WAKUWONA bzanyengo ambakwanisa kuwona cimphepo camphanvu cakugopswa, comwe cikufendera m’mbuto yomwe wanthu ambakhala. Mwakamfulumize akawona kuti cimphepoco cikubwera, ambacita ciri-cense kuti adziwise wanthu.

Ninga momwe ambacitira wakuwona bzanyengo, Yahova akudziwisa wanthu bza cimphepo comwe cikubwera, ndipo cimphepoco cimbaposa comwe wa bzanyengo ambawona. Kodi Yahova akudziwisa tani wanthu? Kodi tingatsimikize tani kuti iye akupereka nthawe kwa wanthu kuti akonzekere cimphepoco? Tikanati kutawira mibvunzoyi, bwerani tiwone mcenjezo omwe Yahova adapereka kwa wanthu wakale-kale mbuyomu.

Mu nthawe za m’Bibliya, Yahova adadziwisa bza ‘cimphepo’ comwe cikhali ciyeruzo comwe iye akhacipereka kwa wanthu omwe akhamubvera lini. (Mimwani 10:25; Jeremiya 30:23) Pomwe ciyeruzo cikhanati kucitika Yahova akhadziwisiratu wanthuwo, ndipo akhawauza momwe angakhalire wakubvera. (2 Wamambo 17:12-15; Nehemiya 9:29, 30) Kuti awathandize kucinja, Yahova akhaphatisa basa atumiki wace wakukhulupirika kuti awauze bza ciyeruzo comwe cikhabwera, bzimwebzi bzikhathandiza wanthuwo kuti acinje mwakamfulumize bzicito bzawo.—Amosi 3:7.

Nowe adalatiza kuti akhali m’bodzi wa atumiki wakukhulupirika wa Mulungu. Kwa magole mazinji, iye adapalizira mwakukhwimika wanthu wakuipa bza cigumula ca madzi comwe cikhabwera. (Ciyambo 6:9-13, 17) Iye akhawauza bzomwe an’funika kucita kuti adzapulumuke, ndipo patsogolo pace Nowe adadzacemeredwa kuti ‘mpalizi wa cirungamo.’—2 Pedru 2:5.

Napo kuti Nowe adacita nyongo ya kupalizira wanthu wa mu nthawe yace, iwo alibe kumubvera. Iwo alibe kukhulupira bzomwe Mulungu akhawauza pakuphatisa basa Nowe. Ndipo thangwe ra kusaya kubvera kwawoko, adafa ‘pomwe cigumula cidafika ciciwapsairiratu wensewo.’ (Mateu 24:39; Wahebereu 11:7) Palibe m’bodzi mwa wanthuwa angadalewa kuti Mulungu alibe kuwadziwisa.

Nthawe zinango, Yahova akhayamba kudziwisa anati kupereka ciyeruzo cace. Ndipo iye akhapereka nthawe yakukwanira kwa wale omwe angadabonera thangwe ra kusaya kutetekera. Pomwe akanati kubweresa Matsoka Khumi ku Edjipito, Yahova akhadawadziwisa kale. Mwa ciratizo, Yahova adatumiza Mozeji na Aroni kuti akadziwise Farawo pabodzi na atumiki wace, tsoka la cinomwe lomwe ikhali mvula ya matalala yomwe ingadabwera mangwana yace ndipo ingadadzonga kwene-kwene. Kodi nsiku ibodzi ikhali yakukwanira kuti iwo anyang’ane mbuto yabwino kuti athawire cimphepo cire? Bibliya limbati: ‘Pakati pa wanthu omwe akhatumikira Farawo, wale omwe akhagopa fala la Yahova, mwakusaya kucedwa adakhotcerera anyabasa pabodzi na bzifuwo bzawo m’nyumba, tsono omwe agopa lini fala la Yahovayo, adalekerera anyabasa pabodzi na bzifuwo bzawo kubusa.’ (Kufuluka 9:18-21) Bzimwebzi bzikulatiza kuti Yahova adapereka nthawe izinji kuti atumiki wa Farawo akonzekere, ndipo ule omwe adatetekera alibe kubonera na tsoka lire.

