Nkhani Yakupfunza 48
Nyang’anisani Kutsogolo
‘Maso yako yan’funika kunyang’anisisa kutsogolo, inde, maso yako ya kuyetima yan’funika kukhala yadanyang’anisisa kutsogolo.’—MIMWANI 4:25.
NYIMBO 77 Ceza mu Dziko la Mdimali
BZOMWE TIN’PFUNZA *
1-2. Kodi tingateweze tani malango yomwe yali pa Mimwani 4:25? Fotokozani ciratizo.
ONANI bziratizo bzitatu bzakutewerabzi. Mpfumakazi yacikulire ikukumbukira bzinthu bzabwino bzomwe bzidamucitikira kale-kale pomwe akhali mwana. Ndipo tsapano napo kuti ikugumana na mabvuto yakusiyana-siyana pa moyo wace, koma ikucita ciri-centse comwe ingakwanise kuti ipitirize kutumikira Yahova. (1 Wakolinto 15:58) Ntsiku zentse mpfumakaziyo imbakumbukira kuti iri mu paraizo na wanthu wa m’banja lace pabodzi na axamwali wace. Mpfumakazi inango ikukumbukira munthu omwe adamucitira cinthu comwe iribe kukomedwa naco m’gwere. Koma yasankhula kuleka kumukoyera cakumtima. (Wakoloso 3:13) M’bale akukumbukira bzomwe adaphonya, koma akupitiriza kucita bzomwe angakwanise kuti alimbise cikhulupiro cace kwa Yahova.—Psalymo 51:10.
2 Kodi pana kundendemerana kuponi pakati pa bzomwe Akristau atatuwa adacita? Abale atatuwa ambakumbukira bzinthu bzomwe bzidacitika kale-kale pa moyo wawo, koma nthawe zentse ambandokhala lini acikumbukira bzomwe bzidacitikabzo. M’mbuto mwace iwo ‘[ambanyang’anisisa] kutsogolo.’—Werangani Mimwani 4:25. *
3. Thangwe ranyi mpsakufunika kuti ifepano ‘[timbanyang’anisise] kutsolo?’
3 Thangwe ranyi mpsakufunika kuti ‘[tinyang’anisise] kutsogolo?’ Thangwe munthu akakhala akufamba uku adanyang’anisa m’mbuyo, bzimbamunesa kufamba bwino. Bzimwebzi mpsibodzi-bodzimbo na basa lathu lakutumikira Yahova. Ifepano tingakwanise lini kupitiriza kutumikira Yahova tikakhala ticimbandokumbukira bzinthu bzomwe bzidacitika kale-kale pa moyo wanthu ayai bzinthu bzomwe tidacita.—Luka 9:62.
4. Kodi mu nkhani ino tin’cezerana bzinthu bziponi?
4 Mu nkhani ino tin’cizerana bzinthu bzitatu bzomwe bzingaticitise kukumbukira moyo omwe tikhanawo kale-kale. Bzinthubzo mpsibzi: (1) cisuwo, (2) kukoyerana cakumtima, na (3) kubzipasa mulandu mwakupitirira malire. Pa cinthu ciri-centse, tiniwona momwe Bibliya lingatithandizire kuleka kumbandokhala ticikumbukira ‘bzinthu bza m’mbuyo,’ koma timbacite nyongo yakuti timbakumbukire ‘bzinthu bza kutsogolo.’—Wafiripo 3:13.
MAKUMBUKIDWE YAKUIPA YOMWE YANGABWERE THANGWE RA CISUWO
Kodi n’ciyani cingatitazise kunyang’anisa kutsogolo komwe tikuyenda? (Onani ndime 5, 9, 13) *
5. Kodi Mpalizi 7:10, ambatiuza kuti titcenkhe kucita ciyani?
5 Werengani Mpalizi 7:10. * Onani kuti vesiri likulewa lini kuti mpsakuphonyeka kubzibvunza kuti: ‘Thangwe ranyi kale-kale bzinthu bzikhali bwino kuposa ntsiku zino?’ Kukhala na makumbukidwe yabwino ni mphaso yakucokera kwa Yahova. Tenepo vesiri likulewa kuti: ‘Leka kulewa kuti: “Thangwe ranyi kale-kale bzinthu bzikhali bwino kuposa ntsiku zino?”’ Kulewa m’mafala yanango, tin’funika kutcenkha kumbandendemezera moyo omwe tikhanawo kale-kale na moyo omwe tinawo lero lino, ticimbakumbuka kuti ntsiku zino bzinthu bzaipa kwene-kwene. Bibliya linango pakulewa bza vesiri lidati: “Lekani kumbabvunza kuti ‘thangwe ranyi bzinthu bzikhali bwino kwene-kwene kale-kale?’ Mpsakusaya msolo kubzibvunza mbvunzoyu.”
