ABALE na mpfumakazi azinji omwe akhadasiya dziko lawo aciyenda m’madziko yanango kuti akagumane kobiri zizinji, tsapano abwerera ku dziko lawo. Thangwe ra lufoyi lawo kwa Yahova, na kuna anantsi wawo, iwo adafulukira ku mbuto yomwe ikhafunikira apalizi azinji wa Umambo. (Mateu 22:37-39) Kodi ni nyongo iponi yomwe iwo adacita, ndipo Yahova adawasimba tani? Kuti tigumane mtawiro wace, mbatiwoneni bzomwe bzidacitika mu dziko la Camarões, lomwe liri kumadokero kwa África.

Mu 1998, m’bale wakucemeredwa Onésime adacoka ku dziko lace lakubadwira la Camarões aciyenda ku dziko linango. Iye adakhala ku dzikolo, kwa magole 14. Ntsiku inango pa mtsonkhano, iye adabva ciratizo cakulewa bza basa lakupalizira. M’bale omwe akhafotokoza nkhani adalewa ciratizoco kuti: “Tiyezezere kuti amuna awiri pa uxamwali bwawo akumedza ntsomba, ndipo ali pa mbuto yace-yace, tsono m’bodzi ali kupha ntsomba kwene-kwene kuposa mwanzace. Kodi bzingacitike kuti munthu omwe akupha lini kwene-kweneyo kuyenda ku mbuto ya mwanzaceyo?”

Ciratizoci cidathandiza Onésime kukumbukira kubwerera ku dziko lace lakubadwira, ku Camarões komwe kukhana wanthu azinji omwe akhafuna kupfunza Bibliya. Tsono iye akhana thupo. Kodi iye angadakwanisa kukakhala pomwe ku Camarões pambuyo pa kukhala magole mazinji kunja kwa dziko lace lakubadwira? Kuti akwanise kuwona kuti angadakwanisa kukakhala ayai ne, Onésime adayenda kukakhala ku Camarões kwa minyezi mitanthatu. Patsogolo pace, mu 2012, iye adayenda ku Camarõesko acikakhaliratu.

Onésime adalewa kuti: “Inepano ndikhafunika kuzolowera pomwe nyengo ya kupsa, na cikhalidwe ca kwathu. Ndipo mu Nyumba ya Umambo ndikhafunika kukhalira pomwe pa mabankho, ninga pomwe bzikhaliri pakuyamba.” Iye adalewa pomwe kuti: “M’mbuto mwa kukumbukira makadera yabwino ya ofu-ofu, makumbukidwe yangu yambandokhala pa mitsonkhano basi.”

Mu 2013, Onésime adalowola Géraldine omwe adabwererambo ku Camarões, pambuyo pa kukhala ku França kwa magole mapfemba. Kodi banjali lidagumana bzisimbo bziponi, thangwe ra kuikha utumiki pa mbuto yakuyamba pa moyo wawo? Onésime adati: “Ifepano ninga banja, tidakhala na mwayi wa kupita Xikola ya Apalizi wa Umambo ndipo patsogolo pace tidakatumikira ku Beteli. Gole lidamalali anyakupfunza Bibliya wakukwana 20 wa m’gwere mwathu adabatizidwa. Tsapano ndikubzibva kuti ndiri pa mbuto yabwino ‘yakumedzera.’” (Marko 1:17, 18) Géraldine adalewambo kuti: “Ndidatambira bzisimbo bzizinji kuposa bzomwe ndikhadikhirira kutambira.”

Judith adayenda kukakhala ku Estados unidos, koma iye akhafuna kuthimizira utumiki bwace. Iye adati: “Pambuyo pa kumbazungira adzinza wangu ku Camarões, ndikhambalira thangwe ra kudziwa kuti nin’siyana na mapfunziro yangu ya Bibliya yomwe  ndikhambapfunzisa.” Napo bzikhali tenepo, Judith akhambazeza kubwera ku Camarões kuti akakhaliretu. Thangwe ranyi? Thangwe ku Estados unidos iye akhaphata basa lomwe likhamupasa kobiri zizinji, kuti akwanise kusamalira Pai wace omwe akhaduwala ku Camarões. Tsono thangwe ra kukhulupira Yahova, Judith adadzakwanisa kubwerera ku Camarões. Iye akuzindikira kuti nthawe zinango ambakumbukira bzinthu bzomwe bzikhamutsangalazisa pomwe akhali ku Estados unidos. Iye adapemba kwa Yahova kuti amuthandize kucinja nzeru, ndipo nyakunyang’anira dera na mkazace adamulimbikisa..

