Nkhani Yakupfunza 7
Ifepano Timbamufuna Kwene-kwene Yahova Baba Wathu
‘Ifepano timbalatiza lufoyi thangwe iye ndiye omwe adayamba kutifuna.’—1 JUWAU 4:19.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
BZOMWE TIN’PFUNZA *
1-2. Kodi Yahova adacita tani kuti ticite mbali ya banja lace, ndipo thangwe ranyi?
YAHOVA an’funa kuti ticite mbali ya banja lace lomwe limbamunamata. Bzimwebzi mpsakukondwesa kwene-kwene! Wanthu wa banja limweri ni wale omwe adabzipereka kwa Mulungu ndipo ambakhulupira ntsembe ya Mwana wace, Jezu. Ifepano tikucita mbali ya banja lakukondwa. Ndipo tina moyo wathandauzo thangwe tina cidikhiro cakudzakhala na moyo wakusaya kumala, bziribe basa penu moyoyo tin’dzakhala nawo kudzulu ayai pano pa dziko la pantsi.
2 Yahova adacita ciri-centse kuti ifepano ticite mbali ya banja lace thangwe iye ambatifuna kwene-kwene. Ndipo iye adacita bzimwebzi mwa kupereka ntsembe ikulu kwene-kwene. (Juwau 3:16) Ifepano tidaguliwa mwa kuumira. (1 Wakolinto 6:20) Na ntsembe ya Mwana wace, Yahova adacitisa kuti ifepano tikhale axamwali wace. Kulewa mwakusaya kupenukira, ifepano tina mwayi wakulewalewa na Munthu mkulu wakuposa cirengedwe centse. Ninga momwe tidawonera mu nkhani idamala ire, Yahova ni Baba wabwino.
3. Kodi tingabzibvunze mibvunzo iponi? (Onani kwadru yakuti “ Kodi Yahova Ambandiwonambo Ine?”)
3 Munembi winango wa bukhu la Psalymo, adabvunza kuti: ‘Kodi nin’dzamubwezera ciyani ine Yahova pa bzabwino bzense bzomwe wandicitira?’ (Psalymo 116:12) Mtawiro ngwakuti cipo tingakwanise lini kumubwezera. Koma lufoyi lomwe iye analo na ifepano limbaticitisa kuti timufunembo. Mpostolo Juwau adanemba kuti: ‘Ifepano timbalatiza lufoyi thangwe iye ndiye omwe adayamba kutifuna.’ (1 Juwau 4:19) Kodi tingalatize tani kuti timbafuna Baba wathu wakudzulu?
PITIRIZANI KUFENDERERA YAHOVA
Ifepano timbalatiza kuti timbafuna kwene-kwene Baba wathu wakudzulu, Yahova, mwa kupitiriza kumbapemba kwa iye, kumubvera, na kuthandiza winango kuti amufunembo (Onani ndime 4-14)
4. Mwakubverana na Tiyago 4:8, thangwe ranyi ifepano tin’funika kucita nyongo kuti timufenderere Yahova?
4 Yahova akufuna kuti timufenderere na kumbalewalewa naye. (Werengani Tiyago 4:8. *) Iye ambafuna kuti timbalimbikire kupemba ndipo nthawe zentse ambatitetekera. (Waroma 12:12) Ndipo iye ambaneta lini kutitetekera. Tenepo, ifepanombo timbamutetekera mwa kumbawerenga Bibliya pabodzi na mabukhu yanango yomwe yambatithandiza kubvesesa Bibliyalo. Ndipo timbamutetekerambo mwa kukhala tceru pa mitsonkhano yathu. Ninga momwe maceza yabwino yambathandizira wana kufenderera abereki wawo, maceza yabwino yomwe timbacita na Yahova, yambatithandiza kupitiriza kumufenderera.
