Nkhani Yakupfunza 36
Bzomwe Armagedo In’dzacita!
‘Adawakonkhanisa pabodzi pa mbuto yomwe . . . imbacemeredwa Armagedo.’—CIBVUMBULUTSO 16:16.
NYIMBO 150 Lingani Mulungu Kuti Mudzapulumuke
BZOMWE TIN’PFUNZA *
1-2. (a) Kodi wanthu akabva bza Armagedo ambakumbukira ciyani? (b) Kodi mu nkhani ino tin’cezerana mibvunzo iponi?
WANTHU winango, pakubva fala lakuti Armagedo, ambakumbukira bza matsoka yacilengedwe ayai nkhondo ya mabomba yomwe in’dzapfudza dziko lense. Koma mwakusiyana na bzomwe wanthuwo ambakhulupira, Bibliya limbalewa kuti Armagedo ni nkhondo yomwe in’citika tsapanopapa. Nkhondoyo in’dzakhala na bzakutewera bzabwino kwene-kwene, ndipo bzomwe Bibliya limbalewa pa nkhaniyi, bzimbatikondwesa! (Cibvumbulutso 1:3) Nkhondo ya Armagedo in’dzapfudza lini wanthu wense! Kodi bzin’dzacitika tani bzimwebzi?
2 Bibliya limbalewa kuti nkhondo ya Armagedo in’dzapulumusa wanthu wakulungama mwa kumalisa utongi bwa wanthu, kupfudza wanthu wakuipa na kukhotcerera dzikoli kuti lireke kudzongekeratu. (Cibvumbulutso 11:18) Kuti tibvesese bwino nkhaniyi, mbaticezeraneni mibvunzo minai iyi: Kodi Armagedo n’ciyani? Kodi n’ciyani cin’dzacitika Armagedo ikanati kuyamba? Kodi tingacite ciyani kuti tidzapulumuke pa nkhondoyi? Kodi tingapitirize tani kukhala wakukhulupirika pomwe Armagedo ikufendera?
KODI ARMAGEDO N’CIYANI?
3. (a) Kodi fala lakuti ‘Armagedo’ limbathandauza ciyani? (b) Mwakubverana na cinembo ca Cibvumbulutso 16:14, 16, thangwe ranyi tingalewe kuti Armagedo ni mbuto yakuyezezera?
3 Werengani Cibvumbulutso 16:14, 16. * Fala lakuti ‘Armagedo’ limbagumanika kabodzi basi m’Bibliya, ndipo fala limweri limbacokera ku cirewedwe ca Cihebereu lomwe limbathandauza ‘Phiri la Megido.’ (Cibvumbulutso 16:16) Megido ukhali ubodzi mwa mizinda yomwe ikhalipo mu Jirayeri wakale. (Djosuwe 17:11) Tsono Armagedo ni dzina lini la mbuto yomwe iripodi. Dzinali limbayimira kutsonkhanisidwa kwa ‘wamambo wa pa dziko lense lakukhalidwa na wanthu’ kuti atsutsane na Yahova. (Cibvumbulutso 16:14) Tsono mu nkhani ino tiphatisirambo basa dzina la Armagedo pakulewa bza nkhondo yomwe in’dzacitika pambuyo kutsonkhanisidwa kwa wamambo wa pa dziko lensewa. Kodi timbadziwa tani kuti Armagedo ni mbuto lini yomwe iripodi? Cakuyamba n’cakuti, palibe phiri lomwe lina dzina lakuti Megido. Caciwiri, Megido ni mbuto ing’ono kwene-kwene, ndipo ‘atongi wa pa dziko lense,’ anyankhondo wawo, pabodzi na bzifuzo bzawo bza nkhondo angakwane lini. Cacitatu, mu nkhani ino tiniwona kuti nkhondo ya Armagedo in’dzayamba pomwe atongi wa dzikoli an’dzaphindukira atumiki wa Mulungu omwe ali pa dziko la pansi.
