Nkhani Yakupfunza 41
Pitirizani Kukhala Wakukhulupirika pa Nthawe ya ‘Citsautso Cikulu’
‘Funani Yahova, imwe mwense omwe ndimwe wakukhulupirika kwa iye! Yahova ambasamalira wanthu wakukhulupirika.’ —PSALYMO 31:23.
NYIMBO 129 Ifepano Tin’dzapitiriza Kupirira
BZOMWE TIN’PFUNZA *
1-2. (a) Kodi atsogoleri wa maboma an’pereka cidziwiso ciponi tsapanopapa? (b) Kodi ni mibvunzo iponi yomwe in’funika mitawiro?
TIYEZEZERE kuti atsogoleri wa maboma apereka cidziwiso cakuti ‘mtendere na cisungiko.’ Pinango iwo akutsimikiza na mtima wense kuti tsapano akwanisa kucitisa dziko kukhala pa mtendere. Ndipo akufuna kuti wanthu awone kuti iwo an’kwanisa kumalisa mabvuto yense ya pa dziko la pansi. Tsono cadidi n’cakuti, atsogoleriwo an’dzakwanisa lini kuletsa bzomwe bzin’dzacitika pambuyo pakuperekedwa kwa cidziwisoco. Thangwe ranyi? Thangwe ndakuti Bibliya limbalewa kuti: ‘Pa nthawe imweyo cipasu-pasu cin’dzawafikira mwakudzidzimusa, ndipo an’dzapulumuka lini.’—1 Watesalonika 5:3.
2 Pana mibvunzo yakufunika kwene-kwene yomwe in’funika mitawiro: Kodi n’ciyani cin’dzacitika pa nthawe ya ‘citsautso cikulu’? Kodi n’ciyani comwe Yahova an’dzafuna kuti ticite pa nthaweyo? Kodi tingakonzekere tani nsiku zino kuti tidzapitirize kukhala wakukhulupirika pa nthawe ya citsautsoci?—Mateu 24:21.
KODI N’CIYANI CIN’DZACITIKA PA NTHAWE YA ‘CITSAUTSO CIKULU’?
3. Mwakubverana na Cibvumbulutso 17:16-18, kodi Mulungu an’dzapfudza tani Babulo Mkulu?
3 Werengani Cibvumbulutso 17:16-18. * ‘Babulo Mkulu’ an’dzapfudzidwa! Ninga tafotokoza kale pakuyamba, atsogoleri wa maboma an’dzakwanisa lini kuletsa bzomwe bzin’dzacitika pa nthawe imweyi. Thangwe ranyi? Thangwe ‘Mulungu [an’dzaikha] m’mitima mwawo makumbukidwe yace.’ Kodi makumbukidweyo njaponi? Ni kupfudzidwa kwa bzipembedzo bzense bzakunama, kuphatanidzambo bzomwe bzimbati mpsacikristau. Mulungu an’dzaikha makumbukidwe yace m’mitima mwa ‘nyanga khumi’ za ‘cirombo cipfuwiira.’ Nyanga khumi zikuimira bungwe la Nações Unidas, ndipo ‘cirombo cipfuwiira’ cikuimira maboma yense yomwe yambathandizira bungwero. (Cibvumbulutso 17:3, 11-13; 18:8) Tenepo, mabomaya yakadzamukira cipembedzo cakunama, cin’dzakhala cizindikiro cakuti citsautso cikulu cikuyamba. Imweyi in’dzakhala nthawe yakupasa mantha kwa wanthu wense omwe ali pa dziko la pansi.
4. (a) Kodi ni bzinthu bziponi bzomwe pinango bzin’dzacitisa kuti maboma yapfudze bzipembedzo bzakunama? (b) Kodi n’ciyani comwe wanthu omwe ambacita mbali ya bzipembedzobzi an’dzacita?
