MACIBESE ya nsiku ya Citatu, pa 24 Janeiro, 2018, abale wa ku Beteli ya Estados Unidos na ya ku Canadá adakomedwa kwene-kwene pomwe adabva cidziwiso cakupambulika cakulewa kuti: M’bale Kenneth Cook, Jr., ni m’bodzi wa Bungwe Lakutonga la Mboni za Yahova.

M’bale Cook adabadwa ndipo adakulira ku Pennsylvania, U.S.A. Iye adapfunza cadidi ca m’Bibliya kucokera kwa mwanzace wa ku xikola ndipo bzimwebzi bzidacitika pomwe akhadasala pang’ono kumaliza mapfunziro yace ya kuxikola. M’bale Cook adabatizidwa pa 7 Junho, 1980 ndipo adayamba kucita upainiya bwakukhazikika pa 1 Setembro, 1982. Pomwe padapita magole mawiri akutumikira ninga mpainiya, iye adacemeredwa kuti akatumikire pa Beteli, ndipo adayamba kucita utumiki bwa pa Beteli ku Wallkill, Nova York pa 12 Outubro, 1984.

Kwa magole 25, m’bale Cook adaphata mabasa yakusiyana-siyana ku depatimenti yakudindira mabukhu na ku cipinda ca Beteli. Iye adalowolana na Jamie, mu 1996, ndipo mkazaceyo adadzaphatambo basa pa Beteli ya Wallkill. Mu Dezembro 2009, m’bale Cook pabodzi na mkazace, adatumizidwa ku Likulu la Mapfunziro la Watchtower ku Patterson, Nova York, kumweko m’bale Cook adasankhulidwa kuti atumikire mu Depatimenti Yakunemba Matsamba. Mu kanthawe kakucepa, banjali lidabwerera ku Wallkill ndipo mu Abril 2016, adatumizidwa ku Brooklyn, Nova York. Pomwe padapita minyezi mixanu, iwo adafulukira ku likulu la pa dziko lense lomwe liri ku Warwick, Nova York. Ndipo mu Janeiro 2017, m’bale Cook adaikhidwa ninga mthandizi wa Komiti Yakunemba ya Bungwe Lakutonga.