KODI PANA bzinthu bzomwe mukhafuna kucita m’gwere mwanu koma tsapano mun’kwanisa lini? Pinango bungakhale udindo bomwe m’bale munango anabo, ayai bomwe mukhanabo kale-kale. Pinango mudasiya udindobo thangwe ra kukalamba, matenda, kusaya kobiri, ayai thangwe ra kufuna kusamalira wanthu wa m’banja mwanu, ayai thangwe ra kucinja kwa bzinthu m’gulu lathu. Bziribe basa thangwe lomwe mudasiyira udindobo, imwepo mungawone kuti mukucita lini bzense bzomwe mukhafuna kucita pakutumikira Mulungu. Ndipo nthawe zinango, kukumbukira bzimwebzi kungakusunamiseni. Penu ndibzo bzikukucitikirani, kodi n’ciyani comwe mungacite kuti makumbukidwe yakuipaya yaleke kukula mu mtima mwanu? Kodi mungacite ciyani kuti muleke kuluza cikondweso canu?

Tingapfunze bzizinji na ciratizo ca Juwau Batista. Iye adakhala na maudindo mazinji pakutumikira Yahova, ndipo akhadziwa lini bzomwe bzingadamucitikira pa moyo wace. Koma moyo wace udacinja mu njira yomwe iye akhaidikhirika lini. Juwau adamala gole ankupalizira bza kubwera kwa Jezu, ndipo adakhala m’kawoko pafupi-fupi gole libodzi. Tsono bzimwebzi bziribe kumuluzisa cikondweso cace, iye adapitiriza kukhala wakukondwa mpaka kuphampha kwa utumiki bwace. Kodi n’ciyani comwe cidamuthandiza? Tsono n’ciyani comwe ifepano tingacite kuti tirike kudzaluza cikondweso bzinthu bzikadzacinja pa moyo wathu?

Mu gole la 29, pomwe Jezu akhali pano pa dziko la pansi, Juwau adayamba kucita basa lomwe akhadapasidwa na Yahova, ndipo basalo likhali lakukonzekeresa wanthu bza kubwera kwa Mesiya. Iye akhauza wanthuwo kuti: ‘Kungulani, pakuti Umambo bwakudzulu bwafendera.’ (Mateu 3:2; Luka 1:12-17) Wanthu azinji adakomedwa nayo mafalaya. Winango akhacokera kutali kuti adzabve mafala ya Juwau, ndipo azinji adakungula pikado zawo acibatizidwa. Iye adakhwimika pomwe adatsimula atsogoleri wa bzipembedzo omwe akhabziwona kuti mbakulungama, ndipo adawacenjeza kuti angadasaya cinja angadayeruzidwa. (Mateu 3:5-12) Ndipo cinthu cakufunika kwene-kwene comwe Juwau adacita mu utumiki bwace, ni kubatiza Jezu mu Outubro, gole la 29. Kuyambira nthawe imweire, Juwau akhauza wanthu kuti atewere Jezu, omwe akhali Mesiya wakupiciridwa.—Juwau 1:32-37.

Basa lomwe Juwau Batista adacita likhali lakupambulika kwene-kwene. Ndipopa Jezu adalewa kuti: ‘Pa wense omwe adacita kubadwa palibe munango omwe ni mkulu kuposa Juwau Batista.’ (Mateu 11:11) Tinkupenukira lini kuti Juwau adakomedwa kwene-kwene na bzisimbo bzomwe adatambira. Ninga Juwau, abale azinji nsiku  zino ambatambira bzisimbo bzizinji na Yahova. Ciratizo pa nkhaniyi, ni m’bale wakucemeredwa Terry. Iye pabodzi na mkazi wace, Sandra, akucita utumiki bwa nthawe zense kupitirira magole 50. Terry adati: “Inepano ndidatumikira ninga, mpainiya, pa Beteli, mpainiya wakupambulika, nyakunyang’anira dera, nyakuyang’anira cigawo, ndipo tsapano ndikutumikira ninga mpainiya wakupambulika.” Kulewa cadidi, kucita mabasa yakusiyana-siyana mu gulu la Yahova kumbabweresa cikondweso cikulu, koma ninga ciratizo ca Juwau Batista cikulatizira, tin’funika kumbacita nyongo kuti tipitirize kukhala wakukondwa bzinthu bzakucinja pa moyo wathu.

