Nkhani Yakupfunza 7
Khalani Wakufatsa Kuti Mukondwese Yahova
‘Mulingeni Yahova, imwe mwense anyakudzicepswa wa pa dziko la pansi . . . Lingani cirungamo.’—SOFONIYA 2:3.
NYIMBO 80 Lawidzani Muwone Kuti Yahova Ngwabwino
BZOMWE TIN’PFUNZA *
1-2. (a) Kodi Mozeji akhana khalidwe liponi, ndipo n’ciyani comwe iye adacita? (b) Mwakubverana na cinembo ca Psalymo 37:11, kodi n’ciyani comwe cingatithandize kupitiriza kukhala wakufatsa?
BIBLIYA limbalewa kuti Mozeji ‘na patali akhali munthu wa bwino kwene-kwene kuposa wanthu wense wa pa dziko la pansi.’ (Mirewengo 12:3) Kodi bzimwebzi bzinkuthandauza kuti iye akhali wakupusa, akhagopa kucita bzakusankhula ndipo akhatazira kukhwimika wanthu winango akamutsutsa? Makumbukidwe yamweya ndiyo yomwe wanthu winango ambakhala nayo akawona munthu wakufatsa. Tsono makumbukidwe yamweya njacadidi lini. Mozeji akhali mtumiki wa Mulungu wamphanvu, wakudziwa kusankhula bzinthu na wakukhwimika. Ndipo na thandizo la Yahova, iye adalimbana na mtongi wamphanvu wa ku Edjipito, adatsogolera m’dambo wanthu wakukwana pafupi-fupi 3.000.000, ndipo adathandiza mtundu wa Jirayeri kukunda anyamadulanthaka wawo.
2 Ifepano tinkulimbana lini na mabvuto yomwe Mozeji adagumana nayo, koma nsiku zense timbagumana wanthu ayai bzakucitika bzomwe bzimbatitazisa kukhala wakufatsa. Napo bziri tenepo, ifepano tina cilimbiso cikulu kwene-kwene comwe cingatithandize kukulisa khalidweri. Yahova adapicira kuti ‘anyakulungama an’dzatambira dziko la pansi.’ (Psalymo 37:11) Kodi imwepo pamwekha mumbawona kuti ndimwe wakufatsa? Kodi wanthu winango ambakuwonani kuti ndimwe wakufatsa? Tikanati kugumana mitawiro ya mibvunzo yakufunikayi, cakuyamba tin’funika kudziwa thandauzo la kufatsa.
KODI KUFATSA N’CIYANI?
3-4. (a) Kodi kufatsa kuli ninga ciyani? (b) Kodi ni mikhalidwe iponi yomwe tin’funika kukhala nayo kuti tikhale wakufatsa, ndipo n’thangwe ranyi?
3 Kufatsa * kuli ninga nguwo yakudeka. Mwa njira iponi? Ninga momwe nyakukonza nguwo ambasanganizira mitundu yakusiyana-siyana ya tinta yakudeka kuti akonzere nguwo ibodzi, ifepanombo tin’funika kusanganiza mikhalidwe yakusiyana-siyana kuti tikhale wakufatsa. Ndipo inango mwa mikhalidweyo ni kubzicepswa, kubvera na kukhwimika. Thangwe ranyi ifepano tin’funikira mikhalidwe imweyi kuti tikondwese Yahova?
4 Ni wanthu wakubzicepswa wokha omwe ambacita kufuna kwa Mulungu. Mulungu ambafuna kuti tikhale wakufatsa. (Mateu 5:5; Wagalata 5:23) Ndipo tikambacita kufuna kwa Mulungu, Sathani ambakomedwa lini. Tsono napo ndife wakubzicepswa na wakufatsa, wanthu azinji omwe ali ku mbali ya dziko la Sathaniri ambatiwenga. (Juwau 15:18, 19) Ndipopa tin’funikira mphanvu yakuposa yacibadwa kuti tilimbane na Sathani.
5-6. (a) Thangwe ranyi Sathani ambawenga wanthu wakufatsa? (b) Kodi ni mibvunzo iponi yomwe tin’funika kugumana mitawiro yace?
