Jack na Marie-Line akucita utumiki bwa nthawe zentse kuyambira mu 1988. Iwo ambadziwika ninga wanthu omwe ambabvuma kucinja utumiki, ndipo tikulewa pano abvuma kale kucita utumiki bwakusiyana-siyana ku Guadalupe na ku Guiana Francesa. Mbuto zimwezi tsapano zikunyang’aniridwa na mthambi ya ku França. Mbaticeze nawoni pang’ono.

Kodi n’ciyani comwe cidakucitisani kuti muyambe utumiki bwa nthawe zentse?

Marie-Line: Inepano ndidakulira ku Guadalupe, ndipo pomwe ndikhali mwana, kawiri-kawiri ndikhapalizira na mai wangu ntsiku yathunthu. Maiwo adatumikira Yahova na nyongo. Inepano nimbafuna wanthu, tenepo pomwe ndidamaliza mapfunziro ya ku xikola, ndidayamba kutumikira ninga mpainiya.

Jack: Pomwe ndikhali mulumbwana, ndikhafuna kwene-kwene kukhala na abale omwe akhacita utumiki bwa nthawe zentse, acifunisisadi utumikibo. Ndipo ndikapita feriya ku xikola, inepano ndikhatumikirambo ninga mpainiya wakuthandiza. Kuphampha kwa midzinga inango, ine na mai wangu ayai na abale winango wa m’gwere, tikhayenda na kanderendere kukapalizira ku magawo yomwe apainiya akhakapalizira. Tikhapalizira ntsiku yathunthu, ndipo kuphampha kwa ntsikuyo tikhayenda kukatcula ku gombe. Nthawe imweyire ikhali yakudekeza kwene-kwene!

Pomwe padapita nthawe yakucepa kucokera pomwe ndidalowola Marie-Line mu 1988, ndidabzibvunza kuti: ‘Ifepano tiribe cinthu comwe cingatitazise kucita bzizinji pa kutumikira Yahova, tsono tin’sairanyi kulokotera mpata umweyu?’ Tenepo, ine na mkazangu tidayamba kutumikira ninga apainiya. Pomwe padapita gole libodzi, tidayenda ku xikola ya apainiya, ndipo pambuyo pa xikolayo tidauzidwa kuti titumikire ninga apainiya wakupambulika. Tidacita utumiki bwakusiyana-siyana ku Guadalupe, ndipo na kupita kwa nthawe tidauzidwa kuti tikatumikire ku Guiana Francesa.

Na kupita kwa magole, imwepo mwacinja utumiki bwanu kazinji kentse. Kodi n’ciyani comwe cikukuthandizani kuzolowera moyo upsa?

Marie-Line: Abale wa ku Beteli ya ku Guiana Francesa akhadziwa kuti cinembo comwe timbacifuna kwene-kwene ni Zaiya 6:8. Tenepo iwo akatipfuwira mtedwe, kawiri-kawiri akhayamba na mafala yakuseka nafe yakuti: “Kodi mukukumbukira cinembo comwe mumbacifuna kwene-kwene cire?” Mafalaya yakhatithandiza kudziwa kuti utumiki bwathu bun’cinja.  Tenepo ifepano tikhawatawira kuti: “Tiri pano ife! Titumizeni!”

Ifepano tikhandendemezera lini utumiki bupsa na bwakale thangwe tingadacita bzimwebzi tingadakomedwa lini na utumiki bupsabo. Ndipo tikhacita nyongo yakudziwana na abale na mpfumakazi wa komwe tikhayenda kukacita utumiki bupsa.

Jack: M’mbuyomu, abale na mpfumakazi winango adatikumbira kuti tireke kucoka, thangwe akhafuna lini kuti tisiyane nawo. Pomwe tidacoka ku Guadalupe, m’bale m’bodzi adatikumbusa mafala ya Jezu yomwe yali pa Mateu 13:38 yakuti: ‘Munda ni dziko la pantsi.’ Tenepo, pomwe tikhacinja utumiki, tikhawona kuti tikutumikira m’munda ubodzi-bodzi, bziribe basa kuti tikhali mbuto iponi. Cinthu cakufunika kwene-kwene, ni kukhala na mbuto yakupalizira na wanthu wakuwapalizira.

