Timbabvere Nsisi ‘Wanthu wa Mkhalidwe Uli-Wense’
POMWE Jezu adapfunzisa apostolo wace momwe angadapalizirira bzipsa bzabwino, iye adawauza kuti ni wanthu lini wense omwe angadawatetekera. (Luka 10:3, 5, 6) Bzimwebzi bzimbacitikambo na ifepano nsiku zino. Ndipo wanthu winango omwe timbagumana nawo mu utumiki bwakumunda ambatitawira kuipa ayai ambakhala wa ukali. Tsono tikagumana na wanthu ninga amwewa, bzingakhale bzakunesa kuwalatiza nsisi ndipo pinango tingafune lini kuwapalizira.
Munthu wa nsisi ni ule omwe ambakwanisa kuwona bzakusaya bza winango pabodzi na mabvuto yawo ndipo ambawabvera nsisi, aciwathandiza. Tsono n’ciyani comwe cingacitike tikaleka kumbabvera nsisi wanthu omwe timbagumana nawo mu utumiki bwakumunda? Bzomwe bzingacitike mpsakuti tingasiye kumbacita nyongo ayai kukhala na cikhumbo cakufuna kupalizira wanthuwo, ndipo tin’dzakwanisa lini kuwathandiza. Tingandendemezere nyongo yathu na moto. Kuti uleke kuthima, moto umbafunikira mphepo izinji. Mpsibodzi-bodzimbo na ifepano, kuti nyongo yathu ireke kumala, tin’funika kukhala wa nsisi!—1 Watesalonika 5:19.
Kodi tingacite ciyani kuti tipitirize kulatiza nsisi, napo bzicikhala bzakunesa? Bwerani ticezerane bziratizo bza wanthu atatu omwe tingawatewezere Yahova, Jezu na mpostolo Paulo.
TIMBATEWEZERE NSISI ZA YAHOVA
Wanthu ankunamizira Yahova kwa magole mazinji, tsono napo bziri tenepo, iye ankupitiriza kukhala wabwino ‘kwa anyakusaya kutenda na anyakuipa.’ (Luka 6:35) Kodi iye ambacita tani bzimwebzi? Iye ambapirira na munthu ali-wense, ndipo ambacita bzimwebzi thangwe akufuna kuti ‘wanthu wa mkhalidwe uli-wense’ adzapulumuke. (1 Timotio 2:3, 4) N’cadidi kuti Mulungu ambaipidwa na bzinthu bzakuipa, tsono iye ambafuna kwene-kwene wanthu wense ndipo ambafuna lini kuti ali-wense wa iwo adzapfudzidwe.—2 Pedru 3:9.
Yahova ambadziwa kuti Sathani ni xaxa pakucitisa wanthu kukhulupira magunkha. (2 Wakolinto 4:3, 4) Ndipo wanthu azinji ambabva magunkha yakulewa bza Mulungu kuyambira ali ang’ono. Bzimwebzi bzimbawacitisa kuti aneseke kubvuma cadidi ca m’Bibliya. Tsono napo bziri tenepo, Yahova ambafunisisa kuthandiza wanthu ninga amwewa. Kodi tin’dziwa tani bzimwebzi?
Kumbukirani momwe Yahova akhawonera wanthu wa mu mzinda wa Ninive. Napo kuti wanthuwo akhali wa ciwembo, Yahova adauza Djona kuti: ‘Kodi ndin’funikambo lini kubvera nsisi Ninive, mzinda ukulu, omwe una wanthu wakupitirira 120.000, omwe an’dziwa lini kusiyanisa cabwino na cakuipa?’ (Djona 4:11) Yahova adabvera nsisi wanthuwo, thangwe iwo akhadziwa lini cadidi pakulewa bza iye. Ndipopa iye adatumiza Djona kuti akawacenjeze.
Ifepano tingatewezere nsisi za Yahova mwa kumbawona wanthu kukhala wakufunika kwene-kwene. Bzimwebzi bzin’dzaticitisa kuti tithandize wanthuwo kuti apfunze cadidi ca Yahovayo, napo bzingawoneke kuti iwo ankufuna lini kubva cadidico.
TIMBATEWEZERE NSISI ZA JEZU
Ninga Baba wace, Jezu akhabverambo nsisi wanthu ‘thangwe wanthuwo akhali wakunyuka-nyuka na wakumwazika ninga mabira yakusaya m’busa.’ (Mateu 9:36) Iye akhadziwa kuti wanthuwo akhali pa mkhalidwe umweule thangwe rakuti atsogoleri wa cipembedzo akhawacitira bzinthu bzakuipa na kuwapfunzisa bzakunama. Ndipo Jezu akhadziwa kuti azinji omwe akhamutetekera, angadakhala lini ateweri wace thangwe ra bzinthu bzakusiyana-siyana, tsono napo bzikhali tenepo, iye adapitiriza kuwapfunzisa bzinthu bzizinji.—Marko 4:1-9.