4 Ifepeno tikudziwa lini bzomwe bzin’dzacitisa kuti maboma yamukire Babulo Mkulu. Pinango mabomayo yan’dzawona ninga kuti bzipembedzo ndibzo bzomwe bzikutazisa mtendere pa dziko la pansi ndipo bzikupitira kwene-kwene nkhani za ndale. Ayai yan’dzawona kuti bzipembedzobzo bzikubzigwezekera kobiri zizinji na bzinthu bzakuthupi. (Cibvumbulutso 18:3, 7) Bzimwebzi bzikuthandauza lini kuti maboma yakadzamukira Babulo Mkulu yan’dzapfunza wanthu wense omwe akucita mbali ya cipembedzo cakunama. Kulewa cadidi, mabomayo yan’dzaphadzana na magulu ya cipembedzo. Ndipo bzipembedzo bzikadzapfudzidwa, wanthu omwe ambacita mbali ya bzipembedzobzi an’dzazindikira kuti bzipembedzobzo bzamala mphanvu, ndipo an’dzafuna lini kucita nabzo pomwe tsansa.
5. Kodi Yahova wapicira kudzacita ciyani pa citsautso cikulu, ndipo thangwe ranyi?
5 Bibliya limbalewa lini kukula kwa nthawe yomwe Babulo Mkulu an’dzakhala akupfudzidwa, koma comwe timbadziwa n’cakuti in’dzakhala nthawe yakucepa. (Cibvumbulutso 18:10, 21) Yahova wapicira ‘kufupikisa nsiku’ za citsautso kuti ‘anyakusankhulidwa’ pabodzi na cipembedzo cacadidi apulumuke. (Marko 13:19, 20) Tsono n’ciyani comwe Yahova an’funa kuti tidzacite kumayambiriro kwa citsautso cikulu mpaka kuphampha kwa nkhondo ya Armagedo?
PITIRIZANI KUTUMIKIRA YAHOVA
6. Kodi kusiyana na cipembedzo cakunama kumbathandauza ciyani?
6 Ninga momwe tidawonera nkhani yapitayi, Yahova an’funa kuti atumiki wace asiyane na Babulo Mkulu. Bzimwebzi bzikuthandauza kusiya kucita ciri-cense cakubverana na cipembedzo cakunama. Ifepano tin’funika kupitiriza kunamata kwacadidi mwa kutsimikiza kutumikira Yahova. Mbatiwoneni njira ziwiri za momwe tingacitire bzimwebzi.
Ifepano tin’funika lini kuleka kumbatsonkhana, napo pa nthawe zakunesa (Onani ndime 7) *
7. (a) Kodi tingathandizire tani makhalidwe yakulungama ya Yahova? (b) Mwakubverana na Wahebereu 10:24, 25, thangwe ranyi kutsonkhana pabodzi n’kwakufunika kwene-kwene nsiku zino?
7 Njira yakuyamba, tin’funika kuthandizira makhalidwe yakulungama ya Yahova. Ifepano tin’funika lini kutengera makhalidwe yakuipa ya m’dzikoli. Mwa ciratizo, tin’funika lini kubvuma mtundu uli-wense wa kugonana kwakusaya kubvumizika, kuphatanidzambo kugonana kwa amuna na akazi wokha-wokha. (Mateu 19:4, 5; Waroma 1:26, 27) Njira yaciwiri, ifepano pabodzi na abale wathu tin’funika kupitiriza kunamata Yahova. Tingacite bzimwebzi, mwa kutsonkhana m’Nyumba za Umambo, za abale ayai mwakabisira. Bziribe basa bzomwe bzingacitike, tin’funika lini kusiya kumbagumanika pa mitsonkhano. Kulewa cadidi, tin’funika kumbatsonkhana pabodzi ‘maka-maka pomwe tikuwona kuti nsikuyo ikufika.’—Werengani Wahebereu 10:24, 25. *
