Nkhani Yakupfunza 2
Momwe Tingatumbizire Yahova pa Mitsonkhano ya Gwere
‘Pakati pa gwere ndin’dzakutumbizani.’—PSALYMO 22:22.
NYIMBO 59 Titumbize Yah Pabodzi
BZOMWE TIN’PFUNZA *
1. Kodi n’ciyani comwe Davide adalewa pa nkhani ya Yahova, ndipo adacita ciyani?
MAMBO DAVIDE adanemba kuti: ‘Yahova ni mkulu ndipo adathemera kutumbizidwa.’ (Psalymo 145:3) Iye akhafuna Yahova, ndipo lufoyi lacero lidamucitisa kuti amutumbize ‘pakati pa gwere.’ (Psalymo 22:22; 40:5) Tinkupenukira lini kuti imwepo mumbafuna Yahova, ndipo mukubverana na mafala yomwe yadanembedwa na Davide yakuti: ‘Mutumbizidwe imwe Yahova, Mulungu wa Jirayeri baba wathu.’— 1 Nkhani 29:10-13.
2. (a) Kodi tingatumbize tani Yahova? (b) Thangwe ranyi winango ambaneseka kupereka mitawiro, ndipo tin’cezerana mibvunzo iponi?
2 Nsiku zino, njira ibodzi yakutumbizira Yahova ni kupereka mitawiro pa mitsonkhano yathu ya gwere. Koma abale na mpfumakazi zinango bzimbawanesa kupereka mitawiro. Iwo ambafuna kupereka mitawiroyo, koma ambacita mantha. Tsono n’ciyani comwe iwo angacite kuti amalise bvuto limweri? Ndipo n’ciyani comwe tensenefe tin’funika kucita kuti timbapereke mitawiro yakulimbisa? Tikanati kutawira mibvunzoyi, cakuyamba bwerani tiwone mathangwe manai yomwe yambalatiza thangwe ranyi tin’funika kumbapereka mitawiro pa mitsonkhano.
THANGWE RANYI TIMBAPEREKA MITAWIRO PA MITSONKHANO?
3-5. (a) Mwa kubverana na Wahebereu 13:15, thangwe ranyi timbapereka mitawiro pa mitsonkhano? (b) Kodi Yahova ambafuna kuti timbapereke mitawiro yakundendemerana? Fotokozani.
3 Yahova ambapereka mwayi kwa ali-wense wa ifepano kuti timbamutumbize. (Psalymo 119:108) Tenepo, mitawiro yomwe timbapereka pa mitsonkhano ni mbali ya ‘nsembe za citumbizo,’ ndipo palibe munthu omwe angatiperekere nsembe imweyi. (Werengani Wahebereu 13:15. *) Kodi Yahova ambafuna kuti ali-wense wa ifepano ambapereke mitawiro yakundendemerana? Ne na pang’onopo!
4 Yahova ambadziwa kuti wanthufe tina luso na cikhalidwe cakusiyana-siyana, napo bziri tenepo, iye ambatenda kwene-kwene nsembe zomwe timbapereka kwa iye. Kumbukirani bza nsembe zomwe iye adabvuma zakucokera kwa Ajirayeri. Mwa ciratizo, Ajirayeri winango akhakwanisa kupereka mwana wa bira ayai tonde. Koma Mjirayeri omwe akhali wakusauka akhapereka ‘njiwa ziwiri ayai wana awiri wa nkhangaiwa.’ Ndipo Mjirayeri omwe akhakwanisa lini kupereka mbalame ziwiri, Yahova akhabvuma ‘ufa bwakunyodoka bwakukwana gawo libodzi la magawo khumi.’ (Mwambo 5:7, 11) Ufa bukhali bwakufewera kwene-kwene, koma bukakhala ‘bwakunyodoka’ bwino Yahova akhatenda kwene-kwene nsembe ninga imweyi.
