1. Thangwe ranyi Yahova ambafuna kuti timbanamate iye yekha basi?

YAHOVA ni Mulengi ndipo ndiye omwe adatipasa moyo, ndipopa ifepano tin’funika kunamata iye yekha basi. (Cibvumbulutso 4:11) Koma pana ngozi. Napo kuti timbafuna na kulemekeza Yahova, pana bzinthu bzinango bzomwe bzingatitazisa kunamata iye yekha basi. Tenepo, tin’funika kubvesesa momwe bzimwebzi bzingacitikire. Koma cakuyamba, mbatiwoneni kuti kunamata Yahova yekha basa kumbathandauza ciyani.

2. Mwakubverana na bukhu la Kufuluka 34:14, kodi kunamata Yahova yekha basi kumbathandauza ciyani?

² M’Bibliya, kufuna kwene-kwene Yahova kumbathandauza kunamata iye yekha basi. Tenepo, tin’funika lini kuti munthu ayai cinthu ciri-cense cititazise kunamata iye yekha basi.—Werengani Kufuluka 34:14. *

3. Thangwe ranyi timbanamata lini Yahova mwakusaya kudziwa?

³ Ifepano timbanamata lini Yahova mwakusaya kudziwa. Thangwe ranyi tikulewa tenepo? Thangwe ndakuti kunamata kwathu kumbacokera pa bzomwe timbapfunza pakulewa bza iye. Ifepano timbadziwa makhalidwe yabwino ya Yahova ndipo yambatidabwisa. Ndipo timbadziwambo bzomwe iye ambafuna na bzomwe ambafuna lini, ndipo timbacita ciri-cense kuti timutewezere. Timbabvesesa ndipo timbathandizira cakulinga comwe anaco kwa wanthufe. Kukhala xamwali wa Mulungu ni mwayi ukulu kwene-kwene kwa ifepano. (Psalymo 25:14) Cinthu ciri-cense comwe timbapfunza kwa Mulengi wathu cimbatithandiza kukhala pa uxamwali bwakulimba na iye.—Tiyago 4:8.

4. (a) Kodi n’ciyani comwe Sathani ambaphatisa basa kuti tireke kunamata Yahova yekha basi? (b) Kodi tin’cezerana ciyani mu nkhani ino?

 ⁴ Sathani ni mtongi wa dzikoli, ndipo iye ambaliphatisa basa kuti adzonge bzikhumbo bzathu bwabwino. (Wayefezo 2:1-3; 1 Juwau 5:19) Iye ambafuna kuti ifepano timbafune kwene-kwene bzinthu bza m’dzikoli sikuti kufuna Yahova yekha basi. Mu nkhani ino, tiniwona bzinthu bziwiri bzomwe Sathani ambaphatisa basa kuti akwanise cakulinga caceci. Cakuyamba, kufunisisa kobiri, ndipo caciwiri, kusankhula masenzeka yakuipa.

5. Thangwe ranyi tin’funika kutcenkha kufunisisa kobiri?

⁵ Tensenefe timbafuna kukhala na cakudya cakufunikira, bzakubvala na nyumba yabwino. Koma tin’funika kutcenkha kufunisisa kobiri. Wanthu azinji nsiku zino, ambafunisisa kobiri na bzinthu bzakusiyana-siyana bzomwe bzimbagulidwa na kobirizo. (2 Timotio 3:2) Jezu akhadziwa kuti ateweri wace angadadzayezedwa na mzimu umweyu wakufunisisa kobiri. Ndipopa iye adalewa kuti: ‘Palibe kapolo omwe angakwanise kuphatira basa ambuya awiri; thangwe, an’dzawenga m’bodzi, acidzafuna munango; ayai an’dzabvera m’bodzi, acidzanyoza munango. Imwepo mungakwanise lini kuphatira basa Mulungu na kuphatira basa cuma pa nthawe ibodzi-bodzi.’ (Mateu 6:24) Tenepo, munthu omwe ambatumikira Yahova ndipo ambadzonga nthawe yace pa pezi thangwe ra kucita nyongo kuti akhale wakudala mu dzikoli, bziri ninga kutumikira ambuya awiri. Iye ambatumikira lini Yahova yekha basi.