8. Kodi tingadzacite upalizi buponi pa citsautso cikulu?
8 Pa nthawe ya citsautso cikulu, pinango mafala yomwe tikuyapalizira yan’dzacinja. Nsiku zino, timbapalizira bzipsa bzabwino bza Umambo ndipo timbacita nyongo yakupfunzisa wanthu. Koma pa nthawe ya citsautso cikulu, upalizi bwathu bun’dzakhala bwamphanvu, ndipo Bibliya limbandendemezera upalizibu ninga nvula ya matalala. (Cibvumbulutso 16:21) Pinango pa nthawe imweyi tin’dzapalizira kuti dziko la Sathaniri lasala pang’ono kupfudzidwa. Nthaweyo ikadzafika, tin’dzadziwa upalizi bomwe tin’dzaphatisa basa na momwe tingadzapalizirire. Kodi tin’dzaphatisa basa njira za upalizi zomwe takhala tikuziphatisa basa kwa magole 100 m’mbuyomu? Ayai tin’dzaphatisa basa njira zinango? Tin’dzawona pa nthaweyo. Koma comwe tikudziwa n’cakuti, ifepano tin’dzakhala na mwayi wakudziwisa mafala yakulewa bza ciyeruzo ca Yahova!—Zakiyeri 2:3-5.
9. Kodi wanthu an’dzabva tani na mafala yomwe tin’dzapalizira, ndipo tikupenukira lini ciyani?
9 Mafala yomwe tin’dzapalizira yan’dzakalipisa wanthu, tenepo iwo an’dzafuna kuti aimise basa lathu lakupalizira. Ndipopa nsiku zino, ifepano tin’funika kukhulupira Yahova kuti atithandize pa basali. Tenepo, ifepano tikupenukira lini kuti napo kutsogolo Mulungu an’dzatipasa mphanvu kuti ticite bzomwe iye akufuna.—Mikeya 3:8.
KONZEKERANI KUMUKIRIDWA KWA ATUMIKI WA MULUNGU
10. Mwakubverana na bukhu la Luka 21:25, 26, kodi n’ciyani comwe cin’dzacitikira wanthu azinji pa citsautso cikulu?
10 Werengani Luka 21:25, 26. * Pa nthawe ya citsautso cikulu wanthu an’dzakhala na mantha pakuwona bzinthu bzomwe bzin’dzacitika. Iwo an’dzawona bzinthu bzomwe akhakhulupira ninga maboma, anyamalonda na bzinthu bzinango bza m’dzikoli bzikupfudzidwa. Tenepo, iwo an’dzasunama, adzakhala na mantha ya kuluza moyo wawo pa nthawe yakunesayi. (Sofoniya 1:14, 15) Pa nthaweyo, moyo un’dzakhala wakunesa kwene-kwene kwa munthu ali-wense, kuphatanidzambo atumiki wa Yahova. Ifepano tingadzabonere, thangwe rakuti timbacita lini mbali ya dzikoli. Pinango tingadzasaye bzinthu bzakufunikira pa moyo wathu.
11. (a) Thangwe ranyi Gogi wa ku Magogi an’dzafuna kulimbana na Mboni za Yahova? (b) Thangwe ranyi tin’funika lini kudzacita mantha na citsautso cikulu?
