Inepano ndidabadwa mu gole la 1954 mu mzinda wa Saint Paul, Minnesota, EUA. Ndidabadwira m’banja la cikatolika lomwe likhalibe kusauka ne kudala ndipo ndine mwana waciwiri pa wana axanu. Pomwe ndikhali mwana ndidapfunza xikola yacikatolika ndipo ndikhathandizira misinda yomwe apadre akhacita. Napo bzikhali tenepo, inepano ndikhadziwa pang’ono bza Bibliya. Ndipo napo kuti ndikhakhulupira kuti alipo Mulungu omwe adalenga bzinthu bzentse, koma ndikhakhulupira lini bzomwe gerejayo ikhapfunzisa.

Mu gole lakuyamba pomwe ndikhacita mapfunziro yakulewa bza ufulu bwa wanthu, banja libodzi la Mboni za Yahova lidandizungira kumui kwangu. Pakuti inepano ndikhadatanganidwa thangwe ra kufula bzakubvala, ndidakumbira banjalo kuti lidzandibwerere pomwe ntsiku inango ndipo iro mwakudeka mtima lidabvuma bzimwebzo. Pomwe banjalo lidandibwerera pomwe ndidalibvunza mibvunzo miwiri: “Thangwe ranyi wanthu wakuipa ambawoneka kuti moyo ukuwafambira bwino kusiyana na wanthu wabwino?” “Kodi n’ciyani comwe tingacite kuti tikhale wakukondwa?” Adandipasa bukhu lakuti A Verdade Que Conduz à Vida Eterna na Baibulo la Dziko Latsopano la Malemba Opatulika lomwe likhana tsamba lakuyamba la cor ya verde. Ndipo ndidabvuma kupfunza Bibliya. Kupfunzako kudandithandiza kubvesesa bzinthu bzizinji bzomwe ndikhabzidziwa lini. Ndidakomedwa kwene-kwene thangwe ra kupfunza kuti Umambo bwa Mulungu bun’dzatonga dziko la pantsi. Ndipo  ndidabvesesa kuti magole ya utongi bwa wanthu yacitisa kuti pa dziko la pantsi pawoneke mabvuto yakusiyana-siyana, kubonera, kusaika kwa cirungamo na ngozi.

Inepano ndidabzipereka kwa Yahova mu gole la 1982, ndipo ndidabatizidwa pomwe padapita minyezi ming’ono-ng’ono pa mtsonkhano wa cigawo omwe ukhana msolo wakuti “A Verdade do Reino”, ndipo mtsonkhanoyo udacitikira ku Centro Cívico ya ku Saint Paul. Pa mdzinga wakutewera ndidadzabwerera pomwe kumweko kuti ndikacite mayezo yakuti ndiwonewe penu ningathemere kukhala wazamalamulo. Kumayambiriro kwa mwezi wa Outubro ndidadziwisidwa kuti ndikhadapasali mayezoyo, ndipo ningadayamba kuphata basa ninga wazamalamulo.

Pa mtsonkhano wa cigawo wakuti “A Verdade do Reino”, ndidadziwana na Mike Richardson. Iye akhatumikira pa Beteli ya ku Brooklyn, ndipo adandifotokozera kuti angadafungula cipinda ca zamalamulo ku Beteli ya ku Brooklyn. Inepano ndidakumbukira mafala ya nduna ya ku Etiyopia yomwe yali pa Mabasa 8:36, ndipo ndidabzibvunza kuti: ‘Kodi n’ciyani cikunditazisa kakutumikira ku Beteli mu cipinda ca zamalamulo?’ Tenepo, ndidadzaza formulariyo yakuti ndikatumikire ku Beteli.

Pomwe ndidakhala Mboni ya Yahova abereki wangu alibe kukomedwa na pang’onopo. Pai wangu adandibvunza kuti kutumikira pa Beteli ninga wazamalamulo kungadandibweresera phindu lanyi? Inepano ndidawafotokozera kuti basa langu la pa Beteli lingadakhala lakucita kubzipereka, ndipo pa mwezi uli-wentse ningadatambira kobiri zakukwana 75 dólares (4.860,00 MT), zomwe abale wa pa Beteli akhathandizidwa nazo mwezi uli-wentse.

Pakuti ndikhaphata kale basa ninga wazamalamulo ku nyumba ya mphala, ndiribe kuyenda kukatumikira ku Beteli pa nthawe ibodzi-bodziyo, koma ndidadzayamba utumiki bwangu ku Beteli ya ku Brooklyn, Nova York, mu gole la 1984, mu Cipinda ca Zamalamulo. Cidziwiso comwe ndikhanaco pa basa langu, cidandikonzekeresa pa bzomwe bzingadadzabwera kutsogolo.

