1. Kodi timbabva tani tikambakumbukira mwayi omwe tidapasidwa wa kupemba kwa Yahova?

 YAHOVA omwe ni Mulengi wa kudzulu na dziko la pantsi adatipasa mphaso yabwino kwene-kwene. Iye adatipasa mwayi wa kumbalewalewa naye mu mpembo. Ndokumbukirani ibzi: Ifepano tingakwanise kulewalewa naye nthawe iri yentse, m’cirewedwe ciri-centse na pomwe tiri ku nyumba ya ulapi ayai m’kawoko. Ndipo tin’funika lini kuyamba kukumbira kuti ticite bzimwebzi. Tingapembe na citsimikizo centse cakuti Baba wathu walufoyi an’dzatitetekera. Ifepano timbatenda kwene-kwene mwayi omwe tidapasidwayu.

2. Kodi Mambo Davide adalatiza tani kuti akhalemekeza mwayi wa kucita mpembo?

² Mambo Davide akhalemekeza kwene-kwene mwayi wa kucita mpembo. Ndipopa iye adaimbira Yahova kuti: “Mpembo wangu ukhale cakufukiza kwa imwepo.” (Salimo 141:1, 2) Pa nthawe yomwe Davide adanemba mafalaya, cakufukiza cakununtcira comwe antsembe akhaciphatisa basa pa kunamata kwa cadidi cikhakonzedwa mwakamderekho. (Kufuluka 30:34, 35) Ndipopa, pomwe Davide adalewa mafalaya, akhafuna kulewa kuti iye akhafunika kuyamba kukumbukira bwino-bwino bzomwe angadauza Yahova mu mpembo, ninga momwe bzakufukiza bzakununtcira bzikhakonzedwera. Bzimwebzi ni bzomwe ifepano tin’funikambo kucita. Tikufuna kuti mipembo yathu imbakondwese Yahova.

3. Kodi n’ciyani comwe tin’funika kumbacita tikambapemba kwa Yahova, ndipo n’thangwe ranyi?

³ Tikambapemba kwa Yahova, tin’funika kumbalewalewa mwaulemu kwene-kwene. Kumbukirani bza masomphenya yakudabwisa yomwe mpolofeta Zaiya, Zakiyeri, Daniyeli na mpostolo Juwau adawona. N’cadidi kuti masomphenyaya yadasiyana, tsono iyo yadandendemerana pa cinthu cibodzi. Yentseneyo yambalatiza  kuti Yahova ni Mambo wakulemekezeka. Mpolofeta Zaiya “adawona Yahova ali pa mpando wace wakulemekezeka na wapadzaulu.” (Zaiya 6:1-3) Mpolofeta Zakiyeri adawona Yahova ali pa ngolo yace yakudzulu ndipo pomwe akhalipo “pakhayetima ninga . . . citaleza.” (Zakiyeri 1:26-28) Mpolofeta Daniyeli adawona “Wa ntsiku Zizinji” adabvala bzakubvala bzicena, ndipo m’mphepete mwa mpando wace mukhagaka moto. (Daniyeli 7:9, 10) Ndipo mpostolo Juwau adawona Yahova adakhala pa mpando wace wa umambo ndipo m’mphepete mwa mpandoyo mukhana citaleza comwe cikhana mawonekedwe ninga mwala wa Esmeralda. (Apokalipse 4:2-4) Tikambakumbukira ulemerero bukulu bomwe Yahova anabobu, ifepano timbakwanisa kuwona kuti ni mwayi ukulu kwene-kwene kulewalewa naye mu mpembo ndipo timbawonambo kufunika kwa kulewalewa naye mwaulemu. Tsono tin’funika kumbapemba tani?

4. Kodi tikupfunza ciyani na mafala yakuyambirira ya mpembo wakuyezezera wa Jezu wa pa Mateu 6:9, 10?

⁴ Werengani Mateu 6:9, 10. Pa Nkhani ya pa Phiri, Jezu adapfunzisa anyakupfunza wace bzomwe angacite pakupemba kuti akondwese Mulungu. Pomwe adamala kulewa mafala yakuti “mbapembani tenepa,” Jezu adalewa bzinthu bzakufunika bzomwe anyakupfunza wace akhafunika kumbalewa mu mpembo. Iye adalewa kuti iwo akhafunika kumbalewa bza kucenesedwa kwa dzina la Mulungu, kubwera kwa Umambo bwace, bomwe bun’dzapfudza anyamadulanthaka wa Mulungu na bzinthu bzabwino bzomwe Umambobo bun’dzacitira wanthu pa dziko la pantsi. Tikambaguma bzinthu bzimwebzi pomwe tikucita mipembo yathu, timbalatiza kuti bzomwe Mulungu akufuna mpsakufunika kwene-kwene kwa ifepano.

