KODI imwepo mumbabziwona kuti ndimwe munthu wakudziwa kutenda? Tentsenefe tin’funika kukumbukira bza mbvunzoyu. Bibliya likhadafotokoza kale kuti mu nthawe zathu zino, wanthu azinji angadadzakhala ‘wakusaya kutenda.’ (2 Timotio 3:2) Pinango imwepo mumbadziwa wanthu omwe ambandofuna kuti winango awacitire ayai awapase bzinthu. Iwo ambawona kuti an’themera kucitiridwa bzinthu bzimwebzi, koma kutenda ambakhala alibe nako basa. Palibe omwe angafune kucita tsantsa na wanthu ninga amwewa, ndibzo lini?

Mwakusiyana na wanthu amwewa, atumiki wa Yahova ambauzidwa kuti: ‘[ambalatize] kutenda.’ Tenepo, ifepano tin’funika kumbatenda ‘pa cinthu ciri-cense.’ (Wakoloso 3:15; 1 Watesalonika 5:18) Kulewa cadidi, pana mathangwe mazinji yakulatiza kuti kutenda n’kwakufunika kwene-kwene pa moyo wathu.

Thangwe libodzi lomwe limbaticitisa kumbatenda nthawe zentse, ndakuti kutendako kumbaticitisa kukhala na moyo wabwino. Munthu omwe ambatenda ambabzibva bwino, ndipo nyakutendedwa ambakhala wakukondwa. Thangwe ranyi kutenda kumbabweresa cikondweso kuna nyakutenda na nyakutendedwa? Kumbukirani ibzi: Munthu akakucitirani cinthu cinango, ndiye kuti ambakulemekezani, ndibzo lini? Ndipo bzimwebzi bzimbalatiza kuti iye ambakufunani. Tenepo, mukazindikira thupo lacero imwepo mumbakhala wakukondwa kwene-kwene. Bzimwebzi ndibzo bzomwe bzidacitikira Rute. Pomwe Bowazi adathandiza Rute mwa kumupasa bzinthu, Ruteyo adakomedwe kwene-kwene pomwe adadziwa kuti akucitiridwa thupo.—Rute 2:10-13.

Cinthu cinango cakufunika kwene-kwene n’cakuti timbatende Mulungu. Mwakusaya kupenukira, nthawe na nthawe imwepo mumbakumbukira bzinthu bzabwino bzomwe Mulungu adakupasani ndipo akupitiriza kukupasani. (Bzakutonga 8:17, 18; Mabasa 14:17) Tsono m’mbuto mwakukumbukira kudeka mtima kwa Mulungu mwakuthamanga, tani kupambula nthawe kuti mukumbukire bzisimbo bzizinji bzomwe imwepo na wanthu omwe mumbawafuna mudabzitambira kale? Kukumbukira bza khalidwe la kupasa lomwe Mulengi wanu analo, kun’dzakucitisani kuti mumutende, ndipo cikhulupiro cakuti iye ambakufunani cin’dzathimizirika.—1 Juwau 4:9.

Koma lekani kundombakumbukira bza kupasa kwa Mulungu, na bzisimbo bzomwe iye ambapereka. Tin’funika kumbakumbukira bzomwe Yahova ambatipasa na kumutenda thangwe ra kudeka mtima kwace. (Psalymo 100:4, 5) Munembi winango wa nkhani, adalewa kuti: “Kutenda kumbacitisa wanthu kukhala wakukondwa.”

Thangwe linango lomwe limbaticitisa kukhala wakutenda ndakuti kutendako kumbalimbisa uxamwali bwathu. Tentsenefe timbafuna kubzibva kuti ndife wakulemekezedwa. Tenepo, mukambatenda munthu omwe wakucitirani cinthu cinango, uxamwali bwanu na munthuyo bumbakhala bwakulimba kwene-kwene. (Waroma 16:3, 4) Kuthimizira bzimwebzi, kumbacitisa wanthu wakutenda kuthandizambo winango. Ndipo iwo ambazindikira winango akawadekera mtima, ndipo ambabzibva kuti an’funika kucitambo bzibodzi-bodzibzo. Kulewa cadidi, kuthandiza winango kumbabweresa cikondweso. Ndipopa Jezu adalewa kuti: ‘Kupasa kumbabweresa cikondweso cikulu kuposa kutambira.’—Mabasa 20:35.

Robert Emmons, omwe ni mkulu wakunyang’anira bza mapfunziro yakulewa bza kutenda, ku Califórnia, adalewa kuti: “Ifepano kuti tikhale wakutenda tin’funika kubvesesa kuti munthu ali-wentse ambathemba mwanzace. Nthawe zinango  timbatambira ndipo nthawe zinango timbapasambo winango.” Nfundo njakuti: Ifepano kuti tipitirize kukhala na moyo wakukondwa, kawiri-kawiri timbafunikira thandizo la winango. Mwa ciratizo, iwo angatipase cakudya ayai thandizo la mankhwala tikaduwala. (1 Wakolinto 12:21) Munthu wakutenda ambalatiza kutendako pa bzomwe winango ambamucitira. Pakuti bziri tenepo, bzibvunzeni kuti: ‘Kodi inepano nimbatenda winango akandicitira cinthu?’