5 Nsiku zino Yahova ambawonambo bzibodzi-bodzi. Tenepo, tikambapereka mitawiro pa mitsonkhono, iye ambadikhira lini kuti tense tilewe-lewe ninga momwe akhacitira Apolo ayai mpostolo Paulo. (Mabasa 18:24; 26:28) Yahova ambafuna kuti tense timbapereke mitawiro yabwino ninga momwe tingakwanisire. Kumbukirani bza mkazi mansiwa omwe adapereka tukobiri tuwiri twakucepa mphanvu. Yahova adamutenda kwene-kwene thangwe iye adapereka bzense bzomwe akhanabzo.—Luka 21:1-4.
Kupereka mitawiro pa mitsonkhano kumbabweresa phindu kwa nyakuiperekayo na omwe ambatetekera (Onani pa ndime 6-7) *
6. (a) Mwa kubverana na Wahebereu 10:24, 25, kodi mitawiro yomwe timbabva pa mitsonkhano imbatitokonyani tani? (b) Kodi mungalatize tani kutenda kwanu pa mitawiro yakulimbisa?
6 Timbalimbisana tikambapereka mitawiro pa mitsonkhano. (Werengani Wahebereu 10:24, 25. *) Tensenefe timbakomedwa kwene-kwene tikambabva mitawiro yakusiyana-siyana pa mitsonkhano yathu. Tembakomedwambo na mitawiro yomwe wana ambaipereka na mafala yawo-yawo. Timbalimbisidwa na mitawiro ya munthu omwe akupfunza cadidi ca m’Bibliya. Ndipo timbadabwa na wale omwe ambacita nyongo yakupereka mitawiro, napo mbamanyazi ayai akupfunza cirewedwe cathu. (1 Watesalonika 2:2) Kodi tingalatize tani kuti tikutenda nyongo yawo? Cakuyamba tin’funika kumbawatenda pambuyo pa mitsonkhano thangwe ra mitawiro yawo yakulimbisa. Caciwiri ifepano tin’funikambo kumbapereka mitawiro. Tenepo, tin’funika lini kumbandodikhira kutambira cilimbiso pa mitsonkhano yathu, koma timbaperekembo cilimbisoco.—Waroma 1:11, 12.
7. Kodi kupereka mitawiro kumbakhala na phindu liponi?
7 Kupereka mitawiro pa mitsonkhano kumbakhala na phindu kwa nyakuperekayo. (Zaiya 48:17) Mwanjira iponi? Cakuyamba, tikakhala na cakulinga cakumbapereka mitawiro pa mitsonkhano, timbafunika kuikonzekera bwino. Tikambakonzekera bwino, timbakwanisa kubvesesa fala Mulungu. Ndipo tikabvesesa, bzimbakhala bzakusaya kunesa kuphatisa basa bzomwe tapfunzabzo. Caciwiri, timbakomedwa kwene-kwene na mitsonkhano thangwe timbatengambo mbali pa mitsonkhanoyo. Cacitatu, pakuti pambafunika nyongo kuti timbapereke mitawiro, tenepo, pambuyo pa mitsonkhano timbakumbukira nfundo zomwe tazipereka pa mitsonkhanoyo.
8, 9. (a) Mwa kubverana na Malakiya 3:16, kodi Yahova ambabzibva tani na mitawiro yathu? (b) N’thangwe ranyi winango ambapereka lini mitawiro pa mitsonkhano?
8 Timbakondwesa Yahova tikambafokoza bza cikhulupiro cathu pa mitsonkhano. Tinkupenukira lini kuti Yahova ambatibva ndipo ambatenda kwene-kwene nyongo yomwe timbacita yakupereka mitawiro pa mitsonkhano. (Werengani Malakiya 3:16. *) Iye ambatitenda ndipo ambatisimba tikacita nyongo yakumukondwesa.—Malakiya 3:10.
9 Kulewa cadidi, ifepano tina mathangwe yakubveka yomwe yambaticitisa kupereka mitawiro pa mitsonkhano. Koma napo bziri tenepo, winango ambacita mantha kuimisa boko. Penu imwepo ndimwe m’bodzi wa iwo, lekani kutaya mtima. Bwerani tiwone mitemo ya m’Bibliya, na bziratizo bzomwe bzingatithandize kuti timbapereke mitawiro pa mitsonkhano.