Kodi Ajirayeri adaphonya ciyani pomwe adacoka ku Edjipito? (Onani ndime 6)
6. Thangwe ranyi tingalewe kuti mpsakusaya nzeru kumbandokhala ticikumbukira kuti kale-kale tikhana moyo wabwino? Fotokozani ciratizo.
6 Thangwe ranyi tingalewe kuti mpsakusaya nzeru kumbandokhala ticikumbuka kuti kale-kale tikhana moyo wabwino? Cisuwo cingaticitise kumbandokhala ticikumbukira bzinthu bzabwino bzokha bzomwe bzidacitika pa moyo wathu kale-kale. Ndipo bzimwebzi bzingatiyebwese kuti tikhagumanambo na mabvuto. Kumbukirani bzomwe bzidacitika na Ajirayeri. Pambuyo pakucoka ku Edjipito, iwo mwakusaya kucedwa adayebwa kuti moyo wawo kumweko ukhali wakunesa kwene-kwene. Tenepo iwo akhambandokhala acikumbukira cakudya cabwino comwe akhakomedwa naco ku Edjipitoko. Ajirayeriwo adalewa kuti: ‘Tasuwa ntsomba zomwe tikhadya fovolo ku Edjipito, pabodzi na makaka, mabvembe, ntsabola na adyo!’ (Mirewengo 11:5) Kodi n’cadidi kuti iwo akhadya cakudya ca ‘fovolo?’ Nee. Ajirayeri akhabonera kwene-kwene pomwe akhali ku Edjipito, ndipo pa nthaweyo iwo akhali akapolo ndipo akhapondereredwa mwakuti bwerani mudzawone. (Kufuluka 1:13, 14; 3:6-9) Tsono napo kuti bzikhali tenepo, iwo na kupita kwa nthawe adayebwa mabvuto yomwe akhagumana nayo ndipo adasuwa moyo omwe akhanawo ku Edjipito. Iwo akhakumbukira ‘bzinthu bza m’mbuyo,’ m’mbuto mwakukumbukira bzinthu bzabwino bzomwe Yahova akhawacitira. Yahova alibe kukomedwa na makhalidwe yawoyo.—Mirewengo 11:10.
7. Kodi n’ciyani cidathandiza mpfumakazi inango kutcenkha makumbukidwe yakuipa yomwe yambabwera thangwe ra cisuwo?
7 Kodi tingatcenkhe tani makumbukidwe yakuipa yomwe yangabwere thangwe ra cisuwo? Onani ciratizo ca mpfumakazi yomwe idayamba kutumikira ku Beteli ya ku Brooklyn mu gole la 1945. Mkati mwa magole mang’ono-ng’ono mpfumakaziyo idalowodwa na m’bale omwe akhatumikirambo ku Beteliko, ndipo wentse adatumikira kwa magole mazinji. Tsono mu 1976, m’baleyo adaduwala. Mpfumakaziyo idalewa kuti pomwe bayaceyo akhadasala pang’ono kufa, iye adapasa mpfumakaziyo malango yomwe yangadadzamuthandiza pambuyo pa kufa kwa mwamunayo. Iye adauza mpfumakaziyo kuti: “Ifepano takhala na banja labwino. Bzimwebzi bzimbacitika lini na wanthu azinji.” Ndipo adalewa pomwe kuti: “Iwepo un’dzayebwa lini bzinthu bzabwino bzomwe tidacita pabodzi. Tsono leka kumbandokhala ucikumbukira bzinthubzo nthawe zentse. Na kupita kwa nthawe, un’dzasunama lini. Leka kubwerera m’mbuyo ne kusunama thangwe ra bzomwe bzakucitikira. Khala wakukondwa ucimbakumbukira bzinthu bzabwino bzomwe tidacita pabodzi pa kutumikira Yahova. Makumbukidwe yabwino ni mphaso yomwe Mulungu adatipasa.” Kodi imwepo mukuwona lini kuti yamweya yakhali malango yabwino?
