1. Kodi n’ciyani comwe cin’dzatitsangalaza tikabzibva kuti tiri tekha ayai tina thupo thangwe ra mabvuto yathu? (Psalymo 118:5-7)

KODI mudabzibvambo kale kuti muli mwekha mucikumbuka kuti palibe munthu omwe angakuthandizeni na kumalisa mabvuto yanu? Wanthu azinji ambakumbuka tenepo kuphatanidzambo atumiki wakukhulupirika wa Yahova. (1 Wamambo 19:14) Bzimwebzi bzingakucitikirani, kumbukirani bzomwe Yahova adalewa: ‘Nin’dzakusiyani lini na pang’onopo ne kukuthawani.’ Ndipopa tingalewe na mtima wentse kuti: ‘Yahova ndiye nthandizi wangu, cipo ndicidzacita mantha.’ (Wahebereu 13:5, 6) Mpostolo Paulo adanembera abale wace wa ku Djudeya mafala yamweya mu gole na 61. Mafala yamweya yakundokumbusa bzomwe bzidanembedwa pa Psalymo 118:5-7.—Werengani. *

2. Kodi tin’cezerana bzinthu bziponi mu nkhani ino, ndipo thangwe ranyi?

² Ninga nyakunemba psalymoyi, Paulo adazindikira kuti Yahova akhali nthandizi wace. Mwa ciratizo, pomwe padapita magole mawiri kucokera pomwe iye adanembera tsamba Ahebereu, mpostolo Paulo adacita ulendo bwakugopswa pa nthawe yomwe m’nyanza mukhacita cimphepo cakugopswa. (Mabasa 27:4, 15, 20) Pa nthawe yomwe iye akhacita ulendo bwace, na pa nthawe yomwe akhanati kucita ulendobo, Yahova adalatiza kazinji kentse kuti akhali nthandizi wace. Mbatiwoneni njira zitatu za momwe Yahovayo adacitira bzimwebzo. Cakuyamba, Yahova adaphatisa basa Jezu na wanjo wace, caciwiri, adaphatisa basa atongi na cacitatu, abale wace wacikristau. Kukumbukira bzomwe bzidacitika pa moyo wa Paulo, kunikulisa cikhulupiro cathu kwa Mulungu cakuti iye an’dzatawirambo mipembo yathu.

3. Kodi pinango Paulo adabzibvunza ciyani, ndipo n’thangwe ranyi?

³ Paulo akhafunikira thandizo. Pa gole la 56, thimu la wanthu lidapfuwira Paulo kunja kwa templo ku Jeruzalemu ndipo adayeza kumupha. Mangwana yace pomwe Paulo adayendesedwa ku Sinedriyo, thimu la wanthu lire likhafuna kumupha. (Mabasa 21:30-32; 22:30; 23:6-10) Pa nthawe imweyi, pinango iye adabzibvunza kuti: “Nin’funikira kupirira bzimwebzi mpaka lini?”

4. Kodi Yahova adathandiza tani Paulo mwakuphatisa basa Jezu?

⁴ Kodi Paulo adatambira thandizo liponi? Usiku bomwe Paulo adamangidwa, ‘Mbuya’ Jezu adaima patsogolo pace acimuuza kuti: ‘Khwimika! Ninga momwe udacitira umboni bwakukwanira ku Jeruzalemu, un’dzandicitira pomwe umboni ku Roma.’ (Mabasa 23:11) Mafala yamweya yadamulimbikisa Paulo! Jezu adapasa Paulo umboni bomwe adakacitira ku Jeruzalemu, ndipo Jezuyo adalimbikisa Paulo kuti afike ku Roma kuti akacitirembo umboni. Iye adalimbikisa Paulo mwa kumuuza kuti an’fika ku Roma kuti akacitirembo umboni. Pambuyo pa kulimbisidwako, Paulo adabzibva wakukhotcerereka ninga momwe mwana ambabvera akakhala ali m’manja mwa Pai wace.