LEKANI KUMBACITA MANTHA
10. (a) Kodi ni mantha yaponi yomwe azinji wa ifepano tinayo? (b) Kodi kucita mantha kupereka mitawiro pa mitsonkhano kumbalatiza khalidwe liponi?
10 Kodi m’mimba mwanu mumbabvunduka mukafuna kuimisa boko lanu kuti mupereke mtawiro pa mitsonkhano? Penu bziri tenepo, dziwani kuti ndimwe lini mwekha. Cadidi n’cakuti azinji wa ifepano timbacita mantha tikambapereka mitawiro. Mukanati kumalisa bvuto lanu, cakuyamba mun’funika kuzindikira bzinthu bzomwe bzimbakucitisani mantha mukambapereka mitawiro. Kodi imwepo mumbacita mantha thangwe ra kuyebwa bzomwe mumbafuna kulewa ayai thangwe ra kukumbuka kuti munilewa bzinthu bzakuphonyeka? Kodi mumbacita thupo kuti mtawiro wanu un’dzabveka lini bwino ninga momwe winango ambatawirira? Mantha ninga yamweya, yangakhale cizindikiro cabwino. Yangalatize kuti imwepo ndimwe wakubzicepswa nakuti mumbawona winango kukhala wakukuposani. Yahova ambafuna wanthu wa khalidwe limweri. (Psalymo 138:6; Wafiripo 2:3) Koma iye ambafunambo kuti mumutumbize na kulimbisa abale na mpfumakazi zanu pa mitsonkhano. (1 Watesalonika 5:11) Iye ambakufunani ndipo an’dzakupasani cilimbiso cakufunikira.
11. Kodi bzinembo bza m’Bibliya bzingatithandize kukumbukira ciyani?
11 Onani bzomwe Bzinembo bza m’Bibliya bzambatikumbusa. Bibliya limbalewa kuti tensenefe timbaphonya m’mafala na kalewelewedwe. (Tiyago 3:2) Tsono Yahova ambadikhira lini kuti ifepano tikhale wakulungamiratu, ne pa bzomwe abale na mpfumakazi ambacita. (Psalymo 103:12-14) Abalewo mba uzimu ndipo ambatifuna kwene-kwene. (Marko 10:29, 30; Juwau 13:35) Iwo ambadziwa kuti nthawe zinango mitawiro yathu imbabveka lini bwinoletu ninga momwe tikhafunira.
12-13. Kodi tikupfunza ciyani na ciratizo ca Nehemiya na Djona?
12 Kumbukirani bziratizo bza m’Bibliya bzomwe bzingakuthandizeni kuleka kumbacita mantha kupereka mitawiro. Ciratizo cakuyamba n’ca Nehemiya. Iye adatumikira m’nyumba ya mphala ya mambo. Pomwe Nehemiya adabva kuti litsito la mzinda wa Jeruzalemu likhadadzongeka adasunama kwene-kwene. (Nehemiya 1:1-4) Kodi munkukumbukira thupo na mantha yomwe Nehemiya adakhala nayo pomwe mambo adamubvunza kuti amuuze thangwe ranyi akhadasunama? Nehemiya akanati kupereka mtawiro, cakuyamba adapemba kwa Yahova. Ninga bzakutewera bzace, mambo adacita bzinthu bzizinji kuti athandize wanthu wa Mulungu. (Nehemiya 2:1-8) Ciratizo caciwiri, n’ca Djona. Pomwe Yahova adamuuza kuti ayende kukauza mafala ya ciyeruzo wanthu wa m’mzinda wa Ninive, Djona adacita mantha ndipo adathawira ku mzinda munango. (Djona 1:1-3) Koma na thandizo la Yahova, Djona adadzayenda kukapalizira wanthu wa ku Ninive. Ndipo mafala yomwe iye adauza wanthuwo yadawatokonya kwene-kwene. (Djona 3:5-10) Na ciratizo ca Nehemiya, tikupfunza kuti tin’funika kumbapemba tinati kupereka mtawiro. Ndipo na ciratizo ca Djona, tikupfunza kuti Yahova angatithandize kuti timutumikire napo tikagumana na bzinthu bzakupasa mantha. Tenepo, tin’funika lini kumbawona kupereka mitawiro pa mitsonkhano ya gwere, kukhala kwakunesa ninga momwe akhali wanthu wa ku Ninive.