Lekani kumbasunama munthu akasaya kukubveserani pa ulendo bwakuyamba
Wanthu winango ambadzabvuma cadidi ca m’Bibliya akagumana na mabvuto
Wanthu akambalamba kutetekera mafala yomwe timbawapalizira, cakuyamba tin’funika kudziwa thangwe lomwe ankulambira. Pinango iwo ana makumbukidwe yakuphonyeka pakulewa bza Bibliya ayai bza Akristau ndipo pinango iwo ambawona wanthu winango omwe ambabziti Akristau ankucita bzinthu bzakuipa. Ndipo winango pinango adabva magunkha yakulewa bza ife, pomwe winango angafune lini kutitetekera thangwe ra kugopa kuti azibale wawo ayai anzawo aniwaseka.
Wanthu winango omwe timbagumana nawo mu utumiki bwakumunda ambafuna lini kuceza nafe bza Bibliya thangwe ra mabvuto yomwe adagumana nayo. Mwa ciratizo, mpfumakazi inango yakucemeredwa Kim yomwe ni misiyonaria idalewa kuti azinji wa mu gawo lace ni wanthu omwe adathawa nkhondo ndipo adaluza bzinthu bzizinji bzomwe akhanabzo. Iwo alibe cidikhiro ciri-cense pakulewa bza kutsogolo, ndipopa iwo mbakusunama ndipo ambakhulupira lini munthu ali-wense. Wanthu wa m’gawo limweri ambafuna lini kutetekera Mboni za Yahova, ndipo nsiku inango pomwe Kim akhali mu utumiki bwakumunda adamenyedwa.
Kodi n’ciyani comwe cimbacitisa Kim kupitiriza kubvera nsisi wanthuwo, napo kuti iwo ambamucitira bzinthu bzakuipa? Ni kumbakumbukira mafala ya pa Mimwani 19:11, yomwe yambati: ‘Kuzindikira kwa munthu kumbamucitisa kubweza ukali bwace.’ Ndipo cinthu cinango comwe cimbamuthandiza ni kumbakumbukira bzomwe wanthuwo adagumana nabzo pabodzi na wanthu omwe ambamutetekera akambawapalizira mu utumiki bwakumunda. Ndipo mu gawo limweri iye ana maulendo yakubwereza.
Tingabzibvunze kuti: ‘Bzingadakhala kuti ndimbadziwa lini cadidi, kodi n’ciyani comwe ndingadacita Mboni za Yahova zingadabwera kudzandipalizira?’ Ndipo tani bzingadakhala kuti tidabva nkhani zizinji zakunama pakulewa bza Mboni za Yahova? Pinango tingadatetekerambo lini mafala yomwe tingadapaliziridwa ndipo tingadafunambo kuti atibvere nsisi. Jezu adalewa kuti bzomwe tin’funa kuti wanthu aticitire, ifepano tin’funika kumbawacitirambo bzibodzi-bodzibzo. Tenepo tin’funika kumbapirira, ticicitambo nyongo yakubvesesa momwe winango ankubvera, napo bzicikhala bzakunesa.—Mateu 7:12.
TIMBATEWEZERE NSISI ZA PAULO
Mpostolo Paulo akhalatiza nsisi napo kwa wanthu omwe akhafuna lini na pang’onopo kubva bzomwe iye akhapalizira. N’thangwe ranyi? Thangwe ndakuti iye akhakumbukira bzomwe akhacitambo pomwe akhanati kupfunza cadidi. Iye adati: ‘Pakuyamba ndikhanyoza Mulungu, kuzunza na kunyoza wanthu wace. Koma ndidacitiridwa nsisi thangwe ndikhacita bzinthu mwakusaya kudziwa ndipo ndikhalibe cikhulupiro.’ (1 Timotio 1:13) Paulo adazindikira kuti Yahova pabodzi na Jezu akhadamubvera nsisi, ndipopa iye akhakwanisa kubvesesa wanthu omwe akhatsutsa basa lace lakupalizira thangwe ndibzo bzomwe iye akhacitambo pakuyamba.