Nyumba ya stanley yakucitira masenzeka yomwe iri ku Jersey City, Nova Jersey, idagulidwa mwezi wa Novembro mu gole la 1983. Abale adakumbira kuti awabvumize kukonza papsa maluju na mbuto ya kucitira masenzekayo. Pomwe abale adagumana na akulu-akulu wa boma, abalewo adawauza kuti an’funa kuphatisa basa mbuto ya masenzekayo kuti acitire mitsonkhano ya Mboni za Yahova. Bzimwebzi bzidabweresa bvuto. Mwakubverana na malamulo ya mzinda wa Jersey, nyumba zakunamatira zikhafunika kumangidwa m’mii. Tsono Nyumba ya stanley yakucitira masenzeka ikhali pakati pa mui omwe wanthu akhacita malonda. Na thangwe limweri, akulu-akulu wa bomawo, alibe kubvumiza abalewo kuti aphatise basa mbutoyo. Abalewo adakumbira akulu-akuluwo kuti aikumbukire papsa nkhaniyo, koma iwo alibe kucinja makumbukidwe yawo.

 Pomwe ndidamala mdzinga ubodzi ku Beteli, gulu lidayenda na nkhaniyo ku nyumba za mphala. Pakuti inepano ndikhadamala kale magole mawiri ndikuphata basa mu nyumba ya mphala ku Saint Paul, Minnesota, inepano ndikhayadziwa bwino malamulo yakulewa bza nkhani imweyi. M’bodzi wazamalamulo wathu adalewa kuti Nyumba ya stanley yakucitira masenzeka, ikhadaphatisidwa kale basa pa bzakucitika bzakusiyana-siyana, kuyambira pa cakucitika ca kulatiza mavidiyo na nkhani za kuimba-imba. Tsono thangwe ranyi bzingadakhala bzakusaya kuthemera kucitira mitsonkhano pa mbutoyo? Nyumba ya mphala idaphata-phata nkhaniyo ndipo idalewa kuti bzomwe Jersey City akhadacita kukhali kutiphera ufulu bwathu bwakunamata. Nyumba ya mphalayo idauza wanthu wa mu mzindamo kuti akonze matsamba yakufunikira. Pamwepo ndiyamba kuwona kuti Yahova akusimba basa la Cipinda ca Zamalamulo ca gulu lace. Ndidakomedwa kwene-kwene thangwe ra kucitambo mbali pa nkhaniyo.

Abale adayamba kukonza-konza mbuto ya masenzekayo, ndipo msinda wakumaliza mapfunziro ya xikola ya Gileyade, turma ya 79, udakacitikira ku Jersey City m’nyumba yakucitira mitsonkhano mikulu-mikulu pa 8 Setembro, 1985. Ukhali mwayi kwa inepano kuthandizira basa lakuyendesa patsogolo Umambo bwa Mulungu. Bzimwebzi bzidandipasa cikondweso cikulu kwene-kwene kuposa basa lomwe ndikhaliphata ninga wazamalamulo pomwe ndikanati kukatumikira ku Beteli. Tsono inepano ndikhadziwa lini kuti Yahova angadandiphatisa pomwe basa kuti ndisamalire nkhani zinango zamalamulo.

M’magole ya 80, adotolo na nyumba zaulapi zikhalemekeza lini Mboni ya Yahova yacikulire ikakumbira kuti ilapidwe mwakusaya kuikhidwa mulopa. Kwa akazi omwe akhana pathupi, bzikhali bzakunesa kwene-kwene thangwe ayeruzi kawiri-kawiri akhakumbuka kuti akazi akhalibe ufulu bwakulamba kuikhidwa mulopa. Ayeruziwo akhalewa kuti penu mai anilamba kuikhidwa mulopa anifa ndipo mwana wace ankula ne mai.

Pa 29 Dezembro, 1988, mpfumakazi Denise Nicoleau pomwe idabereka idataya mulopa muzinji. Pakuti moyo wa mpfumakaziyo ukhawoneka kukhala pa ngozi, adotolo adamukumbira kuti amuikhe mulopa. Tsono mpfumakazi Denise iribe kubvuma. Mangwana yace, nyumba ya ulapi idakumbira ayeruzi kuti awabvumize kuikha mulopa mpfumakaziyo. Mwakusaya kudziwisa mpfumakazi Denise ayai bayace, muyeruzi adabvumiza nyumba ya ulapi kuti ikaikhe mulopa mpfumakaziyo.

