Nkhani Yakupfunza 10
Lufoyi na Kutenda Yahova Bzin’dzakucitisani Kufika pa Kubatizidwa
‘N’ciyani cin’ndiletsa kuti ndibatizidwe?’—MABASA 8:36.
NYIMBO 37 Kutumikira Yahova na Mtima Wense
BZOMWE TIN’PFUNZA *
1-2. Mwakubverana na Mabasa 8:29-31, 35, 36, 38, kodi n’ciyani cidacitisa kuti nduna ya ku Etiyopia ibatizidwe?
KODI imwepo mun’funa kubatizidwa kuti mukhale nyakupfunza wa Kristu? Wanthu azinji adacita kale cakusankhula cimweci. Ndipo bzomwe bzidawathandiza, ni lufoyi na kutenda Yahova. Onani ciratizo ca nduna yomwe ikhatumikira mambo-mkazi wa ku Etiyopia.
2 Pomwe ndunayo idapfunza bzomwe bzinembo bzikhalewa, iribe kucedwa kubatizidwa. (Werengani Mabasa 8:29-31, 35, 36, 38. *) Kodi n’ciyani cidacitisa kuti ndunayo ibatizidwe? Kulewa mwakusaya kupenukira, ndunayo ikhalemekeza kwene-kwene Fala la Mulungu, thangwe pomwe ikhali pa ulendo ikhawerenga mavesi yanango ya m’bukhu la Zaiya. Ndipo pomwe idamala kuceza na Firipi, ndunayo idatenda kwene-kwene bzomwe Jezu akhadaicitira. Tsono thangwe ranyi ndunayo ikhadayenda ku Jeruzalemu? Thangwe ndakuti iyo ikhafuna kale Yahova. Kodi tikudziwa tani bzimwebzi? Tikudziwa thangwe rakuti Bibliya limbalewa kuti ndunayo ikhayenda ku Jeruzalemu kuti ikanamate Yahova. Ndipo bzikuwoneka kuti ndunayo ikhadasiya cipembedzo cace, iciphatana na mtundu omwe ukhadabzipereka kwa Mulungu wacadidi. Thangwe ra kufuna Yahova, ndunayo idacita cinthu cinango cakufunika kwene-kwene, comwe ni kubatizidwa icikhala nyakupfunza wa Kristu.—Mateu 28:19.
3. Kodi n’ciyani comwe cingatazise munthu kubatizidwa? (Onani kwadru yakuti “ Kodi Mtima Wanu ni Mataka ya Mtundu Wanyi?”)
3 Lufoyi lomwe munalo kwa Yahova lingakuthandizeni kuti mufike pakubatizidwa. Koma lufoyi libodzi-bodziro, lingakutaziseni kucita cakusankhula cimweci. Bzingacitike tani bzimwebzo? Kumbukirani bziratizo bzakutewerabzi. Pinango imwepo mumbafuna kwene-kwene abale ayai axamwali wanu omwe ni Mboni lini za Yahova, ndipo mumbabva mantha kuti mukabatizidwa, iwo an’dzakuwengani. (Mateu 10:37) Ayai pinango imwepo mumbafuna kwene-kwene kucita bzinthu bzomwe Mulungu ambabziwenga ndipo bzikukunesani kubzisiya. (Psalymo 97:10) Ndipo pinango imwepo mukhadazolowera kumbasekerera ntsiku za feriyado zomwe zimbabverana na cipembedzo cakunama, tenepo pakuti mumbabzifunisisa kwene-kwene, bzingakhale bzakunesa kusiya kucita bzinthu bzomwe Mulungu ambabziwenga. (1 Wakolinto 10:20, 21) Tenepo, mbvunzo omwe mun’funika kubzibvunza nguyu: “Kodi n’ciyani ayai ni mbani omwe inepano nimbamufuna kwene-kwene?”
