Kodi Mukhadziwa?
KALE-KALE, nyakunyang’anira akhasamalira nyumba ayai bzinthu bza munthu winango. Mu cihebereu na cigirego fala lakuti “nyakunyang’anira” nthawe zinango limbaimira omwe ambasamalira nyumba ayai cinthu cinango.
Pomwe Zuze, mwana wa Djakobo akhali m’kawoko ku Edjipito, adakhala nyakunyang’anira wa nyumba ya mbuya wace Potifari. Ninga momwe Bibliya limbalewera, ‘Potifari adasiya bzinthu bzace bzense m’manja mwa Zuze.’ (Ciyambo 39:2-6) Na kupita kwa nthawe, pomwe Zuze adakhala wamphanvu mu Edjipito, adasankhula munthu kuti ambanyang’anire nyumba yace.—Ciyambo 44:4.
Mu nthawe ya Jezu, anekaciro minda kawiri-kawiri akhakhala m’mizinda yomwe ikhali patali na minda yawo. Ndipopa, iwo akhasankhula wanthu kuti ambanyang’anire mabasa ya minda yawo.
Kodi n’ciyani comwe cikhacitisa kuti munthu asankhulidwe ninga nyakunyang’anira? Mdziwi winango wa nkhani za Roma, wakucemeredwa Columela, omwe adakhala na moyo m’magole dzana yakuyambirira adalewa kuti, munthu omwe akhasankhulidwa kuti akhale nyakunyang’anira akhafunika kukhala munthu omwe “adapfunza momwe angaphatire bwino basa.” Munthuyo akhafunika kumbadziwa bwino basa “lakunyang’anira, ndipo akhafunika lini kumbalekerera kuti bzinthu bzidzongeke ne kupondereza winango.” Columela adalewa pomwe kuti: “Munthuyo akhadikhiridwa kuti akhale wakukonzeka kupfunza bzinthu bzomwe akhabzidziwa lini, sikuti kulewa kuti akudziwa cinthu cinango pomwe iye akucidziwa lini.”
Bibliya limbaphatisa basa ciratizo ca nyakunyang’anira na basa lace pakufotokoza bza mabasa yanango yomwe yambacitika m’gwere lacikristau. Mwa ciratizo, mpostolo Pedru akulimbisa Mkristau ali-wense kuti ambaphatise basa luso lomwe adapasiwa na Mulungu ‘pakutumikira winango ninga anyakunyang’anira wabwino wa kudeka mtima kukulu kwa Mulungu.’—1 Pedru 4:10.
Jezu adaphatisambo basa ciratizo ca nyakunyang’anira pa there lace lomwe limbagumanika pa cinembo ca Luka 16:1-8. Ndipo pakufotokoza bza cizindikiro cakulatiza kubwera kwace ninga Mambo, Jezu adatsimikizira ateweri wace kuti angadaikha ‘kapolo wakukhulupirika na wanzeru,’ ayai ‘nyakunyang’anira wakukhulupirika.’ Basa likulu la nyakunyang’anirayu ni kupereka cakudya cauzimu pa nthawe yace kwa ateweri wa Kristu mu nthawe zakumalizira zino. (Mateu 24:45-47; Luka 12:42) Tikutenda kwene-kwene thangwe ra kukhala m’gulu la wanthu omwe ambapasidwa mabukhu yomwe yambakonzedwa na nyakunyang’anira wakukhulupirika, ndipo yakugawiridwa pa dziko lense la pansi.
Imwepo Mungakomedwembo na
NTSANZA YA MULINDIRI — YAKUPFUNZA
Kodi Mukhadziwa?—Fevereiro 2022
Thangwe ranyi mu nthawe ya Ajirayeri munthu akafuna kulowola akhambapagali ntseulo?
NTSANZA YA MULINDIRI — YAKUPFUNZA
Kodi Mukhadziwa?—Fevereiro 2022
Thangwe ranyi Yahova adacita bwino kumbabvuma kuti Ajirayeri ambapereke ntsembe njiwa ayai nkhangaiwa?
NTSANZA YA MULINDIRI — YAKUPFUNZA
Kodi Mukhadziwa?—Março 2020
Kuthimizira pa bzomwe Bibliya limbalewa, kodi pana umboni bunango bomwe bumbalatiza kuti Ajirayeri adakhala akapolo ku Edjipito?
NTSANZA YA MULINDIRI — YAKUPFUNZA
Kodi Mukhadziwa?—Abril 2019
Kodi wanthu akhacita tani ulendo bwa pa nyanza mu nthawe zakale?