5 Munthu wakusaya kufatsa ngwakubzikuza, ambakwanisa lini kubziphata akakalipa ndipo ambabvera lini Yahova. Sathani ana mikhalidwe imweyi. Ndipo akambawona wanthu wakufatsa ankulatiza mikhalidwe yabwino yomwe imbacitisa kuti iye awoneke padeca kuti ngwakuipa, ambawawenga kwene-kwene! Napo bziri tenepo, wanthu wakufatsa ambacita bzinthu bzakulatiza kuti iye ngwakunama. Thangwe ranyi? Thangwe ndakuti bziribe basa bzomwe iye ambalewa ayai ambacita, iye an’kwanisa lini kuletsa wanthu wakufatsa kutumikira Yahova!—Djobi 2:3-5.
6 Thangwe ranyi nthawe zinango kukhala wakufatsa kumbanesa? Ndipo thangwe ranyi tin’funika kupitiriza kulinga cirungamo? Kuti tigumane mitawiro ya mibvunzoyi, cakuyamba bwerani tiwone bzomwe bzidacitika na Mozeji, alumbwana atatu Wacihebereu omwe akhali ku ukapolo ku Babulo, na bzomwe bzidacitika na Jezu.
THANGWE RANYI KUKHALA WAKUFATSA KUMBANESA NTHAWE ZINANGO?
7-8. Kodi Mozeji adacita tani pomwe wanthu winango akhamulemekeza lini?
7 Kodi tingakhale tani wakufatsa tikakhala na udindo? Bzingakhale bzakunesa kwa omwe ana udindo kukhala wakufatsa, maka-maka penu munthu munango ambawalemekeza lini ayai ambawalewa kuti ambacita lini bzakusankhula bzabwino. Penu imwepo ndimwe m’bodzi wa amuna wa udindo, kodi bzidakucitikiranimbo kale? Kodi mungacite tani penu munthu wa m’banja mwanu wacita bzimwebzi? Kodi mungamutawire tani? Kumbukirani momwe Mozeji adacitira bzinthu pomwe adagumana na bvuto ninga limweri.
8 Yahova adasankhula Mozeji kuti atsogolere Ajirayeri ndipo adamupasa udindo bwakuti ambanembe malamulo acikayapereka kwa Ajirayeriwo. Tenepo, tinkupenukira lini kuti Yahova akhathandiza Mozeji. Napo bzikhali tenepo, mpfumakazi yace Miriyamu pabodzi na m’bale wace Aroni akhamulewa kuipa thangwe ra mkazi omwe Mozejiyo akhadalowola. Amuna winango omwe akhana udindo adafika pakukalipa na bzimwebzi ndipo akhafuna kuti Mozeji awabwezere, koma iye alibe kucita bzimwebzo. Mozeji akhakalipa lini kamangu, koma akhali wakugwa nfuwa. Ndipo pomwe Miriyamu adaphatidwa na mapere, Mozeji adadandaulira Yahova kuti amupoze. (Mirewengo 12:1-13) Thangwe ranyi Mozeji adacita bzinthu mwa njira imweyi?
Mozeji adadandaulira Yahova kuti apoze mapere ya Miriyamu (Onani ndime 8)
9-10. (a) Kodi Yahova adathandiza Mozeji kuti akhale na khalidwe liponi, ndipo adacita tani? (b) Kodi misolo ya mabanja pabodzi na akulu wa gwere angatewezere tani Mozeji?
9 Mozeji akhabvuma kupfunzisidwa na Yahova. Koma kwa magole 40 m’mbuyo mwace, pomwe akhakhala pa banja la mambo wa Edjipito, Mozeji akhali lini wakufatsa. Mwa ciratizo, pomwe iye adawona munthu munango ankucita bzinthu mwakusaya cirungamo adamupha nthawe imweyoletu. Mozeji akhawona kuti bzomwe adacitabzo Yahova akhabverana nabzo. Yahova adamala magole 40 ankuthandiza Mozeji kuti abvesese kufunika kwa kukhala wakufatsa na cakulinga cakuti akwanise kutsogolera Ajirayeri, sikuti kukhwimika kokha. Ndipo kuthumizira pa kukhala wakufatsa, iye akhafunikambo kukhala wakubzicepswa na wakubvera. Na thandizoli, Mozeji adapfunza bzinthu bzizinji ndipo adakhala mtsogoleri wabwino kwene-kwene.—Kufuluka 2:11, 12; Mabasa 7:21-30, 36.