5. Kodi Yahova adathandiza tani mpostolo Paulo mwakuphatisa basa anjo? (Onani cinthunzi-thunzi.)

⁵ Kodi mabvuto yanango yomwe Paulo adagumana nayo ngaponi? Pambuyo pa magole mawiri kucokera pa bzomwe bzidacitika ku Jeruzalemu, pomwe Paulo akhali mu ngalawa pa ulendo bwakuyenda ku Italiya, adagumana na cimphepo camphanvu ndipo wentse omwe akhali mu ngalawamo akhakumbuka kuti angadafa. Napo bzikhali tenepo, Paulo akhabva lini mantha. Thangwe ranyi? Thangwe ra kuti iye adauza wentse omwe akhali mu cingalawamo kuti: ‘Pakuti usiku bwapitabu, anjo wa Mulungu wangu omwe ndikumucitira utumiki bwakupambulika, adaima pafupi na ine, acindiuza kuti: “Leka kugopa Paulo, un’funika kukawonana na Sezare, ndipo ona Mulungu mwa kudeka mtima an’pulumusa wentse omwe uli nawo pabodzi pa ulendobo, thangwe ra iwepo.”’ Yahova adaphatisa basa anjo kuti akalimbikise Paulo ninga momwe iye adaphatisira basa Jezu kuti amulimbise. Ndipo Paulo adafika ku Roma ninga momwe Yahova akhadalewera.—Mabasa 27:20-25; 28:16.

6. Kodi ni mafala yaponi ya Jezu yomwe yangatilimbikise, ndipo n’thangwe ranyi?

⁶ Kodi Jezu ambatithandiza tani? Iye ambatithandiza ninga momwe adathandizira mpostolo Paulo. Mwa ciratizo, Jezu adawauza wentse omwe ambamutewera kuti: ‘Ndiri pabodzi na imwe ntsiku zentse mpaka kuphampha kwa nkonzedwe uno wa bzinthu wa nthawe ino.’ (Mateu 28:20) Mafala ya Jezuya yambatilimbikisa kwene-kwene. Thangwe ranyi? Thangwe tikukhala mu ntsiku zakunesa ndipo timbagumana na mabvuto mwakuti bzimbatinesa kupirira. Mwa ciratizo, munthu omwe timbamufuna akafa timbawawidwa kwene-kwene mu mtima, ndipo timbakhala tidasunama kwa nthawe itali ayai kwa magole  mazinji; ndipo winango akulimbana na mabvuto yomwe yambabwera thangwe ra kukalamba ndipo winango akulimbana na msunamo pa moyo wawo. Napo bziri tenepo ifepano timbalimbikisidwa thangwe ra kudziwa kuti Jezu ali nafe pabodzi ‘ntsiku zentse’ kuphatanidzambo ntsiku zakunesa za pa moyo wathu.—Mateu 11:28-30.

7. Mwakubverana na Cibvumbulutso 14:6, kodi Yahova ambatithandiza tani ntsiku zino?

⁷ Fala la Mulungu limbatiuza kuti Yahova ambatithandiza mwakuphatisa wanjo wace. (Wahebereu 1:7, 14) Mwa ciratizo, wanjo ambatithandiza tikakhala tikupalizira ‘bzipsa bzabwino bza Umambo’ kuna wanthu wa ‘mitundu yentse, dzinza lentse na bzirewedwe bzentse.’—Mateu 24:13, 14; werengani Cibvumbulutso 14:6. *

8. Kodi Yahova adathandiza tani Paulo mwakuphatisa basa mkulu wa acikunda?

⁸ Kodi Paulo adathandizidwa tani? Mu gole la 56 Jezu adauza Paulo kuti angadayenda ku Roma, koma Adjuda winango mu Jeruzalemu adacita makonzedwe yakuti aphate Paulo kuti amuphe. Pomwe mkulu wa acikunda wa Roma wakucemeredwa Claudiyo Silisiya adadziwa bzimwebzi, iye adapulumusa Paulo. Mwakamkulumize Claudiyo adatumiza acikunda, kuti aperekeze Paulo pakuyenda ku Kaesarea, omwe ukhali ntantho wa makilometro 105 kucokera ku Jeruzalemu. Ku Kaesarea mtongi Felix adalewa kuti Paulo ‘aikhidwe m’kawoko m’nyumba ya Herode acimulindira.’ Adjuda omwe akhafuna kupha Paulo, alibe kukwanisa kumufikira kuti amucite cinthu cakuipa kumweko.—Mabasa 23:12-35.

