1. Kodi cakulinga ca Yahova n’ciponi ntsiku zino?

 NTSIKU zino, cakulinga ca Mulungu n’cakuti mafala yabwino ya Umambo yapaliziridwe pa dziko lentse la pantsi. (Marko 13:10; 1 Timotio 2:3, 4) Basa limweri nda Yahova ndipo iye adalipereka m’manja mwa Mwana wace wapamtima kuti alitsogolere. Pakuti basali likutsogoleredwa na Jezu, ifepano tingatsimikizire kuti lin’dzamalizidwa pa nthawe yomwe Yahova akufuna kuti limale, pomwe dzikoli likanati kumala. — Mateu 24:14.

2. Kodi tin’pfunza ciyani mu nkhani ino?

² Mu nkhani ino, tiniwona momwe Jezu akuphatisira basa “kapolo wakukhulupirika na wanzeru” kuti apereke malango yakucokera m’Bibliya kwa ateweri wace kuti iwo akwanise kucita basa lakufunika kwene-kwene la kupalizira. (Mateu 24:45) Ndipo tiniwonambo momwe ali-wentse wa ifepano angathandizire Jezu na kapolo wakukhulupirikayu.

3. Kodi ni udindo buponi bomwe Jezu adapasidwa?

³ Jezu akutsogolera basa la kupalizira. Thangwe ranyi tikulewa tenepoyo? Pomwe Jezu akhadasala pang’ono kuyenda kudzulu, adatsonkhana na ateweri wace winango wakukhulupirika pa phiri linango ku Galileya. Iye adawauza kuti: “Ndapasidwa utongi bwentse, kudzulu na pa dziko la pantsi.” Onani bzomwe iye adalewa patsogolo pace. Iye adati: “Ndokoni, ndipo kapfunziseni wanthu wa mitundu yentse kuti akhale anyakupfunza wangu.” (Mateu 28:18, 19) Mafala yamweya yakulatiza kuti Jezu adapasidwa utongi bwentse kuti atsogolere basa la kupalizira.

4. Thangwe ranyi tingalewe kuti Jezu akadatsogolera basa la kupalizira?

 ⁴ Jezu adalewa kuti basa la kupalizira na kupfunzisa wanthu lingadadzacitika kwa “wanthu wa mitundu yentse” ndipo iye adalewambo kuti an’dzakhala pabodzi na ateweri wace “ntsiku zentse mpaka kuphampha kwa dzikoli.” (Mateu 28:20) Mafalaya yakulatiza kuti Jezu akupitiriza kutsogolera basa la kupalizirali ntsiku zino.

5. Kodi tikuthandizira tani polofesiya ya pa Salimo 110:3 kuti ikwanisike?

⁵ Jezu akhacita lini thupo kuti pinango ni wanthu ang’ono-ng’ono omwe angadadzacita basa la kupalizira kuphampha kwa dzikoli. Iye akhadziwa kuti polofesiya ya pa Salimo ingadadzakwanisika. Polofesiyayi imbati: “Wanthu wako an’dzabzipereka mwakufunisisa pa ntsiku yomwe un’dzatsogolera acikunda wako ku nkhondo.” (Salimo 110:3) Penu imwepo mukucitambo basa la kupalizira, ndiye kuti mukuthandizira Jezu na kapolo wakukhulupirika ndipo mukuthandizirambo kuti polofesiyayi ikwanisike. Basali likufamba bwino, tsono pana mphitca zinango.

6. Kodi apalizi wa Umambo akugumana na mphitca iponi ntsiku zino?

⁶ Mphitca ibodzi yomwe apalizi wa Umambo ambagumana nayo ni kugazidwa. Apanduki, atsogoleri wa magereja na wanthu wa ndale ambauza wanthu bzinthu bzakunama pakulewa bza basa lathu. Adzinza wathu, anzathu wa ku basa na wanthu winango omwe timbawadziwa akabva mafala yakunamaya, iwo angacite ciri-centse kuti aticitise kusiya kutumikira Yahova na kupalizira. M’madziko manango, abale wathu ambagopswedwa, kumangidwa na kuikhidwa m’kawoko. Bzimwebzi bzikambaticitikira, ifepano timbadabwa lini. Thangwe ranyi? Thangwe Jezu adati: “Mun’dzawengedwa na mitundu yentse ya wanthu thangwe ra dzina langu.” (Mateu 24:9) Wanthu akambatiwenga bzimbalatiza kuti Yahova akukomedwa nafe. (Mateu 5:11, 12) Dyabu ndiye akucitisa bzentsenebzi. Tsono Jezu ana mphanvu kwene-kwene kuposa iye! Ndipopa, mwakuthandizidwa na Jezuyo, mafala yabwino ya Umambo yakufikira wanthu wa mitundu yentse. Mbatiwoneni umboni bwakulatiza kuti bzimwebzi mpsacadidi.