4. Thangwe ranyi Yahova adapasa nkhondo yace ikulu dzina lakucokera ku fala lakuti Megido?
4 Thangwe ranyi Yahova adapasa nkhondo yace ikulu dzina lakucokera ku fala lakuti Megido? Thangwe ndakuti mu nthawe zakale nkhondo zizinji zikhacitikira mu mzinda wa Megido omwe ukhali pafupi na cigwa ca Jezireyeli. Ndipo nthawe zinango, Yahova akhapitira nkhondo zomwe zikhacitika mu mzinda umweyu. Mwa ciratizo, pafupi na ‘madzi ya Megido,’ Yahova adathandiza Baraki kukunda gulu la anyankhondo wa Kanani lomwe likhatsogoleredwa na Sizera. Patsogolo pace, Baraki pabodzi na mpolofeta mkazi Debora adatenda Yahova thangwe ra kukunda kwakudabwisako. Ndipo iwo adaimba kuti: ‘Nyenyezi zidamenyana kudzulu . . . na Sizera. [Ndipo] mkulo wa Kisoni udawakokolola.’—Wayeruzi 5:19-21.
5. Fotokozani kusiyana kwa nkhondo yomwe Baraki adacita na nkhondo ya Armagedo.
5 Baraki na Debora adamaliza nyimbo yawo na mafala yakuti: ‘Imwe Yahova, citisani kuti anyamadulanthaka wanu wense anyembereke, koma omwe ambakufunani akhale na mphanvu ninga momwe dzuwa limbakhalira.’ (Wayeruzi 5:31) Pa nkhondo ya Armagedo, anyamadulanthaka wa Mulungu an’dzapfudzidwa ndipo omwe ambamufuna an’dzapulumuka. Koma pana kusiyana kukulu kwene-kwene pakati pa nkhondo yomwe Baraki adacita na nkhondo ya Armagedo. Pa Armagedo, atumiki wa Mulungu an’dzamenya lini nkhondo ne kuphata nfuti! Koma an’dzakhala wamphanvu mwa kupitiriza ‘kukhala wakuderekha na kukhulupira’ Yahova pabodzi na anyankhondo wace wa kudzulu.—Zaiya 30:15; Cibvumbulutso 19:11-15.
6. Kodi Mulungu pinango an’gadzapfudze tani anyamadulanthaka wace pa nkhondo ya Armagedo?
6 Kodi Mulungu pinango an’gadzapfudze tani anyamadulanthaka wace pa nkhondo ya Armagedo? Pana njira zizinji zomwe iye angadzaphatisire basa. Mwa ciratizo, iye angadzaphatisire basa bziteke-teke, matalala na mpheni. (Djobi 38:22, 23; Zakiyeri 38:19-22) Iye angadzacitise anyamadulanthakawo kuphana wokha-wokha. (2 Nkhani 20:17, 22, 23) Ndipo angadzaphatisire basa wanjo wace kuti apfudze wanthu wakuipa. (Zaiya 37:36) Bziribe basa momwe Mulungu adzapfudzire wanthuwo, koma iye an’dzakunda anyamadulanthaka wace wense. Kulewa cadidi, anyamadulanthaka wense an’dzapfudzidwa. Koma anyakulungama wense an’dzapulumusidwa.—Mimwani 3:25, 26.
BZOMWE BZIN’DZACITIKA ARMAGEDO IKANATI KUYAMBA
7-8. (a) Mwakubverana na 1 Watesalonika 5:1-3, 6, kodi atongi wa maboma an’dzalewa mafala yaponi? (b) Thangwe ranyi kunama kumweku kun’dzabweresa ngozi ikulu?
7 Ikanati kufika ‘nsiku ya Yahova’, atongi wa maboma an’dzalewa kuti ‘mtendere na cisungiko.’ (Werengani 1 Watesalonika 5:1-3, 6. *) Mwakubverana na 1 Watesalonika 5:2, ‘nsiku ya Yahova’ imbaimira ‘citsautso cikulu.’ (Cibvumbulutso 7:14) Kodi tin’dzadziwa tani kuti citsautso cikulu cayamba kucitika? Bibliya limbalewa kuti pan’dzabveka mafala yomwe yan’dzakhala ninga cizindikiro ca kuyambika kwa citsautso cikuluco.