8. Kodi mpfumakazi yathu idagumana phindu liponi na malango yomwe idapasidwa na bayace?
8 Mpfumakazi yathu idabvera malango yomwe idapasidwa na bayace, ndipo idatumikira mwakukhulupirika mpaka kufa kwace na magole 92. Magole mang’ono-ng’ono pomwe mpfumakaziyo ikhadasala pang’ono kufa, idalewa kuti: “Ndikanyang’anisa m’mbuyo, pa magole yakupitirira 63 yomwe ndakhala ndikutumikira Yahova mu utumiki bwa nthawe zentse, ningalewe kuti ndakhala wakukondwa na moyo wabwino kwene-kwene.” Thangwe ranyi? Mpfumakaziyo idafotokoza kuti: “Ifepano tingakhale na moyo wabwino thangwe ra kucita mbali ya banja labwino lomwe lina abale na mpfumakazi, ndipo tina cidikhiro cakudzakhala nawo mu paraizo, na kudzatumikira nawo pabodzi Mulengi Mkululetu, Mulungu yekha wacadidi, Yahova.” * Ifepano tingapfunze bzinthu bzizinji na mpfumakazi yomwe idanyang’anisa kutsogoloyi.
LEKANI KUMBAKOYERA MUNTHU CAKUMTIMA
9. Mwakubverena na Mwambo 19:18, kodi ni nthawe iponi yomwe bzingakhale bzakunesa kulekerera mwanzathu akatiphonyera?
9 Werengani Mwambo 19:18. * Nthawe zinango bzimbakhala bzakunesa kwene-kwene kuleka kukoyera cakumtima Mkristau mwanzathu, xamwali wathu ayai abale wathu akatiphonyera. Mwa ciratizo, mpfumakazi inango m’gwere idanamizira mpfumakazi inzace kuti aibera kobiri yace. Tsono na kupita kwa nthawe, mpfumakaziyo idadzazindikira kuti idaphonya ndipo idakumbira mpfumakazi inzaceyo kuti ailekerere, tsono mwanzaceyo adapitiriza kukoyera cakumtima mpfumakaziyo. Kodi bzimwebzi bzidakucitikiranimbo kale? Napo penu bzikanati kukucitikirani kale, tsono azinji wa ifepano timbakoyera anzathu cakumtima ndipo bzimbatinesa kulekerera munthu mwanzathu akatiphonyera.
10. Kodi n’ciyani comwe cingatithandize tikakhala na makumbukidwe yakufuna kukoyera mwanzathu cakumtima?
10 Kodi n’ciyani comwe cingatithandize tikakhala na makumbukidwe yakufuna kukoyera mwanzathu cakumtima? Tin’funika kumbakumbukira kuti Yahova ambawona bzinthu bzentse. Iye ambadziwa bzinthu bzentse bzomwe bzimbacitika pa moyo wathu, maka-maka wanthu akaticitira bzinthu bzakusaya cirungamo. (Wahebereu 4:13) Ndipo bzimbamuwawa akatiwona tikubonera. (Zaiya 63:9) Tenepo iye akulewa kuti an’dzacosa kuwawidwa kwentse komwe timbabva thangwe ra bzinthu bzakusaya kulungama bzomwe bzimbaticitikira.—Cibvumbulutso 21:3, 4.
11. Kodi timbagumana phindu liponi tikaleka kukoyera cakumtima anzanthu?
11 Tikambalekerera anzathu bzakuphonya bzawo na kuleka kuwakoyera cakumtima, tin’dzagumana phindu kwene-kwene. Bzimwebzi ndibzo bzomwe mpfumakazi yomwe idanamiziridwa ire idazindikira. Pa nthawe imweyo, iye alibe kudzakoyera pomwe cakumtima mwanzace omwe adamunamizira ule, ndipo adamulekerera na mtima wentse. Mpfumakaziyo idazindikira pomwe kuti tikambalekerera anzathu bzakuphonya bzawo, Yahova ambatilekererambo bzakuphonya bzathu. (Mateu 6:14) Mpfumakaziyo ikhadziwa kuti bzomwe mpfumakazi inzace ire idacita, bzikhali bzakuphonyeka, koma idasankhula kuleka kumukoyera cakumtima. Ndipo ninga bzakutewera bzace, mpfumakaziyo idakhala yakukondwa icipitiriza kutumikira Yahova.