Tikafika ku gawo lipsa, timbawona kuti wanthu wa m’deralo ambakhala wakukondwa. Tenepo, timbayezera kukhala ninga iwo. Cakudya cingakhale cakusiyana, koma timbadya bzomwe iwo ambadya na kumwa bzomwe iwo ambamwa, tsono cinthu comwe timbayebwa lini ni kukhala wakhonkho. Ifepano timbacita nyongo yakufotokoza bwino utumiki bwathu.

Marie-Line: Timbapfunzambo bzizinji na abale wa kumweko. Ndikukumbukira bzomwe bzidacitika pomwe tidafika ku Guiana Francesa. Nvula idabvumba kwene-kwene, tenepo tidawona kuti bzikhali bwino kudikhira nvulayo kukata, patsogolo pace tiyambe kupalizira. Koma mpfumakazi inango idandibvunza kuti: “Kodi mwakonzeka kuti tikapalizire?” Inepano ndidadabwa ndiciibvunzambo kuti: “Kodi na nvulayi tinkapalizira tani?” Mpfumakaziyo idanditawira kuti: “Tengani sumbulero ndipo mbatiyendeni na njinga.” Ni ntsiku imweyi pomwe ndidapfunza kufamba na njinga uko ndidaphatirira sumbulero nthawe ibodzi-bodziyo. Ndipo ningadakhala kuti ndiribe kupfunza kucita bzimwebzi, ningadakwanisa lini kupalizira pa nthawe ya nvula!

Imwepo mudacinja kale utumiki bwanu kwa maulendo 15. Kodi mpsiponi bzomwe mungauze winango pa nkhani ya kucinjako?

Marie-Line: Nthawe zinango kucinja kungakhale kwakunesa. Koma cakufunika ni kukhala na mbuto yabwino yakupumira ukacokera kukapalizira.

Jack: Kawiri-kawiri, inepano ndikhafuna kumbapintari mkati mwa nyumba yathu ipsa. Koma abale wa ku mthambi akadziwa kuti tin’khalisa lini pa utumiki bupsabo, iwo akhalewa kuti: “Jack, leka kudedema kupintari nyumbayo!”

Marie-Line akhana luso lakulongedza mitolo! Iye akhalongedza bzentse m’kaxa ndipo akhanemba kaxa iri-yentse mwakubverana na bzinthu bzomwe akhaikha m’kaxamo, ninga “bzinthu bzakuphatisira basa ku  cimbudzi,” “ku cipinda,” “ku kozinha” na bzinthu bzinango. Tenepo tikafika ku nyumba ipsa, bzikhatinesa lini kulongedza bzinthu pa mbuto yace. Marie-Line akhanembambo cinthu ciri-centse comwe akhaikha m’kaxa iri-yentse, ndipopa bzikhatinesa lini kugumana bzomwe tikhafuna.

Marie-Line: Pakuti tikhadapfunza kale momwe tingalinganizire bzinthu, tenepo bziribe kutinesa kucita utumiki bwathu mwa njira yakuthemera.

Kodi imwepo mumbacita tani kuti mukwanirise ‘mbali zentse za utumiki [bwanu]’?—2 Timotio 4:5.

Marie-Line: Pa ntsiku ya Ciposi, ifepano timbapuma na kukonzekera mitsonkhano. Koma timbayenda kukapalizira kuyambira Cipiri.

Jack: Napo kuti timbafunika kukwanirisa maora yomwe tidauzidwa kuti timbapereke mwezi uli-wentse, tsono ifepano timbandokumbukira lini bzimwebzo. Cinthu cakufunika kwene-kwene pa moyo wathu, ni kupalizira. Ifepano timbalewalewa na wanthu wentse omwe timbagumana nawo, kuyambira nthawe yomwe timbacoka pamui mpaka nthawe yakubwerera.

Marie-Line: Mwa ciratizo, tikayenda ku madyo, nimbanyamula tumatsamba kuti ndikagawire. Wanthu winango ambatifenderera acitikumbira mabukhu, napo tiribe kuwauza kuti ndife Mboni za Yahova. Ndipopa, timbakhala tceru na bzomwe timbabvala na momwe timbacitira bzinthu na winango. Ndipo wanthu ambawona bzimwebzo.