8 Bibliya lidaleweratu kuti mafala yakuti ‘mtendere na cisungiko’ yan’dzakwanirisidwa. Thangwe ranyi atongi wa maboma an’dzalewa mafalaya? Kodi atsogoleri wa bzipembedzo an’dzayalewambo? Pinangopense. Napo bziri tenepoyo, mafala yakuti ‘mtendere na cisungiko’ kun’dzakhala kunama kunango kwa madimonyo. Tsono kunama kumweku kun’dzabweresa
ngozi ikulu, thangwe azinji an’dzakumbuka kuti mbakukhotcerereka, koma cadidi n’cakuti nthawe imweyi in’dzakhala ciyambi ca citsautso cikulu comwe cikanati kucitika pa moyo wa wanthu. Ninga momwe Bibliya limbalewera, ‘nthawe imweyo cipasu-pasu cin’dzawafikira mwakudzidzimusa, ninga kuwawidwa kwa mkazi omwe akufuna kubereka.’ Tsono n’ciyani cin’dzacitika na atumiki wakukhulupirika wa Yahova? Pakuti iwo ambadziwa lini nsiku yomwe citsautso cikulu cin’dzayambika, pinango an’dzadzidzimuka thangwe cin’dzayamba mwadzidzidzi, koma an’dzakhala adakonzeka kale.9. Fotokozani momwe Yahova an’dzapfudzira dziko la Sathaniri.
9 Yahova an’dzapfudza dziko la Sathaniri mwakusiyana na momwe adapfudzira wanthu wa mu nthawe ya Nowe. Cakuyamba iye an’dzapfudza Babulo Mkulu, omwe ambaimira bzipembedzo bzense bzakunama. Ndipo pa nkhondo ya Armagedo iye an’dzapfudza wense omwe ali kumbali ya utongi bwa Sathani, kuphatanidzambo wandale, acikunda na anyamalonda wacinyengo. Tsapano mbaticezeraneni cibodzi na cibodzi pa bzinthu bzalewedwabzi.
10. Mwakubverana na Cibvumbulutso 17:1, 6, na 18:24, thangwe ranyi Yahova an’dzapfudza Babulo Mkulu?
10 ‘Kuyeruzidwa kwa hule mkulu.’ (Werengani Cibvumbulutso 17:1, 6; 18:24. *) Babulo Mkulu akucitisa wanthu azinji kuleka kulemekeza dzina la Mulungu. Ambapfunzisa bzinthu bzakunama pakulewa bza Mulungu. Pakuti ambacita bzinthu ninga hule, iye ngwakusaya kukhulupirika kwa Mulungu ndipo ambaphatana na akulu-akulu wandale. Ndipo Babulo Mkuluyo ambangingimiza anamati wace kucosa kobiri, ambapha wanthu kuphatanidzambo atumiki wa Mulungu. (Cibvumbulutso 19:2) Kodi Yahova an’dzapfudza tani Babulo Mkulu?
11. Kodi ‘cirombo cifuira’ n’ciyani, ndipo nyanga zace khumi zin’dzacita ciyani na Babulo Mkulu?
11 Yahova an’dzapfudza ‘hule mkulu,’ mwa kuphatisa basa ‘nyanga khumi’ za ‘cirombo cifuira.’ Ciromboci cimbaimira bungwe la Nações Unidas. Ndipo nyanga khumi zimbaimira maboma ya ndale yomwe yambathandizira bungwe la Nações Unidas. Mabomaya yan’dzaphindukira Babulo Mkulu, pa nthawe yomwe Mulungu adaikhazikisa. Iyo ‘yan’dzamusakaza Cibvumbulutso 17:3, 16) Kupfudzidwa kwace kun’dzacitika mwakamfulumize ndipo kun’dzawoneka ninga kwacitika ‘nsiku ibodzi.’ Ndipo bzimwebzi bzin’dzatokonya wense omwe ambathandizira cipembedzo cakunama. Pakuti ico cikhambacita kulegedja kuti: ‘Ndidakhala ninga mambo-mkazi, ndine lini mansiwa, ndipo cipo ndicidzalira.’—Cibvumbulutso 18:7, 8.
na kumusiya ali pezi’ mwa kumutengera cuma cace na kuzimbula bzinthu bzakuipa bzomwe adacita. (12. Kodi n’ciyani comwe Yahova an’dzalekerera lini, ndipo n’thangwe ranyi?
12 Mulungu an’dzalekerera lini atumiki wace kuti adzapfudzidwe na wanthu wakuipa. Atumiki wacewo ambalemekeza dzina lace na kubvera mtemo wakuti acoke mu Babulo Mkulu. (Mabasa 15:16, 17; Cibvumbulutso 18:4) Iwo ambathandizambo wanthu winango kucoka mu Babulo Mkuluyo. Ndipopa atumiki wa Yahovawa an’dzatambira lini ‘naye pabodzi matsoka yace.’ Napo bziri tenepo, iwo an’dzafunika kulimbisa cikhulupiro cawo kuti an’dzakwanise kupirira mayezo yomwe angadzagumane nayo.