10 Nsiku zino, misolo ya mabanja pabodzi na akulu wa gwere an’funika kutewezera Mozeji. Iwo angamutewezera mwa kuleka kukalipa kamangu wanthu winango akasaya kuwalemekeza. M’mbuto mwace, iwo an’funika kukhala wakubzicepswa na kufulumiza kuzindikira kuphonya kwa wanthuwo. (Mpalizi 7:9, 20) Iwo an’funikambo kuteweza malango yakuperekedwa na Yahova yomwe yambalewa momwe angamalisire bvutolo. Ndipo iwo ambapereka mitawiro mwakufatsa nthawe zense. (Mimwani 15:1) Tenepo, misolo ya mabanja pabodzi na akulu wa gwere akambakhala wakufatsa ambakondwesa Yahova, ndipo ambacitisa pa mui ayai gwere kukhala pa mtendere ndipo ambapereka ciratizo cabwino pa nkhani ya kufatsa.
11-13. Kodi tingatewezere tani ciratizo ca alumbwana atatu Wacihebereu?
11 Kodi tingakhale tani wakufatsa tikambazunzidwa? Kuyambira kale-kale, maboma ya wanthu yambazunza atumiki wa Yahova. Iwo ambacita bzimwebzo thangwe ambalewa kuti ifepano timbacita bzinthu bzakuipa bzomwe bzimbabverana lini na malamulo ya boma, koma cadidi n’cakuti, iwo ambakalipa nafe thangwe timbabvera Mulungu kuposa iwo. (Mabasa 5:29) Na thangwe limweri iwo ambatilewa kuipa, ambatinyoza, ambatiikha m’kawoko ndipo nthawe zinango ambatimenya. Ndipo na thandizo la Yahova tin’dzawabwezera lini koma tin’dzapitiriza kucita bzinthu mwa kufatsa.
12 Kumbukirani ciratizo ca alumbwana atatu Wacihebereu omwe akhali m’kawoko, Ananiya, Misaeli na Azariya. * Mambo wa ku Babulo adawauza kuti agodamire cifanikiso ca oro comwe iye akhadacikonza. Koma mwa kufatsa, iwo adafotokozera mamboyo thangwe race angadanamata lini cifanikisoco. Iwo adapitiriza kubvera Mulungu napo kuti mamboyo adawagopswa kuti akalamba angadawatentha pa moto. Yahova adawona kuti bzikhali bzakufunika kuwapulumusa nthawe imweireletu, tsono iwo akhakumbukira lini kuti Yahovayo angadawacitira bzimwebzo. M’mbuto mwace, iwo akhadikhirira ciri-cense comwe Yahova angadabvuma kuti cicitike. (Danyeri 3:1, 8-28) Bzomwe iwo adacitabzi bzidalatiza kuti munthu wakufatsa ngwakukhwimika, ambacita lini mantha napo akagopswedwa na mambo ndipo palibe cinthu ciri-cense comwe cingamutazise kupitiriza kutumikira Yahova.—Kufuluka 20:4, 5.
13 Kodi tingatewezere tani alumbwana atatu Wacihebereu, cikhulupiro cathu cikayezedwa? Mwa kukhala wakubzicepswa na kukhulupira kuti Yahova an’dzatisamalira. (Psalymo 118:6, 7) Ndipo wanthu akambatilewa kuti tikucita bzinthu bzakuipa, tin’funika kumbawatawira mwa kufatsa na mwa ulemu. (1 Pedru 3:15) Tin’funikambo kumbatcenkha kucita bzinthu bzomwe bzingadzonge uxamwali bomwe tinabo na Baba wathu wa lufoyi.
Wanthu akambatitsutsa tin’funika kumbawatawira mwakufatsa (Onani ndime 13)
14-15. (a) Kodi n’ciyani comwe cingacitike tikasunama? (b) Mwakubverana na cinembo ca Zaiya 53:7, 10, thangwe ranyi tingalewe kuti Jezu ni ciratizo cabwino pa nkhani ya kufatsa?
14 Kodi tingakhale tani wakufatsa tikasunama? Tensenefe timbasunama thangwe ra bzinthu bzakusiyana-siyana. Mwa ciratizo, pinango tingasuname pa nthawe yomwe tin’funa kunemba prova ku xikola ayai pomwe tikufuna kucita basa linango lomwe timbalidziwa lini bwino-bwino. Tingasunamembo tikakumbukira momwe tingagumanire mankhwala yomwe tinkufunikira kuti tipole matenda yomwe tinkuduwala. Tsono tikasunama, bzimbakhala bzakunesa kukhala wakufatsa. Ndipo napo tubzinthu tun’gono-tung’ono tungatisunamise, ticiyamba kulewa na kucita bzinthu mwaukali. Tenepo, penu imwepo mudasunamambo kale, kumbukirani ciratizo ca Jezu.