13 Kodi n’ciyani comwe cingakuthandizeni kuti mumbapereke mitawiro yakulimbisa pa mitsonkhano? Bwerani tiwone malango yomwe yangakuthandizeni.
14. Thangwe ranyi tin’funika kumbakonzekera bwino mitsonkhano yathu, ndipo ni lini pomwe tingakonzekere?
14 Mbakonzekerani mbali zense za mitsonkhano. Kutetekera na kukonzekera bwino mitsonkhano, kun’dzakucitisani kukhala wakutsudzuka kupereka mitawiro pa mitsonkhanoyo. (Mimwani 21:5) Kulewa cadidi, tensenefe timbakonzekera mitsonkhano nthawe zakusiyana-siyana. Mwa ciratizo, mpfumakazi inango yomwe ni mansiwa yakucemeredwa Eloise, ya magole pafupi-fupi 80, imbayamba kukonzekera pfunziro la Nsanza ya Mulindiri kumayambiriro kwa mdzinga. Mpfumakaziyo idalewa kuti: “Ndikakonzekera mitsonkhano ndimbakomedwa kwene-kwene.” Ndipo mpfumakazi inango yakucemeredwa Joy, yomwe imbaphata basa lakunembedwa, idalewa kuti, imbapambula nthawe pa nsiku ya Malinkhuma kuti ikonzekere pfunziro la Nsanza ya Mulindiri. Iyo idati: “Bzimbandinesa lini kukumbukira mbali za mtsonkhano ndikapfunza mbalizo mtsonkhanoyo ukanati kuyamba.” Ike, omwe ni mkulu wa gwere ndipo ankutumikirambo ninga mpainiya, adati: “Kwa ine ndimbawona kuti bziri bwino kumbapambula kanthawe kakucepa mkati mwa mdzinga kuti ndimbakonzekere mitsonkhano, m’mbuto mwa kudikhira kudzakonzekera bzense kabodzi na kabodzi.”
15. Kodi mungakonzekere tani mitsonkhano?
15 Kodi kukonzekera bwino mitsonkhano kumbaphatanidza ciyani? Mukanati mwayamba pfunziro lanu, nthawe zense mbakumbirani Yahova mu mpembo kuti akupaseni mzimu wakucena. (Luka 11:13; 1 Juwau 5:14) Patsogolo pace onani bzense bzomwe bziri mkati mwa nkhaniyo. Mwa ciratizo, mbawonani msolo wa nkhani, tumisolo tung’ono-tung’ono, mathere na kwadru zomwe ziri mkati mwace. Ndipo mukayamba kupfunza ndime ibodzi na ibodzi, mbawerengani mavesi yense yomwe yali mu nkhaniyo. Mumbakumbukire bza nkhaniyo, ndipo mbakonzekerani bwino ndime zomwe mungakapereke mitawiro. Tenepo, mukambakonzekera bwino, mun’dzagumana phindu ndipo mun’dzaneseka lini kupereka mitawiro yanu.—2 Wakolinto 9:6.
16. Kodi ni bzinthu bziponi bzomwe tingaphatise basa pa kukonzekera mitsonkhano?
16 Bzikakwanisika phatisani basa mitcini ya nzeru ayai tablet kuti mugumane mabukhu yomwe yalipo pa interneti m’cirewedwe canu. Yahova mwakuphatisa basa gulu lace, ambatipasa mabukhu yomwe yambagumanika pa interneti kuti yambatithandize kukonzekera bwino mitsonkhano. Mwa ciratizo, na programa ya JW Library timbakwanisa kucosa mabukhu yakupfunza m’mitedwe ya m’manja. Ndipo tikamala kuyacosa timbayawerenga, kubvesera nkhani zace pa nthawe na mbuto iri-yense yomwe tingafune. Winango ambaphatisa basa programa imweyi pa kucita pfunziro lawo pa nthawe yakupuma kubasa, ku xikola ayai akakhala pa ulendo. Ndipo programa ya Watchtower Library na BIBLIOTEKA YA PA INTERNETI ya Watchtower imbatithandiza pa kufufudza nfundo zomwe tikupfunza kuti tizibvesese bwino.