MUNTHU OMWE TIN’FUNIKA KUMBAMUFUNA KWENE-KWENE
4. Kodi n’ciyani cingakucitiseni kuti mubatizidwe?
4 Pana bzinthu bzizinji bzabwino bzomwe imwepo mumbabzifuna, ndipo mumbatenda. Mwa ciratizo, pinango imwepo mukhalemekeza kwene-kwene Bibliya, napo mukhanati mwayamba kulipfunza na Mboni za Yahova. Kuthimizira bzimwebzi, pinango mudapfunza kufuna Jezu. Ndipo pakuti tsapano mwadziwa Mboni za Yahova, bzikuwonekeratu kuti mumbafuna kwene-kwene kukhala nawo pabodzi. Koma kufuna bzinthu bzimwebzi kungakucitiseni lini kuti mubzipereke kwa Yahova mucibatizidwa. Cinthu comwe cingakucitiseni kuti mubatizidwe ni lufoyi lomwe mungakhale nalo kwa Yahova Mulungu. Ndipo mukambafuna kwene-kwene Yahova kuposa cinthu ciri-centse, imwepo mun’dzabvuma lini kuti cinthu cinango ayai munthu akutaziseni kutumikira Yahovayo. Kufuna Yahova kun’dzakucitisani kufika pa kubatizidwa ndipo kun’dzakuthandizanimbo kupitiriza kukhala wakukhulupirika pambuyo pa kubatizidwa.
5. Kodi tin’cezerana mitawiro ya mibvunzo iponi?
5 Jezu adalewa kuti tin’funika kumbafuna Yahova na mtima wathu wentse, moyo wathu wentse, nzeru zathu zentse, na mphanvu zathu zentse. (Marko 12:30) Kodi n’ciyani comwe mungacite kuti mumbafune Yahova na kumulemekeza kwene-kwene? Mbakumbukirani lufoyi lomwe Yahova ambakulatizani. Ndipo mukacita bzimwebzi imwepo mun’dzamufunambo. (1 Juwau 4:19) Kodi mpsiponi bzinthu bzinango bzomwe bzingakuthandizeni kukulisa lufoyi lanu kwa Yahova? *
6. Mwakubverana na Waroma 1:20, kodi mungacite tani kuti mupfunze bza Yahova?
6 Pfunzani bza Yahova kucokera pa bzinthu bzomwe iye adalenga. (Werengani Waroma 1:20; * Cibvumbulutso 4:11) Kumbukirani bza miti na bzirombo bzomwe Yahova adabzilenga na momwe ibzo bzimbalatizira kuti Yahovayo ngwanzeru kwene-kwene. Kumbukiranimbo momwe thupi lathu limbaphatira basa. (Psalymo 139:14) Kumbukirani pomwe bza mphanvu zomwe Yahova adaikha mkati mwa dzuwa, lomwe ni libodzi mwa mabidyau ya nyenyezi. * (Zaiya 40:26) Tenepo, mukambakumbukira bza cirengedwe ca Yahova, imwepo mun’dzamulemekeza kwene-kwene. Tsono kundodziwa kuti Yahova ngwanzeru na wamphanvu n’kwakukwanira lini. Koma ni mbali ibodzi yomwe imbacitisa kuti imwepo mukhale naye pa uxamwali. Tsono kuti mukulise lufoyi lanu kwa Yahova na kukhala naye pa uxamwali, mun’funika kupfunza bzizinji pakulewa bza iye.