15 Kuphampha kwa nsiku zakumalizira za moyo wace wa pa dziko la pansi, Jezu adasunama kwene-kwene. Iye akhadziwa kuti angadaboneresedwa ndipo angadaphedwa mwakupasa nsisi. (Juwau 3:14, 15; Wagalata 3:13) Pomwe ikhadasala minyezi yakucepa kuti aphedwe, Jezu adalewa kuti akhadasunama kwene-kwene. (Luka 12:50) Pomwe nsiku zakuti aphedwe zidafendera, iye adati: ‘Moyo wangu unkutsautsika.’ Ndipo mafala yomwe adayafotokoza mu mpembo wace yadalatiza kuti iye akhali wakubzicepswa na wakubvera Mulungu. Iye adalewa kuti: ‘Baba, ndipulumuseni mu nthawe yakutsautsayi. Koma nthawe imweyi in’funika kundifikiradi pakuti ndibzo bzomwe ndidabwerera. Baba, tumbizani dzina lanu.’ (Juwau 12:27, 28) Pomwe nthawe idafika, Jezu mwakukhwimika adabzipereka kwa anyamadulanthaka wa Mulungu, omwe adamupha mwakupasa manyazi. Jezu adapitiriza kucita kufuna kwa Mulungu mwa kufatsa napo pomwe akhadasunama. Mwa kusaya kupenukira, Jezu ni ciratizo cabwino kwene-kwene ca munthu omwe adakhala wakufatsa napo pomwe akhadasunama!—Werengani Zaiya 53:7, 10. *
Jezu ni ciratizo cabwino pa nkhani ya kufatsa (Onani ndime 16-17) *
16-17. (a) Kodi axamwali wa Jezu adayeza tani khalidwe lace la kufatsa? (b) Kodi tingatewezere tani Jezu?
16 Usiku bwakumalizira bwa moyo wa Jezu pa dziko la pansi, axamwali wace adacita bzinthu bzomwe bzidayeza khalidwe lace la kufatsa. Ndokumbukirani msunamo omwe Jezu adakhala nawo usiku bule. Kodi iye angadapitiriza kukhala wakukhulupirika mpaka infa? Iye angadasaya kukhala wakukhulupirika palibe ne munthu m’bodzi omwe angadakhala na cidikhiro ca moyo wakusaya kumala. (Waroma 5:18, 19) Ndipo cinthu cinango n’cakuti, bzomwe iye angadacita usiku bule bzingadadzonga ayai bzingadathumizirisa mbiri ya Babace. (Djobi 2:4) Pomwe iye akhadya cakudya cakumalizira pabodzi na axamwali wace wa pa mtima, omwe akhali apostolo wace, maceza yawo yadacinja ndipo ‘adayamba kupopotezana mwamphanvu kuti mbani omwe akhali mkulu pakati pawo.’ Ukhali lini ulendo bwakuyamba iwo kucita bzimwebzi, tsono Jezu akhawatsimula kazinji kense, ndipo kumayambiriro kwa usiku bom’bule iye akhadawatsimula kale thangwe ra nkhani imweyi! Napo bzikhali tenepo, Jezu alibe kuwakalipira. M’mbuto mwace, iye adapitiriza kuwathandiza mwa kugwa nfuwa. Ndipo mwakudeka mtima, Jezu adalatiza na kuwafotokozera pomwe bza khalidwe lomwe iwo akhafunikira kukhala nalo. Patsogolo pace, iye adawatenda thangwe ra kupitiriza kukhala naye.—Luka 22:24-28; Juwau 13:1-5, 12-15.
17 Kodi n’ciyani comwe imwepo mungacite penu bzakucitikirani bzinthu ninga bzimwebzi? Mungacite bwino kutewezera Jezu mwa kupitiriza kugwa nfuwa napo mukasunama. Ndipo tin’funika kumbabvera mtemo wa Yahova omwe umbalewa kuti ‘pitirizani kupirirana.’ (Wakoloso 3:13) Ifepano tingabvere mtemo umweyu tikambakumbukira kuti tensenefe timbalewa na kucita bzinthu bzomwe bzimbasunamisa winango. (Mimwani 12:18; Tiyago 3:2, 5) Tenepo, mbacitani nyongo yakumbalewa mikhalidwe yabwino yomwe winango anayo.—Wayefezo 4:29.
THANGWE RANYI TIN’FUNIKA KUPITIRIZA KUKHALA WAKUFATSA?