9. Kodi mtongi Festo adathandiza tani Paulo?

⁹ Kwa magole mawiri, Paulo adapitiriza kukhala m’kawoko ku Kaesarea. Na kupita kwa nthawe, Festo ndiye omwe adadzakhala mtongi mupsa ku Kaesarea m’mbuto mwa Felix. Adjuda adakumbira Festo kuti Paulo ayende ku Jeruzalemu kuti akatongedwe kumweko, koma Festo adalamba. Pinango pentse mtongiyo akhadziwa kuti Adjuda akhana ‘cakulinga cakufuna kumudikhira [Paulo] pa njira kuti amuphe.’—Mabasa 24:27–25:5.

10. Kodi mtongi Festo adacita ciyani pomwe Paulo adakumbira kuti akatongedwe na Sezare?

¹⁰ Na kupita kwa nthawe, Paulo adadzatongedwera ku Kaesarea. Festo ‘pakufuna kuti Adjuda akomedwe naye,’ iye adabvunza Paulo kuti: ‘Un’funa kuyenda ku Jeruzalemu kuti ukatongedwe kumweko, pamaso pa inepano pakulewa bza nkhani imweyi?’ Pakuti Paulo akhadziwa kuti angadayenda ku Jeruzalemu angadaphedwa kumweko, ndipo nakuti akhadziwa kuti n’ciyani akhafunika kucita kuti apulumuse moyo wace, iye adasankhula kuyenda ku Roma kuti akapitirize kucita utumiki bwace. Iye adatawira kuti: ‘Ndikukumbira kuti ndikawonekere kwa Sezare.’ Pambuyo pakubvunza alangizi wace, Festo adatawira kuti: ‘Pakuti wakumbira kuti ukawonekere kwa Sezare un’dzayendadi kumweko.’ Bzomwe Festo adalewa, bzidapulumusa moyo wa Paulo kwa anyamadulanthaka wace. Na kupita kwa nthawe, Paulo adadzayenda ku Roma komwe kukhali kutali na komwe Adjuda omwe akhafuna kumupha wale akhakhala.—Mabasa 25:6-12.

11. Kodi Paulo adakumbukira mafala yaponi yomwe Zaiya adanemba?

¹¹ Pomwe Paulo akhadikhirira ulendo bwace bwakuyenda ku Italiya, pinango pentse iye adakumbukira cenjezo omwe mpolofeta Zaiya adauza wale omwe ambanyoza Yahova: ‘Citani bzomwe mukufuna koma bzin’dzakufambirani lini. Lewani bzomwe mukufuna koma bzin’dzakumalirani kuipa, thangwe Mulungu ana ifepano!’ (Zaiya 8:10) Paulo akhadziwa kuti Mulungu angadamuthandiza ndipo bzimwebzi bzidamulimbikisa pa mabvuto yomwe angadadzagumana nayo kutsogolo.

12. Kodi Juliyo adathandiza tani Paulo, ndipo Pauloyo adazindikira ciyani?

¹² Mu gole la 58, Paulo adayamba ulendo bwace bwakuyenda ku Roma. Pakuti akhali nyam’kawoko,  akhanyang’aniridwa na mcikunda m’bodzi wa Roma wakucemeredwa Juliyo. Kucokera mu nthawe imweyire, Juliyo akhana mphanvu yakucitira Paulo bzinthu bzabwino ayai bzinthu bzakuipa. Kodi iye adaphatisa basa tani mphanvu zacezo? Mangwana yace pomwe adafika pa mbuto yakuyamba kuima, ‘Juliyo adadekera mtima Paulo mwakuti adamubvumiza kuzungira azixamwali wace.’ Patsogolo pace Juliyo adapulumusa moyo wa Paulo. Mwa njira iponi? Pomwe acikunda akhafuna kupha anyam’kawoko wentse omwe akhali mu cingalawa, Juliyo adawaletsa kucita bzimwebzi. Thangwe ranyi? Thangwe rakuti iye ‘akhadatsimikiza kupulumusa Paulo.’ Mwa kusaya kupenukira, Paulo adazindikira kuti Yahova akhaphatisa basa mcikunda wabwino ule kuti amuthandize na kumukhotcerera.—Mabasa 27:1-3, 42-44.