7. Kodi n’ciyani comwe mun’funika kucita kuti mukulise lufoyi lanu kwa Yahova?
7 Imwepo mun’funika kutsimikiza na mtima wentse kuti Yahova ambacita namwe thupo, ndipo ambakufunani kwene-kwene. Kodi bzimbakunesani kukhulupira kuti Mulengi wakudzulu na wa dziko la pantsi ambakuwonani ndipo ambakusamalirani? Penu munti inde, dziwani kuti Yahova ‘ali lini kutali na m’bodzi na m’bodzi wa ifepano.’ (Mabasa 17:26-28) Iye ‘ambafufudza mitima yentse,’ ndipo akukuuzani kuti ‘[mukamulinga], iye an’dzabzicitisa kuti [mumugumane].’ (1 Nkhani 28:9) Tenepo, thangwe lomwe likukucitisani kupfunza Bibliya tsapano ndakuti Yahovayo akukwewani. (Jeremiya 31:3) Ndipo mukabvesesa bzentse bzomwe Yahova ambakucitirani, lufoyi lanu kwa iye lin’dzathimizirika.
8. Kodi mungatende tani lufoyi lomwe Yahova ambakulatizani?
8 Njira ibodzi yomwe ingakuthandizeni kutenda lufoyi lomwe Yahova ambakulatizani, ni kulewalewa naye mu mpembo. Mukambapemba, mbamuuzani Mulungu bzomwe bzimbakucitisani thupo, ndipo mbatendani bzinthu bzabwino bzomwe iye ambakucitirani. Tenepo mukambawona momwe Yahova akutawirira mipembo yanu, uxamwali bwanu na iye bun’dzalimba. (Psalymo 116:1) Ndipo lufoyi lanu kwa iye lin’dzathimizirika mucikhala na citsimikizo cakuti Yahova ambakubvesesani. Tsono kuti mukhale naye pa uxamwali bwakulimba, mun’funika kubvesesa bzomwe ambafuna, bzomwe ambafuna lini na mathangwe yomwe iye ambacitira bzinthu bzinango. Ndipo mun’funikambo kudziwa bzomwe iye ambafuna kuna imwepo. Njira ibodzi yomwe ingakuthandizeni kukhala na cidziwiso, ni kupfunza Fala lace, Bibliya.
Njira ibodzi yomwe ingatithandize kufendererana na Mulungu, pabodzi na kudziwa bzomwe iye ambafuna, ni kupfunza Bibliya (Onani ndime 9) *
9. Kodi mungalatize tani kuti mumbalemekeza Bibliya?
9 Mbalemekezani Fala la Mulungu, Bibliya. Ni Bibliya lokha lomwe limbalewa bza cadidi ca Yahova na bzomwe iye akufuna kudzakucitirani kutsogolo. Ndipopa mbawerengani Bibliya ntsiku zentse, mbakonzekerani pfunziro lomwe mukucita na munthu omwe ambakupfunzisani Bibliyalo, ndipo mbaphatisani basa bzomwe mukupfunzabzo. Mukacita bzimwebzi, mun’dzalatiza kuti mumbalemekeza Bibliya. (Psalymo 119:97, 99; Juwau 17:17) Kodi imwepo muna ndandanda yakuwerenga Bibliya ntsiku zentse? Penu munti inde, kodi mumbaiteweza?
10. Kodi n’ciyani comwe cimbacitisa Bibliya kukhala lakupambulika?
10 Cinthu cibodzi comwe cimbacitisa Bibliya kukhala lakupambulika, n’cakuti iro lina nkhani za wanthu omwe adawona Jezu maso na maso. Ndipo ndiro lokha lomwe limbafotokoza bzomwe Jezu adakucitirani. Mukadziwa bzomwe Jezu adalewa na kucita, imwepo mun’dzafunisisa kukhala naye pa uxamwali.
11. Kodi n’ciyani comwe cingakuthandizeni kuti muthimizire lufoyi lanu kwa Yahova?
11 Mbafunani Jezu, kuti lufoyi lanu kwa Yahova lithimizirike. Thangwe ranyi? Thangwe ndakuti Jezu ambatewezera ndendende makhalidwe ya Baba wace. (Juwau 14:9) Tenepo, mukambapfunza bza Jezu, mun’dzawona kuti Yahova ngwakufunika kwene-kwene kuna imwepo. Kumbukirani momwe Jezu akhalatizira ntsisi wanthu omwe winango akhawawona kuti mbakunyozeka, thangwe ra kusauka, kupunduka na kuduwala. Ndipo kumbukiranimbo malango yomwe Jezu ambakupasani, na phindu lomwe mwaligumana thangwe ra kuphatisa basa malangoyo.—Mateu 5:1-11; 7:24-27.