Pa Cixanu, 30 Dezembro, adotolo wa nyumba ya ulapi adaikha mulopa mpfumakazi Denise. Iwo adacita bzimwebzi napo kuti bayace na wacibale winango omwe akhali ku mbali ya mpfumakaziyo akhafuna lini kuti iye aikhidwe mulopayo. Usiku bwace, wacibale azinji wa mpfumakazi Denise na m’bodzi ayai akulu awiri wa gwere adafungiridwa m’kawoko thangwe ra kupasidwa mulandu wakuti akhaletsa mpfumakazi  Denise kuti iyikhidwe mulopa. Macibese ya ntsiku ya Sabudu, pa 31 Dezembro, nkhani yakuti abale adaikhidwa m’kawoko ikhagumanika pa majornale, pa TV na pa bzikasi bza mphepo ku Nova York na ku Long Island.

Macibese ya ntsiku ya Ciposi, inepano ndidaceza na Milton Mollen, muyeruzi wa nyumba ikulu ya mphala. Ndidamufotokozera bzentse bzomwe muyeruzi adacita pakubvumiza kuti mpfumakazi ire iyikhidwe mulopa mwakusaya kuikhalira pantsi nkhaniyo. Muyeruzi Mollen adandikumbira kuti ndikaceze naye pomwe pa nthawe inango bza nkhaniyo pabodzi na malamulo yomwe yambabverana na nkhaniyo. Usiku inepano na muimikiri wangu Philip Brumley, tidayenda ku xikiritoriyo ya muyeruzi Mollen. Muyeruziyo akhadacemerambo omwe akhaimikira nyumba ya ulapi kuti adzagumanikembo pa nkhaniyo. Nkhaniyi idafika pa kuipa kwene-kwene. Pa nthawe inango, m’bale Philip adandinembera katsamba komwe kakhana mafala yakuti “derekha.” Mafalaya yadanditsangalaza thangwe bzomwe akhalewa nyakuimikira nyumba ya ulapi ule bzikhandizunguza msolo mpaka ndikhafuna kugaza bzomwe iye akhalewabzo.

Pomwe padapita ora ibodzi, muyeruzi Mollen adalewa kuti nkhaniyo ingadakhala yakuyambirira kusamaliridwa pa ntsiku yakutewera. Ndipo pomwe tikhacoka mu xikiritoriyo, muyeruzi Mollen adalewa kuti: “Muimikiri wa nyumba ya ulapi bzin’dzamunesa kwene-kwene kufotokoza nkhaniyi mangwana.” Bzimwebzi bzikufuna kulewa kuti Muimikiriyo angadafotokoza momwe nyumba ya ulapi idangingimizira mpfumakazi Denise kuti aikhidwe mulopa. Pa nthawe imweyire, ndidabzibva ninga kuti Yahova akundiuza kuti tikhanawo mpata ukulu kwene-kwene wakuti tikunde nkhaniyo. Bzidakhala bzakudabwisa kwene-kwene kuwona momwe Yahova akhatiphatisira basa kuti ticite kufuna kwace.

Tidamala nthawe izinji kwene-kwene tikukonzekera bzomwe tingadadzalewalewa mangwana yace. Pakuti nyumba ya mphala ikhali pafupi na Beteli ya Brooklyn, abale azinji wa xikiritoriyo yathu ya zamalamulo adayenda kumweko na minyendo. Ayeruzi anai adabva bzomwe ifepano tidalewa ndipo iwo adakhala ku mbali ya mpfumakazi Denise. Ayeruziwo adalewa kuti muyeruzi wakuyamba ule adaphonya kupereka lamulo lakungingimiza munthu kuikhidwa mulopa, ndipo kukhazikisa lamulo mwakusaya kudziwisa anekeciro wa nkhaniyo kukhali kuwaphera ufulu bomwe budakhazikisidwa na boma.

Pakumalizira, nyumba ya mphala ikulu ya ku Nova York idalewa kuti mpfumakazi Denise ikhana ufulu bwa kulapidwa mwakusaya kuphatisa basa mulopa. Pomwe idamala nkhani imweyi, ndidakhala na mwayi wakucita mbali ya kukunda nkhani zinango zitatu zomwe zikhalewambo bza mulopa zomwe zidatongedwa mu nyumba za mphala zakusiyana-siyana.  (Onani kwadru yakuti “ Kuwina Nkhani mu Nyumba Zikulu-zikulu za Mphala.”) Ndipo ndidacitambo mbali pa nkhani zinango na abale omwe akhatumikira ninga wa zamalamulo wa pa Beteli, pa nkhani ya kusamalira wana, nkhani yakulambana, nkhani za mbuto na nkhani yakumanga-manga.