13. Kodi Yahova angaphatise tani basa wanthu omwe ali pa utongi?

¹³ Kodi ifepano timbathandizidwa tani? Mwakubverana na kufuna kwace, Yahova angaphatise basa mzimu wace wakucena kuti acitise atongi kucita bzomwe iye akufuna. Mambo Salomau adanemba kuti: ‘Mtima wa mambo uli ninga madzi yamphanvu yomwe yali mu mkulo m’manja mwa Yahova, ndipo ambaugonyolesera komwe iye akufuna.’ (Mimwani 21:1) Kodi mwaniyi akuthandauza ciyani? Wanthu ambakonza mgero kuti madzi yambapite na m’mwemo. Mpsibodzi-bodzimbo, Yahova angaphatise basa mzimu wace kuti acitise atongi kucita bzomwe iye akufuna. Bzimwebzi bzikacitika wanthu omwe ali pa utongi, ambatokonyedwa ndipo ambacita bzinthu bzomwe bzimbathandiza atumiki wa Mulugu.—Ndendemezerani na Ezara 7:21, 25, 26.

14. Mwakubverana na Mabasa 12:5, kodi ni mbani omwe tin’funika kumbawapempherera?

¹⁴ Kodi n’ciyani comwe tingacite? Tin’funika kupempherera ‘wamambo na wentse omwe ali m’mbuto za padzulu,’ akakhala akusankhula kucita bzinthu bzomwe bzingatokonye moyo wathu na utumiki bwathu. (1 Timotio 2:1, 2 Nehemiya 1:11) Ninga momwe adacitira Akristau wakuyambirira, ifepanombo tin’funika kupemphera kwa Mulungu kuti athandize abale na mpfumakazi zathu omwe ali mkawoko. (Werengani Mabasa 12:5; * Wahebereu 13:3) Tin’funika kupemphererambo wanthu omwe ambanyang’anira abale na mpfumakazi omwe ali m’mkawoko. Tingakumbire Yahova kuti acitise makumbukidwe ya wanthuwo kuti yakhale ninga ya Juliyo kuti acitire bzinthu abale wathu ‘mwakudeka mtima.’—Mabasa 27:3.

15-16. Kodi Yahova adathandiza tani Paulo mwakuphatisa basa Aristako na Luka?

¹⁵ Kodi Paulo adathandizidwa tani? Pomwe Paulo adacita ulendo bwakuyenda ku Roma, Yahova adaphatisa basa abale na mpfumakazi kuti amuthandize. Mbatiwoneni bziratizo bzinango.

 ¹⁶ Axamwali wa Paulo awiri wakukhulupirika omwe ni Aristako na Luka, adayenda pabodzi na Paulo ku Roma. * Bibliya limbalewa lini kuti Jezu akhadalewa kale kuti Aristako na Luka angadafika ku Roma mwakukhotcerereka. Koma napo bzikhali tenepo, iwo adaikha moyo wawo pa ngozi mwa kucita ulendo bwakugoswa bule. Bzikuwoneka kuti iwo akhali wakukonzeka kucita bzimwebzi thangwe ra kufuna kuthandiza Paulo. Pambuyo pa ulendobo ni pomwe adazindikira kuti angadapulumusidwa. Pomwe Aristako na Luka adapita m’cingalawa ku Kaesarea, Paulo adapemphera na mtima wentse kwa Yahova mwa kutenda thandizo lomwe iye adalitambira kucokera kwa abale awiri wakukhimikawa.—Mabasa 27:1, 2, 20-25.