11 Pomwe bzimwebzi bzin’dzakhala bzikucitika, wanthu omwe akhanamata bzipembedzo bzakunama bzomwe pa nthaweyo bzin’dzakhala bzapfudzidwa, an’dzawona kuti Mboni za Yahova zikupitiriza kunamata Yahovayo. Bzimwebzi bzin’dzacitisa wanthu pabodzi na anyakumwaza nkhani kuipidwa nabzo. Ndipo maboma pabodzi na mtongi wawo, Sathani, an’dzatiwenga kwene-kwene thangwe rakuti ni cipembedzo cathu basi comwe cin’dzakhala ciripo pa nthaweyo. Tenepo, iwo an’dzawona kuti alibe kukwanisa cakulinga cawo ca kupfudza bzipembedzo bzense pa dziko la pansi. Na thangwe limweri, iwo an’dzafuna kulimbana nafe. Pa nthawe imweyo, mabomayo yan’dzakhala Gogi wa ku Magogi. * Iyo yan’dzabverana kuti yamenyane na atumiki wa Yahovafe. (Zakiyeri 38:2, 14-16) Kudziwa bzomwe bzin’dzacitika pa citsautso cikulu kumbaticitisa thupo kwene-kwene, thangwe tikudziwa lini momwe bzin’dzacitikira. Koma cadidi n’cakuti: Tin’funika lini kudzacita mantha na citsautso cikulu. Thangwe Yahova an’dzatipasa malango yomwe yan’dzatithandiza kupulumusa moyo wathu. (Psalymo 34:19) Tenepo, ifepano tin’dzafunika ‘[kuima na kudjigumisa] misolo yathu,’ thangwe tin’dzadziwa kuti cipulumuso ‘[cathu] ciri pafupi.’ *
12. Kodi ‘kapolo wakukhulupirika na wanzeru’ akutikonzekeresa tani bza citsautso cikulu?
12 ‘Kapolo wakukhulupirika na wanzeru’ akutikonzekeresa kuti tidzapitirize kukhala wakukhulupirika pa ‘citsautso cikulu.’ (Mateu 24:45) Iye akucita bzimwebzi mu njira zakusiyana-siyana, mwa ciratizo: kumbukirani bza mitsonkhano yacigawo yomwe idacitika m’magole ya 2016 mpaka 2018. Nkhani zomwe zidafotokozedwa pa mitsonkhanoyi zidatilimbisa kukhala na makhalidwe yomwe tikufunikira, pomwe nsiku ya Yahova ikufendera. Bwerani ticezerane pang’ono bza makhalidweyo.
PITIRIZANI KUKHALA WAKUKHULUPIRIKA, WAKUPIRIRA NA WAKUKHWIMIKA
Konzekerani kuti mudzapulumuke pa ‘citsautso cikulu’ (Onani ndime 13-16) *
13. Kodi n’ciyani comwe cingatithandize kupitiriza kukhala wakukhulupirika kwa Yahova, ndipo thangwe ranyi tin’funika kuyamba nsiku zino kucita bzimwebzo?
13 Kukhulupirika: Msolo wa mtsonkhano wa cigawo wa 2016 ukhali wakuti: “Pitirizani Kukhala Wakukhulupirika Kwa Yahova!” Mtsonkhanoyu udatipfunzisa kuti tikhale wakukhulupirika kwa Yahova, tin’funika kukhala pa uxamwali bwakulimba na iye. Ndipo nkhani za pa mtsonkhanoyu zidatilimbisa kuti tikhale pa uxamwali na Yahova, tin’funika kumbapemba kwa iye na mtima wense na kupfunza Fala lace. Kucita bzimwebzi kun’dzatithandiza kulimbana na mabvuto yakusiyana-siyana. Ndipo pakuti citsautso cikulu ciri pafupi, ifepano tin’gumana na mayezo mazinji yomwe yaniyeza kukhulupirika kwathu kwa Yahova na Umambo bwace. Ndipo wanthu an’pitiriza kutinyoza. (2 Pedru 3:3, 4) Iwo an’cita bzimwebzi thangwe ifepano timbacita lini mbali ya dziko la Sathaniri. Ndipopa kuti tidzakwanise kupitiriza kukhala wakukhulupirika kwa Yahova pa citsautso cikulu, tin’funika kulimbisa kukhulupirika kwathu kuyambira nsiku zino.
14. (a) Kodi ni kucinja kuponi komwe kun’dzacitika na Bungwe Lakutonga pa nthawe ya citsautso cikulu? (b) Thangwe ranyi tin’dzafunika kukhala wakukhulupirika pa nthaweyo?
