Nkhani Yakupfunza 10
Kodi N’ciyani Cikunditazisa Kubatizidwa?
‘Firipi pabodzi na nduna ire adabuluka acipita m’madzimo, ndipo Firipiyo adaibatiza.’—MABASA 8:38.
NYIMBO 52 Kubzipereka Kwathu
BZOMWE TIN’PFUNZA *
1. Kodi n’ciyani comwe Adamu na Eva adaluza, ndipo bzakutewera bzace bzidakhala bziponi?
KODI mbani omwe imwepo mukuwona kuti angakwanise kukhazikisa mitemo yakulewa bzabwino na bzakuipa? Pomwe Adamu na Eva adadya cisapo ca muti wakudziwisa cabwino na cakuipa, iwo adalatiziratu padeca kuti, akhakhulupira lini Yahova pabodzi na mitemo yace. Iwo adawona kuti bzikhali bwino kumbabzisankhulira wokha bzabwino na bzakuipa. (Ciyambo 3:22) Koma kumbukirani bzomwe iwo adaluza. Iwo adaluza uxamwali bomwe akhanabo na Yahova, mwayi wakukhala na moyo kwa muyaya, ndipo patsogolo pace, adapasira wana wawo pikado na infa. (Waroma 5:12) Cakusankhula ca Adamu na Eva cidabweresa mabvuto makulu kwene-kwene.
Pomwe nduna ya ku Etiyopia idabvesesa nkhani yakulewa bza Jezu, idabatizidwa nthawe imweyoletu (Onani mdime 2-3)
2-3. (a) Kodi n’ciyani comwe nduna ya ku Etiyopia idacita pomwe idapaliziridwa na Firipi? (b) Kodi tin’dzatambira bzisimbo bziponi tikabatizidwa, ndipo tin’cezerana mitawiro ya mibvunzo iponi?
2 Pomwe nduna ya ku Etiyopia idapaliziridwa na Firipi idacita bzinthu mwakusiyana kwene-kwene na Adamu na Eva. Nduna ire idatenda kwene-kwene bzomwe Yahova na Jezu adaicitira, ndipopa idabatizidwa nthawe imweyoletu. (Mabasa 8:34-38) Mpsibodzi-bodzimbo na ifepano, tikabzipereka kwa Mulungu na kubatizidwa ninga momwe idacitira nduna ire, tin’dzalatiza padeca kutenda bzomwe Yahova na Jezu adaticitira. Tin’dzalatizambo kuti timbakhulupira Yahova na kuzindikira kuti iye ndiye yekha omwe angatipase mitemo yakulewa bzabwino na bzakuipa.
3 Kumbukirani bzisimbo bzomwe timbagumana thangwe ra kutumikira Yahova! Ndipo kutsogolo, Yahova an’dzatisimba mwa kutipasa bzinthu bzense bzomwe Adamu na Eva adaluza, kuphatanidzambo mwayi wakukhala na moyo kwa muyaya. Ndipo thangwe ra kukhulupira kwathu Jezu Kristu, Yahova ambatilekerera bzakuphonya bzathu na kutipasa cikumbu-mtima cakucena. (Mateu 20:28; Mabasa 10:43) Timbacitambo mbali ya banja la atumiki wakubvumidwa na Yahova omwe an’dzakhala na moyo wabwino kutsogoloku. (Juwau 10:14-16; Waroma 8:20, 21) Koma bzakupasa nsisi mpsakuti, napo winango afika pa kudziwa bzisimbobzi, ambazeza kutewezera bzomwe nduna ya ku Etiyopia ire idacita. Kodi n’ciyani comwe cimbatazisa wanthu amwewa kuleka kubatizidwa? Tsono angacite tani kuti akunde mabvuto yomwe yankuwatazisayo?
BZOMWE BZINGACITISE WANTHU WINANGO KULEKA KUBATIZIDWA
Mabvuto yomwe yangatazise munthu kubatizidwa
Kusaya kukhwimika (Onani ndime 4-5) *
4-5. Kodi ni mabvuto yaponi yomwe Avery na Hannah adagumana nayo?