5. Kodi mpsakuthemera kukumbirambo bzomwe tikufuna mu mpembo?

⁵ Mu mbali yaciwiri ya mpemboyu, Jezu adalatiza kuti mpsakuthemera kukumbirambo bzinthu bzinango mu mpembo. Ifepano tingakumbire Yahova kuti atipase cakudya cathu ca ntsiku iri-yentse, atilekerere bzakuphonya bzathu, atikhotcerere kuti tireke kuyezedwa nakuti atipulumuse kwa nyakuipayo. (Mateu 6:11-13) Tikambakumbira Yahova bzinthu bzimwebzi, ifepano timbalatiza kuti timbamuthemba ndipo timbafuna kumukondwesa.

6. Kodi tin’funika kumbandopempherera bzinthu bzomwe bzafotokozedwa mu mpembo wakuyezezera ule basi? Fotokozani.

⁶ Pomwe Jezu adapfunzisa ateweri wace  kupemba, iye akhafuna lini kuti iwo ambafotokoze mafala ndendende ninga momwe iye adawapfunzisira. Thangwe ranyi tikulewa tenepoyo? Thangwe pa nthawe inango yomwe Jezu akhapemba iye adafotokoza bzinthu bzinango bzomwe bzikhamucitisa thupo, bzomwe alibe kubzifotokoza mu mpembo wakuyezezera ule. (Mateu 26:39, 42; Juwau 17:1-26) Mpsibodzi-bodzimbo na ifepano. Tikambapemba, tin’funika kufotokoza cinthu ciri-centse comwe cikuticitisa thupo. Tikafuna kucita cinthu, ifepano tingapembe kuti Mulungu atipase nzeru. (Salimo 119:33, 34) Ndipo tikafuna kucita basa lakunesa, tingapembe kuti Yahova atipase nzeru na kuzindikira. (Mimwani 2:6) Abereki angapempherere wana wawo, wana angapempherere abereki wawo ndipo tentsenefe tin’funika kupemphererambo anyakupfunza wathu wa Bibliya na wanthu omwe timbawapalizira. Tsono tin’funika lini kumbandocita mipembo ya kukumbira yokha-yokha.

7. Thangwe ranyi tin’funika kumbatumbiza Yahova tikambapemba?

⁷ Ifepano tin’funika kumbatumbiza Yahova tikambapemba. Palibe munthu munango omwe an’funika kutumbizidwa kwene-kwene kuposa Yahova Mulungu wathu. Iye ‘ngwabwino ndipo ngwakukonzeka kulekerera.’ Iye ‘ngwantsisi na wakudeka mtima, ambakalipa lini kamangu ndipo ngwakudzala na lufoyi lacadidi na kukhulupirika.’ (Salimo 86:5, 15) Yahova ambaticitira bzinthu bzizinji, ndipopa ifepano tin’funika kumbamutumbiza.

8. Kodi mpsiponi bzinthu bzinango bzomwe tingatende Yahova mu mpembo? (Salimo 104:12-15, 24)

⁸ Pana cinthu cinango pomwe comwe tin’funika kucita kuposa kundotumbiza Yahova basi. Pomwe tikupemba kwa iye, ifepano tin’funikambo kumbamutenda thangwe ra bzinthu bzentse bzomwe ambaticitira. Tingamutende thangwe ra maluwa yakudeka yomwe timbawona, bzakudya bzakukoma bzomwe tinabzo na axamwali wabwino omwe iye adatipasa. Yahova adatipasa bzinthu bzimwebzi na bzinango kuti tikhale na moyo wabwino. (Werengani Salimo 104:12-15, 24.) Ndipo tin’funikambo kumbamutenda kwene-kwene thangwe ra kutipasa malango yakucokera m’Bibliya yomwe yambatithandiza kukhala na cikhulupiro cakulimba na mwayi wa kudzakhala na moyo wabwino kutsogolo.

9. Kodi n’ciyani comwe cingambatithandize kumbakumbukira kutenda Yahova? (1 Atesalonika 5:17, 18)

⁹ Mpsakupusa kuyebwa kutenda bzinthu bzentse bzomwe Yahova ambaticitira. Tsono n’ciyani comwe cingatithandize kukumbukira? Imwepo  munganembe lista ya bzinthu bzomwe mudakumbira Yahova. Ndipo na kupita kwa nthawe onani kuti Yahova akutawirani tani. Mukamala mungapembe kwa Yahova kuti mumutende thangwe ra kukuthandizani. (Werengani 1 Atesalonika 5:17, 18.) Ifepano timbakomedwa kwene-kwene anzathu akambatitenda. Mpsibodzi-bodzimbo na Yahova. Iye ambakomedwambo ifepano tikambamutenda thangwe ra kutawira mipembo yathu. (Akolose 3:15) Tsono ciripo pomwe cinthu cinango cakufunika kwene-kwene comwe tin’funika kutenda Mulungu.