12. Kodi n’ciyani cin’dzacitika imwepo mukabvesesa kuti Jezu adabzipereka kuti akufereni?
12 Mukambakumbukira bza ntsembe yomwe Jezu adaipereka kuti tilekereredwe pikado zathu, lufoyi lanu kwa iye lin’dzathimizirika kwene-kwene. (Mateu 20:28) Ndipo mukabvesesa kuti Jezu adabzipereka kuti akufereni, imwepo mun’dzakhala wakukonzeka kukungula pikado zanu na kukumbira Yahova kuti akulekerereni. (Mabasa 3:19, 20; 1 Juwau 1:9) Imwepo mukambafuna Jezu pabodzi na Yahova, mun’dzafunisisa kukhala pa uxamwali na wanthu omwe ambawafunambo.
13. Kodi Yahova an’dzakupasani ciyani?
13 Mbafunani wale omwe ambafunambo Yahova. Bzingacitike kuti abale na axamwali wanu omwe ni Mboni lini za Yahova, angabvesese lini thangwe race imwepo mun’funa kukhala mtumiki wa Yahova. Pinango iwo angaipidwe namwe. Tsono dziwani kuti Yahova an’dzakusiyani lini mwekha; iye an’dzakupasani abale na mpfumakazi wa m’gwere kuti adzakhale ninga wanthu wa m’banja lanu. Ndipo mukakhala wakuphatana na abale wanu wa m’gwere, imwepo mun’dzagumana lufoyi na thandizo lomwe mukufunikira. (Marko 10:29, 30; Wahebereu 10:24, 25) Na kupita kwa nthawe, abale wanu omwe ni mboni lini, pinango angadzacinje makumbukidwe yawo aciyamba kutumikira namwe pabodzi Yahova na kuphatisa basa malamulo yace.—1 Pedru 2:12.
14. Mwakubverana na 1 Juwau 5:3, kodi mwazindikira ciyani pakulewa bza malamulo ya Yahova?
14 Mbalemekezani ndipo mbatewezani malamulo ya Yahova. Mukanati mwadziwa Yahova, pinango imwepo mukhabzisankhulira mwekha bzabwino na bzakuipa, koma tsapano mukuwona kuti malamulo ya Yahova njabwino kwene-kwene. (Psalymo 1:1-3; werengani 1 Juwau 5:3. *) Kumbukirani malango yomwe Bibliya limbapereka kwa amuna na akazi omwe ali pa banja, kwa abereki na wana. (Wayefezo 5:22–6:4) Kodi mukuwona kuti malangoyo yakuthandiza banja lanu kuti likhale lakukondwa? Kumbukiranimbo malango yomwe Yahova ambapereka yakulewa bza kusankhula axamwali. Kodi imwepo mukuwona kuti kuteweza malangoyo kukukuthandizani kukhala na makhalidwe yabwino? Kodi ndimwe wakukondwa? (Mimwani 13:20; 1 Wakolinto 15:33) Bzikuwoneka kuti mtawiro wanu pa mibvunzoyi ngwakuti inde.
15. Kodi mun’funika kucita ciyani kuti mumbaphatise basa malamulo yomwe mumbapfunza m’Bibliya?
15 Nthawe zinango, bzingakuneseni kuphatisa basa malamulo yomwe mukupfunza m’Bibliya. Ndipopa Yahova ambaphatisa basa gulu lace kuti limbakonza mabukhu yomwe yambakhala na nkhani zakulewa bza Bibliya, kuti yambakuthandizeni kuzindikira bzabwino na bzakuipa. (Wahebereu 5:13, 14) Ndipo mukambawerenga na kupfunza mabukhuyo, mun’dzawona kufunika kwa malamuloyo, ndipo mun’dzafunisisa kukhala m’gulu la Yahova.
