Sara * adalewa kuti: “Inepano ndine munthu wa manyazi ndipo nimbazeza kucita bzinthu. Ndipopa nimbakhala lini wakutsudzuka ndikakhala ndiri pafupi na wanthu waukali na wakubzithemba kwene-kwene. Tsono bzimbasiyana ndikakhala ndiri pakati pa wanthu wakufatsa na wakubzicepesa. Inepano nimbakwanisa kuwafotokozera makumbukidwe yangu pabodzi na mabvuto yomwe ndinayo. Axamwali wangu wa pa mtima ni wanthu wakufatsa na wakubzicepesa.”

Mafala ya Saraya yakulatiza kuti tikakhala wanthu wakupfatsa, winango an’dzafuna kukhala axamwali wathu. Ndipo kuthimizira bzimwebzi, tikakhala wanthu wakufatsa, Yahova an’dzakomedwa nafe. Ndipopa Fala la Mulungu limbati: ‘Bvalani [khalidwe la] kufatsa.’ (Wakoloso 3:12) Tsono, kodi kufatsa n’ciyani? Kodi Jezu adalatiza tani kuti akhali munthu wakufatsa? Ndipo khalidwe limweri lingatithandize tani kukhala na moyo wabwino?

Kuti munthu akhale wakufatsa, an’funika kukhala wamtendere. Munthu wakufatsa ambalewalewa bwino na anzace, ndipo ambakwanisa kubziphata na kupitiriza kukhala wakuderekha wanthu akamukalipisa.

Kukhala munthu wakufatsa bzikufuna lini kulewa kuti munthuyo alibe mphanvu. Fala lacigirego lomwe likhaphatisidwa basa lakuti kufatsa likhafotokoza bza kavalo wa m’thengo omwe wapfunzisidwa kuti akhale m’mui. Kavaloyo ambaleka lini kukhala na mphanvu thangwe ra mapfunziroyo, koma ambapfunza momwe angaphatisire basa mphanvu zacezo. Mu njira ibodzi-bodziyi, kukhala munthu wakufatsa kumbatithandiza kuuphata msambo wathu wakumbafulumiza kubva ciya, ticikhala mwa mtendere na anzathu.

Pinango mungalewe kuti: ‘Inepano ndine lini munthu wakufatsa.’ Mpsakunesadi kukhala munthu wakufatsa, thangwe tinkukhala m’dziko lakudzala na wanthu waukali na wakutaza kupirira. (Waroma 7:19) Bzinkuwonekeratu kuti tin’funika kumbacita nyongo kuti tikwanise kukhala wanthu wakufatsa. Ndipo, mzimu wakucena wa Yahova un’dzatithandiza kukhala na kalidwe limweri. (Wagalata 5:22, 23) Tsono, tikacita nyongo yakukhala wanthu wakufatsa, phindu lace lin’dzakhala liponi?

Kufatsa kumbacitisa kuti wanthu ambatifenderere. Ninga momwe adalewera Sara omwe tamuguma m’mbuyomu, ifepano timbatsudzuka tikakhala pakati pa wanthu wakufatsa. Jezu ni ciratizo cabwino pa nkhani ya kukhala munthu wakufatsa na wakudeka mtima. (2 Wakolinto 10:1) Napo wana omwe akhumudziwa lini bwino-bwino, akhacita lini mantha kumufenderera.—Marko 10:13-16.

 Kufatsa kumbathandiza ifepano na wale omwe timbaceza nawo. Tikakhala wanthu wakufatsa, tin’dzathamangira lini kubva ne kukalipa. (Mimwani 16:32) Ndipo tin’dzatcenkha kubzipasa mulandu tikaphonyera mwanzathu, maka-maka akakhala munthu omwe timbamufuna kwene-kwene. Ndipo tin’dzakalipisa lini ne kukhumudwisa anzathu, thangwe kufatsako kun’dzatithandiza kukhala wakubziphata.

Jezu akhali munthu wakutanganidwa kwene-kwene, ndipo akhana bzakucita bzizinji. Napo bzikhali tenepoyo, iye akhali munthu wakufatsa pakucita bzinthu na wanthu wentse. Mu nthawe ya Jezu, wanthu azinji akhaphata basa kwene-kwene, ndipo basalo likhawanetesa. Tenepo, iwo akhafuna kutsangalazidwa. Ndipo adabva bwino kwene-kwene pomwe Jezu adawauza kuti: ‘Bwerani kuna inepano, . . . thangwe ndine wakufatsa, na wa mtima wakubzicepesa.’—Mateu 11:28, 29.