Comwe cidacitisa Juwau Batista kuleka kuluza cikondweso cace ni kupitiriza kutenda utumiki bomwe akhanabo. Mwa ciratizo, pomwe Jezu adabatizidwa, utumiki bwa Juwau budayamba kucepa, koma utumiki bwa Jezu budayamba kuthumizirika. Pomwe anyakupfunza wa Juwau adawona bzimwebzi adacita thupo kwene-kwene, tenepo adafenderera Juwau acimuuza kuti: ‘Onani, munthu omwe mukhamucitira umboni ule, akubatiza wanthu ndipo wense akuyenda kwa iye.’ (Juwau 3:26) Tsono Juwau adawatawira kuti: ‘Omwe ana namwali wacikazi ni namwali wacimuna. Koma xamwali wa namwali wacimuna akakhala ali pafupi, acibva fala la namwali wacimunayo, ambakomedwa kwene-kwene. Ndipopa cikondweso cangu cakuladi.’ (Juwau 3:29) Juwau akhabzindendemezera lini na Jezu, ndipo alibe kukhala na makumbukidwe yakuti utumiki bwace bukhacepa mphanvu thangwe rakuti utumiki bwa Jezu bukhathumizirika. M’mbuto mwace, Juwau adapitiriza kukhala wakukondwa thangwe ra kutenda mwayi omwe akhanawo wakukhala ‘xamwali wa namwali wacimuna.’

Makumbukidwe yabwino yomwe Juwau akhanayo, yadamuthandiza kupitiriza kukhala wakukondwa napo kuti akhagumana na mazunzo mu utumiki bwace. Mwa ciratizo, Juwau akhali m’nazireu kuyambira pomwe adabadwa, ndipopa akhamwa lini vinyu. (Luka 1:15) Jezu adalewa kuti Juwau akhana moyo wa wakusaya kufuna bzizinji, mwa kulewa kuti: ‘Juwau adabwera, ndipo akhadya lini ne kumwa.’ Koma Jezu pabodzi na anyakupfunza wace akhana moyo wakusiyana na wa Juwau. (Mateu 11:18, 19) Kusiyana kwinango n’kwakuti, Juwau alibe kucita bzakudabwisa. Koma iye akhadziwa kuti anyakupfunza wa Jezu, kuphatanidzambo winango omwe akhali anyakupfunza wa Juwauyo angadadzatambira mphanvu yakucitira bzakudabwisa. (Mateu 10:1; Juwau 10:41) Iye alibe kubvuma kuti kusiyanako kumucitise kuwona kuti basa lace likhali lakusaya kufunika, m’mbuto mwace, adapitiriza kucita basa lomwe Yahova adamupasa.

Bzimwebzi bzikutipfunzisa nfundo yakuti: Tikambawona bzomwe tikucita nsiku zino kukhala bzakufunika, tin’dzapitiriza kukhala wakukondwa. Terry omwe wafotokozedwa pakuyamba ule, adalewa kuti: “Inepano ndikhatenda basa liri-lense lomwe ndikhapasidwa.” Akakumbukira bza basa lomwe ambacita mu utumiki bwa nthawe zense, iye ambalewa kuti: “Ndimbadandaula lini kuti ndidataya nthawe yangu papezi, koma ndimbandokumbukira bzinthu bzabwino bzokha-bzokha.”

Ifepano tingakhale wakukondwa kwene-kwene tikambakumbukira bzomwe bzimbacitisa basa ayai udindo kukhala bwakufunika. Ni mwayi ukulu kukhala ‘anyabasa anzace wa Mulungu.’ (1 Wakolinto 3:9) Combo cakufunika cimbapitiriza kukhala cakudeka cikambasamalidwa bwino, mpsibodzi-bodzi na ifepano, tingapitirize kukhala wakukondwa tikambakumbukira mwayi omwe tinawo wakuphata basa pabodzi na Yahova. Tin’funika lini kumbandendemezera basa lomwe timbacita na lomwe winango ambacita. Ndipo tin’funikambo lini kumbawona basa lomwe Yahova ambatipasa kukhala lakusaya kufunika pakundendemerezera na lomwe winango akucita.—Wagalata 6:4.