16. Kodi Yahova ambalinganiza tani gulu lace?
16 Mbafunani ndipo mbathandizani gulu la Yahova. Yahova ambalinganiza gulu lace kucokera m’magwere, ndipo iye adasankhula Mwana wace, Jezu, kuti akhale msolo wa magwere yentse. (Wayefezo 1:22; 5:23) Ntsiku zino, pana basa lomwe likucitidwa na magwereyo. Tsono kuti Jezu akwanise kucita basalo, iye adasankhula kagulu ka amuna wakudzozedwa kuti ambatsogolere basalo. Ndipo Jezuyo adapasa kaguluko dzina lakuti ‘kapolo wakukhulupirika na wanzeru.’ Basa la kaguluko ni kukuthandizani kuti mufendererane na Mulungu na kukhotcerera uxamwali bomwe munabo na iye. (Mateu 24:45-47) Njira ibodzi ya momwe kapolo wakukhulupirika ambaphatira basalo, ni kusankhula amuna wakuthemera kuti akhale akulu wa gwere kuti ambakusamalireni na kukukhotcererani. (Zaiya 32:1, 2; Wahebereu 13:17; 1 Pedru 5:2, 3) Akulu wa gwere ambacita ciri-centse comwe angakwanise, kuti akutsangalazeni na kukuthandizani kukhala pa uxamwali bwakulimba na Yahova. Ndipo cinthu cinango cakufunika kwene-kwene comwe akuluwo angakucitireni, ni kukuthandizani kuti mukapfunzise winango bza Yahova.—Wayefezo 4:11-13.
17. Mwakubverana na Waroma 10:10, 13, 14, thangwe ranyi timbauzambo winango bza Yahova?
17 Thandizani winango kuti amufunembo Yahova. Jezu adauza ateweri wace kuti akapfunzise winango bza Yahova. (Mateu 28:19, 20) Ifepano tingadabvera lamuloli thangwe ra kungingimizidwa. Tsono bziri lini tenepo. Koma lufoyi lanu kwa Yahova likambathimizirika, imwepo mun’dzabzibva ninga momwe mpostolo Pedru na Juwau adabvera. Iwo adati: ‘Tin’leka lini kulewa bzinthu bzomwe tidawona na kubva.’ (Mabasa 4:20) Ifepano tingakomedwe kwene-kwene tikathandiza munthu kuti afunembo Yahova. Kumbukirani momwe Firipi adakhalira wakukondwa pomwe adathandiza nduna ya ku Etiyopia kudziwa cadidi comwe cikhali m’Bzinembo icibatizidwa! Mukambatewezera Firipi na kubvera lamulo la Jezu lakupazira, imwepo mumbakhala mukulatiza kuti mun’funa kukhala m’bodzi wa Mboni za Yahova. (Werengani Waroma 10:10, 13, 14. *) Mpaka pano, imwepo pinango mungabzibvunze mbvunzo ninga omwe nduna ya ku Etiyopia ire idabzibvunza kuti: ‘N’ciyani cin’ndiletsa kuti ndibatizidwe?’—Mabasa 8:36.
18. Kodi ni mibvunzo iponi yomwe in’dzatawiridwa mu nkhani yakutewera?
18 Cakusankhula cakufunika kwene-kwene comwe mungacite pa moyo wanu ni kubzipereka kwa Mulungu mucibatizidwa. Pakuti cakusankhula cimweci n’cikulu, tenepo imwepo mun’funika kukumbukira bwino thandauzo lace. Kodi n’ciyani comwe mun’funika kudziwa pakulewa bza batismo? Kodi imwepo mun’funika kucita ciyani mukanati kubatizidwa na pambuyo pakubatizidwa? Mibvunzoyi in’dzatawiridwa mu nkhani yakutewera.