10. Thangwe ranyi tin’funika kutenda Yahova thangwe ra kutumiza Jezu pantsi pano? (1 Pedru 2:21)

¹⁰ Werengani 1 Pedru 2:21. Tin’funika kutenda Yahova thangwe rakuti adatumiza Mwana wace wakufunika kuti adzatipfunzise. Timbafika pakumudziwa bwino-bwino Yahova na kuwona bzomwe tingacite kuti timukondwese tikambapfunza moyo wa Jezu. Tikambakhulupira ntsembe ya cakulombolera ya Kristu, ifepano tingakhale pa uxamwali bwabwino na bwakulimba na Yahova. Ndipo tingakhalembo pa mtendere na iye. — Aroma 5:1.

11. Thangwe ranyi tin’funika kumbapemba m’dzina la Jezu?

¹¹ Ifepano timbatenda Yahova thangwe timbapemba kwa iye mu dzina la Mwana wace. Yahova ambaphatisa basa Jezu kuti atipase bzomwe takumbira. Ndipo iye ambatetekera na kutawira mipembo yomwe imbacitidwa mu dzina la Jezu. Jezu adalewa kuti: “Ciri-centse comwe mun’dzakumbira m’dzina langu, nin’dzacita cimweco, kuti Baba alemekezedwe thangwe ra Mwana.” — Juwau 14:13, 14.

12. Kodi ni cinthu cinango ciponi comwe cin’funika kuticitisa kutenda Yahova thangwe ra Mwana wace?

¹² Yahova ambalekerera pikado zathu mwakuphatisa basa ntsembe ya cakulombolera ya Jezu. Bibliya limbalewa kuti Jezu ni “mkulu wa antsembe [wathu omwe] . . . adakhala kumbali yamadidi ya mpando wa umambo wa Mulungu Mkululetu kudzulu.” (Ahebereu 8:1) Jezu ni “mthandizi [wathu] . . . omwe ali pabodzi na Baba.” (1 Juwau 2:1) Timbatenda kwene-kwene Yahova thangwe ra kutipasa Mkulu wa Antsembe omwe ambabvesesa kuwofoka kwathu ndipo “ambatikumbirira kwa Mulungu mwakutidandaulira.” (Aroma 8:34; Ahebereu 4:15) Ifepano ndife wanthu wakuperewera, ndipopa tingadakwanisa lini kulewalewa na Yahova mu mpembo pangadakhala palibe ntsembe ya cakulombolera ya Jezu. Ndipo tentsenefe tingakwanise lini kutenda bwino-bwino Yahova thangwe ra mphaso yakufunika kwene-kwene, yomwe ni Mwana wace!

13. Kodi Jezu adalatiza tani kuti akhafuna anyakupfunza wace pa usiku bwakumalizira bwa moyo wace?

¹³ Pa usiku bwakumalizira bwa moyo wace pantsi pano, Jezu adapempherera anyakupfunza wace. Ndipo adakumbira Baba wace kuti ‘awanyang’anire thangwe ra nyakuipayo.’ (Juwau 17:15) Bzimwebzi bzikulatiza kuti Jezu akhawafuna kwene-kwene anyakupfunza wacewo. Napo kuti akhadziwa kuti akhadasala pang’ono kuti agumane na mabvuto pa moyo wace, iye akhacita thupo na apostolo wace.

14. Kodi tingalatize tani kuti timbafuna abale na mpfumakazi zathu?

¹⁴ Ifepano timbatewezera Jezu mwa kuleka kumbandokumbukira bzomwe tikufuna basi. Koma timbakumbukirambo abale na mpfumakazi zathu mwa kumbawapempherera nthawe zentse. Tikambacita bzimwebzi, timbakhala tikuteweza lamulo la Jezu lakuti timbafunane ndipo pa nthawe ibodzi-bodziyo timbalatizambo kwa Yahova kuti timbafuna kwene-kwene Akristau anzathu. (Juwau 13:34) Kupempherera abale na mpfumakazi zathu n’kutaya lini nthawe. Fala la Mulungu limbatiuza kuti “mpembo wakudandaulira wa munthu wakulungama una mphanvu kwene-kwene.” — Tiyago 5:16.

15. Thangwe ranyi tin’funika kumbapempherera abale na mpfumakazi zathu?

 ¹⁵ Ifepano tin’funika kumbapempherera abale na mpfumakazi zathu thangwe iwo akugumana na mabvuto mazinji. Tingakumbire Yahova kuti awathandize kupirira matenda, malengwa ya pantsi, nkhondo, kuzunzidwa na mabvuto yanango. Ndipo tingapemphererembo abale na mpfumakazi omwe akucita nyongo kuti athandize abale omwe akugumana na mabvutowa. Penu tikudziwa madzina yawo, tingawagume m’mipembo yathu ya patekha. Timbalatiza kuti timbafuna abale wanthu tikambakumbira Yahova kuti awathandize kupirira.