Onani ndime 5
5. Kodi tingadziwe tani momwe iriri mipembo yomwe timbacita kwa Yahova?
5 Kumbukirani momwe iriri mipembo yomwe mumbacita kwa Yahova. Iye ambafuna kuti timbamuuze makumbukidwe yathu na momwe timbabvera mu mtima mwathu. (Psalymo 62:8) Tingacite bzimwebzo mwa kubzibvunza kuti: ‘Kodi mipembo yangu imbakhala ibodzi-bodzi ayai nimbandobwerezera-bwerezera, ayai imbacokera pantsi pa mtima?’ Tikupenukira lini kuti imwepo mumbafuna kwene-kwene Yahova, ndipo mun’funa kupitiriza kukhala naye pa uxamwali bwakulimba. Tsono kuti mukwanise kucita bzimwebzi, mun’funika kumbalewalewa naye kawiri-kawiri. Tenepo, muwoneni Yahova kukhala xamwali wanu wakukhulupirika, ndipo mbamuuzani bzentse bzomwe bzimbakukondwesani na bzomwe bzimbakucitisani thupo. Ndipo tsimikizirani kuti iye angakuthandizeni.
6. Kodi tin’funika kucita ciyani kuti tikhale pa uxamwali bwakulimba na Baba wathu wakudzulu?
6 Kuti tikhale pa uxamwali bwakulimba na Baba wathu wakudzulu, tin’funika kumbamutenda nthawe zentse. Ndipo tikutawiriza bzomwe nyakunemba bukhu la Psalymo adanemba kuti: ‘Imwe Yahova Mulungu wangu, mudakonza bzinthu bzizinji bzakudabwisa, mabasa yanu yabwino yambalatiza kuti mumbatikumbukira. Palibe omwe angandendemere namwe. Ningadafuna kubzifotokoza, ningadakwanisa lini!’ (Psalymo 40:5) Ifepano timbacita bzizinji sikuti kumutenda kokha; ndipo timbalatiza kutenda kwathu Yahova m’mafala na m’bzicito. Bzimwebzi bzimbaticitisa kukhala wakusiyana na wanthu azinji ntsiku zino. Ifepano tikukhala m’dziko lomwe wanthu azinji ambatenda lini bzinthu bzentse bzomwe Mulungu ambawacitira. Kulewa cadidi, cibodzi mwa bzizindikiro bzomwe bzikulatiza kuti tikukhala ‘m’ntsiku zakumalizira,’ ni kusaya kutenda komwe wanthu akucita. (2 Timotio 3:1, 2) Tenepo, ifepano tin’funika lini kuwatewezera wanthu amwewa!
7. Kodi Yahova an’funa kuti ticite ciyani, ndipo thangwe ranyi?
7 Abereki ambafuna lini kuti wana wawo ambakhale acimenyana-menyana, koma ambakhale pa uxamwali. Mpsibodzi-bodzi, Yahova an’funa kuti wentse omwe ambamunamata akhale pa uxamwali. Kulewa cadidi, lufoyi lomwe timbalatizana, limbatidziwikisa ninga akristau wacadidi. (Juwau 13:35) Tikutawiriza bzomwe nyakunemba bukhu la Psalymo adanemba kuti: ‘Mpsabwino, ndipo mpsakudekeza abale kukhala pabodzi mwakuphatana!’ (Psalymo 133:1) Tikambafuna abale na mpfumakazi zathu, timbalatiza kwa Yahova kuti timbamufuna. (1 Juwau 4:20) Kulewa mwakusaya kupenukira, mpsakudekeza kwene-kwene kukhala pabodzi na abale na mpfumakazi omwe ‘[mbakudeka mtima na wa] ntsisi!’—Wayefezo 4:32.
LATIZANI LUFOYI LANU MWA KUKHALA WAKUBVERA
Onani ndime 8
8. Mwakubverana na 1 Juwau 5:3, kodi ndiponi thangwe likulu lomwe limbaticitisa kubvera Yahova?
8 Yahova akufuna kuti wana ambabvere abereki wawo, ndipo iye akufunambo kuti ifepano timbamubvere. (Wayefezo 6:1) Tin’funika kumbabvera Yahova thangwe iye ni Mulengi, ambasamalira moyo wathu ndipo ngwanzeru kwene-kwene kuposa abereki wentse. Koma kuposa bzentse, lufoyi ndiro limbaticitisa kuti timbabvere Yahova. (Werengani 1 Juwau 5:3. *) Napo kuti pana mathangwe mazinji yomwe yangaticitise kubvera Yahova, iye ambatingingimiza lini kucita bzimwebzo. Yahova adatipasa ufulu bwakusankhula kucita bzomwe tingafune, ndipopa iye ambakomedwa kwene-kwene tikambamubvera thangwe ra kumufuna.
