Nkhani Yakupfunza 48
Malizani Bzomwe Mwayamba Kale Kucita
‘Maliza Kucita Bzomwe Wayamba Kucita.’—2 Wakolinto 8:11.
NYIMBO 35 ‘Tsimikizani Kuti Mpsiponi Bzinthu Bzakufunika Kwene-kwene’
BZOMWE TIN’PFUNZA *
1. Kodi ni mpata uponi omwe Yahova ambapasa ali-wense wa ifepano?
YAHOVA ambatipasa mpata wakusankhula momwe tingakhalire na moyo. Iye ambatipfunzisa momwe tingacitire bzakusankhula bzabwino ndipo tikacita bzakusankhula bzomwe bzin’kodwesa, Yahova an’dzatithandiza kuti bzinthu bzitifambire bwino. (Psalymo 119:173) Tikambaphatisa basa malango ya mu m’Fala Mulungu, tin’dzakwanisa kumbacita bzakusankhula bzabwino.—Wahebereu 5:14.
2. Kodi ni bvuto liponi lomwe tingakhale nalo pambuyo pakucita cakunkhula?
2 Napo ticite cakusankhula canzeru, koma nthawe zinango bzingatinese kucikwanirisa. Onani bziratizobzi: M’bale angacite cakusankhula cakuwerenga Bibliya lense. Iye angayambe kuwerenga bwino-bwino pa mdzinga yakuyambirira, koma nakupita kwa nthawe, n’khusiya kuwerengako. Mpfumakazi ikusankhula kutumikira ninga mpainiya wakukhazikika, tsono ikuzeza kuyamba utumikibo pa nsiku yomwe idasankhula. Bungwe la akulu likusankhula kuzungira abale m’gwere mwawo, tsono papita minyezi mizinji ne kuwazungira. Bzakucitikabzi mpsakusiyana, koma bzikundendemerana pa cinthu cibodzi. Wanthuwa adacita bzakusankhula, koma alibe kukwanirisa bzomwe iwo adasankhulabzo. Mpsibodzi-bodzimbo na bzomwe adacita Akristau wakuyambirira omwe akhala mu mzinda wa Kolinto. Mbatiwoneni bzomwe tingapfunze na iwo.
3. Kodi n’cakusankhula ciponi comwe Akristau wa ku Kolinto adacita, ndipo n’ciyani cidadzacitika?
3 M’magole ya 55 mbuyomu, Akristau wa ku Kolinto adacita cakusankhula cakufunika kwene-kwene. Iwo adadziwa kuti abale wawo omwe akhakhala ku Jeruzalemu na ku Judeya akhabonera ndipo magwere manango yakhakonceza kobiri kuti awathandize. Thangwe ra kupasa na kudeka mtima, Akristau wa ku Kolintowo adacita nyongo kuti athandizembo abalewo, tenepo iwo adabvunza mpostolo Paulo momwe angadaperekera thandizo lawolo. Tenepo, Paulo adatumiza malango kwa Akristauwo, ndipo adasankhula Tito kuti akathandizire pa nkhani yakukonceza kobirizo. (1 Wakolinto 16:1; 2 Wakolinto 8:6) Pomwe padapita minyezi ming’ono-ng’ono, Paulo adabva kuti Akristau wale akhanati akonceza kobiri zomwe akhadalewa zire. Na thangwe limweri, bzakupereka bzawo bzidacebwa kufika ku Jeruzalemu pa nthawe yace, ninga momwe magwere manango yadacitira.—2 Wakolinto 9:4, 5.
4. Mwakubverana na bukhu la 2 Wakolinto 8:7, 10, 11, kodi Paulo adauza Akristau wa ku Kolinto kucita ciyani?
4 Akristau wa ku Kolinto adacita cakusankhula cabwino, ndipo Paulo adawatenda thangwe ra cikhulupiro cakulimba na mtima wawo wakupasa. Koma Paulo akhafunika kuwauza kuti amalize bzomwe akhadayamba kucita. (Werengani 2 Wakolinto 8:7, 10, 11. *) Tenepo, bzomwe Akristauwa adacita bzikutipfunzisa kuti napo Akristau wakukhulupirika nthawe zinango, bzingawanese kukwanirisa cakusankhula cabwino comwe angacite.