4 Kubziwona mtazi. Abereki wa Avery ni Mboni za Yahova. Pai wace ana mbiri yabwino, iwo ambasamalira bwino banja lawo ndipo ankutumikira ninga mkulu wa gwere. Napo bziri tenepo, Avery akhazeza kubatizidwa. Thangwe ranyi? Iye adalewa kuti: “Ndikhawona kuti ndingadakwanisa lini kumbacita bzinthu bzabwino ninga momwe pai wangu ambacitira.” Avery akhawonambo kuti angadakwanisa lini kusamalira udindo bomwe angadadzatambira kutsogolo pambuyo pa kubatizidwa. Mwa ciratizo, iye adalewa kuti, “Ndikhacita mantha kuti ndikabatizidwa ndin’dzambauzidwa kuti ndicite mpembo pa gulu, ndifotokoze nkhani, ayai nditsogolere gulu mu utumiki bwakumunda.”
5 Hannah, omwe ana magole 18 yakubadwa, adamala magole mazinji ankubziwona kuti ni mtazi. Mtsikanayu adaleredwa na abereki omwe ambatumikira Yahova. Napo bzikhali tenepo, iye akhabziwona kuti angadakwanisa lini kuphatisira basa mitemo ya Yahova. Thangwe ranyi? Hannah akhadakulisa mzimu wakumbabzipasa mulandu. Nthawe zinango, iye akhasunama kwene-kwene ndipo bzimwebzi bzikhacitisa kuti bvuto lace lithumizirike. Iye adalewa kuti: “Ndikhauza lini munthu ali-wense ne abereki wangu bza bvutolo, ndipo ndikhawona ninga kuti Yahova akhafuna lini kuti ndikhale m’bodzi wa atumiki wace thangwe ra bzomwe ndikhacita.”
Kupupsidwa na axamwali (Onani ndime 6) *
6. Kodi n’ciyani cidacitisa Vanessa kuleka kubatizidwa?
6 Kupumpsidwa na axamwali. Vanessa, omwe ana magole 22 yakubadwa adalewa kuti: “Ndikhana xamwali wangu wakupha naye nsomba na mwala omwe ndidadziwana naye kwa magole mazinji.” Tsono xamwali waceyo alibe kuthandizira Vanessa kuti akwanirise cakulinga comwe akhanaco ca kubatizidwa. Bzimwebzi bzidasunamisa Vanessa, ndipopa iye adalewa kuti: “Ndikhawona kuti mpsakunesa kwene-kwene kucita uxamwali, ndipo ndikhacita thupo kuti ndikamalisa uxamwalibo, ndingadakhala lini pomwe na xamwali munango ninga iye.”
Kugopa kuphonya (Onani ndime 7) *
7. Kodi n’ciyani comwe cidacitisa Makayla kugopa kubatizidwa, ndipo thangwe ranyi?
7 Kugopa kuphonya. Makayla akhana magole maxanu pomwe m’bale wace wacimuna adacosedwa m’gwere. Pomwe Makayla akhakula adawona momwe bzicito bzakuipa bza m’bale waceyo bzidasunamisira abereki wace. Makayla adalewa kuti: “Ndikhafuna lini kubatizidwa, thangwe ndikhagopa kuti ndikadzaphonya nin’dzacosedwa m’gwere, bzomwe bzingadacitisa kuti msunamo wa abereki wangu uthumizirike.”
Kugopa kutsutsidwa (Onani ndime 8) *
8. Kodi Miles akhagopa ciyani?
8 Kugopa kutsutsidwa. Pai wace wa Miles pabodzi na mai wakumufuwa ni Mboni za Yahova, koma mai wace omwe adam’bereka ni Mboni lini. Miles adalewa kuti: “Ndidakhala na mai wangu kwa magole 18, ndipo ndikhacita mantha kuwauza kuti ndikhafuna kubatizidwa, thangwe ndikhadawona kale bzomwe iwo adacita pomwe pai wangu adakhala Mboni ya Yahova. Tenepo, ndikhacita mantha kuti iwo angadandibweresera mabvuto.”