17. Kodi Yahova adathandiza tani Paulo mwakuphatisa basa abale?

¹⁷ Pomwe Paulo akhali pa ulendo bwace, abale wa m’gwere adamuthandiza kazinji kentse. Mwa ciratizo, pomwe iwo adaima mu mzinda wa Sidoni, Juliyo adabvumiza Paulo ‘kukazungira axamwali wace acikamusamalira.’ Ndipo na kupita kwa nthawe mzinda wa ku Putewoli, Paulo na omwe akhamuperekeza ‘adagumana na abale winango omwe adamungingimiza kuti akhale nawo ntsiku zinomwe.’ Akristau adapasa bzinthu bzomwe Paulo na anzacewo akhafunikira, ndipo tikupenukira lini kuti Pauloyo adakondwesa abale wacewo mwa kuwalimbikisa na bzomwe bzidamucitikira. (Ndendemezerani na Mabasa 15:2, 3.) Pambuyo pa kuzungira abalewo, Paulo pabodzi na omwe akhamuperekezawo adapitiriza ulendo bwawo.—Mabasa 27:3; 28:13, 14.

18. Kodi n’ciyani cidacitisa Paulo kutenda Mulungu na kukhala wakukhwimika?

¹⁸ Pomwe Paulo akhali ku Roma, pinango iye adakumbukira matsamba matatu yomwe akhadanembera gwere la mzinda umweule, pomwe iye adati: ‘Kwa magole mazinji ndakhala na cikhumbo cakufuna kubwera kudzakuwonani.’ (Waroma 15:23) Bzikuwoneka kuti iye akhadikhirira lini kuti angadafika mu mzindamo ninga nyamkawoko. Bzikuwoneka kuti Paulo adalimbikisidwa kwene-kwene pomwe adawona abale wa ku Roma ali kumudikhirira mu njira kuti amusane naye! ‘Pomwe Paulo adawawona adatenda Mulungu ndipo adakhala wakukhwimika.’ (Mabasa  28:15) Onani kuti Paulo adatenda Mulungu thangwe ra kuwona abalewo. Thangwe ranyi? Thangwe rakuti Paulo adazindikira kuti Yahova akhamuthandiza mwakuphatisa basa abale wacewo.

19. Mwakubverana na 1 Pedru 4:10, kodi Yahova angatiphatise tani basa kuti tithandize abale omwe akufunikira thandizo?

¹⁹ Kodi tin’funika kucita ciyani? Kodi m’gwere mwanu muna abale ayai mpfumakazi omwe ali kubonera thangwe ra matenda ayai akulimbana na mabvuto yakusiya-siyana ayai adafedwa m’bale wawo? Tikabva kuti pana m’bale ayai mpfumakazi omwe akufunikira thandizo, tingakumbire Yahova kuti atithandize kuwona bzakulewa ayai kuwacitira bzinthu mwakudeka mtima na mwa lufoyi. Mafala yathu na bzakucita bzathu bzin’funika kukhala bzire bzomwe bzinilimbikisa abale na mpfumakazi zathu. (Werengani 1 Pedru 4:10. *) * Tikawathandiza abalewo, iwo angakhale na citsimikizo centse ca mafala ya Yahova yakuti: ‘Nin’dzakusiyani lini na pang’onopo ne kukuthawani,’ kuti yakuphata basa pa moyo wawo. Bzimwebzi bzin’dzakucitisani kukhala wakukondwa.

20. Thangwe ranyi tingalewe na mtima wentse kuti ‘Yahova ni nthandizi wangu’?

²⁰ Ninga Paulo na axamwali wace, ifepano timbagumanambo na mabvuto. Ndipo pa nthawe ibodzi-bodziyo, timbadziwa kuti tingakhale wakukhwimika thangwe rakuti Yahova, anafe pabodzi. Iye ambatithandiza mwakuphatisira basa Jezu na anjo. Ndipo mwakubverana na kufuna kwace Yahova angatithandizembo mwakuphatisira basa wanthu omwe ali mu utongi. Azinji wa ifepano takwanisa kuwona kuti Yahova ambaphatisa basa mzimu wace wakucena kuti acitise abale na mpfumakazi kuti atithandize. Tenepo ninga Paulo, ifepano tina mathangwe yakubveka yakulewera kuti: ‘Yahova ndiye nthandizi wangu cipo ndicidzacita mantha, munthu angandicitenyi.’—Wahebereu 13:6.