5. Kodi mu nkhani ino tinigumana mitawiro ya mibvunzo iponi?
5 Ninga Akristau wa ku Kolinto, nthawe zinango ifepano bzingatinesembo kukwanirisa bzakusankhula bzathu. Thangwe ranyi? Pakuti ndife wakuperewera, nthawe zizinji tingambacite bzinthu mwakucedwa. Ayai pangacitike cinthu cinango mwadzidzidzi comwe cingatitazise kucita cakusankhula cathu. (Mpalizi 9:11; Waroma 7:18) Tsono, tingadziwe tani penu mpsakufunika kucinja cakusankhula comwe tidacita? Ndipo n’ciyani comwe cingatithandize kupitiriza kumaliza bzomwe tayamba kale kucita? Ndime zakutewerazi zin’tithandiza.
BZOMWE MUNGACITE MUKANATI KUCITA CAKUSANKHULA
6. Thangwe ranyi nthawe zinango tingafunike kucinja bzakusankhula?
6 Bzakusankhula bzinango bzingafunike lini kubzicinja. Mwa ciratizo, ifepano tidasankhula kutumikira Yahova, ndipo anyakulowolana an’funika kumbakhulupirana. (Mateu 16:24; 19:6) Koma bzakusankhula bzinango bzingacinjidwe. Thangwe ranyi? Thangwe bzinthu bzimbacinja. Kodi n’ciyani comwe cingatithandize kuti timbacite bzakusankhula bzabwino?
7. Kodi n’ciyani comwe tin’funika kukumbira Yahova, ndipo thangwe ranyi?
7 Mbakumbirani nzeru Yahova. Yahova adauza Tiyago kuti anembe mafala yakuti: ‘Penu alipo omwe akusaya nzeru, apitirize kukumbira kwa Mulungu, pakuti iye ambapasa wense mwakudeka mtima na mwakusaya kutombodzera.’ (Tiyago 1:5) Palibe munthu omwe ambadziwa bzinthu bzense. Tenepo, tikafuna kucita cakusankhula ayai kucinja comwe tidacita kale m’mbuyomu tin’funika kuthemba Yahova kuti ticite cakusankhula cabwino. Tikacita bzimwebzi, Yahovayo an’dzatithandiza kucita bzakusankhula mwanzeru.
8. Thangwe ranyi kufufudza n’kwakufunika tikanati kucita cakusankhula?
8 Mbafufudzani mwakukwanira. Tingafufudze m’Fala la Mulungu, kuwerenga mabukhu ya gulu la Yahova na kumbaceza na wanthu omwe timbawakhulupira. (Mimwani 20:18) Kufufudza n’kwakufunika kwene-kwene thangwe kungaticitise kusankhula basa lomwe lingadzatithandize kugumana kobiri zakuphatisa basa pa moyo wathu, na kupitiriza kutumikira Yahova.
9. Thangwe ranyi tin’funika kukhala wakukhulupirika tikambacita cakusankhula?
9 Mbapendani bzomwe bzimbakucitisani kucita cakusankhula . Yahova ambawona lini kokha bzakusankhula bzathu, koma ambawonambo mathangwe yomwe timbacitira bzakusankhulabzo. (Mimwani 16:2) Iye ambafuna kuti tikhale wakukhulupirika pa bzinthu bzense. Ndipopa, tikambacita cakusankhula tin’funika kumbakhala wakukhulupirika kwa ife na anzathu kubodzi, thangwe tikasaya kukhala wakukhulupirika, bzin’dzatinesa kukwanirisa cakusankhula cathu. Mwa ciratizo, tiyezeze kuti m’bale wasankhula kutumikira ninga mpainiya wakukhazikika. Koma nakupita kwa nthawe, iye akukwanirisa lini maora ya upainiyabo ndipo akuluza cikondweso pa utumiki bwace. Pinango bzomwe bzidacitisa m’baleyu kusankhula kutumikira ninga mpainiya ni kufuna kukondwesa Yahova. Tsono pinango bzingacitike kuti iye adacita cakusankhulaci thangwe kufuna kukondwesa abereki wace, na munthu munango omwe ambakomedwa naye.