18. Kodi Yahova ambathandiza tani wanthu wakufatsa kuti acite bzakusankhula bzanzeru, ndipo n’ciyani comwe iwo an’funika kucita?
18 Tikakhala wakufatsa tin’dzakwanisa kucita bzakusankhula bzanzeru. Tikaneseka kudziwa bzomwe tingacite pa moyo wathu, Yahova an’dzatithandiza kusankhula bzinthu mwanzeru. Koma iye an’dzacita bzimwebzo kokha tikakhala wakufatsa. Iye ambalewa kuti an’dzabva ‘kukumbira kwa anyakulungama.’ (Psalymo 10:17) Tsono iye an’dzacita bzizinji sikuti kundobva kokha mkumbiro wathu. Bibliya limbalewa kuti: ‘Anyakufatsa an’dzawatsogolera ku cirungamo, ndipo an’dzapfunzisa anyakufatsawo m’njira zace.’ (Psalymo 25:9) Yahova ambapereka citsogozo cimweci mwakuphatisa basa Bibliya, mabukhu, * mavidiyo na mitsonkhano yomwe imbakonzedwa na ‘kapolo wakukhulupirika na wanzeru.’ (Mateu 24:45-47) Tenepo, ifepano tin’funika kumbabvuma thandizo la Yahova mwa kukhala wakubzicepswa na wakuzindikira kufunika kwa thandizolo, ndipo tingacite bzimwebzi mwa kumbapfunza mabukhu yomwe Yahova ambatikonzera na kuphatisa basa bzomwe timbapfunzabzo.
19-21. Kodi Mozeji adagumana na mabvuto yaponi ku Kadesi, ndipo tingapfunze ciyani na ciratizo cace?
19 Tikakhala wakufatsa tin’dzatcenkha kucita bzinthu bzakuphonyeka. Kumbukirani bzomwe bzidacitika na Mozeji. Iye adamala magole mazinji akucita bzinthu mwa kufatsa ndipo Yahova akhakomedwa naye. Koma kuphampha kwa magole 40 yomwe Ajirayeri akhadadzungaira m’dambo, Mozeji adatazira kukhala wakufatsa. Pa nthaweyi pakhadandopita nsiku zakucepa pomwe mpfumakazi yace yomwe idamupulumusa ku Edjipito ikhadafa, ndipo idapendesedwa ku Kadesi. Tenepo, Ajirayeri adayamba pomwe kudandaula kuti akusamaliridwa lini bwino. Tsono pa nthaweyi iwo ‘akhanesana na Mozeji’ thangwe ra kusaya madzi. Wanthuwo adacita bzimwebzi napo kuti adawona bzinthu bzakudabwisa bzomwe Yahova akhadawacitira na utsogoleri bomwe Mozeji adacita kwa magole mazinji. Iwo adadandaula sikuti kokha thangwe ra kusaya madzi, koma adadandaulirambo Mozeji, mwa kumupasa mulandu wakuti ndiye omwe adawacitisa kukhala na nyota.—Mirewengo 20:1-5, 9-11.
20 Thangwe ra bzimwebzi, Mozeji adakalipa kwene-kwene ndipo adasiya kukhala wakufatsa. Bzimwebzi bzidamucitisa kuti atazire kucita bzomwe Yahova akhadamuuza bzakuti akalewelewe na tsendwa, m’mbuto mwace, iye adakalipira wanthuwo ndipo adawauza kuti iye ndiye angadawacosera madziyo. Pambuyo pace, iye adamenya tsendwalo kawiri kense ndipo yadacoka madzi mazinji. Tenepo, kubzikuza na ukali bzidacitisa Mozeji kucita pikado ikulu. (Psalymo 106:32, 33) Ndipo thangwe ra kusaya kukhala wakufatsa mu kanthawe kakucepa, Mozeji alibe kubvumizidwa kupita m’Dziko Lakupiciridwa.—Mirewengo 20:12.
21 Ifepano timbapfunza bzinthu bzizinji na ciratizoci. Cakuyamba, tin’funika kucita nyongo kuti tipitirize kukhala wakufatsa. Tsono tikaleka kukhala wakufatsa, tin’dzayamba kubzikuza ndipo tin’dzafika pakulewa na kucita bzinthu bzakusaya kuthemera. Caciwiri, msunamo ungatitazise kukhala wakufatsa, tenepo tin’funika kulatiza khalidweri napo tikagumana na mabvuto.
22-23. (a) Thangwe ranyi tin’funika kupitiriza kukhala wakufatsa? (b) Kodi mafala pa ya Sofoniya 2:3 yambathandauza ciyani?