6. Kodi tikupfunza ciyani na malango yomwe Jezu adapereka ku gwere la ku Laodiseya?

⁶ Kuphampha kwa magole dzana yakutoma, kukhana gwere linango mu mzinda wa Laodiseya, ndipo abale wa gwerelo akhalewa mwakubzikuza kuti: ‘Ndidadala, ndina kobiri, ndipo ndikusaya lini cinthu.’ Koma Yahova pabodzi na Jezu akhawawona kuti ‘mbakubonera, mbakupasa nsisi, mbakusauka, mbazimola ndipo akhali pezi.’ Jezu adawapasa malango thangwe rakuti iwo akhafunisisa kwewe-kwene kobiri, sikuti thangwe  ra kudala, ndipo kufunisisa kobiri kwawoko kukhadzonga uxamwali bwawo na Yahova. (Cibvumbulutso 3:14-17) Tenepo, tikazindikira kuti tayamba kufunisisa kobiri, tin’funika kubwezeratu makumbukidweyo mwakamfulumiza. (1 Timotio 6:7, 8) Tikasaya kucita bzimwebzi, tin’dzayamba kufuna bzinthu bza m’dzikoli ndipo Yahova an’dzakomedwa lini na kunamata komwe timbacita kwa iye, thangwe iye ambafuna kuti timbanamate ‘iye yekha basi.’ (Bzakutonga 4:24) Kodi kobiri zingakhale tani zakufunika kwene-kwene pa moyo wathu?

7-9. Kodi mukupfunza ciyani na ciratizo ca m’bale David?

⁷ Mbatiwoneni ciratizo ca m’bale David, omwe ni mkulu wa gwere ndipo ambakhala ku dziko la Estados Unidos. Iye adalewa kuti ambaphata basa na nyongo. Thangwe ra bzimwebzi, ku impreza yomwe akhaphata basa adakwizidwa mpando ndipo adafika pa kudziwika ninga munthu wakudziwa bwino kuphata basa m’dzikolo. David adalewa kuti: “Pa nthawe imweire, ndikhakumbuka kuti bzinthu bzikhandifambira bwino, thangwe ndikhawona ninga kuti Yahova akhandisimba.” Kodi bzikhalidi tenepo?

⁸ David adazindikira kuti basa lace likhadzonga uxamwali bwace na Yahova. Iye adati: “Nthawe zense ndikhandokumbukira bza mabvuto ya kubasa, napo ndikakhala ku mitsonkhano ya gwere na mu utumiki bwakumunda. Ndikhatambira kobiri zizinji, koma ndikhakhala wakusunama kwene-kwene ndipo ine na mkazangu tikhakhala ticinesana kawiri-kawiri.”

⁹ David adazindikira kuti akhafunika kucita cakusankhula comwe cikhali cakufunika kwene-kwene. Tenepo, iye adalewa kuti: “Ndidawona kuti ikhali nthawe yakucinja bzinthu pa moyo wangu.” David adaceza na bwana wace kuti acinje nthawe yomwe akhamala kubasa. Kodi mukudziwa bzomwe bzidadzacitika? Bwana wacewo adadzamucosa basa! Kodi n’ciyani comwe David adacita? Iye adati: “Mangwana yace, ndidadzaza formulariyo ya upainiya bwa kuthandiza.” Na  kupita kwa nthawe, David adayamba kutumikira ninga mpainiya wakukhazikika, ndipo mkazace adadzatengambo upainiyabo. Kuti asamalire banja lawo, iwo ambacita basa lakucenesa nyumba za wanthu. Wanthu azinji ambafuna lini kucita basa limweri thangwe ambaliwona kuti ndakunyozeka. Kwa David pabodzi na mkazace, cakufunika ni mtundu lini wa basa lomwe limbacita, koma kuikha pa mbuto yakuyamba basa la Yahova. Napo kuti basa lomwe akhaphata likhawapasa lini kobiri zizinji ninga lakuyamba, koma mwezi uli-wense iwo akhakhala na kobiri zakugulira bzinthu bzomwe akhafuna pa moyo wawo. Mwa kusaya kupenukira, banjali lidawona momwe Yahova ambasamalirira wale omwe ambaikha pa mbuto yakuyamba Umambo bwace.—Mateu 6:31-33.

10. Kodi tingakhotcerere tani mtima wathu?

¹⁰ Tensenefe tin’funika kukhotcerera mtima wathu, bziribe basa penu ndife wakudala ayai wakusauka. Kodi tingacite tani? Lekani kubvuma kuti cikhumbo cakufunisisa kobiri cikule mu mtima mwanu. Ndipo lekani kuwona basa lanu kukhala lakufunika kwene-kwene kuposa kutumikira Yahova. Kodi mungadziwe tani kuti bzimwebzi bzikucitika kwa imwepo? Mungabzibvunze kuti: ‘Ndikakhala pa mitsonkhano ayai mu utumiki bwakumunda, kodi nimbandokumbukira bza basa langu? Kodi nimbafuna kukoya kobiri zizinji kuti ndireke kudzabonera kutsogolo? Kodi kobiri na bzinthu bza kuthupi bzikubweresa mabvuto m’banja mwangu? Kodi ningabvume kuphata basa lomwe winango ambalinyoza kuti ndikhale na nthawe izinji pa kutumikira Yahova?’ (1 Timotio 6:9-12) Mukambacita mibvunzoyi, kumbukirani kuti Yahova ambatifuna kwene-kwene, ndipo iye wapicira wense omwe ambanamata iye yekha basi kuti: ‘Nin’dzakusiyani lini na pang’onopo ne kukuthawani.’ Na thangwe limweri mpostolo Paulo adanemba kuti: ‘Moyo wanu ukhale wakusaya kufunisisa kobiri.’—Wahebereu 13:5, 6.