LEKANI KUMBABZIPASA MULANDU MWAKUPITIRIRA MALIRE
12. Kodi tikupfunza ciyani na 1 Juwau 3:19, 20?
12 Werengani 1 Juwau 3:19, 20. * Nthawe zinango tentsenefe timbabzipasa mulandu. Winango ambabzipasa mulandu thangwe ra bzinthu bzomwe adacita pomwe akhanati kupfunza cadidi. Ndipo winango ambabzipasa mulandu thangwe ra bzinthu bzomwe adacita pambuyo pakubatizidwa. (Waroma 3:23) Mpsakubveka kuti tentsenefe timbafuna kucita bzinthu bzabwino. Tsono ‘tentsenefe timbaphonya kazinji kentse.’ (Tiyago 3:2; Waroma 7:21-23) Napo kuti timbakomedwa lini tikambabzipasa mulandu, koma bzimwebzi nthawe zinango mpsabwino. Thangwe ranyi tikulewa tenepo? Thangwe makumbukidwe yakumbabzipasa mulandu yangatithandize kucinja moyo wathu ticileka kudzabwerezera kucita bzinthu bzakuphonyeka.—Wahebereu 12:12, 13.
13. Thangwe ranyi tin’funika lini kumbabzipasa mulandu mwakupitirira malire?
13 Nthawe zinango ifepano tingabzipase mulandu mwakupitirira malire pa bzinthu bzomwe tidakungula Yahova acitilekerera. Kubzipasa mulandu kumweku kungakhale kulibe na basalo. (Psalymo 31:10; 38:3, 4) Thangwe ranyi? Onani ciratizo ca mpfumakazi yomwe ikhambabzipasa mulandu thangwe ra pikado zomwe idacita kale-kale. Mpfumakaziyo idalewa kuti: “Ndikhabva utofu kupitiriza kutumikira Yahova na nyongo thangwe ra kukumbukira kuti pinango-pentse nin’dzapulumusidwa lini.” Azinji wa ifepano pinango angakumbukembo tenepo. Tsono tin’funika kucita mphole kuti tireke kumbabzipasa mulandu mwakupitirira malire. Thangwe ranyi? Thangwe ndakuti tikacita bzimwebzi, tingafike pakusiya kutumikira Yahova, ndipo Sathani angakomedwe kwene-kwene bzimwebzi bzikacitika. Yahova ambatifuna kwene-kwene ndipo iye ambatilekerera tikakhala tamuphonyera.—Ndendemezerani na 2 Wakolinto 2:5-7, 11.
14. Kodi tingatsimikize tani kuti Yahova alibe kutiyebwa?
14 Pinango tingabzibvunze kuti: ‘Kodi ningatsimikize tani kuti Yahova alibe kundiyebwa?’ Mukabzibvunza mbvunzoyi, mumbakhala mukulatiza kuti Yahova angakulekerereni bzomwe mudamuphonyera. Nsanza ya Mulindiri m’mbuyomu idalewa kuti: “Ifepano pinango tingapitirize kucita bzinthu bzakuipa mwakubwereza-bwereza bzomwe tikhambacita kale-kale. . . . Tsono lekani kubwerera m’mbuyo. Ndipo lekani kumbakumbuka kuti mudacita pikado yomwe Yahova angakulekerereni lini. Bzimwebzi ndibzo bzomwe Sathani ambafuna kuti mumbakumbuke. Mpsakubveka kuti imwepo mumbasunama ndipo bzimbakuwawani mukakhala na makumbukidwe yamweya. Tsono dziwani kuti bzimwebzi ni umboni bwakuti imwepo ndimwe lini munthu wakuipa, ndipo Yahova angakulekerereni pikado yanu. Khalani munthu wakubzicepesa ndipo pitirizani kupemphera kwa Mulungu kuti akulekerereni, akuthandizeni kukhala pomwe na makumbukidwe yakucena, nakuti muleke kubwerezera pomwe kucita bzinthu bzakuipa. Ciratizo pa nkhaniyi ni mwana. Napo iye akhale tani na bvuto libodzi-bodzi, mwanayo nthawe zentse ambakumbira pai wace kuti amuthandize. Tenepo pitirizani kukumbira Yahova kuti akuthandizeni, ndipo iye an’dzakuthandizanidi.”
