DIANA omwe ana magole yakupitirira 80 adabonera kwene-kwene m’magole ya m’mbuyomu. Bayace omwe akhaduwala matenda manango, (Alzheimer) adadzafera ku nyumba yakukoyera mkhalamba. Wana wace awiri adadzafambo, ndipo iye adaphatidwa na kankro ya m’masuku. Napo bziri tenepo, abale na mpfumakazi ambawona kuti Diana ambafika nthawe zense pa mitsonkhano na mu utumiki bwakumunda wakukondwa.

John adatumikira ninga nyakunyang’anira era kwa magole yakupitirira 43. Ndipo palibe basa linango lomwe likhamudekera kuposa utumiki bomwe akhacita. Koma iye adadzasiya kutumikira ninga nyakunyang’anira dera kuti akasamalire wacibale wace omwe akhaduwala. Ndipo abale na mpfumakazi omwe akhamudziwa, akagumana naye pa mtsonkhano wa cigawo na wadera, akhawona kuti iye alibe kucinja na pang’onopo. Iye nthawe zense akhakhala wakukondwa.

Kodi n’ciyani cidathandiza Diana na John kukhala wakukondwa? Kodi munthu omwe ankubonera angakhale tani wakukondwa? Kodi munthu angakhale tani wakukondwa akasiya kuphata basa lomwe ambalifuna? Bibliya limbatawira kuti: ‘Nyakulungama an’dzakondwa mwa Yahova.’ (Psalymo 64:10) Kuti tibvesese nfundo imweyi cakuyamba tin’funika kudziwa bzomwe bzingatipase cikondweso cakusaya kumala na bzomwe bzingatipase lini cikondweso.

Pana bzinthu bzizinji bzomwe bzimbabweresa cikondweso nthawe zense. Mwa ciratizo, kumbukirani bza wanthu omwe ambafunana akacita malowozi. Kumbukirani bza munthu omwe wakhala m’bereki ayai omwe watambira udindo bupsa m’gulu la Yahova. Bzinthu bzimwebzi bzimbatikondwesa thangwe ni mphaso za Yahova. Ndiye adacita makonzedwe ya malowozi, adatipasa mphanvu yakuti tikhale na wana na basa lomwe timbacita m’gulu lace.—Ciyambo 2:18, 22; Psalymo 127:3; 1 Timotio 3:1.

Koma bzinthu bzinango bzomwe bzimbatikondwesa bzimbakhala bza kanthawe kakucepa. Pinango mwanzathu wa m’banja angakhale wakusaya kukhulupirika ayai angafe. (Zakiyeri 24:18; Ozeya 3:1) Wana angaleke kubvera abereki wawo pabodzi na Mulungu, ndipo pinango angafike pa  kucosedwa m’gwere. Mwa ciratizo, wana wa Samuyeri alibe kutumikira Yahova pa moyo wawo wense, ndipo Davide adagumana na mabvuto mazinji pa banja lace thangwe ra pikado yomwe adacita na Bateseba. (1 Samuweri 8:1-3; 2 Samuweri 12:11) Bzinthu bzimwebzi bzikacitika, pambakhala palibe cikondweso koma msunamo na thupo.

Mpsibodzi-bodzimbo na ifepano, nthawe zinango tingaime kutumikira m’gulu la Yahova thangwe ra kuduwala ayai kufuna kusamalira wacibale wathu, ayai thangwe ra kucinja kwa bzinthu m’gululi. Ndipo azinji omwe adasiya utumiki bwawo, ambalewa kuti ambasuwa kwene-kwene cikondweso comwe akhanaco pakuyamba.

Bzimwebzi bzikulatiza kuti bzinthu bzomwe bzimbatikondwesa bzimbakhalisa lini. Penu bziri tenepo, kodi ciripo cinthu comwe cingatikondwese napo tikagumana na mabvuto pa moyo wathu? Inde ciripo, thangwe Samuyeri, Davide na wanthu winango alibe kuluza cikondweso cawo napo adagumana na mabvuto pa moyo wawo.

Jezu akhadziwa kuti cikondweso n’ciyani. Bibliya limbatiuza kuti iye akanati kubwera pano pa dziko la pansi, akhakondwa ‘pa maso pa [Yahova] nthawe zensene.’ (Mimwani 8:30) Koma pomwe adabwera pano pa dziko la pansi, nthawe zense akhagumana na mabvuto yakusiyana-siyana. Napo bzikhali tenepo, Jezu adakhala wakukondwa thangwe ra kucita kufuna kwa Baba wace. (Juwau 4:34) Tsono tani bza kuwawidwa komwe adabva pa nthawe yakumalizira ya moyo wace, pano dziko la pansi? Bibliya limbalewa kuti: ‘Thangwe ra cikondweso comwe adamuikhira patsogolo pace, iye adapirira pa muti wakuzunzikira.’ (Wahebereu 12:2) Tenepo, na bzomwe Jezu adalewa pa nkhani ya cikondweso caico tin’pfunza bzinthu bziwiri bzakufunika kwene-kwene.

Nsiku inango, anyakupfunza wa Jezu wakukwana 70 adabwerera kwa iye pambuyo pa kupalizira. Iwo akhadakomedwa kwene-kwene thangwe ra bzomwe adacita, kuphatanidza kucosa mizimu. Koma Jezu adawauza kuti: ‘Lekani kukondwa thangwe rakuti mizimu yakubverani, koma kondwani thangwe rakuti madzina yanu yanembedwa kudzulu.’ (Luka 10:1-9, 17, 20) Kulewa cadidi, kubvumidwa na Yahova ni cinthu cakufunika kwene-kwene ndipo kumbabweresa cikondweso cikulu kuposa utumiki buli-bwense bomwe tingakhale nabo.