16. Thangwe ranyi tin’funika kumbapempherera wale omwe ambatsogolera bzinthu mu gulu la Yahova?

¹⁶ Abale omwe ana udindo bwa kutsogolera m’gwere ambatenda kwene-kwene tikambawapempherera. Mpostolo Paulo akhadziwa kufunika kwa kucita bzimwebzi, ndipopa iye adanemba kuti: “Ndipemphererenimbo kuti ndikafuna kulewalewa, yandibwerere mafala yakuthemera kuti ndikwanise kulewalewa mwakukhwimika, pakudziwisa winango cintsintsi cakupambulika ca mafala yabwino.” (Aefezo 6:19) Ntsiku zino, tina abale azinji omwe ambatsogolera bzinthu mu gulu la Yahova. Ndipo ifepano timbalatiza kuti timbawafuna tikambakumbira Yahova kuti asimbe basa lawo.

17-18. Kodi ni pa nthawe ziponi zomwe tingakumbiridwe kuti tipempherere wanthu winango, ndipo n’ciyani comwe tin’funika kumbakumbukira?

¹⁷ Nthawe zinango ifepano tingakumbiridwe kuti tipempherere wanthu winango. Mpfumakazi yomwe ikucitisa pfunziro la Bibliya ingakumbire mpfumakazi yomwe ikuiperekeza kuti icite mpembo. Tsono mpfumakazi yomwe ikuperekezayo pinango ingamudziwe lini bwino-bwino munthu omwe an’funa kumupemphererayo. Ndipopa bzingakhale bwino kuti mpfumakaziyo icite mpembo wakumalizira, thangwe ingakhale na mpata wakudziwa bwino bzomwe ingalewe mu mpembo pakupempherera nyakupfunzayo.

¹⁸ M’bale angakumbiridwe kuti acite mpembo pa mtsonkhano wa utumiki bwa kumunda ayai pa mtsonkhano wa gwere. Abale omwe ana mwayi wa kucita mipembo pa mitsonkhano, an’funika kumbakumbukira cakulinga ca mitsonkhanoyo. Iwo an’funika lini kuphatisa basa mpemboyo kuti apereke malango ku gwere ayai kuti apereke bzidziwiso. Kazinji-kazinji bzimbadikhiririka kuti nyimbo na mpembo bzimale mphindi zixanu.  Ndipopa m’bale omwe akucita mpembo an’funika lini kulewalewa “mafala mazinji,” maka-maka kumayambiriro kwa mitsonkhano. — Mateu 6:7.

19. Kodi n’ciyani cin’dzatithandiza kuti ntsiku ya Yahova idzatigumane tidakonzeka?

¹⁹ Ifepano tin’funika kumbawona mpembo kukhala cinthu cakufunika kwene-kwene pa moyo wathu, maka-maka pomwe ntsiku ya Yahova ikufendera. Pa nkhani imweyi, Jezu adati: “Pitirizani kukhala tceru ndipo mbapembani mwakudandaula nthawe zentse kuti mudzapulumuke bzinthu bzentsebzi bzikadzacitika.” (Luka 21:36) Inde, kupemba kawiri-kawiri kun’dzatithandiza kuti tipitirize kukhala wakupenya mwauzimu kuti ntsiku ya Mulungu idzatigumane tidakonzeka.

20. Kodi tingacite tani kuti mipembo yathu ikhale ninga bzakufukiza bzakununtcirisa?

²⁰ Kodi tapfunza ciyani mu nkhani yathuyi? Ifepano tapfunza kuti tin’funika kumbatenda kwene-kwene mwayi omwe tinawo wa kupemba. Tawona kuti cinthu cakufunika kwene-kwene comwe tin’funika kumbacipempherera n’cakuti bzomwe Yahova akufuna bzicitike. Ndipo tawona kuti tin’funikambo kumbatenda Mulungu thangwe ra kutitumizira Mwana wace na Umambo bomwe bukutonga. Tawonambo kuti tin’funika kumbapempherera abale na mpfumakazi zathu nakuti tingapembe kwa Mulungu kuti atithandize pa moyo wathu na mwauzimu. Tikambakumbukira bwino-bwino bzomwe tin’funa kulewa pomwe tikanati kucita mpembo, timbalatiza kuti timbatenda kwene-kwene mwayi omwe tinawoyu. Tikacita bzimwebzi, mafala yathu yan’dzakhala ninga bzakufukiza bzakununtcirisa kwa Yahova, thangwe ‘yan’dzamudekera.’ — Mimwani 15:8.