Bziribe basa komwe atumiki wa Mulungu angagumanike, nthawe zense iwo an’dzathemba Yahova akadzazunzidwa na Gogi (Onani ndime 13) *
13. (a) Kodi Gogi ni mbani? (b) Mwakubverana na Zakiyeri 38:2, 8, 9, kodi n’ciyani cin’dzacitisa kuti nkhondo ya Armagedo iyambe?
13 Bzomwe Gogi an’dzacita na atumiki wa Mulungu. (Werengani Zakiyeri 38:2, 8, 9. *) Pambuyo pa bzipembedzo bzense bzakunama kupfudzidwa, atumiki wa Mulungu an’dzakhala ninga muti omwe wapulumuka pa cimphepo camphanvu. Sathani akadzawona bzimwebzi, an’dzakalipa kwene-kwene. Iye an’dzalatiza ukali bwacebo mwakuphatisa basa ‘mafala yakunyansa’ yakufuliziridwa na madimonyo, ndipo thangwe ra mafalayo mitundu ya wanthu in’dzaphatana kuti izunze atumiki wa Mulungu. (Cibvumbulutso 16:13, 14) Ndipo ciphatano ca mitundu ya wanthuci cimbacemeredwa ‘Gogi wa dziko la Magogi.’ Pomwe mabomayo yan’dzazunza atumiki wa Yahova, nkhondo ya Armagedo in’dzayamba.—Cibvumbulutso 16:16.
14. Kodi Gogi an’dzazindikira ciyani?
14 Gogi an’dzathemba acikunda wace. (2 Nkhani 32:8) Koma ifepano tin’dzathemba Yahova Mulungu wathu, napo kwa wanthu winango bzin’dzawoneka ninga kuti mpsakusaya kuthandiza. Tsono mirungu ya Babulo Mkulu yomwe ikhali yamphanvu kwene-kwene, in’dzakwanisa lini kumupulumusa ku ‘cirombo’ na ‘nyanga [zace] khumi’! (Cibvumbulutso 17:16) Pa nthawe imweyi Gogi an’dzawona ninga kuti wakunda kale. Tenepo, ‘ninga momwe mitambo imbampsinkhira dziko la pansi,’ iye an’dzayamba kuzunza atumiki wa Yahova. (Zakiyeri 38:16) Koma mwakusaya kucedwa Gogi an’dzazindikira kuti an’kwanisa lini kukunda atumikiwo ndipo iye an’dzapulumuka lini. Bzimwebzi bzikadzacitika, Gogi an’dzazindikira kuti akulimbana na Yahova ninga momwe Farawo adacitira pa Nyanza Ifuira.—Kufuluka 14:1-4; Zakiyeri 38:3, 4, 18, 21-23.
15. Kodi n’ciyani comwe Jezu an’dzacita pa nkhondo ya Armagedo?
15 Jezu pabodzi na anyankhondo wace wakudzulu an’dzakhotcerera atumiki wa Mulungu, ndipo an’dzapfudza Gogi na acikunda wace wense. (Cibvumbulutso 19:11, 14, 15) Tsono n’ciyani cin’dzacitika kwa nyamadulanthaka mkulu wa Yahova, Sathani, omwe akunamiza wanthu na kuwatsogolera kuti akaphedwe pa nkhondo ya Armagedo? Jezu an’dzathusa iye pabodzi na madimonyo yace ku ciphompho, ndipo iwo an’dzakhala kumweko wakumangidwa mpaka magole 1.000.—Cibvumbulutso 20:1-3.
BZOMWE TIN’FUNIKA KUCITA KUTI TIDZAPULUMUKE PA NKHONDO YA ARMAGEDO
16. (a) Kodi tingalatize tani kuti timbadziwa Mulungu? (b) Kodi n’ciyani cin’dzacitika na wanthu omwe ambadziwa Mulungu pa Armagedo?