Nthawe zinango Paulo akhagumana na wanthu omwe akhakhulupira bzipfunziso bzakunama. Kodi iye akhabva tani na bzimwebzi? Pa Mabasa 17:16, pambafotokoza kuti pomwe iye akhali ku Atena, ‘adawawidwa kwene-kwene mu mtima pomwe adawona kuti mzindayo ukhadadzala na bzifanikiso.’ Tsono mwa luso, Paulo adaphatisa basa bzifanikisobzo ninga njira ibodzi yakupalizirira wanthu wa mu mzindayo. (Mabasa 17:22, 23) Paulo akhafuna kupalizira wanthu wense, tenepo, iye akhambacinja-cinja kapaliziridwe kace kuti kabverane na wanthu wakusiyana-siyana na cakulinga cakuti adzapulumuse winango.—1 Wakolinto 9:20-23.
Tikagumana na wanthu omwe an’funa lini kubva bzipsa bzabwino ayai omwe ambakhulupira bzinthu bzakunama, tingacite bzomwe mpostolo Paulo adacita. Ndipo tingaphatise basa bzinthu bzomwe iwo ambabzidziwa kale kuti tiwapalizire ‘bzipsa bzabwino pa cinthu comwe n’cabwino.’ (Zaiya 52:7) Mpfumakazi inango yakucemeredwa Dorothy idati: “M’gawo lathu, wanthu azinji ambakhulupira kuti Mulungu ngwakuuma mtima ndipo ngwakuipa. Tsono ndikambawapalizira cakuyamba ndimbawatenda thangwe ra kukhulupira kuti Mulungu alipo, pambuyo pace ndimbawalatiza bzomwe Bibliya limbalewa bza makhalidwe yabwino yomwe Yahova anayo na tsogolo labwino lomwe iye ankupicira.”
‘PITIRIZANI KUKUNDA CAKUIPA MWA KUCITA CABWINO’
Pakuti tinkufika kuphampha kwa dzikoli, tingadikhirire kuti makhalidwe ya wanthu azinji yaniipiratu. (2 Timotio 3:1, 13) Tsono napo bziri tenepo, mbatipitirizeni kukhala wakukondwa ticipitiriza kumbalatiza nsisi, ndipo Yahova an’dzatipasa mphanvu kuti tipitirize ‘kukunda cakuipa mwa kucita cabwino.’ (Waroma 12:21) Mpainiya munango wakucemeredwa Jessica adalewa kuti: “Pomwe tinkupalizira, kawiri-kawiri ifepano timbagumana na wanthu wakubzikuza omwe ambanyoza ifepano pabodzi na basa lathu lakupalizira. N’cadidi kuti bzimbanesa kupalizira wanthu amwewa, koma pomwe ndinkuwapalizira, ndimbapemba kwa Yahova ca mu mtima ndipo ndimbakumbira kuti iye andithandize kuwona munthu omwe ndinkuceza nayeyo ninga momwe iye ambamuwonera. Bzimwebzi bzimbandithandiza kuwona momwe ndingathandizire munthuyo, m’mbuto mwa kumbakumbukira bzomwe iye wacita ayai walewa.”
Mbatipitirizeni kunyang’ana wanthu omwe an’funa kudziwa cadidi
Na kupita kwa nthawe wanthu winango angadzabvume thandizo lathu, acipfunza cadidi
Tin’funikambo kumbalimbisa abale na mpfumakazi zathu tikambapalizira nawo pabodzi. Ndipo bzimwebzi ndibzo bzomwe Jessica ambacita. Iye adalewa kuti: “Tikagumana na munthu omwe alibe kutitambira bwino mu utumiki, ndimbacita nyongo yakulimbisa anzanguwo m’mbuto mwakumbakumbukira bzomwe bzaticitikirabzo. Ndipo ndimbayambisa maceza yakulimbisa yakulewa bzakutewera bzabwino bzomwe bzimbabwera tikambapitiriza kupalizira napo penu wanthu winango an’funa lini kutibvesera.”
Yahova ambadziwa kuti nthawe zinango bzimbatinesa kupalizira, koma iye ambadekedwa kwene-kwene tikambabvera nsisi wanthu ninga momwe iye ambacitira. (Luka 6:36) Tsono iye an’dzapitiriza lini kubvera nsisi wanthu mpaka kale-kale, ndipo tingakhale na citsimikizo cense cakuti pa nthawe yace, iye an’dzacita ciri-cense pa nkhaniyi. Koma pomwe nthaweyo ikanati kufika, mbatipitirizeni kupalizira wanthu wense. (2 Timotio 4:2) Ndipo bwerani timbapalizire na nyongo, ticimbabvera nsisi ‘wanthu wa mkhalidwe uli-wense.’