10. Kodi munthu an’funika kucita ciyani kuti acinje?
10 Tiyezeze kuti nyakupfunza wa Bibliya wasankhula kuleka kufumali. Kwa midzinga yakuyambirira iye akukwanisa kuleka kufumaliko mwakubonerera. Koma nakupita kwa nthawe akuyamba pomwe kufumali. Tsono nsiku inango, iye akukwanisa kumalisa cikalo cace! Kodi akukwanisa tani? Wakwanisa thangwe ra kufuna Yahova na cikhumbo cace cakufuna kumukondwesa.—Wakoloso 1:10; 3:23.
11. Thangwe ranyi mun’funika kumbalatiza kuti muna bzakulinga?
11 Mbalatizani kuti muna bzakulinga. Mukambalatiza kuti muna bzakulinga, bzin’dzakunesani lini kubzikwanirisa. Mwa ciratizo, pinango imwepo mungasankhule kumbawerenga Bibliya mwakukhazikika. Koma mukakhala mulibe ndandanda bzinganese kukwanirisa cakulinga canuco. * Ciratizo cinango n’ca akulu wa gwere omwe asankhula kucita ulendo bwa ubusa mwakukhazikika, koma na kupita kwa nthawe, iwo akuteweza lini cakusankhula cawoco. Kuti bziwafambire bwino, iwo an’funika kubzibvunza mibvunzo ninga iyi: “Kodi tanemba kale madzina ya abale na mpfumakazi zomwe zin’funikira ulendo bwa ubusa? Kodi tasankhula kale nsiku na nthawe yomwe tingadzawazungire?”
12. Thangwe ranyi tin’funika kumbacita bzinthu bzomwe tingakwanise?
12 Mbacitani bzomwe mungakwanise. Palibe munthu omwe ana nthawe, mphanvu ayai bzinthu bzomwe angaphatise basa kuti acitire bzense bzomwe angafune. Ndipopa, tin’funika kumbacita bzinthu bzomwe tingakwanise. Tenepo, mukawona kuti bzikukunesani kukwanirisa cakusankhula canu, cinjani. (Mpalizi 3:6) Tiyezeze kuti imwepo mwacinja cakusankhula canu ndipo mukufuna kuphatisa basa comwe mwacinjaco, kodi n’ciyani comwe cingakuthandizeni kumaliza comwe mwayamba kucita? Mbatiwoneni bzinthu bzixanu bzomwe bzingakuthandizeni.
BZOMWE MUNGACITE KUTI MUMBAPHATISE BASA BZAKUSANKHULA BZANU
13. Kodi mungagumane tani mphanvu kuti mukwanirise cakulinga canu?
13 Mbakumbirani Mulungu kuti akupaseni mphanvu. Mulungu angakupaseni ‘mphanvu’ kuti mukwanirise cakulinga canu. (Wafiripo 2:13) Tenepo, kumbirani Yahova mzimu wace wakucena kuti akupaseni mphanvu zomwe mukufunikira. Ndipo pitirizani kupemba napo penu mukukumbuka kuti mipembo yanu ikanati kutawiridwa. Lekani kuyebwa kuti Jezu adalewa kuti: ‘Pitirizani kukumbira [mzimu wakucena], ndipo mun’dzapasidwa.’—Luka 11:9, 13.