Farawo na atumiki wace adadziwisidwa, pomwe tsoka la cikhumi likhanati kucitika. Koma iwo alibe kubvera. (Kufuluka 4:22, 23) Ninga bzakutewera bzace, wana wense wakuyamba kubadwa adafa. Limweri likhali tsoka likulu! (Kufuluka 11:4-10; 12:29) Kodi iwo angadatetekera cenjezo lire pakana nthawe? Inde! Mozeji adadziwisa Ajirayeri bza tsoka la cikhumi ndipo adawauza momwe angadapulumusira mabanja yawo. (Kufuluka 12:21-28) Kodi ni wanthu angasi omwe adabvera cenjezolo? Mwakubverana na miwerengo inango,  ni wanthu wakukwana mamidyau matatu ayai kupitirira ya Ajirayeri, na omwe akhali lini Ajirayeri pabodzi na Aedjipito. Wanthu wensenewa alibe kutambira ciyeruzo ca Mulungu ndipo adacoka ku Edjipitoko.—Kufuluka 12:38.

Bzimwebzi bzikulatiza kuti Yahova adapereka nthawe yakukwanira kwa wanthuwo kuti amutetekere. (Bzakutonga 32:4) Thangwe ranyi iye adacita tenepoyo? Mpostolo Pedru adalewa kuti ‘Yahova an’funa lini kuti munthu ali-wense adzapfudzidwe, koma an’funa kuti wense akungule.’ (2 Pedru 3:9) Kulewa cadidi, Mulungu akhawafuna kwene-kwene. Iye akhafuna kuti iwo akungule na kucinja bzicito bzawo pomwe akanati kupereka ciyeruzo cace.—Zaiya 48:17, 18; Waroma 2:4.

Nsiku zino, wanthu wense pa dziko la pansi akucenjezedwambo bza cakucitika comwe cin’citika tsapanopapa ndipo wense an’funika kukhala wakukonzeka. Pomwe Jesu akhali pano pa dziko pansi, iye adalewa kuti dziko lin’dzapfudzidwa pa ‘citsautso cikulu.’ (Mateu 24:21) Iye adaleweratu bwino-bwino bza mabvuto yomwe anyakupfunza wace angadagumana nayo pomwe nthawe imweyi ingadakhala ikufika. Ndipo iye adalewambo bzinthu bzomwe bzikucitika pa dziko lense la pansi m’nsiku zathu zino.—Mateu 24:3-12; Luka 21:10-13.

Pakuti tikukhala mu nthawe yomwe bzinthu bzimwebzi bzikucitika, Yahova akucenjeza wanthu wense, kuti asankhule kumubvera na kumutumikira. Iye an’funa kuti wanthu omwe asankhule kumubverawo akhale na moyo wabwino nsiku zino na kuti kutsogolo adzatambire moyo wakusaya kumala. (2 Pedru 3:13) Yahova an’funa kuti wanthu akhulupire mapiciro yace. Ndipopa iye akuuza wanthu wense ‘bzipsa bzabwino bza Umambo.’ Ndipo Jezu adalewa kuti bzipsa bzakupulumusa moyobzi ‘bzin’dzapaliziridwa pa dziko lense komwe kuna wanthu, ninga umboni kwa mitundu yense.’ (Mateu 24:14) Yahova akutsogolera atumiki wace wakukhulupirika kuti acitire ‘umboni’ ayai kuti adziwise bzipsabzi ku madziko yakwana 240. Yahova an’funa kuti wanthu azinji adzapulumuke pa ‘cimphepo cakupasa mantha’ comwe cikubwera pa nsiku yace ya ciyeruzo yomwe ikufendera.—Sofoniya 1:14, 15; 2:2, 3.

Nkhani si yakuti Yahova anipereka nthawe yakukwanira kuti wanthu abve mafala yace. Ninga momwe tawonera, iye nthawe zense ambapereka nthawe yakukwanira. Tenepo mbvunzo wakufunika kwene-kwene nguyu: kodi wanthu anibvera mcenjezo lomwe Mulungu ambapereka pakana nthawe? Yahova watipasa mwayi wa kudziwisa wanthu bzipsa bzace, tenepo mbaticiteni cire-cense comwe tingakwanise kuti tithandize wanthu azinji kuti adzapulumuke pomwe dzikoli lin’dzapfudzidwa.