Jack: Thangwe ra bzinthu bzabwino bzomwe timbacita, wanthu omwe tidafendererana nawo nyumba ambadekedwa nafe. Inepano nimbalokota matsamba, kupsaira kunja kwa litsito na kukataya lixo. Anyakufendererana nawo nyumbawo ambawona bzimwebzi ndipo nthawe zinango ambabvunza kuti: “Kodi mungakhale na Bibliya kuti mundipasembo?”

Imwepo kawiri-kawiri mwakhala mukupalizira ku magawo yakutali. Kodi mukukumbukira cinthu cakupambulika comwe cidakucitikirani ku magawoyo?

Jack: Ku Guiana, mpsakunesa kuti mufike magawo yanango. Nthawe zinango, tikhamala mdzinga ubodzi tikufamba mtantho wa makilometro 600 thangwe ra kudzongeka kwa mseu. Ntsiku inango, tidayenda kukazungira mudzi wa Saint-Élie, omwe uli ku thengo la amazônica, ndipo ntsiku imweyo nimbaiyebwa lini! Kuti tifike kumweko, tikhafunika kufamba maora mazinji na kanderendere ndipo m’mbuto zinango tikhapakira barco. Wanthu azinji wa kumweko basa lawo likhali lakucera oro. Winango wa iwo adakomedwa na mabukhu yathu, ndipo adatipasa oro pang’ono ninga cakupereka. Usiku, tidalatiza vidiyo ibodzi ya gulu lathu. Ndipo wanthu azinji adabwera kudzawona vidiyoyo.

Marie-Line: Mwakusaya kucedwa Jack adacemeredwa kuti akafotokoze nkhani ya Cikumbuso m’mudzi wa Camopi. Kuti tifike kumweko, tidamala maora manai tikufamba na barco mu mkulo wa Oiapoque. Cidakhala cakucitika cabwino.

Jack: Mu mkulo, mbuto yomwe ina madzi yakudemba imbakhala yakugopswa kwene-kwene. Ningalewe kuti mpsakudabwisa kuwona madziyo yakubwera na mphanvu komwe kuna barco. Ntekenyi wa barco ambafunika kudziwa bzomwe akucita. Koma bzidakhala bzakudekeza kwene-kwene! Napo kuti pa Cikumbusoco pakhana Mboni za Yahova 6 zokha, koma wentse omwe adafika pa Cikumbusoco, akhalipo 50, ndipo winango wa iwo zikhali nzika za ku América, omwe ni wanthu omwe ambakhala m’midzi!

Marie-Line: Maswaka yomwe yakufuna kuthimizira utumiki bomwe akucitira Yahova, yangagumanembo phindu na cakucitikaci. Pacakucitika ninga cimweci, imwepo mun’funika kuthemba Yahova ndipo cikhulupiro canu cin’dzalimba. Kawiri-kawiri timbakwanisa kuwona momwe Yahova akutithandizira.

Imwepo mudapfunza bzirewedwe bzizinji. Kodi bziribe kukunesani pa kupfunzapo?

Jack: Ne na pang’onopo. Ndidapfunza bzirewedwebzo kuti ndikwanise kupalizira na kuthandizira m’gwere. Ndikanati kupasidwa mbali yakuwerenga Bibliya, inepano ndikhafunika kutsogolera pfunziro ya Nsanza ya Mulindiri mu cirewedwe ca Cisranantongo. * Pomwe ndidamala kucitisa pfunzirolo, ndidabvunza m’bale m’bodzi kuti andiuze penu bzomwe ndikhalewa bzikhabveseseka. M’baleyo adandiuza kuti: “Mafala yanango ifepano tikhayabvesesa lini, koma mwatsogolera bwino.” Wana akhatithandiza kwene-kwene. Ndipo pakulewalewa ndikaphonyesa mafala yanango, wana akhandiuziratu, tsono akulu-akulu akhandiuza lini. Tenepo na wanawo ndidapfunza bzinthu bzizinji.

Marie-Line: Mu gawo linango, inepano ndikhambacitisa mapfunziro ya Bibliya mu Cifaransa, Cipwitikizi na Cisranantongo. Mpfumakazi inango idandiuza kuti ndiyambe kucitisa mapfunziro mu bzirewedwe  bzomwe bzikhandinesa kwene-kwene, ndicimalizira na bzakusaya kunesa. Mwa kusaya kucedwa ndidawona kuti imweyi ikhali njira yabwino.