BZOMWE MUNGACITE KUTI MUMALISE MABVUTO YOMWE YAKUKUTAZISANI KUBATIZIDWA
9. Kodi n’ciyani cin’dzacitika mukapfunza momwe Yahova aliri wakupirira na walufoyi?
9 Adamu na Eva adasankhula kusiya kutumikira Yahova thangwe adatazira kukulisa lufoyi lawo kwa iye. Napo bzikhali tenepo, Yahova adawalekerera kuti akhale na nthawe yakukwanira kuti abereke wana acikhazikisa wokha mitemo ya momwe angalerere wanawo. Bzakutewera bzomwe Adamu na Eva adagumana nabzo thangwe ra kufuna kubzisankhulira wokha bzakucita, bzidalatiza kuti iwo akhali apsiru. Mwa ciratizo, mwana wawo wakuyamba adapha m’bale wace thangwe ra njiru, ndipo na kupita kwa nthawe ciwembo na dyera bzidadzala pa dziko lense la pansi. (Ciyambo 4:8; 6:11-13) Napo papita nthawe izinji bzimwebzi bzinkucitika, Yahova adalinganiza kale njira yakupulumusira wana wense wa Adamu na Eva omwe an’funa kumutumikira. (Juwau 6:38-40, 57, 58) Tenepo, mukapfunza momwe Yahova aliri wakupirira na walufoyi, lufoyi lanu kwa iye lin’dzathumizirika. Mun’dzatcenkha kutewezera njira yomwe Adamu na Eva adasankhula ndipo mun’dzabzipereka kwa Yahova.
Kodi mungacite tani kuti mumalise mabvutoyo?
(Onani ndime 9-10) *
10. Thangwe ranyi kukumbukira cinembo ca Psalymo 19:7 kungakuthandizeni kutumikira Yahova?
10 Pitirizani kupfunza bza Yahova. Mukapfunza bzizinji pakulewa bza Yahova, bzinthu bzin’dzakufambirani bwino pomwe mukumutumikira. Avery, omwe wafotokozedwa pakuyamba ule, adalewa kuti: “Cikhulupiro cangu cidathumizirika pomwe ndidawerenga na kukumbukira bza piciro lomwe limbagumanika pa cinembo ca Psalymo 19:7.” (Werengani.) * Pomwe Avery adawona momwe Yahova adakwanirisira piciroli, lufoyi lace kwa iye lidathumizirika. Lufoyi limbatithandiza lini kokha kukulisa cikhulupiro koma limbatithandizambo kulinga Yahova na kucita bzomwe iye ambafuna. Hannah, omwe wafotokozedwa pakuyamba ule, adalewa kuti: “Thangwe ra kuwerenga Bibliya na kucita pfunziro la pa ndekha, ndidazindikira kuti ndikabzipasa mulandu, nimbapasambo mulandu Yahova.” (1 Pedru 5:7) Ndipopa Hannah adawona kuti bzikhali bwino kumbateweza ‘Fala la Mulungu.’ (Tiyago 1:22) Kodi bzakutewera bzace bzidakhala bziponi? Iye adati: “Pomwe ndidawona kuti kubvera Yahova n’kwa phindu kwa inepano, ndidakulisa lufoyi langu kwa iye. Tsapano ndimbawona kuti nthawe zense Yahova ambanditsogolera ndikafuna thandizo lace.” Bzimwebzi bzikulatiza kuti Hannah adakwanisa kukunda cikhumbo cace cakubzipasa mulandu. Na kupita kwa nthawe iye adabzipereka kwa Yahova acibatizidwa.