9-10. Thangwe ranyi mpsakufunika kwa ifepano kudziwa na kubvera malamulo ya Mulungu?
9 Abereki ambafuna kuti wana wawo akhale wakukhotcerereka. Ndipopa iwo ambakhazikisa malamulo kuti yakhotcerere wanawo. Tsono wanawo akabvera malamuloyo, ambalatiza kuti ambakhulupira na kulemekeza aberekiwo. Tenepo, mpsakufunikambo kwene-kwene kwa ifepano kudziwa na kubvera malamulo ya Baba wathu wakudzulu. Tikacita bzimwebzi, timbalatiza kwa Yahova kuti timbamufuna na kumulemekeza ndipo timbagumanambo phindu pa moyo wathu. (Zaiya 48:17, 18) Koma wale omwe ambalamba Yahova na malamulo yace, bzimbawamalira kuipa.—Wagalata 6:7, 8.
10 Tikambacita bzomwe Yahova ambatiuza kuti ticite, timbakhala wakukhotcerereka mwakuthupi, m’makumbukidwe na bzinthu bzomwe bzingadzonge uxamwali bwathu na iye. Yahova ambadziwa bzomwe mpsabwino kuna ifepano. Aurora, omwe ambakhala ku Estados Unidos, adalewa kuti: “Inepano nimbadziwa kuti kubvera Yahova nthawe zentse n’kwabwino kwene-kwene.” Ifepanombo tikutawiriza kuti bzimwebzi mpsacadidi. Kodi imwepo mukukumbukira momwe mudagumanira phindu thangwe ra kubvera malamulo ya Yahova?
11. Kodi mpembo umbatithandiza kucita ciyani?
11 Mpembo umbatithandiza kukhala wakubvera, napo kuti kucita bzimwebzi kungakhale kwakunesa. Nthawe zinango bzingatinese kubvera Yahova, thangwe ndife wakuperewera, koma tin’funika kucita nyongo kuti timbamubvere. Nyakunemba bukhu la Psalymo adadandaulira Yahova kuti: ‘Ndipaseni mtima wakufuna kumbakubverani.’ (Psalymo 51:12) Denise, omwe ni mpainiya wakukhazikika adalewa kuti: “Ndikawona kuti bzikundinesa kubvera mtemo wa Yahova, nimbapemba kuti andithandize kucita bzomwe mpsabwino.” Tenepo ifepano tingatsimikizire kuti Yahova ambatawira mpembo ninga umweyu.—Luka 11:9-13.
THANDIZANI WINANGO KUTI AFUNE BABA WATHU
12. Kodi n’ciyani comwe tin’funika kucita mwakubverana na Wayefezo 5:1?
12 Werengani Wayefezo 5:1. * Pakuti ndife ‘wana wakufunidwa’ wa Yahova, timbacita ciri-centse kuti timutewezere. Timbamutewezera mwa kukhala walufoyi, wakudeka mtima na wakulekerera winango akatiphonyera. Tenepo, wale omwe ambadziwa lini Mulungu akambawona makhalidwe yathu yabwino, pinango angafune kudziwa bzizinji pakulewa bza Mulunguyo. (1 Pedru 2:12) Abereki wacikristau an’funika kumbasamalira wana wawo ninga momwe Yahova ambatisamalirira. Ndipo aberekiwo akambatewezera Yahova, wana wawo an’dzafunambo kukhala pa uxamwali na iye.