Juwau Batista pinango akhadziwa kuti basa lace lingadakhalisa lini, koma akhadziwa lini kuti pangadatenga nthawe zingasi kuti bzimwebzi bzicitike. (Juwau 3:30) Mu gole la 30, pomwe pakhadapita minyezi mitanthatu Jezu atabatizidwa, mambo Herode adatonga kuti Juwau aikhidwe m’kawoko. Koma iye adapitiriza kupalizira napo akhali m’kawokomo. (Marko 6:17-20) Kodi n’ciyani cidathandiza Juwau kupitiriza kukhala wakukondwa napo bzinthu bzikhadacinja pa moyo wace? Iye adaikha pa mbuto yakuyamba bzinthu bzomwe mpsakufunika kwa Yahova.

Pomwe Juwau akhala m’kawoko, iye adabva bzinthu bzomwe Jezu akhacita. (Mateu 11:2; Luka 7:18) Juwau akhapenukira lini kuti Jezu akhali Mesiya, koma pinango iye akhafuna kudziwa momwe Jezuyo angadakwanirisira bzinthu bzense bzomwe bzinembo bzikhalewa kuti Mesiya angadakwanirisa. Ndipo pinango  akhabzibvunza kuti: Pakuti Mesiya angadakhala mambo, kodi iye angadayamba kutonga nthawe imweireletu? Kodi Jezu angadamucosa m’kawokomo? Kuti abvesese bwino bzomwe Jezu angadacita, Juwau adatumiza anyakupfunza wace awiri kuti akabvunze Jezuyo kuti: ‘Kodi Mbuya omwe tinkumudikhirira ndimwepo ayai tidikhirire munango?’ (Luka 7:19) Pomwe anyakupfunzawo adabwerera, Juwau adakhala tceru kuti abvesese bzakudabwisa bzomwe Jezu adacita na mafala yomwe Jezuyo adauza anyakupfunzawo kuti akauze Juwauyo, iwo adati: ‘Azimola tsapano akuwona, anyakupunduka akufamba, anyamapere akucenesedwa, ankhuthu akubva, anyakufa akulamusidwa ndipo anyakusauka akuuzidwa bzipsa bzabwino.’—Luka 7:20-22.

Juwau adalimbisidwa kwene-kwene na bzomwe adauzidwa na anyakupfunza wace. Ndipo bzidamutsimikizirisa kuti Jezu akhakwanirisa mapolofesiya yakulewa bza Mesiya. Juwau akhadziwa kuti basa lace likhayenda lini papezi, napo Jezu alibe kukamucosa m’kawoko. Napo bzinthu bzidancinja pa moyo wace, iye adapitiriza kukhala wakukondwa.

Ninga Juwau Batista, ifepano tikaikha pa mbuto yakuyamba bzinthu bzakufunika kwa Yahova, tin’dzapitiriza kukhala wakukondwa na wakupirira. (Wakoloso 1:9-11) Kuti tikwanise kupirira, tin’funika kumbawerenga Bibliya na kumbakumbukira bzomwe timbawerengabzo. Kucita bzimwebzi, kun’dzatithandiza kuwona kuti nyongo yomwe timbacita pakutumikira Mulungu inkuyenda lini papezi. (1 Wakolinto 15:58) Sandra adalewa kuti: “Cinthu comwe cimbandithandiza kupitiriza kukhala pa uxamwali na Yahova ni kuwerenga nsiku zense kapitulo ibodzi ya m’Bibliya. Bzimwebzi bzimbandithandiza kuikha pa mbuto yakuyamba bzinthu bza Yahova sikuti bzangu.” Tin’funikambo kumbaikha pa mbuto yakuyamba bzinthu bzomwe abale na mpfumakazi zathu ambacita pa basa la Yahova, bzimwebzi bzin’dzatithandiza kuleka kumbabzikumbukira tekha, koma kumbakumbukira bzinthu bzomwe Yahova akucita mwakuphatisa basa gulu lace. Sandra adalewa pomwe kuti: “Programa zomwe zimbacosedwa pa mwezi uli-wense pa JW Broadcasting zimbatithandiza kukhala pafupi na gulu la Yahova, ndipo zimbatithandizambo kupitiriza kukhala wakukondwa pa basa lathu.”

Mu nthawe yakucepa yomwe Juwau Batista adapalizira, iye adapalizira mwa ‘mphanvu ninga Eliya,’ ndipo ninga Eliya, Juwau ‘akhali munthu ninga ifepano.’ (Luka 1:17; Tiyago 5:17) Ifepano tikambatenda basa lathu ninga momwe Juwau adacitira na kupitiriza kuikha pa mbuto yakuyamba kukumikira Yahova, tin’dzakhala wakukondwa mu utumiki bwa Yahova, bziribe basa bzomwe bzingadzacitike pa moyo wathu.