(Onani ndime 11) *
11. Kodi n’ciyani comwe Vanessa adacita kuti akhale na axamwali wabwino, ndipo tingapfunze ciyani na ciratizo caceci?
11 Mbasankhulani axamwali wanu mwanzeru. Vanessa, omwe wafotokozedwa pakuyamba ule, adadzazindikira kuti xamwali wace akhamutazisa kutumikira Yahova. Tenepo, iye adamalisa uxamwalibo. Ndipo kuthumizira bzimwebzi, iye adacita nyongo kuti akhale na axamwali wapsa, mkati mwa gwere. Iye adalewa kuti ciratizo ca Nowe pabodzi na banja lace cidamuthandiza kwene-kwene. Iye adalewa kuti: “Banja la Nowe likhadazunguliridwa na wanthu omwe akhafuna lini Yahova, koma ali-wense wa iwo akhali pa uxamwali bwakulimba m’banjamo.” Pomwe adabatizidwa, Vanessa adayamba kutumikira ninga mpainiya. Tsapanopapa iye adalewa kuti: “Kucita upainiya kwandithandiza kukhala na axamwali wabwino sikuti kokha na abale wa m’gwere mwangu mokha, koma na abale wa magwere manango.” Imwepombo mungakhale na axamwali wabwino mukacita nyongo yakucita basa lomwe Yahova adatipasa kuti ticite.—Mateu 24:14.
(Onani ndime 12-15) *
12. Kodi ni mantha yaponi yomwe Adamu na Eva akhalibe, ndipo bzakutewera bzace bzidakhala bziponi?
12 Lekani kumbacita mantha mwakunyanyira. Nthawe zinango kucita mantha kumbakhala kwabwino kwa ifepano. Mwa ciratizo, ifepano tin’funika kukhala na mantha kuti titcenkhe kucita bzinthu bzomwe bzingakalipise Yahova. (Psalymo 111:10) Bzingadakhala kuti Adamu na Eva akhana mantha ninga yamweya, iwo angadapandukira lini Yahova. Koma thangwe ra kusaya mantha kwawoko, iwo adamupandukira, ndipo pomwe adacita bzimwebzo, maso yawo yadafunguka ndipo adadziwa kuti aphonya. Tenepo iwo adapasira wana wawo, pikado na infa. Ndipo thangwe rakuti iwo angadakwanisa kuwona, kubvesesa momwe akhaliri, iwo adacita manyazi thangwe akhali pezi, tenepo adapakasa masamba kuti abvale.—Ciyambo 3:7, 21.
13-14. (a) Mwakubverana na 1 Pedru 3:21, thangwe ranyi tin’funika lini kumbagopa kufa? (b) Kodi ni mathangwe yaponi yomwe yambaticitisa kufuna Yahova?
13 Napo tin’funika kukhala na mantha yakuthemera kwa Yahova, tin’funika lini kumbagopa kufa. Thangwe Yahova adakonza kale njira yakuti tidzakhale na moyo wakusaya kumala. Ndipo tikacita pikado, ticikungula na mtima wense, Yahova an’dzatilekerera. Koma iye an’dzatilekerera kokha tikakhulupira nsembe ya cakulombolera ya Mwana wace. Ndipo njira ibodzi yakufunika kwene-kwene ya momwe tingalatizire cikhulupiro cathu ni kubzipereka kwa Mulungu na kubatizidwa.—Werengani 1 Pedru 3:21. *
14 Ifepano tina mathangwe mazinji yakulatizira kuti timbafuna Yahova. Ndipo timbacita bzimwebzi sikuti thangwe rakuti ambatipasa bzinthu bzabwino bzomwe timbakomedwa nabzo nsiku na nsiku, koma thangwe rakuti ambatipfunzisa cadidi pabodzi na cakulinga cace. (Juwau 8:31, 32) Iye ambaphatisa basa gwere Lacikristau kuti atitsogolere na kutithandiza. Nsiku zino tikagumana na mabvuto, iye ambatithandiza kulimbana nayo ndipo ambatipasa cidikhiro cakudzakhala na moyo wakusaya kumala na wakulungamiratu kutsogolo. (Psalymo 68:19; Cibvumbulutso 21:3, 4) Tenepo, tikakumbukira bzinthu bzomwe Yahova adaticitira bzomwe bzimbalatiza kuti ambatifuna, lufoyi lathu kwa iye limbathumizirika. Ndipo tikambafuna Yahova, ifepano timbakhala na mantha yakuthemera. Tin’funikambo kumbatcenkha kucita bzinthu bzomwe bzingakalipise abale wathu.