14 Nsiku zino, Bungwe Lakutonga ni lomwe likusamalira wanthu wa Yahova pa dziko lense la pansi. Napo bziri tenepo, mwakusaya kucedwa pa nthawe ya citsautso cikulu, iwo an’dzakhala lini pomwe pa dziko la pansi pano, thangwe anyakudzozedwa wense an’dzakonkhanisidwira kudzulu kuti akacite mbali pa nkhondo ya Armagedo. (Mateu 24:31; Cibvumbulutso 2:26, 27) Koma thimu likulu la wanthu lin’dzapitiriza kukhala lakuphatana. Tenepo, abale wakuthemera omwe ambacita mbali ya thimuli, an’dzasamalira wanthu wa Mulungu. Tsono ifepano tin’dzafunika kukhala wakukhulupirika thangwe cipulumuso cathu cin’dzathemba kukhulupirikako, ndipo tingadzacite bzimwebzo mwa kuthandizira abalewo, kubvera malango yomwe an’dzapasidwa na Mulungu!
15. Kodi n’ciyani cin’dzatithandiza kuti tikwanise kupirira, ndipo thangwe ranyi mpsakufunika kucita bzimwebzi?
15 Kupirira: Mtsonkhano wa cigawo wa 2017 ukhana msolo wakuti: “Lekani Kubwerera M’mbuyo!” Mtsonkhanoyu udatithandiza momwe tingapiririre mayezo yakusiyana-siyana. Tidapfunza kuti kupirira kumbathemba lini momwe bzinthu bziriri pa moyo wathu. Koma tingakwanise kupirira mwa kuthemba Yahova. (Waroma 12:12) Koma tin’funika lini kuyebwa piciro la Jezu lakuti: ‘Omwe an’dzapirira mpaka cimaliziro ndiye an’dzapulumuka.’ (Mateu 24:13) Piciroli likulatiza kuti tin’funika kupitiriza kukhala wakukhulupirika napo tigumane na mabvuto yakusiyana-siyana. Tikakhala wakukhulupirika nsiku zino, tin’dzakhalambo wakukhulupirika pa citsautso cikulu.
16. Kodi kukhwimika kwacadidi kumbathemba ciyani, ndipo tingakhale tani wakukhwimika nsiku zino?
16 Kukhwimika: Mtsonkhano wa cigawo wa 2018 ukhana msolo wakuti: “Khwimikani!” Nkhani za pa mtsonkhanoyu zidatithandiza kukumbukira kuti kukhala wakukhwimika kumbathemba lini luso lathu. Tenepo ninga kupirira, ifepano timbakhala wakukhwimika thangwe ra kuthemba Yahova. Kodi tingalimbise tani kukhulupirika kwathu kwa iye? Mwa kumbawerenga Fala lace nsiku zense na kumbakumbukira momwe Yahova adapulumusira wanthu wace mu nthawe zakale-kale. (Psalymo 68:20; 2 Pedru 2:9) Maboma yakadzafuna kulimbana nafe pa citsautso cikulu, tin’dzafunika kukhala wakukhwimika na kukhulupira Yahova kuposa kale-kale. (Psalymo 112:7, 8; Wahebereu 13:6) Penu nsiku zino timbathemba Yahova, tin’dzakwanisa kukhala wakukhwimika pomwe Gogi an’dzafuna kulimbana nafe. *
DIKHIRIRANI CIPULUMUSO CANU
Jezu ali pabodzi na anyankhondo wace wakudzulu akumenya nkhondo ya Armagedo kuti apfudze anyamadulanthaka wa Mulungu! (Onani ndime 17)