Kodi ni nthawe iponi yomwe mumbakonzekera mitsonkhano? (Onani pa ndime 14-16) *
17. (a) Thangwe ranyi mpsakufunika kukonzekera mitawiro mizinji? (b) Kodi n’ciyani comwe imwepo mudapfunza na vidiyo yakuti Khala Xamwali wa Yahova—Mbakonzekereni Mitawiro Yanu?
17 Mbakonzekerani mitawiro mizinji pa pfunziro liri-lense. Thangwe ranyi mpsakufunika? Thangwe winango an’dzaimisambo boko lawo pa mtawiro omwe imwepo mwakonzekera, ndipo m’bale omwe akucitisa pfunzirolo angadzalate m’bodzi wa iwo, ndipopa ni nthawe lini zense zomwe mungalatidwe kuti mupereke mtawiro mukaimisa boko lanu. Ndipo kuti mitsonkhano imale na nthawe yabwino, nyakucitisa pfunziro angakhale na malire ya mitawiro yomwe ingaperekedwe. Koma mun’funika lini kusunama ayai kutaya mtima penu nyakucitisayo alibe kukulatani kumayambiriro kwa pfunzirolo. Tenepo, mukambakonzekera mitawiro mizinji, mun’dzakhala na mpata wa kupereka mitawiro mizinji pa pfunzirolo. Ndipo mbali inango yomwe mun’funika kuikonzekera, ni kuwerenga mavesi. Koma mun’funika kukonzekera mitawiroyo kuti mukaipereke na mafala yanu-yanu. *
18. Thangwe ranyi mpsakufunika kumbapereka mitawiro ifupi?
18 Mbaperekani mitawiro ifupi. Kawiri-kawiri mitawiro yakulimbisa imbakhala ifupi. Tenepo, khalani na cakulinga cakumbapereka mitawiro ifupi. Citani nyongo kuti mumbapereke mitawiro yanu m’tumphindi 30. (Mimwani 10:19; 15:23) Penu imwepo muna magole mazinji mukupereka mitawiro pa mitsonkhano, dziwani kuti muna udindo bukulu bwa kukhala ciratizo cabwino ca kumbapereka mitawiro ifupi. Tsono mukambafotokoza bzinthu bzizinji bzomwe bzingakucitiseni kudya mphindi zizinji, bzin’dzacitisa winango kucita mantha kupereka mitawiro yawo, acikumbuka kuti iwo an’kwanisa lini kufotokoza bzinthu ninga momwe mumbacitira. Tenepo, mitawiro ifupi imbacitisa kuti wanthu azinji akhale na mpata wakupereka mitawiro pa mitsonkhano. Ndipo nyakucitisa pfunziro akakulatani pakuyamba, perekani mtawiro ufupi na wakulondoza mwakubverana na mbvunzo. Tcenkhani kufotokoza nfundo zense zomwe ziri pa ndime. Ndipo nfundo ikulu ya ndimeyo ikamala kufotokozedwa, mungakhale wakutsudzuka kufotokoza nfundo zinango za ndimeyo.—Onani kwadru yakuti “ Bzomwe Ndingalewe pa Mtawiro Wangu.”
19. Kodi mun’funika kucita ciyani penu muna nfundo yakufotokoza pa ndime inango?
19 Penu muna nfundo yakufotokoza pa ndime inango dziwisani nyakucitisa pfunziro kukana nthawe. Penu mwakonzekera kudzafotokoza nfundo inango, uzani nyakucitisa pfunzirolo mitsonkhano ikanati kuyamba. Ndipo nthawe yakuti mufotokoze nfundo yanu pa ndimeyo ikakwana, imisani boko lanu ndipo citisani kuti nyakucitisayo akuwoneni.