Pa nthawe inango, pomwe Jezu akhalewalewa na thimu la wanthu, mkazi munango wacijuda adadabwa kwene-kwene na bzomwe Jezuyo akhapfunzisa, ndipo adalewa kuti mai wace akhakomedwa  naye kwene-kwene. Koma Jezu adamutawira kuti: ‘Nee, koma omwe an’kondwa ni wale omwe ambabva fala la Mulungu, acirisunga!’ (Luka 11:27, 28) Kukhala na wana kungatikondwese. Tsono comwe cingatipase cikondweso cakusaya kumala ni kubvera na kukhala pa uxamwali bwakulimba na Yahova.

Kucita bzimwebzi kumbatikondwesa kwene-kwene thangwe timbadziwa kuti Yahova ankukomedwa nafe. Napo tikagumana na mayezo yakunesa, yangakwanise lini kuticosera cikondweso cathu. Kulewa cadidi, tikagumana na mayezo ticikhala wakukhulupirika, cikondweso cathu cimbathumizirika. (Waroma 5:3-5) Kuthumizira bzimwebzi, Yahova ambapasa mzimu wace wale omwe ambamukhulupira na kukondwa na mbali ya bzisapo bzace. (Wagalata 5:22) Bzimwebzi bzimbatithandiza kubvesesa thangwe race Psalymo 64:10 ambalewa kuti: ‘Nyakulungama an’dzakondwa mwa Yahova.’

Bzimwebzi bzikulatiza thangwe race Diana na John adapitiriza kukondwa napo adagumana na mabvuto yakusiyana-siyana. Diana adalewa kuti: “Ndidathawira kwa Yahova ninga momwe mwana ambacitira na abereki wace.” Iye adalewa pomwe kuti: “Ndimbawona kuti iye andisimba kwene-kwene mwa kundipasa mphanvu kuti ndipitirize kupalizira mwakukhazikika na mwakukondwa.” Kodi n’ciyani cidathandiza John kupitiriza kukondwa na kucita nyongo mu utumiki pambuyo pa kusiya kutumikira ninga nyakunyang’anira dera? Iye adalewa kuti: “Mu 1998 pomwe ndidaikhidwa ninga mpfunzisi wa Xikola Yakupfunzisa Utumiki, ndidapfunza bzizinji pa pfunziro langu la pandekha.” Iye adalewa kuti kucinja komwe adacita pabodzi na mkazace kukhali lini kwakunesa thangwe akhadakonzeka kucita bzense bzomwe Yahova angadawauza kuti acite. Iye adalewa pomwe kuti: “Ifepano tidacita bzimwebzi mwakusaya kudandaula.”

Wanthu azinji ambalewa kuti mafala ya pa Psalymo 64:10 njacadidi. Mwa ciratizo, onani bza banja linango lomwe lidatumikira pa Beteli ku Estados Unidos kwa magole pafupi-fupi 30. Na kupita kwa nthawe, iwo adauzidwa kuti akatumikire ninga apainiya wakupambulika. Iwo adalewa kuti: “Munthu ali-wense mwa cibadwa akaluza cinthu comwe akhacifuna ambakhala na thupo, koma thupo lace limbakhala lini la muyaya.” Ndipo pomwe adafika ku gawo, iwo adayamba kupalizira pabodzi na gwere la kumweko. Iwo adalewa kuti: “Tidakumbira bzinthu bzinango mu mpembo. Pomwe tidawona kuti mipembo yathu inkutawiridwa tidalimbisidwa ndipo tidakomedwa kwene-kwene. Pomwe tidafika, mwakusaya kucedwa abale winango m’gwere adayamba kukhala apainiya, ndipo tina mapfunziro mawiri ya Bibliya yomwe yankuyenda patsogolo mwauzimu.”

N’cadidi kuti bzimbakhala bzakunesa kukhala wakukondwa nthawe zense, mwakuti nthawe zinango tingasuname. Tsono Yahova ambatitsangalaza na mafala yomwe timbayagumana pa Psalymo 64:10. Napo tikataya mtima, tingakhale na citsimikizo cense cakuti tikapitiriza kukhala wakukhulupirika, bziribe basa mabvuto yomwe tingagumane nayo tin’dzakondwa ‘mwa Yahova.’ Tinkudikhirira na mtima wense nthawe yomwe Yahova an’dzakwanirisa piciro lakuti ‘ndinkulenga kudzulu kupsa na dziko lipsa,’ bzimwebzi bzin’dzacitikadi. Ndipo pa nthawe imweyo, wanthu wense an’dzakhala wakulungamiratu ndipo iwo an’dzakondwa na ‘kukomedwa’ thangwe ra bzense bzomwe Yahova an’dzawacitira.—Zaiya 65:17, 18.

Kumbukirani thandauzo la bzimwebzi. Ifepano tin’dzakhala na thanzi labwino ndipo nsiku zense tin’dzamuka na mphanvu zense. Bziribe basa msunamo omwe tikhanawo thangwe ra mabvuto yomwe tidagumana nayo, mabvutoyo yan’dzatisunamisa lini pomwe. Yahova ambatitsimikizira kuti ‘bzinthu bzakuyambirira bzin’dzakumbukiridwa lini pomwe, ne kubwerera mu mtima.’ Tin’dzatambira anyakufunidwa wathu omwe adafa, ndipo pa nthawe imweyo tin’dzabzibva ninga momwe adabvera abereki wa kamtsikana ka magole 12 yakubadwa komwe Jezu adakalamusa, mwakuti: ‘Wanthuwo adakondwa kwene-kwene.’ (Marko 5:42) Pa nthawe imweyo, munthu ali-wense pa dziko la pansi an’dzakhala wakulungamiratu ndipo an’dzakondwa ‘mwa Yahova’ kwa muyaya.