14. Kodi malango ya pa Mimwani 21:5, yangakuthandizeni tani kuti mukwanirise bzakulinga bzanu?
14 Mbanembani bzomwe mun’funa kucita. (Werengani Mimwani 21:5. *) Kuti mukwanise kumaliza basa liri-lense, imwepo mun’funika kumbakonzekera, mukamala mumbacite bzinthu mwakubverana na momwe mwakonzekerera. Bzimwebzi bzikuphatanidzambo bzakusankhula bzanu. Nembani bzinthu bzense bzomwe mukufuna kucita na bzomwe mun’funikira kubzikwanirisa. Ndipo kucepesa mabasa kungakuthandizeni kuwona momwe mukupitira patsogolo. Mwa ciratizo, mpostolo Paulo adapereka malango kwa Akristau wa ku Kolinto yakuti ‘nsiku yakuyamba ya mdzinga uli-wense’ ambacite bzakupereka. Tenepo, bzingadafunika lini kucita bzakupereka pa nsiku yomwe iye angadafika. (1 Wakolinto 16:2) Bzimwebzi bzikulatiza kuti kucepesa mabasa, kungakuthandizeni kuleka kukhala na makumbukidwe yakuti mungakwanise lini kucita mabasayo.
15. Kodi n’ciyani cin’dzacitika mukambanemba bzomwe mukufuna kucita?
15 Mukambanemba bzomwe mukukhumba kucita, bzin’dzakhala bzausaya kunesa kubzikwanirisa. (1 Wakolinto 14:40) Mwa ciratizo akulu wa gwere adatambira malango ya momwe angaikhire pa udindo mkulu mwanzawo kuti ambanembe cakusankhula ciri-cense comwe akuluwo angacite. Mkulu wakusankhulidwayo ambanemba omwe wasankhulidwa kuti acite basa linango, na nthawe yakukhazikisidwa kuti alikwanirise. Akulu akambanemba ndandanda, bzimbakhala bzakusaya kunesa kucita bzomwe asankhula. (1 Wakolinto 9:26) Tenepo, imwepo mungacitembo bzibodzi-bodzibzi pa moyo wanu wa nsiku na nsiku. Mwa ciratizo, munganembe bzomwe mukufuna kucita pa nsiku iri-yense, ndipo mukamala nembani cinthu cakuyambirira comwe mukufuna kucita. Mukacita bzimwebzi, mun’dzakwanisa kumaliza bzomwe mwayamba kucita na nthawe yabwino.
16. Kodi tin’funika kucita ciyani kuti titeweze na kumaliza bzomwe tayamba kucita, ndipo bukhu la Waroma 12:11 lingatithandize tani?
16 Mbacitani nyongo. Kuti titeweze na kumaliza bzomwe tayamba kucita, pambafunika nyongo. (Werengani Waroma 12:11. *) Mpostolo Paulo adauza Timotio kuti ‘pitiriza kukhala wakubzipereka pa kuwerenga’ na kukhala mpfunzisi wabwino. Malangoya njabwino, ndipo ifepano tingayaphatise basa pomwe tikufuna kucitira Yahova bzinthu bzense bzabwino bzomwe tingakwanise.—1 Timotio 4:13, 16.
17. Kodi bukhu la Wayefezo 5:15, 16, lingatithandize tani kucita mabasa yomwe tingalinganize?
17 Mbaphatisani basa bwino nthawe yanu. (Werengani Wayefezo 5:15, 16. *) Khazikisani nthawe yakuti mucite bzomwe mwakumbuka kucita ndipo lekani kucinja nthaweyo. Lekani kumbandodikhirira nthawe yabwino yokha-yokha. (Mpalizi 11:4) Ndipo samalani kuti bzinthu bzakusaya kufunika, bzireke kukudzongerani nthawe pabodzi na mphanvu zomwe mungaziphatise basa pakucita bzinthu bzakufunika kwene-kwene. (Wafiripo 1:10) Bzikakwanisika, mbacitani mabasa yanango pa nthawe yomwe winango angakuphingezeni lini. Tenepo mbawauzani kuti aleke kukusokonezani. Ndipo mukakhala mukucita mabasa yanuyo, mbathimisani mtedwe ayai mtcini wanu wanzeru ndipo mensaje zomwe zingapite mun’dzaziwone pa nthawe inango. *
18-19. Kodi n’ciyani comwe cingakuthandizeni kuleka kubwerera m’mbuyo pa cakusankhula cabwino comwe mudacita napo mukagumana na mphitca?