Pakukumbukira bzinthu bzomwe akwanisa kucita ku Camarões, Judith adalewa kuti: “Kwa magole matatu, ndagumana cikondweso thangwe ra kuthandiza wanthu anai kufika pa kubatizidwa.” Judith adayamba kucita upainiya bwakupambulika. Tsapano, iye akutumikira pabodzi na mwamuna wace Sam-Castel, omwe ni nyakunyang’anira dera. Tsono n’ciyani cidadzacitika na Pai wace wa Judith? Judithiyo pabodzi na adzinza wace adakwanisa kugumana xipitali yomwe ikhali m’madziko ya kunja, yomwe idabzipereka kucita operação Pai wacewo fovolo. Ndipo cakukondwesa n’cakuti operaçãoyo idafamba bwino.

M’bale wakucemeredwa Victor, adafuluka acikakhala ku Kanada. Pomwe adamala kuwerenga nkhani ya mu Nsanza ya Mulindiri yomwe ikhalewa bza mapfunziso ya padzulu, iye adayamba kukumbukira bza mapfunziro yomwe akhacita. Iye adasiya mapfunziro yapadzulu yomwe akhacita, aciyamba kucita curso yomwe idatenga nthawe ing’ono-ng’ono. Iye adalewa kuti: “Ndidacita bzimwebzi kuti ndikhale na nthawe izinji yakucita upainiya.” Ndipo na kupita kwa nthawe Victor adalowola Caroline, ndipo iwo adayenda kukazunga ku Camarões. Kumweko pomwe iwo akhazungira nthambi, abale winango adawalimbikisa kuti atumikire ku Camarões. Victor adati: “Ifepano tiribe kulamba, pakuti tikhadasankhula kale kukhala na moyo wakusaya kufuna bzizinji, pakhalibe thangwe lakulambira mcemoyo.” Napo kuti Caroline akhalibe thanzi labwino, iwo alibe kubwerera m’mbuyo.

Victor na Caroline adayamba kucita upainiya bwakukhazikika kuti athandize wanthu omwe akhafuna kudziwa bzizinji bzomwe Bibliya limbapfunzisa. Pakuti iwo akhadakoya kobiri zizinji, bzikhafunika lini kuti aphate basa. Pambuyo pa kuphata basa minyezi ming’ono-ng’ono ku Kanada, iwo adabwerera ku Camarões kuti akapitirize kucita upainiya. Kodi iwo adagumana bzisimbo bziponi? Iwo adapita Xikola ya Apalizi wa Umambo, adacita upainiya bwa kupambulika, ndipo tsapano akucita basa la cimango. Victor adati: “Thangwe ra kusiya moyo wa ofu-ofu omwe tikhanawo takwanisa kuwona kuti Yahova akutisamalira.”

Mu 2002, Alain, omwe akhali nyakupfunza wa Universidade inango ku Alemanha, adawerenga katsamba kakuti: “Maswaka Kodi Mun’dzauphatisa Tani Basa Moyo Wanu?” Nkhani yomwe adawerenga m’katsambako idamucitisa kukhala na bzakulinga bzipsa. Mu 2006, iye adapita Xikola Yakupfunzisa Utumiki, ndipo adatumizidwa ku Camarões lomwe ni dziko lace lakubadwira.

Ku Camarões Alain adagumana basa lomwe likhamupasa mpata wakucita upainiya. Patsogolo pace iye adagumana basa lomwe likhamupasa kobiri zizinji, koma adazindikira kuti basalo lingadamupasa lini mpata kuti apalizire na kupfunzisa. Tenepo pomwe adacemeredwa kuti akacite utumiki bwakupambulika, iye alibe kuzeza. Pomwe Alain adayenda kukagoneka ku basa kwace, patrau wace adamuuza kuti animuthimizira kobiri, tsono Alain adalamba ndipo adayenda kukacita upainiya bwakupambulikabo. Na kupita kwa nthawe Alain adalowola  Stéphanie, omwe akhakhala ku França. Kodi ni mabvuto yaponi yomwe Stéphanie adagumana nayo pomwe adayenda kukakhala ku Camarões?

