1, 2. Kodi n’cineso ciponi comwe Djafeti na mwana wace wacikazi adagumana naco?

ADADIKHIRIRA kwene-kwene. Pomwe adawona baba wace ankubwerera bwino-bwino kucokera ku nkhondo iye adatsudzuka, ndipo adawathamangira kuti akamusane nawo acimbasekerera thangwe ra kukunda kwawo. M’mbuto mwa kukondwa na mwana waceyo mwa kuimba na kubzina, iye adang’amba bzakubvala bzace bza kunkhondo acilira kuti: “Mwana wangu! Wandisunamisa kwene-kwene.” Patsogolo pace iye adalewa mafala yomwe yadacinja moyo wa mwana waceyo kwa nthawe zense, yadacinja bzomwe iye akhafuna kucita pabodzi na cidikhiro ca kukhala na moyo omwe akhadauzolowera. Tsono, mwakusaya kuzeza, iye adatawira kuti angadacita mwakubverana na bzomwe adamuuzabzo, ndipo adalimbisa baba wace kuti acite ninga momwe adapicira kuna Yahova. Mafala yaceya njacikhulupiro cikulu. Iye adakhulupira kuti ciri-cense comwe Yahova akhafuna kuti iye acite, cikhali cabwino kuna iye. (Way. 11:34-37) Baba wace adadzala na cikondweso, thangwe akhadziwa kuti kubzipereka na mtima wense kwa mwana waceyo kuti amuthandize pa cakusankhula caceco, kungadakondwesa Yahova.

 ² Djafeti na mwana wace omwe akhagopa Mulungu, adaikha cikhulupiro cawo pa momwe Yahova ambacitira bzinthu, napo kucita bzimwebzo kukhali kwakunesa. Iwo akhali wakutsimikiza kubzipereka pa ciri-cense kuti abvumidwe na Mulungu.

3. Thangwe ranyi ciratizo ca Djafeti pabodzi na mwana wace wacikazi cingatithandize nsiku zino?

³ Timbadziwa kuti mpsakupusa lini kukhala wakukhulupirika nthawe zense kwa Yahova. Cadidi n’cakuti ifepano tin’funika ‘kumenya nkhondo yacikhulupiro mwamphanvu.’ (Juda 3) Kuti tithandizike kucita bzimwebzi, bwerani tiwone bzineso bzomwe Djafeti na mwana wace adakwanisa kulimbana nabzo. Kodi iwo adakwanisa tani kupitiriza kukhala wakukhulupirika kwa Yahova?

4, 5. (a) Kodi ni cakutonga ciponi comwe Yahova adapereka kuna Ajirayeri pomwe iwo adapita mu Dziko Lakupiciridwa? (b) Mwakubverana na Psalymo 106, kodi n’ciyani cidacitikira Ajirayeri thangwe ra kusaya kubvera kwawo?

⁴ Nsiku iri-yense, Djafeti na mwana wace akhakumbukira tsoka lomwe limbabwera thangwe ra kusaya kukhala wakukhulupirika. Pafu-pifupi magole 300 yakuyambirira, anyamuya wawo akhadauzidwa kuti acose wanthu wense anyakusaya kunamata Mulungu mu Dziko Lakupiciridwa. (Bzak. 7:1-4) Ajirayeri adaphonya mwa kutengera bzicito bza pikado bza wanthu wakukanani. Bzimwebzi bzidacitisa kuti iwo ayambe kunamata mirungu yakunama ndipo adasiya makhalidwe yabwino yomwe akhanayo, aciyamba bzicito bzakuipa.—Werengani Psalymo 106:34-39.

⁵ Kusaya kubvera kumweku kudawacitisa kuti aleke kufunidwa na Yahova; iye alibe kuwapasa citsimikizo cakuti angadawasamalira. (Way. 2:1-3, 11-15; Psal. 106:40-43) Cikhali cineso cikulu kwa mabanja yakugopa Mulungu, kupitiriza kukhala yakukhulupirika kuna Yahova mkati mwa nsiku zimwezire! Tsono Bibliya limbalewa kuti kumweko kukhana wanthu wacikhulupiro, ninga Djafeti na mwana wace, kukhana Elikana, Ana na Samuweri, wensenewa adatsimikiza kubvumidwa na Mulungu.—1 Sam. 1:20-28; 2:26.