15-16. Kodi abale winango adabzibva tani pomwe adazindikira kuti Yahova alibe kuwasiya okha pa mabvuto?
15 Atumiki azinji wa Yahova adatsangalazidwa, pomwe adazindikira kuti Yahova alibe kuwasiya wokha pomwe iwo akhagumana na mabvuto. Mwa ciratizo, magole mang’ono-ng’ono m’mbuyomu, m’bale m’bodzi adalimbikisidwa pomwe adawerenga nkhani pa webisaite yathu, pa mbali yakuti bzakucitika pamoyo wa Mboni za Yahova: “Bibliya Limbacinja Moyo wa Wanthu.” Mu nkhani yomwe m’baleyo akhawerenga, mpfumakazi inango idafotokoza kuti bzikhali bzakunesa kukhulupira kuti Yahova ambaifuna, thangwe ra bzinthu bzakuipa bzomwe bzidacitika pa moyo wace. Mpfumakaziyo idapitiriza kukumbuka tenepo kwa magole mazinji mpaka pambuyo pakubatizidwa. Tsono pomwe idakumbukira kwene-kwene bza ntsembe ya cakulombolera, mpfumakaziyo idayamba kuwona kuti Yahova ambayifuna kwene-kwene. *
16 Kodi ciratizo ca mpfumakazici cidatsangalaza tani m’baleyo? Iye adanemba kuti: “Pomwe inepano ndikhali tswaka, ndikhambawona bzithunzi-thunzi bza maika, ndipo bzikhambandinesa kusiya kucita bzimwebzo. Ndipo tsapanopapa ndawona pomwe bzithunzi-thunzibzo. Tsono ndakumbira akulu wa gwere kuti andithandize ndipo ndikucita nyongo kuti ndilekeretu kudzacita pomwe. Akuluwo andithandiza kutsimikiza kuti Yahova ambandifuna ndipo akufuna kundilekerera bzakuphonya bzangu. Napo bziri tenepo, ndikadabzibva kuti ndine munthu wapezi-pezi ndipo ndikukumbuka kuti Yahova ambandifuna lini. Tsono ndikakumbukira bzomwe ndidawerenga pa nkhani ya mpfumakaziyi, ndikuwona kuti bzidandithandiza kwene-kwene. Tsapano ndikalewa kuti Mulungu an’ndilekerera lini, nimbakhulupira kuti ntsembe ya Mwana wace njakukwanira lini kuti impsikhe pikado zangu. Ndidakhwatcula matsamba yomwe yakhana nkhani imweyi kuti nimbawerenge na kukumbukira bzikakhala kuti makumbukidwe yakuphonyeka yandibwerera.”
17. Kodi mpostolo Paulo adatcenkha tani kumbabzipasa mulandu mwakupitirira malire?
17 Bziratizobzi bzimbatikumbusa mpostolo Paulo. Pomwe iye akhanati kukhala Mkristau, adacita bzinthu bzakuipa kwene-kwene. Paulo adakumbukira bzomwe adacita, tsono alibe kumbandokhalira kukumbukira bzomwe adacitabzo. (1 Timotio 1:12-15) Iye akhakhulupira kuti angadalekereredwa thangwe ra ntsembe ya cakulombolera ndipo akhakhulupirambo kuti ntsembeyo ni mphaso yomwe adapasidwa na Mulungu. (Wagalata 2:20) Paulo alibe kubzipasa mulandu mwakupitirira malire pa bzomwe adaphonya. M’mbuto mwace iye adapitiriza kucita ciri-yentse kuti apitirize kutumikira Yahova.
MBAKUMBUKIRANI DZIKO LIPSA
Mbatitsimikizeni kumbakumbukira moyo omwe tin’dzakhala nawo kutsogolo (Onani ndime 18-19) *
18. Kodi mu nkhani ino tapfunza ciyani?
18 Kodi tapfunza ciyani mu nkhani ino? (1) Makumbukidwe yabwino ni mphaso yakucokera kwa Yahova, ndipo bziribe basa kuti moyo wathu ukhali tani kale-kale. Mu dziko lipsa tin’dzakhala na moyo wabwino kwene-kwene. (2) Wanthu winango angatisunamise, koma tikawalekerera bzakuphonya bzawo, timbakwanisa kupitiriza kutumikira Yahova. (3) Kubzipasa mulandu mwakupitirira malire kungatitazise kutumikira Yahova mwakukondwa. Tenepo, ninga Paulo, ifepano tin’funika kukhulupira kuti Yahova ambatilekerera pikado zathu.