17. Thangwe ranyi tin’funika lini kucita mantha na nkhondo ya Armagedo? (Onani cithunzi-thunzi pa tsamba lakuyamba.)
17 Ninga momwe idafotokozera nkhani idamala ire, azinji wa ifepano, adayamba kukhala na moyo kumayambiriro kwa nsiku zakumalizira. Ndipo ifepanombo tikudikhirira kudzakhala tina moyo pa citsautso cikulu. Nkhondo ya Armagedo in’dzamalisa bzakuipa bzense bza pa dzikoli. Napo bziri tenepo, tin’funika lini kucita mantha. Thangwe ranyi? Thangwe ndakuti nkhondoyi nja Mulungu. (Mimwani 1:33; Zakiyeri 38:18-20; Zakariya 14:3) Yahova akadzapereka cizindikiro, Jezu Kristu an’dzatsogolera gulu la anyankhondo wa Mulungu kuti adzamenye nkhondo. Ndipo Jezuyo mwakuthandizidwa na anyakudzozedwa pabodzi na bzulu na bzulu bza anjo an’dzamenya nkhondoyo mwakulimbana na Sathani, madimonyo yace na acikunda wace wa pa dziko la pansi.—Danyeri 12:1; Cibvumbulutso 6:2; 17:14.
18. (a) Kodi n’ciyani comwe Yahova adatsimikiza? (b) Mwakubverana na Cibvumbulutso 7:9, 13, 14, thangwe ranyi mumbatsimikiza kuti mun’dzapulumuka kutsogoloku?
18 Yahova adatsimikiza kuti: ‘Cifuzo ciri-cense comwe cidakonzedwa kuti cikudzonge, cin’dzakunda lini.’ (Zaiya 54:17) ‘Thimu likulu’ la atumiki wakukhulupirika wa Yahova lin’dzapulumuka pa ‘citsautso cikulu!’ Patsogolo pace, iwo an’dzapitiriza kutumikira Mulungu. (Werengani Cibvumbulutso 7:9, 13, 14. *) Bibliya limbatipasa mathangwe mazinji yomwe yambatithandiza kuwona kuti ifepano tin’dzapulumuka kutsogoloku! Ndipo timbadziwa kuti ‘Yahova ambasamalira wanthu wakukhulupirika.’ (Psalymo 31:23) Tenepo, wense omwe ambanamata na kufuna Yahova an’dzakomedwa kwene-kwene akadzawona kuti dzina la Yahovayo lacenesedwa.—Zakiyeri 38:23.
19. Kodi ifepano tina cidikhiro ciponi?
19 Kumbukirani momwe mafala ya pa 2 Timotio 3:2-5 yangadakhalira, bzingadakhala kuti yakulewa bza m’dziko lipsa, pomwe Sathani an’dzakwanisa lini pomwe kupumpsa wanthu. (Onani kwadru yakuti “Momwe Wanthu An’dzakhalira Kutsogoloku.”) M’bale George Gangas, * omwe adatumikira m’Bungwe Lakutonga, adalewa kuti: “Dzikoli lin’dzadekeza kwene-kwene wanthu wense akadzanamata Yahova! Tenepo mwakusaya kucedwa imwepo mun’khala na mwayi wakukhala m’dziko lipsa. Ndipo imwepo mun’dzakhala na moyo wakusaya kumala ninga momwe Yahova an’funira.” Kulewa mwakusaya kupenukira, cimweci ni cidikhiro cabwino kwene-kwene!
NYIMBO 122 Khalani Wakulimba na Wakukhazikika!
^ ndi. 5 Ifepano timbadziwa kuti tsapanopapa wanthu wense an’gumana na ‘citsautso cikulu.’ Kodi n’ciyani cin’dzacitika na atumiki wa Yahova pa nthaweyo? Kodi n’ciyani comwe Yahova an’dzafuna kuti ticite? Kodi nsiku zino tin’funika kukulisa makhalidwe yaponi kuti tidzapitirize kukhala wakukhulupirika pa citsautsoci? Nkhani ino in’tawira mibvunzoyi.
^ ndi. 3 Cibvumbulutso 17:16 Ndipo nyanga khumi zomwe wawonazo, na ciromboco, bzimwebzi bzin’dzawenga m’kazi hule bzicidzamusakaza na kumusiya ali pezi, ndipo bzin’dzadya nyama yace bzicidzamunyekesa na moto. 17 Thangwe Mulungu waikha m’mitima mwawo makumbukidwe yace, inde, bzikwanirise nzeru yawo ibodzi mwa kupereka utongi bwawo kwa cirombo, mpaka mafala ya Mulungu yatacitika. 18 Ndipo mkazi omwe wamuwonayo, akuimira mzinda ukulu omwe una umambo bwakutonga wamambo wa pa dziko la pansi.