Kodi n’ciyani cin’dzatihandiza kukhala wanthu wakufatsa ninga Jezu? Cakuyamba, tin’funika kupfunza Fala la Mulungu kuti tidziwe momwe Jezu akhasamalirira wanthu pabodzi na momwe akhacitira bzinthu bzikanesa. Patsogolo, tikadzagumana na nkhani zakunesa, tin’dzafunika kucita nyongo yakucita bzinthu ninga momwe Jezu angadacitira. (1 Pedru 2:21) Mbatiwoneni bzomwe bzidathandiza Jezu kukhala munthu wakufatsa.

Jezu akhali munthu wakubzicepesa kwene-kwene. Jezu adalibe kundolewa kuti akhali ‘wakufatsa,’ koma adalewambo kuti akhali munthu ‘wakubzicepesa.’ (Mateu 11:29) Bibliya limbalewa bza makhalidwe mawiriya thangwe rakuti kufatsa na kubzicepesa bzimbaphatira basa pabodzi. (Wayefezo 4:1-3) Kodi bzimbacitika tani?

Kubzicepesa kumbatithandiza kuleka kuthamangira kukalipa. Kodi Jezu adacita ciyani pomwe wanthu adamulewa kuti akhali munthu omwe akhafuna kwene-kwene kudya na kumwa vinyu? Iye adandosiya kuti bzicito bzace bzirewe bzokha, ndipo adalewambo kuti ‘nzeru imbadziwika kuti njakulungama thangwe ra mabasa yace.’—Mateu 11:19.

Munthu akalewani kuipa mtundu wanu, cirewedwe ayai mbuto yomwe mudabadwira, bzingakhale lini bwino kumutawra mwakufatsa basi? Pedro, omwe ambatumikira ninga mkulu mu gwere libodzi la ku África do Sul, adati: “Munthu akalewa bzinthu bzomwe bzingandikalipise, inepano nimbabzibvunza kuti: ‘Kodi Jezu angadacita tani pa nkhani imweyi?’” Ndipo adalewambo kuti: “Ndidapfunza kuleka kumbandokalipa na cinthu ciri-centse.”

Jezu akhabvesesa kuti wanthu mbakuperewera. Anyakupfunza wa Jezu akhafuna kucita bzinthu bzabwino. Tsono thangwe ra kuperewera kwawo, iwo akhaphonya nthawe zinango. Mwa ciratizo, usiku bwa ntsiku yomwe Jezu angadaphedwa mangwana yace, Pedru, Tiyago na Juwau adagona m’mbuto mwakumuyangaza mwanzawo. Tsono, mbuto mwakukalipa, Jezu adawabvesesa, aciti: ‘Mzimu un’funa, tsono thupi ndiro lakutepa.’—Mateu 26:40, 41.

Mpfumakazi Mandy ikhana msambo wakumbatsutsa kwene-kwene anzace, tsono ntsiku zino mpfumakaziyo ikucita nyongo yakumbatewezera Jezu. Iyo idati: “Nimbakumbukira kuti wanthu wentse mbakuperewera, ndipo nimbacita nyongo ya kumbawona makhalidwe yawo yabwino ninga momwe Yahova ambacitira.” Mukakhala ninga Jezu, mun’dzazindikira kutepa kwa anzanu, ndipo mun’dzakwanisa kucita nawo bzinthu mwakufatsa.

Jezu akhakhulupira Mulungu. Jezu adaboneresewa kwene-kwene pomwe akhali pantsi pano. Wanthu adamukumbukira kuipa, adamunyoza na kumuzunza. Napo bzikhali teneoyo, iye adapitiriza kukhala munthu wakufatsa, thangwe ‘[Mulungu] omwe ambayeruza mwakulungama.’ (1 Pedru 2:23) Jezu akhadziwa kuti Pai wace angadamusamalira, ndipo angadadzamalisa bzinthu bzakusaya kulungama ikadzakwana nthawe yace.

Ifepano tingakalipa thangwe rakuti munthu waticitira cinthu cakuipa, tingakhumbe kumubwezera. Tsono tikacita bzimwebzo, bzinthu bzingadzongekeretu. Ndipopa Bibliya limbatikumbusa kuti: ‘Ukali bwa munthu bumbabweresa lini cirungamo ca Mulungu.’ (Tiyago 1:20) Napo ticikhala na mathangwe yakukalipira, tireke kuyebwa kuti kuperewera kwathu kungaticitise cinthu cakuphonyeka.