Pomwe ndidadziwana na mkazangu Dawn, iye akhadalowodwa kale na mwamuna winango. Dawn akhana kale wana atatu, akhaphata basa ndipo akhali mpainiya. Iye adagumana na mabvuto mazinji pa moyo wace, ndipo inepano ndidadabwa thangwe ra kumuwona kuti akhapitiriza kutumikira Yahova. Mu gole la 1992 tidayenda ku Mtsonkhano Wacigawo omwe ukhana msolo wakuti: “Onyamula Kuunika.” Kumweko inepano ndidakumbira Dawn kuti ndikhale naye pa umakhadzi. Pomwe padapita gole libodzi, inepano ndidamulowola. Mkazangu ni mphaso yakucokera kwa Yahova. Iye ambaikha pa mbuto yakuyamba bzomwe Yahova ambafuna ndipo ana khalidwe labwino. Ndipopa inepano ningalewe kuti iye andithandiza na bzinthu bzabwino pa ntsiku zentse zomwe takhala pabodzi.—Mimwani 31:12.

Pomwe ndidamulowola, mwana wakuyamba akhana magole 16, waciwiri akhana 13, ndipo wakumalizira akhana 11. Pakuti ndikhafuna kukhala pai wabwino kuna iwo, tenepo ndidapfunza mwakusamala mabukhu yathu yomwe yakhalewa momwe ningakhalire pai wabwino. Bzidakhala bzakunesa na kupita kwa magole, koma tsapano ndine wakukondwa thangwe rakuti wanawo adayamba kumbandiwona ninga xamwali wawo na pai wawo wa lufoyi. Tikhauza axamwali wa wana wathu omwe akhabwera pamui kuti atsudzuke ndipo ifepano tikhakomedwa nawo kwene-kwene.

Mu gole la 2013, inepano na mkazangu Dawn, tidafuluka ticiyenda ku Wisconsin kuti tikasamalire abereki wanthu wakukalamba. Ndidadabwa pomwe ndidadziwa kuti utumiki bwangu bwa pa Beteli bungadamala lini. Ndidacemeredwa kuti ndikapitirize kuthandiza gulu lathu pa nkhani zizinji zamalamulo.

Pa mwezi wa Setembro 2018, inepano ndidazindikira kuti ndikafuna kulewalewa ndikhakhala na bvuto pa ngololo. Dotolo wangu adandiwona koma alibe kuzindikira cinthu comwe cikhacitisa bvutolo. Na kupita kwa nthawe, dotolo winango adandiuza kuti ndikawonane na dotolo omwe ambawona bza ulupi. Pa tsogolo pace mu gole la 2019 mwezi wa Janeiro, dotolo wakuwona bza ulupiyo adandiuza kuti ndina matenda makulu yomwe na kupita kwa nthawe yangadatokonya thupi lentse.

Pomwe padapita ntsiku zitatu, ndidayamba kucita masenzeka yakulimbisa thupi yomwe inepano nimbayafuna, tsono ndidagwa ndicibzuguduka boko. Ndidacita masenzekayo pa moyo wangu wentse ndipo ndikhayadziwa bwino. Koma ndidazindikira kuti ndikhaluza luso langu lakuthamanga. Kucokera pa nthawe imweyire, matenda yangu yadafika pakuipa. Ndidayamba kuneseka kulewalewa, kufamba na kukhudyula cinthu.

Nimbakondwa kwene-kwene thangwe ra kuthandizira gulu la Yahova na basa langu la wazamalamulo. Ndipo ndikukomedwa thangwe rakuti ndidanemba marevista mazinji yakulewa bza malamulo yomwe yambawerengedwa na adotolo, wazamalamulo na ayeruzi. Ndikhafotokozambo nkhani pafupi-fupi pa dziko lentse la pantsi, ndipo ndidakhotcererambo atumiki wa Yahova pa nkhani yakulamba kuikhidwa mulopa. Tsono napo bziri tenepo, nimbatawiriza mafala yomwe yali pa Luka 17:10 yomwe yambati: ‘[Ndine kapolo] wapezi-pezi. Bzomwe inepano ndidacita ndibzo bzomwe ndikhafunika kucita.’