18 Mbakumbukirani bzakutewera bzabwino bzomwe mungakhale nabzo. Bzakutewera bzomwe bzimbabwera thangwe ra bzakusankhula bziri ninga ulendo. Mukafunisisa kufika ulendo bwanu, imwepo mun’dzapitiriza na ulendobo napo penu mungafunikire kucinja njira yakupitira thangwe rakuti njirayo yafungidwa. Mpsibodzi-bodzimbo na imwepo, mukambakumbukira bzakutewera bzomwe bzimbabwera thangwe ra bzakusankhula bzanu, mun’dzabwerera lini m’mbuyo mwakamfulumize mukagumana na mphitca ayai pakafunikira kucinja bzinthu bzinango.—Wagalata 6:9.
19 Kucita bzakusankhula bzabwino na kubziphatisa basa mpsakunesa. Koma na thandizo la Yahova, imwepo mungakhale na nzeru pabodzi na mphanvu zakufunikira kuti mumalize bzense bzomwe mwayamba kale kucita.
NYIMBO 65 Tipitirize Kuyenda Patsogolo!
^ ndi. 5 Kodi imwepo mudakhumbula kale na bzakusankhula bzomwe mudacita? Kodi bzimbakunesani kucita cakusankhula cabwino na kuciphatisa basa? Nkhani ino inkuthandizani kumalisa bvutoli ndipo inilatiza momwe mungamalizire bzomwe mwayamba kale kucita.
^ ndi. 4 2 Wakolinto 8:7 Pakuti ndimwe wakudala pa bzense, ninga pa cikhulupiro, kudziwa kulewalewa, cidziwiso, nyongo pa bzense bzomwe mumbacita, na lufoyi lomwe ifepano timbakulatizani, tenepo khalanimbo wakudala thangwe ra kudeka mtima komwe mwapasidwaku. 10 Makumbukidwe yangu pa nkhaniyi njaya: kuteweza bzimwebzi n’kwaphindu kwa imwepo, pakuti papita gole libodzi kucokera pomwe mudayamba basali, ndipo mulibe kundoyamba kokha, koma mwalatiza kuti mukufunisisa kulicita. 11 Tsapano, malizani kucita bzomwe mwayamba kucita, kuti kukonzeka kwanu kukwanisike mwakubverana na bzinthu bzomwe mukubziphatisa basa.
^ ndi. 11 Kuti mukwanirise makonzedwe yanu ya kuwenga Bibliya, cosani “Ndandanda Yowerengera Baibulo”, yomwe iri pa jw.org®.
^ ndi. 14 Mimwani 21:5 Munthu wa nyongo an’dzagumana phindu pa bzakulinga bzace, koma nyakucita bzinthu na befu an’dzasauka.
^ ndi. 16 Waroma 12:11 Phatani basa na mphanvu, sikuti mwautofu. Gakani mwauzimu. Phatani basa ninga akapolo wa Yahova.
^ ndi. 17 Wayefezo 5:15 Tenepo, samalani kuti mufambe, sikuti ninga wanthu wakusaya nzeru, koma ninga wanthu wanzeru, 16 mucimbaphatisa bwino basa nthawe yanu, pakuti nsikuzi zaipa.
^ ndi. 17 Kuti mudziwe bzinthu bzinango bzomwe bzingakuthandizeni kusamalira nthawe yanu, onani nkhani yakuti “Mfundo 20 Zothandiza Kuti Muzikhala ndi Nthawi Yokwanira,” mu Mukani! wa Abril 2010 Chichewa.