Pfumakazi Cathy, ya ku Alemanha ikhambalewa kuti: ‘Ndikasaya kubzikhotcerera palibe omwe angandikhotcerere.’ Tsono iye adadzacinja makumbukidwe yace pomwe adapfunza bza Yahova. Iye adati: “Tsapano nimbabzithemba lini pomwe ndekha. Comwe cimbandithandiza kucita bzinthu mwakufatsa ni kudziwa kuti Yahova ni omwe ambasamalira bzinthu bzentse.” Penu imwepo mudacitiridwa kale bzinthu bzakusaya kulungama, tewezerani momwe Jezu akhacitira bzinthu ndipo khulupirani Mulungu. Bzimwebzi bzin’dzakuthandizani kukhala munthu wakufatsa.

Jezu adalewa kuti tikhale wakukondwa tin’finika kukhala wakufatsa. Iye adati: ‘An’kondwa ni wanthu wakufatsa.’ (Mateu 5:5) Mbatiwoneni kufunika kwa khalidwe limweri pa bzinthu bzakutewerabzi.

Kukhala wa kufatsa kumbacepesa kusaya kubvesesana m’banja. M’bale Robert wa ku Australia, adalewa kuti: “Inepano mwakusaya kukumbuka bwino, ndalewa kale mafala mazinji yomwe mkazangu alibe kukomedwa nayo. Munthu akambalewalewa pa nthawe yomwe adakalipa, bzimbanesa kulamba kuti alibe kulewa cinthu. Inepano ndiribe kubzibva bwino thangwe ra kudziwa kuti mafala yomwe ndidalewa yadakalipisa mkazangu.”

‘Tentsenefe timbaphonya kazinji kentse’ pa kulewalewa na pakucita bzinthu, ndipo bzimwebzi bzingabwerese mabvuto m’banja mwathu. (Tiyago 3:2) Tikasaya kubvesesana m’banja, kufatsa kumbatithandiza kukhala wanthu wakugwa nfuwa na wakubziphata pa kulewalewa.—Mimwani  17:27.

Robert adacita nyongo ya kukulisa khalidwe la kugwa nfuwa na la kubziretsa. Kodi iye adakhala na phindu liponi? Iye adati: “Tsapano, inepano na mkazangu tikasaya kubvesesana, nimbacita nyongo yakumutetekera bwino, kulewalewa naye mwakufatsa na mwakusaya kukalipa. Ndipo tsapano banja lathu ndakulimba kwene-kwene kuposa m’mbuyomu.”

Kufatsa kumbatithandiza kuti timbakhale bwino na anzathu. Omwe ambafulumiza kukalipa ambakhala alibe axamwali azinji. Kufatsa kumbatithandiza ‘kukoya ubodzi bwathu . . . mwa mtendere ninga cingwe cakutimangiridza.’ (Wayefezo 4:2, 3) Cathy omwe wafotokozedwa pakuyamba ule adalewa kuti: “Kufatsa kumbandithandiza kukhala munthu wakucezaka na wanthu omwe nimbaceza nawo, napo kuti bzimbakhala bzakunesa kucita bzinthu na wanthu winango.”

Kufatsa kumbatithandiza kukhala na mtendere wa mu mtima. Bibliya limbandendemezera ‘nzeru yakucokera kudzulu’ na khalidwe la kufatsa na mtendere. (Tiyago 3:13, 17) Ndipo iro limbalewambo kuti munthu wakufatsa ana ‘mtima wakuderekha.’ (Mimwani 14:30) Martin, omwe adacita nyongo kwene-kwene kuti akhale munthu wakufatsa adati: “Tsapano, nimbadikhirira lini kuti bzinthu bzentse bzicitike mu njira yomwe ndikhafunira. Tenepo ndina mtendere wa mu mtima ndipo ndine munthu wakukomedwa kwene-kwene.”

Kulewa cadidi, bzimbafunika nyongo kuti munthu akhale wakufatsa. M’bale winango adalewa kuti: “Nthawe zinango nimbakhala na ukali.” Tsono Yahova akufuna kuti tikhale wanthu wakufatsa, ndipo iye an’dzatithandiza. (Zaiya 41:10; 1 Timotio 6:11) Iye an’dzamaliza kutipfunzisa ndipo an’dzatilimbisambo. (1 Pedru 5:10) Na kupita kwa nthawe, ninga mpostolo Paulo, ifepano tin’kwanisa kutewezera ‘kufatsa na kudeka mtima kwa Krisatu.’—2 Wakolinto 10:1.