16 Kuti tidzapulumuke pa nkhondo ya Armagedo, tin’funika kulatiza kuti timbamudziwa ‘Mulungu’ na kumbabvera ‘bzipsa bzabwino pakulewa bza Mbuya wathu Jezu,’ bziribe basa penu tapfunza cadidi ca m’Bibliya tsapanopapa ayai kale-kale. (2 Watesalonika 1:7-9) Ifepano tingalatize kuti timbadziwa Mulungu, tikadziwa bzomwe iye ambafuna, bzomwe ambafuna lini na mitemo yace. Ndipo tingalatizembo kuti timbamudziwa tikambamufuna, tikambamubvera na kunamata iye yekha basi. (1 Juwau 2:3-5; 5:3) Tikacita bzimwebzi, Mulungu an’dzatidziwa ndipo an’dzatifuna. (1 Wakolinto 8:3) Ndipo iye an’dzatipulumusa pa nkhondo ya Armagedo.
17. Kodi kubvera ‘bzipsa bzabwino bzomwe Mbuya wathu Jezu’ adapfunzisa kumbaphatanidza ciyani?
17 ‘Bzipsa bzabwino [bzomwe] Mbuya wathu Jezu’ adapfunzisa, bzimbaphatanidza cadidi cense comwe cimbagumanika m’Fala la Mulungu. Ifepano timbabvera bzipsa bzabwinobzo tikambabziphatisa basa pa moyo wathu. Kubverako kumbaphatanidza kuikha Umambo bwa Mulungu pa mbuto yakuyamba, kuphatisa basa mitemo yakulungama ya Mulungu na kudziwisa Mateu 6:33; 24:14) Ndipo kumbaphatanidzambo kuthandiza Akristau wakudzozedwa, omwe ambacita mabasa yakusiyana-siyana.—Mateu 25:31-40.
winango bza Umambobo. (18. Kodi Akristau wakudzozedwa an’dzabwezera tani ‘mabira manango’ kudeka mtima komwe adawalatiza?
18 Tsapanopapa Akristau wakudzozedwa anibwezera ‘mabira manango’ kudeka mtima komwe adawalatiza. (Juwau 10:16) Kodi aniwabwezera tani? Nkhondo ya Armagedo ikanati kuyamba, Akristau wense wakudzozedwa wakukwana 144.000, an’dzakhala ali kudzulu ninga wana wakusaya kufa wa Mulungu. Iwo an’dzacita mbali ya anyankhondo wakudzulu omwe an’dzapfudza Gogi na kukhotcerera ‘thimu likulu la wanthu’ omwe ambatumikira Yahova. (Cibvumbulutso 2:26, 27; 7:9, 10) Mwakusaya kupenukira, thimulo lin’dzatenda kwene-kwene mwayi omwe lidakhala nawo wakuthandizira Akristau wakudzozedwa wa Yahova pomwe akhali pa dziko la pansi!
KODI TINGAPITIRIZE TANI KUKHALA WAKUKHULUPIRIKA KUPHAMPHA KWA DZIKOLI?
19-20. Napo tikugumana na mayezo, kodi n’ciyani cingatithandize kupitiriza kupirira pomwe nkhondo ya Armagedo iri pafupi?
19 Nsiku zakumalizira zino, atumiki azinji wa Yahovafe tikupirira mayezo yakusiyana-siyana. Napo bziri tenepo, tikupitiriza kukhala wakukondwa. (Tiyago 1:2-4) Cinthu cakufunika kwene-kwene kuti tipitirize kupirira ni mpembo. (Luka 21:36) Ndipo cinthu cinango ni kuwerenga Bibliya nsiku zense na kumbakumbukira bzomwe timbawerengabzo, kuphatanidza mapolofesiya yomwe yan’kwanisika tsapanopapa. (Psalymo 77:12) Tikacita bzimwebzi na kumbapalizira na nyongo, cikhulupiro pabodzi na cidikhiro cathu bzin’dzalimba!
20 Kumbukirani momwe bzinthu bzin’dzakhalira Babulo Mkulu akadzapfudzidwa ndipo nkhondo ya Armagedo ikadzamala! Kumbukiranimbo cikondweso comwe mun’dzakhala naco thangwe ra kuwona wanthu wense akulemekeza dzina la Mulungu pabodzi na utongi bwace! (Zakiyeri 38:23) Kulewa mwakusaya kupenukira, nkhondo ya Armagedo njabwino kwene-kwene kuna wale omwe ambadziwa Mulungu, ambabvera Mwana wace na omwe an’pirira mpaka kuphampha.—Mateu 24:13.