6. Kodi ni nzeru zakuipa ziponi zomwe ziripo m’dzikoli nsiku zino, ndipo tin’funika kucita ciyani?

⁶ Tinkukhala m’dziko lomwe wanthu ambakumbuka na kucita bzinthu ninga momwe wanthu wa ku Kanani akhacitira—iwo akhalemekeza kwene-kwene upombo na ciwembo ndipo akhalimbisa kufunisisa bzinthu bzakuthupi. Yahova ankutipasa cenjezo lakubveka bwino—ninga momwe adacitira na Ajirayeri—kuti ticenkhe bzinthu bzimwebzi. Kodi tinkupfunza cinthu ciri-cense na kuphonya kwa Ajirayeri? (1 Wak. 10:6-11) Tin’funika kucosa cinthu ciri-cense cakulatiza makumbukidwe ya ucikanani pa moyo wathu. (War. 12:2) Kodi timbalatiza nyongo mwakukhulupirika pa kucita bzimwebzi?

7. (a) Kodi wanthu wa Djafeti adamucitira ciyani iye? (b) Kodi n’ciyani comwe Djafeti adacita?

⁷ Kusaya kubvera kwa Ajirayeri mu nsiku za Djafeti, kudawacitisa kuti akhale akapolo wa Afiristi na wa Amoni. (Way. 10:7, 8) Na tenepo, bzineso bza Djafeti bziribe kucokera ku mitundu ya anyamadulanthaka yokha koma bzidacokerambo kuna abale wace caiwo na atsogoleri wa Jirayeri. Njiru na ciwengo bzidacitisa wacibale wace kupatukana naye, acimutazisa kuphatisa bwino basa utaka bwace bwa kukhala mwana wakuyamba. (Way. 11:1-3) Djafeti alibe kubvuma kutengera makhalidwe yawo yakuipaya. Pomwe akulu-akulu wa dzinzalo adamukumbira thandizo, m’mbuto mwa kulamba mkumbiroyo, iye adayenda kukawathandiza. (Way. 11:4-11) N’ciyani comwe cidacitisa Djafeti kucita bzinthu ninga munthu wauzimu?

8, 9. (a) Kodi ni mitemo iponi mu Cakutonga ca Mozeji yomwe idathandiza Djafeti? (b) Kodi n’ciyani comwe cikhali cinthu cakufunika kuna Djafeti?

⁸ Djafeti sikuti akhali m’cikunda wamphanvu  basi, iye adakhalambo nyakupfunza wa momwe Mulungu akhacitira bzinthu na wanthu wace. Kubvesesa kwa Djafeti pa mbiri ya Jirayeri kudamucitisa kudziwa bwino comwe n’cabwino na comwe n’cakuipa m’maso mwa Yahova. (Way. 11:12-27) Mitemo ya Mulungu yomwe ikhali mu Cakutonga ca Mozeji idacinja makumbukidwe na mtima wace. Iye akhadziwa kuti Yahova ambafuna lini kuti wanthu ambakoyerane cakumtima; m’mbuto mwace, Mulungu ambafuna kuti wanthu wace ambafunane winango na mwanzace. Cakutonga cikhapfunzisa kuti munthu an’funika lini kulekerera bzakusaya bza winango, napo akhale munthu omwe ‘ambawenga’ iye.—Werengani Kufuluka 23:5; Mwambo 19:17, 18.

⁹ Ciratizo ca wanthu wacikhulupiro ninga Zuze omwe adalatiza nsisi kuna abale wace—napo pomwe ‘iwo adayamba kumuwenga’—pinango ni bzomwe bzidacitisa kuti Djafeti atawire tenepaule. (Ciy. 37:4; 45:4, 5) Kukumbukira bziratizo bzimwebzi kudathandiza Djafeti kusankhula kucita bzinthu bzomwe bzidakondwesa Yahova. Bzicito bza abale wace mwakusaya kupenukira bzidamupweteka mtima kwene-kwene, koma iye alibe kusiya kutumikira Yahova na Wanthu wace. (Way. 11:9) Nyongo ya kukhotcerera dzina la Yahova cikhali cinthu cakufunika kwene-kwene kuna Djafeti kuposa kulimbana na wanthu. Iye adatsimikiza kukhala wakukhulupirika kwa Yahova, ndipo bzinthu bzidamufambira bwino, pabodzi na wanthu winango.—Waheb. 11:32, 33.

10. Koti tingalekerere tani kuti nfundo za Mulungu zitithandize kucita bzinthu ninga Akristau nsiku zino?

¹⁰ Kodi mun’lekerera kuti ciratizo ca Djafeti citokonye mitima yanu? Pinango bzidaticitikira kale bzinthu bzakutitaisa mtima ayai M’kristau mwanzathu adaticitira bzinthu bzakuipa. Penu n’tenepo, tin’funika lini kulekerera kuti bzinthu bzimwebzi bzimbatitazise kugumanika pa mitsonkhano yacikristau ayai kutumikira Yahova na kukhala wakukhazikika mu gwere. Mwa kutewezera Djafeti, tin’funika kubvuma kuti nfundo za Mulungu zikhale zamphanvu kwene-kwene kuposa bzinthu bzakuipa, zicipitiriza kukhala za mphanvu pa bzinthu bzabwino.—War. 12:20, 21; Wakol. 3:13.