Stéphanie adati: “Ndidayamba kuduwala matenda yakusiyana-siyana, koma pambuyo pakutambira thandizo la ulapi ndidalimba.” Banjalo lidasimbidwa thangwe ra kupirira kwawo. Alain adalewa kuti: “Pomwe tidayenda kukapalizira ku mudzi unango wakucemeredwa Katé, tidagumana wanthu azinji omwe akhafuna kupfunza Bibliya. Na kupita kwa nthawe tidadzakwanisa kupfunza nawo mwakuphatisa basa telefoni. Awiri mwa anyakupfunzawo adabatizidwa ndipo padakhazikisidwa kagulu ka apalizi.” Stéphanie adalewambo kuti: “Palibe cinthu cabwino comwe cingapose kuthandiza wanthu kuti afike pakubzipereka na kubatizidwa. Kutumikira kuno kukuticitisa kukhala wakukondwa nthawe zentse.” Ntsiku zino, Alain na Stéphanien mbaanyakunyang’anira dera.

Gisèle adabatizidwa pomwe akhapfunza xikola ya bza ulapi ku Itália. Iye adasirira moyo wakusaya kufuna bzizinji omwe banja la apainiya omwe adamupfunzisa Bibliya akhanawo, ndipo iye adafuna kucita bzizinji mu utumiki. Tenepo Gisèle adayamba kutumikira ninga mpainiya wakukhazikika pomwe akhamaliza mapfunziro yace.

Gisèle akhafuna kuyenda ku Camarões kuti akacite bzizinji pa kutumikira Yahova. Tsono iye akhana thupo. Iye adati: “Bzikhafunika kuti ndisiye nyumba yangu, ndisiyane na axamwali wangu pabodzi na adzinza wangu omwe akhakhala ku Itália.” Napo bzikhali tenepo, mu Maio 2016, Gisèle adayenda kukakhala ku Camarões. Na kupita kwa nthawe, iye adadzalodwa na Léonce, ndipo nthambi ya ku Camarões idawauza kuti ayende ku mzinda wa Ayos, komwe kukhafunikira apalizi azinji wa Umambo.

Kodi moyo wawo ukhali tani ku Ayos? Gisèle adati: “Pakhatenga midzinga mizinji tiribe maluju ndipo tikhakwanisa lini kutchadja matelefoni yathu. Ndipo matelefoniyo yakhamala ntsiku zizinji yakuphata lini basa. Ndidapfunza kuphika na nkhuni, ndipo tikhambayenda kukatunga madzi na cibara usiku na lanterna nthawe yomwe kukhalibe wanthu azinji.” Kodi n’ciyani cidathandiza banjalo kupirira? Gisèle adati: “Mzimu wa Yahova udatithandiza kupirira ndipo ifepano tikhambalimbikisanambo tekha-tekha. Ndipo nthawe zinango adzinza wathu na azixamwali akhatilimbikisa na kutithandiza mwa kutipasa kobiri.”

Kodi Gisèle adakomedwa thangwe ra kubwerera ku dziko lace lakubadwira? Inde! Iye adati: “Pakuyamba ndikhabzibva lini bwino, koma na kupita kwa nthawe tidazolowera. Ine na mwamuna wangu tidabzibva kuti tidacita bzomwe tikhafunika kucita. Timbathemba Yahova ndipo timbabzibva kuti ndife wakufendererana naye.” Léonce na Gisèle adapita Xikola ya Apalizi wa Umambo, ndipo tsapano akucita upainiya bwakupambulika bwa nthawe yakucepa.

Ninga khombwe omwe ambafunika kukhala wakulimbika kuti akwanise kumedza ntsomba, wale omwe abwerera ku madziko yakubadwira, ambacita ciri-centse mwakufuna kwawo kuti athandize wanthu omwe akufuna kubva mafala ya Umambo. Mwakusaya kupenukira, Yahova ambakumbukira nthawe zentse apalizi wa nyongo amwewa omwe ambalatiza lufoyi pa dzina lace. (Nehemiya 5:19; Wahebereu 6:10) Penu imwepo mumbakhala ku dziko linango tsono mwazindikira kuti mu dziko lanu lakubadwira mukufunikira apalizi azinji wa Umambo, kodi mungakwanise kubwerera? Mukabvuma kubwerera, Yahova an’dzakusimbani.—Mimwani 10:22.