22 Tikakhala wakufatsa tin’dzakhala wakukhotcerereka. Tsapanopapa, Yahova an’pfudza wanthu wense wakuipa omwe ali pa dziko la pansi, koma omwe an’dzasala ni wakufatsa wokha. Bzimwebzi bzikadzacitika dziko lense lin’dzakhala pa mtendere. (Psalymo 37:10, 11) Kodi imwepo mun’dzakhalambo m’bodzi wa iwo? Mungadzakhale m’bodzi wa iwo mukambacita bzinthu mwakubverana na mafala ya Yahova yomwe yadanembedwa na mpolofeta Sofoniya.—Werengani Sofoniya 2:3. *
23 Thangwe ranyi pa cinembo ca Sofoniya 2:3 pambalewa kuti, ‘Pinango-pense mungadzabisidwe’? Mafalaya yakuthandauza lini kuti Yahova an’kwanisa lini kukhotcerera wale omwe ambafuna kucita bzinthu bzakumukondwesa na omwe iye ambawafuna. Koma yakuthandauza kuti tin’funika kucita ciri-cense kuti tikhale wakukhotcerereka. Ifepano tina mwayi wakudzapulumuka pa ‘nsiku ya ukali bwa Yahova’ na kukhala na moyo wakusaya kumala, tikambacita nyongo yakulinga kukhala wakufatsa na kucita bzinthu bzakukondwesa Yahova kuyambira nsiku zino.
NYIMBO 120 Titewezere Kubzicepswa kwa Jezu
^ ndi. 5 Palibe munthu omwe ambabadwa na khalidwe la kufatsa, koma timbacita kulikulisa. Pinango tingakumbuke kuti tingakhale wakufatsa tikambakhala na wanthu omwe ambafuna mtendere, koma bzingatinese kupitiriza kukhala na khalidweri tikagumana na wanthu wakubzikuza. Mu nkhani ino tiniwona mabvuto yomwe yangatitazise kukulisa khalidwe la kufatsa.
^ ndi. 3 KAFOTOKOZEDWE KA MAFALA MANANGO: Kufatsa. Wanthu wakufatsa ambacita bzinthu mwakufatsa na anzawo ndipo ambapitiriza kugwa nfuwa napo winango akawaphonyera. Kubzicepswa. Wanthu wakubzicepswa ambabzikuza lini ne kusamwa; koma ambawona wanthu winango kukhala wapadzulu kuposa iwo. Ndipo Yahova ambacita bzinthu mwalufoyi na mwansisi na wanthu omwe mbakubzicepswa, omwe ambawoneka ninga wakusaya kufunika ayai wakunyozeka.
^ ndi. 12 Ababulo adapasa alumbwana atatu Wacihebereu madzina yakuti Sadraki, Mesaki na Abedinego.—Danyeri 1:7.
^ ndi. 15 Zaiya 53:7 Iye adapanikizidwa ndipo adabvuma kuzunzidwa, koma alibe kufungula mulomo wace. Iye adatengedwa ninga bira omwe ankuyenda kukaphedwa, ninga bira mkazi omwe ambakhala zii akambametedwa ukuse; ndipo iye alibe kufungula mulomo wace. 10 Koma Yahova adafuna kuti iye azunzidwe, ndipo adamulekerera kuti aduwale. Imwepo mukapereka moyo wace ninga nsembe ya pikado, iye an’dzawona wana wace, ndipo nsiku zace zin’dzathumizirika, ndipo mwa iye bzin’dzakwanisika bzomwe Yahova ambafuna.
^ ndi. 18 Onani nkhani yakuti “Zosankha Zanu Zizilemekeza Mulungu” yomwe imbagumanika mu Nsanja ya Olonda ya 15 Abril, 2011.
^ ndi. 22 Sofoniya 2:3 Mulingeni Yahova, imwe mwense anyakudzicepswa wa pa dziko la pansi, omwe mumbabvera bzakutonga bzace bzakulungama. Lingani cirungamo, lingani kukhala wakudzicepswa; pinango-pense mungadzabisidwe pa nsiku ya ukali bwa Yahova.
^ ndi. 61 BZOMWE BZINKUCITIKA PA CITHUNZI-THUNZI Tsamba: JJezu ankupitiriza kukhala wakufatsa pambuyo pomwe anyakupfunza wace akhadapopotezana kuti mbani mkulu pakati pawo, ndipo ankuwatsimula mwa kugwa nfuwa.