NYIMBO 2 Dzina Lanu Ndimwe Yahova
^ ndi. 5 Wanthu winango omwe ambafuna Yahova, ambapenukira kuti mbakukonzeka kubatizidwa kuti akhale m’bodzi wa atumiki wace. Kodi imwepo ndimwe m’bodzi wa iwo? Penu bziri tenepo, nkhani ino inkuthandizani kuwona bzinthu bzinango bzomwe mungacite kuti mufike pakubatizidwa.
^ ndi. 2 Mabasa 8:29 Tenepo mzimu udauza Firipi kuti: ‘Ndoko, fendera pa ngolopo.’ 30 Firipi adathamanga ku mbali kwa ngoloyo, acibva ndunayo ikuwerenga mwakukuwa bukhu la mpolofeta Zaiya. Ndipo Firipiyo adabvunza ndunayo kuti: “Kodi ukubvesesa bzomwe ukuwerengabzo?” 31 Iyo idatawira kuti: “Ningabzibvesese tani akasaya kuwoneka nyakuthumbudzulira?” Ndipo ndunayo idadandaulira Firipi kuti apakire ngoloyo, acikhala naye, 35 Firipi adayamba kulewalewa, ndipo kucokera pa bzomwe ndunayo ikhawerenga, iye adaifotokozera bzipsa bzabwino pakulewa bza Jezu. 36 Ndipo pomwe iwo akhafamba mu mseu adafika pa mbuto inango yomwe ikhana thawale la madzi, ndipo ndunayo idati: ‘Onani madziya! N’ciyani cin’ndiletsa kuti ndibatizidwe?’ 38 Tenepo, adaimisa ngoloyo, ndipo Firipi pabodzi na ndunayo adabuluka acipita m’madzimo, ndipo Firipiyo adabatiza ndunayo.
^ ndi. 5 Wanthufe ndife wakusiyana, tenepo, wanthu winango angaphatise basa malango ya mu nkhani ino mwakusiyana na momwe malangoyo yakulewera.
^ ndi. 6 Waroma 1:20 Cirengedwere dziko kuyenda kutsogolo, makhalidwe ya Mulungu yakusaya kuwoneka na maso, yakuwoneka bwino. Makhalidwe ya Mulungu yamweya, na mphanvu zace zakusaya kumala napo Umulungu bwace yakuwonekera mu bzinthu bzomwe iye adakonza mwakuti wanthuwo alibe thangwe lakubveka lakusaya kukhulupira Mulungu.
^ ndi. 6 Onani bziratizo bzinango m’mabroxura aya: Kodi Zamoyo Zinachita Kulengedwa? na Mmene Moyo Unayambira—Mafunso 5 Ofunika Kwambiri.
^ ndi. 14 1 Juwau 5:3 Pakuti kufuna Mulungu kumbathandauza kusunga malamulo yace; ndipo malamulo yaceyo yambalemera lini.
^ ndi. 17 Waroma 10:10 Pakuti na mu mtima munthu ambakhala na cikhulupiro kuti akhale wakulungama, tsono na mulomo, ambadziwisa padeca cikhulupiro cace kuti apulumuke. 13 Pakuti “ali-wentse omwe an’cemera dzina la Yahova, an’dzapulumuka.” 14 Tsono, an’dzacemera tani, wale omwe alibe kumukhulupira? Na tenepo, an’dzamukhulupira tani omwe anati kubva bza iye? Ndipo, an’dzabva tani bza iye akasaya nyakuwapalizira?
^ ndi. 65 BZOMWE BZINKUCITIKA PA CITHUNZI-THUNZI: Mpfumakazi ikugawira katsamba mtsikana omwe akugulisa bzinthu pa bazali.