NYIMBO 143 Pitirizani Kuphata Basa, Kulindira na Kudikhirira
^ ndi. 5 Wanthu wa Yahova ankudikhirira kubwera kwa Armagedo kuyambira kale-kale. Mu nkhani ino, tin’pfunza kuti Armagedo n’ciyani? Ndipo tin’pfunzambo bzomwe bzin’dzacitika pomwe Armagedo in’dzasala pang’ono kuti iyambike na bzomwe tin’funika kucita kuti tidzapulumuke pa kupfudzidwa kwa dzikoli.
^ ndi. 3 Cibvumbulutso 16:14 Cadidi yakhali mafala yakufuliziridwa na madimonyo ndipo yambacita bzizindikiro, ndipo yambayenda kwa wamambo wa pa dziko lense lakukhalidwa na wanthu kuti awakonkhanise pabodzi ku nkhondo ya nsiku ikulu ya Mulungu wamphanvu yense. 16 Ndipo adawakonkhanisa pabodzi pa mbuto yomwe m’Cihebereu imbacemeredwa Armagedo.
^ ndi. 7 1 Watesalonika 5:1 Tsapano pakulewa bza nthawe na nyengo, abale, mun’funika lini kunemberedwa ciri-cense. 2 Pakuti imwepo mukudziwa bwino kuti nsiku ya Yahova in’dzabwera ninga mbava, usiku. 3 Pomwe an’dzakhala acirewa kuti: “Mtendere na Cisungiko!” pa nthawe imweyo cipasu-pasu cin’dzawafikira mwakudzidzimusa, ninga kuwawidwa kwa mkazi omwe akufuna kubereka, ndipo an’dzapulumuka lini. 6 Tenepo, tileke kugona ninga momwe winango akucitira, koma tipitirize kukhala wakupenya na kumbakumbuka bwino.
^ ndi. 10 Cibvumbulutso 17:1 M’bodzi wa anjo anomwewo omwe akhana mbale zinomwe, adabwera kwa ine aciti: “Bwera, ndikulatize kuyeruzidwa kwa hule mkulu omwe akhadakhala padzulu pa madzi mazinji. 6 Ndipo ndidawona kuti mkaziyo akhadaledzera na mulopa wa anyakucena na wa mboni za Jezu. Pakumuwona, ndidadabwa kwene-kwene.
Cibvumbulutso 18:24 Inde, mwa iye mwagumanika mulopa wa apolofeta, wa wanthu wakucena na wa wense omwe adaphedwa pa dziko la pansi.
^ ndi. 13 Zakiyeri 38:2 Iwe mwana wa munthu, nyang’ana Gogi wa dziko la Magogi, mtsogoleri mkulu wa Mezeki na Tubali, ndipo uvimire bzinthu bzomwe bzin’dzamucitikira. 8 “Pambuyo pakumala nsiku zizinji, iwepo un’dzacenjezedwa. Pakadzamala magole mazinji, iwepo un’dzathukulira dziko la wanthu omwe akhadandosala pang’ono kuphedwa na mphanga, iwo adakokhanisidwira phiri la Jirayeri pomwe pakhana wanthu azinji omwe akhadakhala kwa nthawe itali. Nzika za dzikoli zidabwerera pomwe zicikakhala mwa mtendere pakati pa wanthu wensene. 9 Iwepo un’dzabwera kuna iwo ninga conzi, ndipo un’dzampsinkha dziko lawo lense ninga mitambo, iwepo, alindiri wako wense na mbumba yense inkukutewera.”
^ ndi. 76 BZOMWE BZINKUCITIKA PA CITHUNZI-THUNZI: Kutsogoloku tiniwona bzinthu bzizinji bzakudabwisa. Napo bziri tenepo, (1) tin’dzafunika kucita ciri-cense kuti tidzapitirize kupalizira, (2) kupitiriza kupfunza Bibliya, ndipo (3) kupitiriza kuthemba Mulungu kuti an’dzatipulumusa.
^ ndi. 90 BZOMWE BZINKUCITIKA PA CITHUNZI-THUNZI: Wamphanvu za umangi afika pamui pa banja la Mboni kuti awamange, tsono banjalo likukhulupira kuti Jezu pabodzi wanjo wace akudziwa bzomwe bzikucitikabzo.