11, 12. Kodi ni lumbiro liponi lomwe Djafeti adacita, ndipo kodi bzimwebzi bzikhaphatanidza ciyani?

¹¹ Djafeti adazindikira kuti iye akhafunika thandizo la Mulungu kuti apulumuse Ajirayeri kwa a Amoni. Iye adapicira Yahova kuti penu iye angadakunda, angadapereka kwa Yahova ninga ‘nsembe yakupsereresa,’ m’bodzi omwe angadayamba kubula m’nyumba pa nthawe yomwe iye angadabwerera kucokera ku nkhondo. (Way. 11:30, 31) Kodi nsembe imweyi ingadaphatanidza ciyani?

¹² Kupereka nsembe ya wanthu ni cinthu cakunyansa kwa Yahova. Na tenepo, mpsakuwonekeratu kuti Djafeti akhafuna lini kupereka nsembe ya munthu caiye. (Bzak. 18:9, 10) Pansi pa Cakutonga ca Mozeji, nsembe yakupsereresa ikhaperekedwa yensene kwa Yahova, bzimwebzi bzinkuwonekeratu kuti Djafeti akhathandauza kuti angadapereka munthu kuti acite utumiki bwakupambulika bwa Mulungu. Piciroli likhaphatanidza kutumikira moyo wace wense mu tendi la mkonkhano. Yahova adabvuma mkumbiro wa Djafeti ndipo adamusimba na kukunda kukulu anyamadulanthaka wace. (Way. 11:32, 33) Tsono munthu angaperekedwe tani ninga ‘nsembe yakupsereresa’ kuna Mulungu?

13, 14. Kodi mafala ya Djafeti yakunembedwa pa Wayeruzi 11:35 yambalatiza ciyani bza cikhulupiro cace?

¹³ Kumbukirani nkhani yomwe yafotokozedwa pakuyambirira ire. Pomwe Djafeti adabwerera kucokera ku nkhondo, omwe adabula kunja kudzagumana naye ni mwana wace wacikazi omwe akhamufuna kwene-kwene, mwana wace m’bodzi yekhayo! Yamweya yakhali mayezo. Kodi iye angadacita ninga momwe adalumbirira kupereka mwana wace wacikaziyo kuti atumikire mu tendi la mkonkhano kwa moyo wace wense?

 ¹⁴ Mitemo ya Mulungu ingadatsogolera pomwe Djafeti kucita cakusankhula cabwino. Pinango iye angadakumbukira mafala yakufotokozedwa pa Mwambo 23:19, pomwe wanthu wa Mulungu akhapfunzisidwa kukhala wakufunisisa kupereka bzabwino bzomwe anabzo kuna Yahova. Cakutonga cikhalewa kuti munthu akalumbira, bzikhafunika kuti acite ninga momwe alumbiriramo. Cakutongaco cikhati: ‘Munthu akalumbira kwa Yahova . . . , aleke kucinja mafala yaceyo. Acite bzense mwakubverana na bzomwe adapicirabzo.’ (Mirew. 30:2) Ninga kukhulupirika kwa Ana omwe pinango adakhala na moyo pa nthawe ibodzi-bodziyo, Djafeti angalewedwe kuti adakhala na moyo mwakubverana na lumbiro lace, akhadziwa bzomwe bzikhamudikhirira iye na mwana wace wacikazi. Iye akhalibe mwana munango; mwana waceyo ndiye yekha akhali cidikhiro ca mbadwa yace, omwe angadasunga dzina lace na utaka bwace mu Jirayeri. (Way. 11:34) Na tenepo, Wayeruzi 11:35 ambalewa mafala ya Yahova yakuti: ‘Ndafungula kale mulomo wangu kuna Yahova, ndipo ndin’kwanisa lini kubwerera m’mbuyo.’ Kukhulupirika kwawo napo bzingadakhala bzakunesa kucita bzimwebzo bzidawacitisa kuti afunidwe na Mulungu acisimbidwa. Kodi mungadakhala ndimwepo mungadacitambo cakusankhula cibodzi-bodzici?

15. Kodi azinji wa ifepano timbapereka nsembe iponi, ndipo tingalatize tani kuti tina cikhulupiro?

¹⁵ Pomwe tidapereka moyo wathu kwa Yahova, tidalumbira kuti tingadacita kufuna kwace na moyo wense. Tikhadziwa kuti kukhala mwakubverana na piciro limweri kungadafuna kubzipereka. Na tenepo, kubzipereka kwathu kumbakhala pa mayezo tikakumbiridwa kucita bzinthu bzomwe tikhafuna lini. Tikambabzipereka mwa njira imweyi na kutumikira Mulungu mu njira yomwe tikhaidikhirira lini, timbalatiza cikhulupiro cathu. Bzisimbo bzomwe bzimbabwera mpsizinji kwene-kwene kuposa nsembe iri-yense yomwe tingacite, bzimwebzi bzingakhale bzakuwawa. (Malak. 3:10) Tsono tani pakulewa bza mwana wacikazi wa Djafeti?