^ ndi. 7 Wahebereu 10:24 Ndipo bwerani timbakumbukirane kuti tilimbisane pa lufoyi na pa mabasa yabwino. 25 Tireke kusiya kutsonkhana kwathu pabodzi ninga momwe winango ambacitira, koma timbalimbisane maka-maka pomwe tikuwona kuti nsikuyo ikufika.
^ ndi. 10 Luka 21:25 Ndipo kun’dzawoneka bzizindikiro pa dzuwa, mwezi na nyenyezi, ndipo pansi pano wanthu an’dzabonera ndipo nzeru zin’dzawamalira thangwe ra kuunga kwa nyanza, na mabimbi yace. 26 Wanthu an’dzakomoka na mantha, pakukumbukira bzomwe bzin’dzacitikira dziko lense, pakuti mphanvu zakudzulu zin’dzagwededzeka.
^ ndi. 11 KAFOTOKOZEDWE KA MAFALA MANANGO: Fala lakuti Gogi wa ku Magogi (ayai Gogi) likuimira ciphatano ayai gulu la maboma yomwe yan’dzafuna kulimbana na atumiki wa Yahova pa nthawe ya citsautso cikulu.
^ ndi. 11 Kuti mudziwa bzizinji bzomwe bzin’dzacitisa kuti nkhondo ya Armagedo iyambike, onani bukhu lakuti Ufumu wa Mulungu Ukulamulira, kaputulo 21. Ndipo kuti mudziwe bzizinji bza kumukira kwa Gogi wa ku Magogi na momwe Yahova an’dzakhotcerera atumiki wace pa nkhondo ya Armagedo, onani bukhu lakuti A Adoração Pura de Jeová É Restaurada!, makapitulo 17 na 18.
^ ndi. 16 Mtsonkhano wa cigawo wa 2019 ukhana msolo wakuti: “Lufoyi Limbamala Lini!” udatithandiza kuti ifepano tikathemba Yahova iye ambatikhotcerera mwa lufoyi.—1 Wakolinto 13:8.
^ ndi. 18 Cibvumbulutso 7:9 Bzitamala bzimwebzi, ndidawona thimu likulu la wanthu lomwe palibe munthu angadakwanisa kulilewenga, lakucokera ku mitundu, madzinza, mbumba na bzirewedwe bzense. Iwo akhadaima pa maso pa mpando wa umambo na pa maso pa Mwana wa bira, atabvala mikanjo micena, ndipo akhana mithambi ya kanjedza m’manja mwawo. 13 Ndipo m’bodzi wa akuluwo adandibvunza kuti: “Kodi mbani adabvala mikanjo micenawa, ndipo acokera kuponi?” 14 Ndipo ine ndidamutawiriratu nthawe ibodzi-bodziyo kuti: “Mbuya wangu, imwepo ndimwe mun’dziwa bzimwebzo.” Ndipo iye adati: Amwewa ni wale omwe akucokera ku citsautso cikulu, ndipo afula mikanjo yawo, aciicenesa na mulopa wa Mwana wa bira.
^ ndi. 19 Onani nkhani yakuti “Zochita Zake Zimtsata”, mu Nsanza ya Mulindiri ya 1 Dezembro, 1994 Chichewa.
^ ndi. 68 BZOMWE BZINKUCITIKA PA CITHUNZI-THUNZI: Pa nthawe ya citsautso cikulu, kagulu kakucepa ka Mboni za Yahova kakulatiza kukhwimika ndipo kakucitira m’thengo mitsonkhano ya gwere.
^ ndi. 70 BZOMWE BZINKUCITIKA PA CITHUNZI-THUNZI: Thimu likulu la atumiki wakukhulupirika wa Yahova lin’dzapulumuka pa citsautso cikulu ndipo lin’dzakondwa!