15. Kodi Makayla adakunda tani bvuto la kugopa kubatizidwa?
15 Makayla, omwe wafotokozedwa pakuyamba ule, adakunda bvuto la kugopa kubatizidwa pomwe adabvesesa njira yomwe Yahova ambaphatisa basa kuti alekerere pikado zathu. Iye adalewa kuti: “Ndidazindikira kuti tensenefe ndife wakuperewera ndipo timbaphonya. Koma napo bziri tenepo, ndidabvesesa kuti Yahova ambatifuna ndipo ambatilekerera mwakuphatisa basa nsembe ya cakulombolera.” Mafalaya yakulatiza kuti lufoyi lace kwa Yahova lidamucitisa kuti abzipereke kwa iye acibatizidwa.
(Onani ndime 16) *
16. Kodi Miles adamalisa tani bvuto la kugopa kutsutsidwa?
16 Miles, omwe akhagopa kubatizidwa thangwe rakuti mai wace angadatsutsa cakusankhula caceco, adakumbira thandizo kwa nyakunyan’ganira dera momwe angamalisire bvutolo. Miles adalewa kuti: “Nyakunyan’ganira derayo pa banja lace lense akhali iye basi Mboni ya Yahova. Tenepo, iye adandiuza momwe ndingathandizire mai wangu kubvesesa cakusankhula cangu cakufuna kubatizidwa, ndipo pai wangu akhandingingimiza lini kuti ndibatizidwe ne kundiletsa.” Na thandizoli Miles alibe kucinja cakulinga cace, napo kuti mai wace angadakomedwa lini, mpaka iye adacoka pa mui kuti akwanirise cakulingaco. Iye adalewa kuti: “Kupfunza bzinthu bzabwino bzomwe Yahova adandicitira kudatokonya kwene-kwene mtima wangu, ndipo ndikakumbukira bza nsembe ya Jezu ya cakulombolera, ndimbazindikira lufoyi lomwe Yahova analo kwa inepano. Tenepo, kukumbukira bzimwebzi kudandicitisa kuti ndibzipereke kwa Yahova na kubatizidwa.”
PHATISISANI CAKUSANKHULA CANU
Bzomwe tingacite kuti tilatize kutenda bzomwe Mulungu ambaticitira (Onani ndime 17)
17. Kodi tin’funika kucita ciyani kuti tileke kukhala ninga Adamu na Eva?
17 Pomwe Eva adadya cisapo ca muti wakuletsedwa omwe ukhali m’zunde la Edeni, iye adapandukira Baba wace. Ndipo Adamu pomwe adadyambo cisapoco, adalatiza kuti akhatenda lini bzinthu bzense bzabwino bzomwe Yahova akhamucitira. Tenepo, ali-wense wa ifepano angalatize kuti ali lini ninga Adamu na Eva mwa kutenda bzinthu bzense bzomwe Yahova ambaticitira. Ndipo tikabatizidwa timbalatiza kwa Yahova kuti tikubvuma kuti ndiye omwe angatipase mitemo yakutidziwisa bzabwino na bzakuipa. Timbalatizambo kuti timbamufuna na kumukhulupira ninga Baba wathu.
18. Kodi mun’funika kucita ciyani kuti bzinthu bzikufambireni bwino pomwe munkutumikira Yahova?
18 Pambuyo pa batismo tin’funika kupitiriza kucita bzinthu mwakubverana na bzomwe Yahova ambafuna, sikuti bzomwe timbafuna. Ndipo atumiki azinji wa Yahova akucita kale bzimwebzi. Tsono kuti imwepo mucitembo bzinthu ninga iwo mun’funika kupitiriza kucita nyongo yakubvesesa Fala la Mulungu, Bibliya; kutsonkhana na abale pabodzi na mpfumakazi zanu mwakukhazikika, na kupitiriza kuuza wanthu winango bzomwe mudapfunza bza Baba wanu wa lufoyi. (Wahebereu 10:24, 25) Ndipo mukafuna kucita bzakusankhula, mbaphatisani basa malango yomwe Yahova ambakupasani kucokera m’Bibliya na gulu lace. (Zaiya 30:21) Mukacita bzimwebzi, mun’dzawona kuti bzense bzomwe mun’dzacita bzin’dzakufambirani bwino.—Mimwani 16:3, 20.