7. Kodi n’ciyani cikulatiza kuti mafala ya pa Apokalipse 14:6, 7 yakukwanisika?

⁷ Mphitca inango yomwe apalizi wa Umambo akugumana nayo, njakuti wanthu omwe ambawapalizira ambalewalewa bzirewedwe bzakusiyana-siyana. Tsono Jezu adauza mpostolo Juwau m’masomphenya kuti mu ntsiku zakumalizira mafala yabwino yangadadzapaliziridwa mu bzirewedwe bzentse. (Werengani Apokalipse 14:6, 7.) Kodi bzimwebzi bzikucitikadi? Inde. Ifepano tikupereka mwayi kuna wanthu azinji kuti abve na kubvuma mafala ya Umambo. Ntsiku zino, wanthu pa dziko lentse la pantsi ambawerenga nkhani zakucokera m’Bibliya pa webisaite yathu ya jw.org thangwe iyo ina nkhani mu bzirewedwe bzakupitirira 1000! Bungwe Lakutonga lidabvumiza kuti bukhu lomwe timbaliphatisa basa pa kupfunzisa wanthu, lakuti Khalani na Moyo Wakukondwa Mpaka Kale-kale!, lisanduliziridwe mu bzirewedwe bzakupitirira 700. Ndipo yambakonzedwambo mabukhu na mavidiyo ya ankhuthu na azimola. Bzentsenebzi bzikulatiza kuti mapolofesiya ya m’Bibliya yakukwanisika. Wanthu ‘wa bzirewedwe bzentse’ akupfunza kulewalewa “cirewedwe cakucena” comwe ni cadidi ca m’Bibliya. (Zakariya 8:23; Sofoniya 3:9) Bzentsenebzi bzikukwanisika thangwe rakuti Jezu Kristu ndiye omwe akutitsogolera.

8. Kodi ni bzinthu bziponi bzabwino bzomwe bzikukwanisika thangwe ra basa lathu la kupalizira?

⁸ Ntsiku zino, wanthu wakupitirira mamidyau 8 m’madziko yakukwana 240 akucita mbali ya gulu la Yahova ndipo gole liri-lentse wanthu wakupitirira 10 000 ambabatizidwa! Tsono cinthu cakufunika kwene-kwene ni kuwanda lini kwa wanthuwo, koma ni makhalidwe yacikristau yomwe iwo adayapfunza ndipo ambayalatiza,  komwe ni kubvala “unthu bupsa.” (Akolose 3:8-10) Iwo adasiya kucita bzinthu bza upombo, ndewo, ukambowa, tsankhulo na kucita bzinthu bzakulatiza kuti ambafuna kwene-kwene dziko lawo. Polofesiya yakunembedwa pa Zaiya 2:4 ikukwanisika thangwe iwo ‘akupfunza lini pomwe nkhondo.’ Tikambacita nyongo yakulatiza makhalidwe yabwino, timbacitisa kuti wanthu abwere mu gulu la Mulungu ndipo timbalatiza kuti tikutewera mtsogoleri wathu Kristu Jezu. (Juwau 13:35; 1 Pedru 2:12) Thangwe ranyi bzimwebzi bzikukwanisika? Bzimwebzi bzikukwanisika thangwe rakuti Jezu akutipasa bzomwe tikufunikira kuti tikwanise kulatiza makhalidwe yabwino.