Thangwe linango lomwe limbaticitisa kukhala wakutenda ndakuti kutendako kumbatithandiza kuikha makumbukidwe yathu pa bzinthu bzabwino, sikuti bzakuipa. Kulewa kwinango, makumbukidwe yathu yambakhala ninga sefa. Iyo yambatithandiza kuikha makumbukidwe yathu pa bzinthu bzabwino sikuti bzakuipa. Munthu wakutenda ambaikha makumbukidwe yace pa bzinthu bzabwino sikuti kundombakumbukira mabvuto yokha-yokha. Tenepo, mukambatenda mun’dzawona bzinthu bzabwino, ndipo kutenda kwanu kun’dzathimizirika. Mukaikha makumbukidwe yanu pa bzinthu bzabwino, mun’dzateweza malango ya mpostolo Paulo yakuti: ‘Mbakondwani nthawe zentse mwa Mbuya.’—Wafiripo 4:4.

Imwepo mun’dzabvesesa kuti kutenda kumbatithandiza kutcenkha kukhala na makumbukidwe yakuipa. Mpsakunesa munthu kukhala wakutenda, ndipo pa nthawe ibodzi-bodziyo, kukhala wa njiru, wakusunama ayai kukoyera mwanzace bzinthu mu mtima. Kodi ndibzo lini? Kuthimizira bzimwebzi, kawiri-kawiri wanthu omwe ambatenda ni wale omwe adasauka. Iwo ambawona bzomwe anabzo kukhala bzakukwanira ndipo ambatsungira lini kukhala na bzinthu bzizinji.—Wafiripo 4:12.

Ninga Mkristau, imwepo mumbadziwa kuti Sathani an’funa kukuwonani wakusunama thangwe ra mabvuto yomwe yakucitika ntsiku zakumalizira zino. Iye angakomedwe kwene-kwene kukuwonani kukhala na makumbukidwe yakuipa na kumbadandaula na bzinthu bziri bzentse. Mukakhala na makumbukidwe yamweya, bzin’dzakhala bzakunesa kwene-kwene wanthu kukutetekerani mukambawapalizira bzipsa bzabwino. Cadidi n’cakuti, kutenda kumbabverana na makhalidwe ya mzimu wa Mulungu, ninga cikondweso na cikhulupiro. Mwa ciratizo, ifepano timbakhala wakukondwa na bzinthu bzabwino bzomwe Mulungu ambatipasa ndipo timbakhulupira kuti kutsogolo iye an’dzaticitira bzomwe ambatiuza.—Wagalata 5:22, 23.

Thangwe ra kucita mbali ya anamati wa Yahova, mwakusaya kupenukira mukutawiriza nkhani yakutenda yomwe yafotokozedwa mu nkhani ino. Napo bziri tenepo, mpsakunesa kukhala wakutenda na wamakumbukidwe yabwino nthawe zentse. Koma lekani kubvuma kuti bzimwebzi bzikusunamiseni. Imwepo mungakhale munthu wakutenda. Mwa njira iponi? Ntsiku iri-yentse, mbapambulani nthawe kuti mumbakumbukire bzinthu bzabwino bzomwe bzingakucitiseni kukhala wakutenda. Mukacita bzimwebzi, bzin’dzakhala bzakusaya kunesa kukhala wakutenda, ndipo mun’dzakhala wakukondwa kwene-kwene kuposa wale omwe ambandokumbukira mabvuto ya moyo wawo. Kumbukirani bzinthu bzabwino bzomwe Mulungu na wanthu winango ambakucitirani kuti akutsangalazeni na kukulimbisani. Bzingakhale bwino kumbanemba pa ntsiku iri-yentse bzinthu bziwiri ayai bzitatu bzomwe bzakucitikirani bzakulatiza kuti mukutenda.

Wanthu omwe adapfunza bza nkhaniyi, ambalewa kuti kukhala na cizolowezi ca kutenda kungacinje momwe ulupi bwathu bumbaphatira basa, ndipo kungaticitise kukhala na makumbukidwe yabwino. Munthu wakutenda ambakhala wakukondwa kwene-kwene. Ndipopa, mbakumbukirani bzisimbo bzomwe mumbatambira, mbalokoterani bzinthu bzabwino bzomwe bzimbakucitikirani pa moyo wanu, ndipo mbatendani nthawe zentse! Ndipo lekani kumbandokumbukira kuti mun’themera bzinthu bzabwino bzokha-bzokha pa moyo wanu, mbatendani Yahova, thangwe iye ngwabwino ndipo mbamutendani ‘pa cinthu ciri-centse.’—1 Nkhani 16:34; 1 Watesalonika 5:18.