhamubvera na omwe akhacitira winango bzinthu mwacirungamo.—w19.02, matsa. 22-23.
Kodi tin’funika kucita ciyani munthu omwe ni Mboni lini ya Yahova akacita mpembo ife tiri pamwepo?
Tin’funika kunyamala ndipo tikhale wa ulemu. Ndipo kuphampha kwa mpemboyo tin’funika lini kulewa ‘ameni,’ ne kuphatana manja na wanthu winango pomwe mpemboyo ukucitidwa. Ndipo pomwe iwo ankucita mpembo wawoyo, ifepano tin’funika kucitambo wathu na mu mtima.—w19.03, tsa. 31.
Thangwe ranyi kupswitha mwana ni pikado ikulu?
Kupswitha mwana ni pikado yomwe imbakhala kuphonyera nyakupswithidwayo, gwere, boma na Mulungu kubodzi. Ndipo m’madziko yomwe yana lamulo lakuti munthu akadziwa kuti mwana wapswithidwa ambakalewe ku boma, akulu wa gwere ambabvera lamuloli.—w19.05, matsa. 9-10.
Kodi mungacite tani kuti mucinje ayai mukonzese makumbukidwe yanu?
Bzomwe mungacite ni ibzi: Mbacezani na Yahova mu mpembo, mbakumbukirani momwe imwepo muliri, ndipo mbasankhulani axamwali wanu mwanzeru.—w19.06, tsa. 11.
Kodi tingakonzekere tani mazunzo?
Tin’funika kulimbisa uxamwali bwathu na Yahova. Tin’funika kukhulupira kuti iye ambatifuna ndipo an’dzatisiya lini, timbawerenge Bibliya ntsiku zentse, timbapembe kwa iye kawiri-kawiri, timbatsimikize na mtima wentse kuti bzomwe Mulungu adalewa bzin’dzakwanisika, ndipo timbakoye mu msolo mavesi yomwe timbakomedwa nayo na nyimbo zomwe zimbatuza Yahova.—w19.07, matsa. 2-4.
Kodi tingathandize tani adzinza wathu kuti adzapulumuke?
Mpsakufunika kuti timbabvere ntsisi, timbabvume kuti bzicito bzathu bzimbapereke umboni bwabwino, kukhala wakupirira na wakudeka mtima.—w19.08, matsa. 15-17.
Kodi timbatsangalazidwa tani, mwakubverana na mafala yomwe Jezu adayafotokoza pa Mateu 11:28?
Ifepano tina anyakunyang’anira wa lufoyi, axamwali wabwino na basa labwino.—w19.09, tsa. 23.
Kodi Yahova angatipase tani cikhumbo na mphanvu yakucita bzinthu? (Wafiripo 2:13)
Tikambawerenga Bibliya na kumbakumbukira bzomwe timbawerengabzo, Mulungu angatipase cikhumbo na mphanvu yakucita bzinthu. Ndipo mzimu wace wakucena ungatithandize kuthimizira luso lathu.—w19.10, tsa. 21.
Kodi tin’funika kucita ciyani tikanati kucita cakusankhula cakufunika kwene-kwene?
Pana bzinthu bzixanu ibzi: Mbafufudzani mwakukwanira, mbakumbirani nzeru Yahova, mbapendani bzomwe bzimbakucitisani kucita cakusankhula, mbalatizani kuti muna bzakulinga ndipo mbacitani bzomwe mungakwanise.—w19.11, matsa. 27-29.
Kodi Sathani adauza Eva kuti moyo umbafa lini?
Bzikuwoneka kuti ne. Sathani adalewa kuti Eva angadafa, sikuti angadakhala ninga kuti wafa. Palibe ne nzeru ibodzi yomwe idapulumuka pa Cigumula ca Madzi. Bzikuwoneka kuti nzeru yakuti moyo umbafa lini, idayambika Mulungu akanati kumwaza wanthu omwe akhamanga Nsanza ya Babeli.—w19.12, tsa. 15.