Ntsiku inango ndikhafunika kucitisa mapfunziro mawiri ya m’Bibliya, lakuyamba mu Cisranantongo, ndipo laciwiri mu Cipwitikizi. Pomwe ndidayamba kucitisa pfunziro laciwiri, mwanzangu omwe ndikhanaye adandiuza kuti: “Marie-Line, ndikuwona kuti pana cinthu comwe ciri lini bwino.” Pa nthaweyo ndidazindikira kuti ndikhacitisa pfunziro mkazi wa ku Brazil mu Cisranantongo mbuto mwakuphatisa basa Cipwitikizi!

Imwepo mumbafunidwa kwene-kwene na abale wa m’magwere yomwe mudatumikira. Kodi mumbacita tani kuti mukwanise kumbabverana na abalewo?

Jack: Mimwani 11:25 ambati: ‘Munthu wakupasa, an’dzasimbidwa.’ Tenepo ifepano timbapambula nthawe kuti ticeze na abale na kucita nawo bzinthu pabodzi. Bzikafunika kuti Nyumba ya Umambo ikonzewe mbuto zakudzongeka, winango ambandiuza kuti: “Lekani abale winango acite basali.” Ine nimbawauza kuti: “Lekani thupo inepano ningaphatembo basa limweri. Ndipo dziwani kuti penu pana basa lomwe likufuna kuphatidwa, inepano niphatambo.” N’cadidi kuti tentsenefe timbafunika kukhala wa cintsintsi, koma tin’funika lini kubvuma kuti cintsintsico cititazise kuthandiza wanthu winango

Marie-Line: Ifepano timbacita nyongo yakulatiza kuti timbakumbukira abale na mpfumakazi zathu. Mwa ciratizo, tikadziwa kuti m’bale winango akufuna munthu kuti asale na wana pamui pace ayai akawatenga ku xikola, ifepano timbacinja ndandanda yathu kuti timuthandize. Tenepo kukhala wakukonzeka kuthandiza abale wathu kumbatithandiza kukhala nawo paciphatano.

Kodi mwagumana bzisimbo bziponi thangwe ra kutumikira komwe kukufunikira apalizi azinji?

Jack: Ifepano tagumana bzisimbo bzizinji thangwe ra kucita utumiki bwa nthawe zentse. Ndipo takhala na mwayi wa kuwona na kudziwa bwino cirengedwe ca Yahova.

Pomwe ndikhali mwana, ndidaikhidwa m’kawoko ku Guiana Francesa thangwe ra kusaya kupitira nkhani za ndale. Ndikhadikhirira lini kuti ntsiku inango ningadabwerera pomwe ku kawokoko ninga misiyonario, ndicibvumizidwa kuti ndikazungire m’kawokomo ninga mtumiki wa Mulungu. Kulewa mwakusaya kupenukira Yahova ambapasa na mtima wentse!

Marie-Line: Cinthu comwe nimbakomedwa naco kwene-kwene ni kuthandiza winango. Timbakomedwa kwene-kwene thangwe ra kutumikira Yahova. Bzimwebzi bzimbacitisa kuti banja lathu likhale lakuphatana. Nthawe zinango, Jack ambandiuza kuti: “Banja la angana lidasunama. Bzingakhale lini bwino kuti tilicemere kuti tidzadye nalo pabodzi?” Kawiri-kawiri nimbatawira kuti: “Inembo ndikhakumbukira kale tenepo!” Bzimwebzi ndibzo bzomwe bzimbacitika.

Jack: Tsapanopapa, ndagumanidwa na kankro. Napo Marie-Line ambafuna lini kubva ndikalewa bzimwebzi, koma ndidamuuza kale kuti: “Mkazangu, inepano ndikafa mangwana, nin’fa lini ‘[ndidakalamba] kwene-kwene.’ Koma nin’fa wakukondwa, thangwe ndikudziwa kuti ndaphatisa basa moyo wangu kuti nditumikire Yahova, tenepo bzimwebzi bzimbandikodwesa kwene-kwene.”—Ciyambo 25:8.

Marie-Line: Yahova watipasa utumiki bwakusiyana-siyana ndipo wabvuma kuti ticite bzinthu bzomwe tikhabzidikhirira lini. Tenepo, moyo wathu wadzala na bzinthu bzabwino. Ifepano timbathemba kwene-kwene Mulungu, ndipo gulu lace likatiuza kuti tiyende tikatumikire ku m’mbuto inango, ifepano timbazeza lini!