Onani ndime 13
13. Kodi n’ciyani comwe cingatithandize kuti tikhale wakukhwimika?
13 Mwana omwe ambasamwirira baba wace, ambafunisisa kuuza winango bza babaceyo. Mpsibodzi-bodzimbo na ifepano, thangwe ra kusamwirira Baba wathu omwe ni Yahova, timbafunisisa kuuza winango kuti amudziwembo. Tentsenefe timbabzibva ninga momwe Mambo Davide adabvera, iye adati: ‘Inepano nin’dzalewa bza Yahova mwakucita kusamwirira.’ (Psalymo 34:2) Tani penu ndimwe wa manyazi? Kodi mungacite tani kuti mukhale wakukhwimika kuti mulewelewe bza Yahova? Yezerani kukumbukira momwe Yahova ambakondwera tikambalewa bza iye. Ndipo kumbukiranimbo phindu lomwe wanthu angakhale nalo akapfunza bza Yahova. Kumbukiranimbo kuti, penu Yahova adapasa mphanvu akristau wa m’magole dzana yakuyambirira kuti akhale wakukhwimika, iye an’dzakupasanimbo mphanvu kuti mukhale wakukhwimika.—1 Watesalonika 2:2.
14. Thangwe ranyi basa lakupalizira ndakufunika kwene-kwene?
14 Yahova alibe tsankhulo. Ndipopa iye ambakomedwa akambatiwona tikucitira winango bzinthu mwa lufoyi na mwa kusaya tsankhulo. (Mabasa 10:34, 35) Njira yabwino ya momwe tingalatizire lufoyi kwa winango ni kuwapalizira. (Mateu 28:19, 20) Tenepo, kupalizira ni basa lakufunika kwene-kwene, thangwe wentse omwe an’bvuma kutetekera bzipsa bzabwino angakhale na moyo wabwino ntsiku zino ndipo kutsogolo moyo wakusaya kumala.—1 Timotio 4:16.
KUFUNA BABA WATHU KUMBABWERESA CIKONDWESO
15-16. Fotokozani mathangwe yomwe yangaticitise kukhala wakukondwa.
15 Yahova ni Baba walufoyi ndipo akufuna kuti banja lace likhale lakukondwa. (Zaiya 65:14) Tina mathangwe mazinji yomwe yangaticitise kukhala wakukondwa ntsiku zino, napo tigumane na mabvuto. Mwa ciratizo, tina citsimikizo centse cakuti Baba wakudzulu ambatifuna kwene-kwene. Tina cidziwiso cacadidi ca m’Fala la Mulungu, Bibliya. (Jeremiya 15:16) Ndipo tikucita mbali ya banja lakupambulika kwene-kwene, lomwe lina wanthu omwe ambafuna Yahova, malamulo yace ndipo ambafunanambo.—Psalymo 106:4, 5.
16 Kuthimizira bzimwebzi, tingapitirize kukhala wakukondwa thangwe tikudziwa kuti moyo un’dzakhala wabwino kwene-kwene kutsogoloku. Timbadziwambo kuti tsapanopapa, Yahova animalisa mabvuto yentse ndipo mwakuphatisa basa Umambo bwace, anisandusa dzikoli licikhala Paraizo. Ndipo tikudikhirira kudzatambira anyakufa omwe an’dzalamusidwa kuti adzakhale pomwe na moyo. (Juwau 5:28, 29) Nthawe imweyi in’dzakhala yakudekeza kwene-kwene! Ndipo kuthimizira bzimwebzi, tsapanopapa omwe ali kudzulu na omwe ali pano pa dziko la pantsi, anipereka ulemu, citumbizo, na kunamata komwe kumbathemera Baba wathu walufoyi.
NYIMBO 12 Yahova, Mulungu Mkulu
^ ndi. 5 Timbadziwa kuti Baba wathu, Yahova, ambatifuna kwene-kwene ndipo adatikwewera m’banja lace kuti timunamate. Ndipopa ifepano timbamufunambo. Kodi tingalatize tani kuti timbafunadi Baba wathuyo? Mu nkhani ino tiniwona njira za momwe tingacitire bzimwebzi.
^ ndi. 4 Tiyago 4:8 Mufenderereni Mulungu ndipo iye an’dzakufendereranimbo. Cenesani manja yanu, imwe anyakuipamwe! Ndipo cenesani mitima yanu, imwe anyakutsitsimwamwe.
^ ndi. 8 1 Juwau 5:3 Pakuti kufuna Mulungu kumbathandauza kusunga malamulo yace; ndipo malamulo yaceyo njakulemera lini.
^ ndi. 12 Wayefezo 5:1 Tenepo, khalani anyakutewezera Mulungu ninga wana wakufunidwa.