16. Kodi mwana wa Djafeti adacita tani na lumbiro la baba wace? (Onani cithunzi-thunzi pa tsamba 5.)

¹⁶ Bzikhali lini bzakupusa kuti mwana wa Djafeti abvume bzakutewera bzomwe bzingadabwera thangwe ra lumbiro la baba wace. Bzimwebzi bzikhali  bzakusiyana na piciro la Ana, mwa kupereka mwana wace Samuweri kuti atumikire mu tendi la mkonkhano ninga m’Nazireu. (1 Sam. 1:11) M’nazireu akhali wakutsudzuka kulowola na kukhala na banja. Koma mwana wa Djafeti angadakhala ninga nsembe yakukwana yakupsereresa; iye akhafunika kusiya bzensenebzi. (Way. 11:37-40) Ninga mwana wa mkulu-mkulu na m’tsogoleri wa Jirayeri, iye angadalowodwa na mwamuna wabwino kwene-kwene m’dzikolo. Koma tsapano iye akhafunika kukhala mtumiki wa mu tendi la mkonkhano. Kodi mtsikanayu angadacita tani? Iye adalatiza kuti akhaikha Yahova pa mbuto yakuyamba mwa kulewa kuti: ‘Baba, penu imwepo mwafungula mulomo wanu pamaso pa Yahova, ndicitireni mwakubverana na bzomwe mwalumbira.’ (Way. 11:36) Iye adabvuma kuluza cikhumbo cace cakukhala na mwamuna na wana kuti apitise patsogolo kunamata kwa cadidi. Kodi tingatewezere tani kubzipereka kwaceku?

17. (a) Kodi tingatewezere tani cikhulupiro ca Djafeti na mwana wace? (b) Kodi mafala ya pa Wahebereu 6:10-12 yambakulimbisani tani kukhala wakubzipereka?

¹⁷ Maswaka mazinji yacikristau yacimuna ayai yacikazi njakufunisisa kuleka kukhala na banja ayai kukhala na wana—maka-maka pakali pano—kuti yatumikire Yahova mwakukwanira. Wanthu wacikulire angaperekembo nthawe yawo yomwe angadamala na wana na azukulu wawo kuti atumikire m’mautumiki ya basa la cimango ayai kugumanikambo pa Xikola ya Apalizi wa Umambo na kutumikira mu mbuto zomwe kulibe apalizi azinji wa Umambo. Winango ambasiya kumbali bzinthu bzawo kuti acitembo mbali pa basa la kugawira micemo pa nthawe ya Cikumbuso. Basa lakucitidwa na mtima wenseli limbabweresa cikondweso kuna Yahova, omwe an’dzayebwa lini basa lawo na lufoyi lawo. (Werengani Wahebereu 6:10-12.) Kodi mungacitembo bzimwebzi mwa kuthumizira kubzipereka kwanu kuti mucite utumiki bwa Yahova mwakukwanira?

18, 19. Kodi tingapfunze ciyani mu nkhani ya m’Bibliya yakulewa bza Djafeti na mwana wace wacikazi, ndipo kodi tingawatewezere tani?

¹⁸ Napo kuti moyo wa Djafeti ukhadadzala na bzineso, iye adabvuma kuti makumbukidwe ya Yahova yambatsogolere bzakusankhula pa moyo wace. Iye adalamba kupumpsika na bzinthu bza m’dziko pa nthawe yace. Bzinthu bzakukhumudwisa bzakucitisidwa na winango bziribe kutazisa kutsimikiza kwace kukhala wakukhulupirika. Kubzipereka kwace na kwa mwana wace wacikaziyo kudabweresa bzisimbo pakuti Yahova adawaphatisa basa pa kupitisa patsogolo kunamata kwakucena. Pomwe winango adasiya kuteweza mitemo ya Mulungu, Djafeti na mwana wace adaiphatisisa mitemoyo.

¹⁹ Bibliya linkutilimbisa kuti ‘tikhale anyakutewezera wale womwe mwa cikhulupiro na kupirira wadatambira mapiciro.’ (Waheb. 6:12) Tingakhale ninga Djafeti na mwana wace wacikazi mwa kukhala mwakubverana na nfundo ikulu yomwe idawonekera pa moyo wawo yakuti: Kukhulupirika kumbacitisa kuti munthu afunidwe na Mulungu.