11. Kodi n’ciyani comwe cingatithandize kuti tikondwe na moyo?

¹¹ Yahova ambafuna kuti tikondwe na moyo, ndipo cinthu comwe cingatithandize ni masenzeka. Bibliya limbati: ‘Palibe comwe n’cabwino kwa munthu kuposa kudya, kumwa na kukondwesa mtima wace pa basa lace lomwe waphata na nyongo.’ (Mpalizi 2:24) Koma m’dzikoli muna masenzeka mazinji yomwe yangadzonge makhalidwe yathu yabwino. Masenzekayo yambalemekeza lini makhalidwe yabwino ndipo yambacitisa wanthu kubvuma ayai kufuna kucita bzinthu bzomwe Mulungu ambakomedwa lini nabzo.

12. Mwakubverana na bukhu la 1 Wakolinto 10:21, 22, thangwe ranyi ifepano tin’funika kumbasankhula masenzeka mwanzeru?

¹² Ifepano tin’funa kunamata Yahova yekha  basi. Ndipopa tin’funika lini kudyera pa ‘meza ya Yahova’ ndipo pa nthawe ibodzi-bodziyo kudyerambo pa ‘meza ya madimonyo.’ (Werengani 1 Wakolinto 10:21, 22. *) Kudya cakudya pabodzi na munthu munango, ni cizindikiro cakulatiza kuti tinaye uxamwali. Ifepano tikambasankhula masenzeka yomwe yambalimbisa ndewo, bza mizimu, bza unzazi ayai bzikhumbo bza thupi, tin’dzakhala tikudya cakudya cakuphikidwa na anyamadulanthaka wa Mulungu. Bzimwebzi bzingadzonge unthu bwathu pabodzi na uxamwali bomwe tinabo na Yahova.

13-14. Mwakubverana na bukhu la Tiyago 1:14, 15, thangwe ranyi tin’funika kumbasamala na masenzeka yomwe timbasankhula? Fotokozani ciratizo.

¹³ Masenzeka tingayandendemezere na cakudya. Tikafuna kudya, timbasankhula cakudya comwe tikufuna sikuti kondodya ciri-cense. Koma tikakhudyula cakudyaco, pambacitika bzinthu bzizinji bzomwe ifepano timbadziwa lini. Ndipo thanzi lomwe limbakhala ku cakudyaco, limbayamba kuphata basa m’thupi mwathu. Tenepo, cakudya cabwino cingathandize thupi lathu kukhala na thanzi labwino, koma cakudya cakuipa cingadzonge thanzi lathu. Pinango bzakutewera bza cakudyaco, bzingawoneke lini lero na lero, koma na kupita kwa nthawe bzingadzawoneke.

¹⁴ Bzimwebzi bzingacitikembo na masenzeka yomwe tingasankhule kucita, ifepano tin’funika kuwonesesa bzinthu bzomwe tingaikhe m’makumbukidwe mwathu. Koma bzomwe bzimbacitika m’makumbukidwemo ifepano timbabzidziwa lini, ndipo timbakwanisa lini kubzikhotcerera. Tenepo, masenzeka yabwino yangatitsangalaze, koma yakuipa yangatidzonge. (Werengani Tiyago 1:14, 15. *) Nthawe zinango bzakutewera bza masenzeka yakuipa bzingawoneke lini nthawe imweyoletu, koma bzimbadzawonekera patsogolo pace. Ndipopa Bibliya limbaticenjeza kuti: ‘Lekani kupumpsiwa; Mulungu ambapusisidwa lini. Pakuti ciri-cense comwe munthu an’bzala, cimweco ndico comwe an’dzabvuna; pakuti omwe abzale na cakulinga cakukondwesa thupi race, an’dzabvuna kudzongeka kwa thupi racelo.’ (Wagalata 6:7, 8) Tenepo, tin’funika kutcenkha masenzeka yense yomwe yambalimbisa bzinthu bzomwe Yahova ambabziwenga!—Psalymo 97:10.