20. Thangwe ranyi mitsonkhano ya gwere iri ninga cakudya cakucokera kwa xamwali wa pa mtima?
20 Mbawonani mitsonkhano ya gwere ninga cakudya cakucokera kwa xamwali wa pa mtima. Yezezerani kuti axamwali wanu wa m’gwere akonza madyo, ndipo akuuzani kuti pakuyenda ku madyoko munyamule cakudya comwe mungakwanise, kodi mungadabzibva tani? Pinango mungadakhala na thupo, koma napo bzingadakhala tenepo, mungadacita bzomwe mungadakwanisa kuti munyamule cakudya ciri-cense comwe munthu ali-wense angadakakomedwa naco. Yahova, omwe ambatikonzera mitsonkhano, ambatipasa bzinthu bzizinji bzabwino pa mitsonkhanoyo. (Psalymo 23:5; Mateu 24:45) Ndipo iye ambakomedwa kwene-kwene tikambanyamula nsembe yakucepa pakuyenda ku mitsonkhano. Tenepo, mbakonzekerani bwino ndipo mbakhalani wakutsudzuka kupereka mitawiro momwe mungakwanisire. Mukacita bzimwebzi mun’dzandodya lini pa meza ya Yahova, koma mun’dzabweresambo mphaso kuti mugawane na gwere lense.
NYIMBO 2 Dzina Lanu Ndimwe Yahova
^ ndi. 5 Ninga nyakunemba bukhu la Psalymo, Davide, tensenefe timbafuna Yahova ndipo timbamutumbiza. Tina mwayi ukulu wa kulatiza lufoyi lathu kwa Yahova tikambapereka mitawiro pa mitsonkhano ya gwere. Tsono winango wa ifepano ambaneseka kupereka mitawiro pa mitsonkhano. Penu imwepo ndimwe m’bodzi wa iwo, nkhani ino inkuthandizani kuwona thangwe ranyi mumbacita mantha kupereka mitawiro nakuti mungacite tani kuti mumalise bvutolo.
^ ndi. 3 Wahebereu 13:15 Mwa iye tipitirize kupereka kwa Mulungu nsembe za citumbizo, zomwe ni bzisapo bza miromo yathu yomwe imbadziwisa padeca dzina lace.
^ ndi. 6 Wahebereu 10:24 Ndipo bwerani timbakumbukirane kuti tilimbisane pa lufoyi na pa mabasa yabwino. 25 Tireke kusiya kutsonkhana kwathu pabodzi ninga momwe winango ambacitira, koma timbalimbisane maka-maka pomwe tinkuwona kuti nsikuyo inkufika.
^ ndi. 8 Malakiya 3:16. Pa nthawe imweyo, wanthu wakugopa Yahova, ali-wense akhambauza mwanzace, ndipo Yahova akhakhala tceru, acimbatetekera. Ndipo bukhu la cikumbuso lidayamba kunembedwa pa maso pace. Bukhulo likhalewa bza wanthu wakugopa Yahova pabodzi na wanthu omwe akhambakumbukira bza dzina lace.
^ ndi. 17 Pa jw.org, pana vidiyo yakuti Khala Xamwali wa Yahova—Mbakonzekereni Mitawiro Yanu. Pitani pomwe padanemba kuti MAPFUNZISO YA M’BIBLIYA > WANA.
^ ndi. 66 BZOMWE BZINKUCITIKA PA CITHUNZI-THUNZI: Abale wa m’gwere ankuimisa manja kuti apereke mitawiro pa pfunziro la Nsanza ya Mulindiri.
^ ndi. 68 BZOMWE BZINKUCITIKA PA CITHUNZI-THUNZI: Abale winango wa m’gwere ankukonzekera pfunziro la Nsanza ya Mulindiri kuti akakwanise kupereka mitawiro. Napo kuti ali-wense wa iwo ali pa mkhalidwe wakusiyana na winango, iwo apambula nthawe kuti akonzekere mbali zense za mitsonkhano.