19. Kodi n’ciyani comwe mun’funika kupitiriza kukumbukira, ndipo thangwe ranyi?
19 Mukapitiriza kuzindikira phindu lomwe limbabwera thangwe ra kutsogoleredwa na Yahova, lufoyi lanu kwa iye pabodzi na mitemo yace bzin’dzathumizirika. Ndipo pan’dzawoneka lini cinthu ciri-cense comwe Sathani angakupumpseni naco comwe cingadzakutaziseni kutumikira Yahova. Ndokumbukira moyo omwe mun’dzakhala nawo mkati mwa magole 1000. Kulewa cadidi, imwepo mun’dzawona kuti mudacita bwino kwene-kwene kusankhula kubatizidwa pa moyo wanu!
NYIMBO 28 Kukhala Xamwali wa Yahova
^ ndi. 5 Cakusankhula cakufunika kwene-kwene comwe mungacite ni batismo. Thangwe ranyi cakusankhula cimweci n’cakufunika? Nkhani ino in’pereka mtawiro wa mbvunzo umweyu. In’thandizambo wale omwe akufuna kubatizidwa kukunda mabvuto yomwe yakuwatazisa.
^ ndi. 10 Psalymo 19:7 Cakutonga ca Yahova n’cakulungamiratu, ico cimbabwezeresa moyo. Mtemo wa Yahova ngwakukhulupirika, ucipfunzisa mtazi.
^ ndi. 13 1 Pedru 3:21 Batismo in’kupulumusanimbo lero ninga cingalawaco (batismoyo si kucosedwa kwa tsuzu m’thupi, koma n’kukumbira cikumbu-mtima cabwino kwa Mulungu,) mwa kulamusidwa kwa Jezu Kristu.
^ ndi. 58 BZOMWE BZINKUCITIKA PA CITHUNZI-THUNZI: Thupo: Mulumbwana akucita mantha kupereka mtawiro.
^ ndi. 60 BZOMWE BZINKUCITIKA PA CITHUNZI-THUNZI: Axamwali: Mtsikana omwe ni Mboni ya Yahova ali pabodzi na xamwali wace omwe ana makhalidwe yakuipa, tsono akucita manyazi pomwe akuwona mpfumakazi zinzace zinkupalizira.
^ ndi. 62 BZOMWE BZINKUCITIKA PA CITHUNZI-THUNZI: Kugopa kuphonya: Mtsikana munango akucita thupo kuti angadzaphonye, pomwe akuwona m’bale wace wacimuna omwe wacosedwa m’gwere akucoka pa mui.
^ ndi. 64 BZOMWE BZINKUCITIKA PA CITHUNZI-THUNZI: Kutsutsidwa: Mulumbwana ankucita mantha kupemba pomwe mai wace omwe ni Mboni lini ya Yahova ankumunyang’anisa.
^ ndi. 67 BZOMWE BZINKUCITIKA PA CITHUNZI-THUNZI: Thupo: Mulumbwana akucita pfunziro la payekha.
^ ndi. 69 BZOMWE BZINKUCITIKA PA CITHUNZI-THUNZI: Axamwali: Mulumbwana akuwona kufunika kwa kukhala Mboni ya Yahova.
^ ndi. 71 BZOMWE BZINKUCITIKA PA CITHUNZI-THUNZI: Kugopa kuphonya: Mtsikana akutenga cadidi kukhala cace ndipo akubatizidwa.
^ ndi. 73 BZOMWE BZINKUCITIKA PA CITHUNZI-THUNZI: Kutsutsidwa: Mulumbwana mwakukhwimika akufotokozera mai wace omwe ni Mboni lini ya Yahova bzomwe iye ambakhulupira.