15. Kodi ni mphaso iponi yomwe Yahova watipasa?

¹⁵ Abale azinji ambakomedwa kwene-kwene kuwona nkhani za programa ya JW Broadcasting, zomwe zimbagumanika pa interneti. Mpfumakazi yakucemeredwa Marilyn idalewa kuti: “Nkhani za programa ya JW Broadcasting zandithandiza kukhala munthu wakukondwa, ndipo nimbawona ciri-cense comwe cimbagumanika pa programayi thangwe bzense bzimbandidekera. Ndipo ndikapswoma ayai ndikasunama, nimbalimbisidwa ndikawona nkhani ayai vesi la nsiku pa programayi. Bzimwebzi bzimbandithandiza kubzibva kuti ndine wakufendererana na Yahova pabodzi na gulu lace. Programa ya JW Broadcasting, yandithandiza kwene-kwene kucinja moyo wangu!” Pa programa ya JW Broadcasting, pambaikhidwa nkhani mwezi uli-wense, pana ma audiyo, ma vidiyo, nyimbo zakutsangalaza zomwe mungaziwone na kuzibva nthawe iri-yense. Kodi imwepo mukuphatisambo basa mphaso ya Yahovayi?

16-17. Thangwe ranyi tin’funika kumbaphatisa basa mwanzeru nthawe yathu tikambacita masenzeka, ndipo tingacite tani bzimwebzi?

¹⁶ Tin’funika lini kundosamala na mtundu wa masenzeka yomwe timbasankhula, koma tin’funika kusamalambo na nthawe yomwe timbadzonga pakucita masenzekayo. Tikasaya kucita bzimwebzi, tingadzonge nthawe izinji tikucita masenzekayo, m’mbuto mwakucita bzizinji pakutumikira Yahova. Wanthu azinji bzimbawanesa kuphatisa basa bwino nthawe akambacita masenzeka. Mpfumakazi yakucemeredwa Abigail, yomwe  ina magole 18 yakubadwa, idati: “Nimbatsangalazidwa kwene-kwene ndikawona nkhani pa TV pambuyo pakucita basa langu pa nsiku. Koma ndikasaya kusamala, nimbamala nthawe izinji ndikuwona nkhanizo.” Ndipo m’bale munango wakucemeredwa Samuel, omwe ana magole 21 yakubadwa, adalewa kuti: “Nthawe zinango nimbawona pa interneti mavidiyo mazinji mang’ono-mang’ono. Nimbayamba kuwona vidiyo ibodzi, ndikati ndidzidzimuke, nimbawona kuti zapita ora zitatu ayai zinai.”

¹⁷ Kodi mungaphatise tani basa nthawe yanu mwanzeru pakucita masenzeka? Cakuyamba, dziwani nthawe yomwe mumbadzonga pakucita masenzekayo. Nembani nthawe yense yomwe mumbadzonga pakucita masenzeka pa mdzinga uli-wense. Ndipo nembani nthawe zomwe mumbamala mukuwona nkhani pa TV, kuphatisa basa interneti, kusenzeka na tablet ayai mtedwe wanu wa m’manja. Tenepo, mukazindikira kuti mukudzonga nthawe izinji kwene-kwene, citani ndandanda ya bzinthu bzomwe mumbacita. Pambulani nthawe kuti mumbacite cakuyamba bzinthu bzakufunika kwene-kwene, ndipo nthawe yomwe yasala mbacitani masenzeka. Mukamala, kumbirani Yahova kuti akuthandizeni kuteweza ndandandayo. Mukacita bzimwebzi, imwepo mun’dzakhala na nthawe na mphanvu yakupfunza Bibliya, kunamata ninga banja, kugumanika pa mitsonkhano na kupalizira. Tenepo, mukaikha Yahova pa mbuto yakuyamba, mun’dzakhala wakukondwa mukambacita masenzeka yanu.

18-19. Kodi tingalatize tani kuti timbanamata Yahova yekha basi?

¹⁸ Pomwe mpostolo Pedru adamala kulewa bza cimaliziro ca dziko la Sathaniri na bza dziko lipsa, iye adati: ‘Abale wakufunidwamwe, pakuti mukudikhirira bzinthu bzimwebzi, citani nyongo kuti mudzagumanidwe na iye wakusaya nthonsa, wakusaya mathangwe, na mu mtendere.’ (2 Pedru 3:14) Tenepo, ifepano tikabvera malangoya na kucita ciri-cense kuti tikhale wakucena mwakuthupi na mwauzimu, tin’dzalatiza kuti timbanamata Yahova yekha basi.

¹⁹ Sathani pabodzi na dziko laceri an’pitiriza kutipumpsa kuti tiikhe bzinthu bza m’dzikoli pa mbuto yakuyamba sikuti Yahova. (Luka 4:13) Koma tin’funika lini kubvuma kuti munthu ayai cinthu ciri-cense cititazise kuikha Yahova pa mbuto yakuyamba, napo tigumane tani na mabvuto. Ndipo tatsimikiza kucita bzomwe Yahova ambafuna bzomwe ni kunamata iye yekha basi!