19. Kodi tikudziwa tani kuti mu dziko lipsa tin’dzakumbukira lini cinthu ciri-centse comwe cimbatisunamisa? Fotokozani.
19 Ifepano tina cidikhiro cakudzakhala na moyo wakusaya kumala. Ndipo mu dziko lipsa tin’dzakumbukira lini cinthu ciri-centse comwe cimbatisunamisa. Pakulewa bza nthawe imweyo, Bibliya limbati: ‘Bzinthu bzakale bzin’dzakumbukiridwa lini pomwe.’ (Zaiya 65:17) Kumbukirani ibzi: Winango wa ifepano atumikira Yahova mpaka kukalamba kwawo, tsono mu dziko lipsa, tentsenefe tin’dzakhala pomwe maswaka. (Djobi 33:25) Tenepo, mbatitsimikizeni kuleka kumbakumbukira moyo omwe tikhanawo kale-kale. M’mbuto mwace, mbatimbakumbukireni bzomwe bzin’dzacitika mu dziko lipsalo, ndipo mbaticiteni ciri-centse comwe tingakwanise kuti tidzakhalembo mu dzikolo.
NYIMBO 142 Tiphatisise Cidikhiro Cathu
^ ndi. 5 Bzimbakhala bwino kukumbukira bzomwe bzidacitika pa moyo wathu kale-kale. Tsono tikambandokhala ticikumbukira bzomwe bzidacitikabzo, tingasiye kucita bzomwe Yahova ambafuna kuti timucitire. Ayai bzingatinese kukumbukira kuti bzomwe Yahova an’dzaticitira mu paraizo kutsogolo mpsabwino kwene-kwene. Mu nkhaniyi tin’cizerana bzinthu bzitatu bzomwe bzingatithandize kutcenkha kumbandokhala ticikumbukira bzomwe bzidaticitikira kale-kale. Ndipo tiniwonambo momwe Bibliya na bziratizo bzinango bza abale bzingatithandizire.
^ ndi. 2 Mimwani 4:25 Maso yako yan’funika kunyang’anisisa kutsogolo, inde, maso yako ya kuyetima yan’funika kukhala yadanyang’anisisa kutsogolo.
^ ndi. 5 Mpalizi 7:10 Leka kulewa kuti: “Thangwe ranyi kale-kale bzinthu bzikhali bwino kuposa ntsiku zino?” Pakuti kucita mbvunzo ninga umweyu, n’kusaya nzeru.
^ ndi. 8 Onani Nsanza ya Mulindiri, ya 1 Julho, 2004, tsamba 23-29, Chichewa.
^ ndi. 9 Mwambo 19:18 Leka kumbabwezera cakuipa ayai kumbakoyera cakumtima wana wa mtundu wako; ndipo mbafuna mwanzako ninga momwe umbabzifunira wekha. Ine ndine Yahova.
^ ndi. 12 1 Juwau 3:19 Mwa njira imweyi tin’dzadziwadi kuti ndife wakucokera m’cadidi ndipo tin’dzaderekhesa mitima yathu pamaso pa Mulungu 20 pa ciri-centse comwe mitima yathu ingatipase mulandu, thangwe Mulungu ni mkulu kuposa mitima yathu ndipo ambadziwa bzinthu bzentse.
^ ndi. 15 Onani Nsanza ya Mulindiri ya 1 Agosto, 2011, tsamba 20-21, Cipwitikizi.
^ ndi. 61 BZOMWE BZIKUCITIKA PA CITHUNZI-THUNZI: Kubva cisuwo, kukoyera munthu cakumtima, na kubzipasa mulandu mwakupitirira malire, kuli ninga kupfuwa mitolo yakulemera kwene-kwene yomwe imbatitazisa kufamba mu mseu omwe umbatsogolera ku moyo.
^ ndi. 68 BZOMWE BZIKUCITIKA PA CITHUNZI-THUNZI: Pambuyo pakutula mitoloyo, timbalulidwa, timbakomedwa ndipo timbakhala pomwe na mphanvu. Tenepo tikacita bzimwebzi, tin’dzakwanisa kunyang’anisa kutsogolo komwe tikuyenda.
