Umboni bukulatiza kuti Jezu adakhala mkulu wa antsembe pomwe adabatizidwa pa gole la 29. Kodi tikudziwa tani bzimwebzi? Pomwe Jezu adabatizidwa, iye adalatiza kuti akhali wakukonzeka kupereka moyo wace ninga ntsembe pa guwa la ntsembe lakuyezezera lakuimira ‘kufuna’ kwa Mulungu. (Wagalata 1:4; Wahebereu 10:5-10) Guwa la ntsembe lakuyezezerali lidawoneka pambuyo pa batismo ya Jezu. Kale-kale, guwa la ntsembe likhaimira mbali yakufunika kwene-kwene ya mu templo. Ndipopa, tingalewe kuti templo ikulu ya uzimu idawonekambo kuyambira pa batismo ya Jezu mpaka kuyenda kutsogolo. Temployo ni bzinthu bzentse bzomwe Yahova ambacita mwakuphatisa basa ntsembe ya Jezu kuti athandize wanthu kuti amunamate mu njira ya kucena.—Mateu 3:16, 17; Wahebereu 5:4-6.

Pakuti kale-kale templo ikhafunikira mkulu wa antsembe, templo ikulu ya uzimu ikhafunikirambo mkulu wa antsembe. Kuti akwanirise udindo bumwebu, Yahova adadzoza Jezu na ‘mzimu wakucena pabodzi na mphanvu.’ (Mabasa 10:37, 38; Marko 1:9-11) Tsono tingatsimikize tani kuti Jezu adaikhidwa ninga mkulu wa antsembe pomwe adabatizidwa, pa nthawe yomwe akhanati kufa na pomwe adalamusidwa? Ciratizo ca Aroni na ca akulu winango wa antsembe omwe adadzakhala pambuyo pace, cin’tithandiza kutawira mbvunzoyi.

Cakutonga comwe Mozeji adapasidwa cikhalewa kuti ni mkulu wa antsembe yekha omwe angadapita m’Mbuto Yakucenesesa ya tendi la mkonkhano ndipo patsogolo pace m’Mbuto Yakucenesesa ya templo. Cinguwo ndico comwe cikhagawa pakati pa Mbuto Yakucenesesa na Cipinda Cakucena. Mkulu wa antsembe akhapita na pa cinguwopo kokha pa Ntsiku Yakumpsinkha Pikado. (Wahebereu 9:1-3, 6, 7) Aroni pabodzi na amuna winango wakukhulupirika omwe adadzabwera pambuyo pace, adadzozedwa ninga akulu wa antsembe kuti athemere ‘kupita na pa cinguwo’ pakupita m’Mbuto Yakucenesesa. Mwa njira ibodzi-bodziyi, pomwe Jezu akhanati kufa, iye akhafunika kudzozedwa ninga mkulu wa antsembe kuti apite ‘na pa cinguwo’ comwe cikhaimira thupi lace, aciyenda kudzulu. Thupi la Jezu likhaimira cinguwo comwe cikhagawa mbuto ziwiri zire. Kuti Jezu akakhale na moyo kudzulu, cakuyamba iye akhafunika kudzozedwa ninga mkulu wa antsembe. (Wahebereu 10:20) Ndipopa mpostolo Paulo adalewa bzomwe Jezu adacita, iye adati: ‘Ninga mkulu wa antsembe . . . iye adapita mu tendi likulu lakulungamiratu, lomwe liribe kukonzedwa na manja ya wanthu,’ komwe ni ‘kudzulu caikoko.’—Wahebereu 9:11, 24.

Palibe kusiyana pakati pa nthawe yomwe mpangano mupsa udakhazikisidwa na nthawe yomwe udayamba kuphata basa. Thangwe ranyi? Pomwe Jezu adabwerera kudzulu acikatiperekera moyo wace wakulungamiratu ninga ntsembe kwa Mulungu, iye adacita cinthu cakuyamba pa bzinthu bzitatu bzomwe iye akhafunika kucita kuti mpangano mupsa uyambe kuphata basa. Ndipo bzinthu bzitatubzo bzidathandizirambo kuti mpangano mupsayo uyambe kuphata basa. Kodi bzinthubzo mpsiponi?

Cakuyamba, Jezu adawonekera kwa Yahova. Caciwiri, iye adapereka moyo wace ninga ntsembe kwa Yahova. Cacitatu, Yahova adabvuma mulopa omwe Jezu adaupereka ninga ntsembe. Pomwe bzikhanati kucitika bzinthu bzimwebzi, mpangano mupsa ukhaphata kale basa.

Bibliya limbafotokoza lini kuti ni lini pomwe Yahova adabvuma ntsembe ya Jezu. Tenepo, tingaleweretu lini ntsiku yomwe mpangano mupsa udakhazikisidwa na kuyamba kuphata basa. Koma bzomwe tikudziwa mpsakuti pomwe Jezu adabwerera kudzulu, zikhadasala ntsiku khumi kuti Pentekosite iyambe. (Mabasa 1:3) Pa nthawe ing’ono-ng’onoyi, Jezu adapereka moyo wace ninga ntsembe ndipo Yahova adaibvuma. (Wahebereu 9:12) Umboni bwapadeca na bwakuwoneka ni bzomwe bzidacitika pa Pentekosite mu gole la 33. (Mabasa 2:1-4, 32, 33) Mwakusaya kupenukira, mpangano mupsa ukhali mkati mwakuphata basa.

Mwacigwatho, mpangano mupsa udakhazikisidwa ndipo udayamba kuphata basa pomwe Yahova adabvuma ntsembe ya mulopa yomwe Jezu adaipereka. Tenepo mpangano mupsa udayamba kuphata basa na mkulu wa antsembe, Jezu omwe akutumikira ninga nyakuimikira.—Wahebereu 7:25; 8:1-3, 6; 9:13-15.