Nee, palibe ne Bibliya, ne mabukhu yakulewa bza moyo wa wanthu yomwe yambalewa kuti Akristau akhabatizidwira wanthu wakufa.

M’mabibliya mazinji, vesi limweri lidasanduliziridwa mwa njira yakuti limbacitisa wanthu azinji kukumbuka kuti nkhani ya kubatizidwira wanthu wakufa ikhacitikadi mu nthawe za Akristau wakuyambirira. Mwa ciratizo, ma Bibliya manango yadasandulizira vesi limweri kuti: “Penu palibe cilamuso, n’ciyani comwe an’dzacita wale omwe ambabatizidwira anyakufa.”

Tsapano mbatiwoneni mafala yomwe wanthu awiri omwe ambapfunza Bibliya adalewa. Doctor Gregory Lockwood adalewa kuti: “Nkhani yakuti wanthu akhabatizidwira wanthu omwe adafa kale, tingalewe kuti ni mtundu unango wa batismo omwe ukubverana lini na mbiri ya moyo wa wanthu ne nkhani za m’Bibliya.” Mwakubverana na bzimwebzi, Mpfunzisi Gordon D. Fee adalewambo kuti: “Palibe bukhu lakulewa bza moyo wa wanthu ne Bibliya lomwe limbalewa bza mtundu umweyi wa batismo. Nkhani imweyi iribe kunembedwa mu Novo Testamento, ndipo palibe umboni bwakulatiza kuti ikhacitika mu nthawe za Akristau wakuyambirira, ayai m’magereja yomwe yadadzakhazikisidwa pambuyo pa kufa kwa apostolo.”

Bibliya limbalewa kuti ateweri wa Jezu ‘akhapfunzisa wanthu wa mitundu yentse aciwabatiza . . . , na kuwapfunzisa kubvera bzinthu bzentse’ bzomwe iye adawauza. (Mateu 28:19, 20) Munthu akanati kubatizidwa, cakuyamba an’funika kupfunza bza Yahova na bza mwana wace Jezu, aciwabvera na kuwakhulupira. Munthu omwe adafa kale angacite lini bzimwebzi, ndipo Mkristau omwe ana moyo angacitire lini nyakufayo bzimwebzi.—Mpalizi 9:5, 10; Juwau 4:1; 1 Wakolinto 1:14-16.

Tsono, kodi Paulo akhafuna kulewa ciyani na mafalaya?

Wanthu winango wa ku Kolinto akhalewa kuti anyakufa an’dzalamusidwa lini. (1 Wakolinto 15:12) Tsono Paulo adawagaza wanthuwo. Iye adalewa kuti ntsiku zentse moyo wace ukhali pa ‘ngozi ya infa.’ Napo kuti bzikhali tenepo, iye akhatsimikiza kuti pambuyo pa kuphedwa, iye angadalamusidwa acikakhala kudzulu, ninga momwe bzidacitikira na Jezu.—1 Wakolinto 15:30-32, 42-44.

Akolinto akhafunika kubvesesa kuti kukhala Akristau wakudzozedwa kukhathandauza kuti Akristau wakudzozedwawo angadagumana na mabvuto ntsiku zentse ndipo angadafa akanati alamusidwa. ‘[Kubatizidwa] mwa Kristu Jezu’ kumbaphatanidza ‘[kubatizidwambo] mu infa yace.’ (Waroma 6:3) Bzimwebzi bzikufuna kulewa kuti, ninga Jezu, iwo angadagumanambo na mabvuto ndipo angadafa acilamusidwa kuti akakhale kudzulu.

Pomwe padapita magole mawiri kucokera pomwe Jezu adabatizidwa m’madzi, iye adauza apostolo wace awiri kuti: ‘Mun’dzabatizidwa na batismo yomwe ine ndikubatizidwa nayo.’ (Marko 10:38, 39) Pamwepa Jezu akhafuna lini kulewa bza batismo yomwe iye adabatizidwa nayo na madzi. Koma akhafuna kulewa kuti kukhala wakukhulupirika kwa Mulungu, kungadamucitisa kufika pa kuphedwa. Paulo adanemba kuti anyakudzozedwa ‘[angadadzabonera] naye pabodzi kuti [adzatumbizidwembo] naye pabodzi.’ (Waroma 8:16, 17; 2 Wakolinto 4:17) Tenepo, iwo akhafunikambo kufa acilamusidwa kuti akakhale na moyo kudzulu.

Mwakubverana na bzimwebzi, mafala ya Pauloya kuti yabveseseke bwino tingayasandulizire kuti: “Penu bziri lini tenepo, n’ciyani comwe an’dzacita wale omwe akubatizidwa na cakulinga cakufuna kufa? Tsono penu anyakufa an’dzalamusidwa lini, thangwe ranyi iwo akubatizidwa na batismo ya mtundu umweyi?”