9. Kodi Jezu adalewa kuti n’ciyani cingadadzacitika mu ntsiku zakumalizira? (Mateu 24:45-47)

⁹ Werengani Mateu 24:45-47. Jezu adalewa kuti mu ntsiku zakumalizira, iye angadadzaikha “kapolo wakukhulupirika na wanzeru” kuti apereke cakudya cauzimu kuna wanthu wa Yahova. Ndipopa timbatsimikizira kuti kapolo umweyu an’phata basa na nyongo ntsiku zino; ndipo ndibzo bzomwe bzikucitika. Mtsogoleri wathu Jezu Kristu akuphatisa basa kathimu kang’ono ka amuna wakudzozedwawa kuti kapereke “cakudya [cauzimu] pa nthawe yakuthemera” kuna wanthu wa Mulungu na kuna wanthu winango omwe akufuna kudziwa bzizinji bza m’Bibliya. Amuna amwewa ambatonga lini cikhulupiro ca wanthu winango. (2 Akolinto 1:24) Thangwe iwo ambadziwa kuti Jezu Kristu ndiye “mtsogoleri” wa wanthu wa Mulungu. — Zaiya 55:4.

10. Pa mabukhu yomwe yakulatizidwa mu bzithunzi-thunziya, kodi ni bukhu liponi lomwe lidakuthandizani kuyamba kutumikira Yahova?

¹⁰ Kuyambira mu 1919, kapolo wakukhulupirika akukonza mabukhu yakusiyana-siyana yomwe yambapereka mwayi kwa wanthu kuti apfunze cadidi kucokera m’Fala la Mulungu. Mu 1921, kapolo umweyu adakonza bukhu lakuti Zeze wa Mulungu kuti lithandize wanthu kudziwa bzizinji  bza m’Bibliya. Pomwe magole yakhapita, mabukhu manango yadakonzedwambo kuti yathandize wanthu kupfunza Bibliya. Kodi ni bukhu liponi lomwe lidakuthandizani kudziwa na kufuna Baba wathu wa kudzulu? Kodi likhali bukhu lakuti “Mulungu Akhale Oona,” Coonadi Cimene Cimatsogolera ku Moyo Wamuyaya, Mungathe Kukhala ndi Moyo Kosatha m’Paradaiso pa Dziko Lapansi, Chidziŵitso Chotsogolera ku Moyo Wosatha, Kodi Bibliya Limbapfunzisa Ciyani Maka-maka?, Bzomwe Bibliya Limbapfunzisa, ayai bukhu lakuti Khalani na Moyo Wakukondwa Mpaka Kale-kale!, lomwe lakonzedwa tsapanopa? Mabukhu yentseya yadakonzedwa kuti yatithandize kupfunzisa wanthu. Ndipo bukhu liri-lentse lidakonzedwa pa nthawe yomwe tikhafunikira mtundu umweyo wa bukhu.

11. Thangwe ranyi tentsenefe tin’funika kucita nyongo kuti timudziwe bwino Yahova na Bibliya?

¹¹ Wanthu omwe ayamba kutumikira Yahova tsapanopa, ndiwo lini okha omwe an’funika kucita nyongo kuti amudziwe bwino Yahova na Bibliya. Tentsenefe tin’funikambo kucita nyongo. Mpostolo Paulo adanemba kuti: “Cakudya cakulimba n’ca wale omwe ana cikhulupiro cakulimba.” Paulo adalewa pomwe kuti kuphatisa basa bzomwe timbapfunza m’Bibliya kungatithandize “kusiyanisa cabwino na cakuipa.” (Ahebereu 5:14) Ntsiku zino, mpsakunesa kukhala na makhalidwe yabwino thangwe rakuti wanthu azinji ambaphatisa lini basa mitemo ya Yahova pa moyo wawo. Tsono Jezu ambacita ciri-centse kuti bzomwe timbapfunza bziticitise kukhala na cikhulupiro cakulimba. Bzomwe timbapfunzabzo bzimbacokera m’Fala la Mulungu, Bibliya. Kapolo wakukhulupirika, mwakutsogoleredwa na Jezu, ambakonza na kupereka cakudya cimweci cauzimu.

12. Kodi timbatewezera tani Jezu pakulemekeza dzina la Mulungu?

¹² Ninga Jezu, ifepano timbalemekeza dzina la Mulungu. (Juwau 17:6, 26) Mu 1931, ifepano tidayamba kudziwika na dzina la m’Bibliya lakuti Mboni za Yahova. Mwakucita bzimwebzi, tidalatiza kuti dzina la Mulungu ndakufunika  kwene-kwene kwa Baba wathu wa kudzulu. (Zaiya 43:10-12) Kuyambira m’mwezi wa Outubro m’gole limwelire, dzina la Mulungu lidayamba kumbabwera pa kapa ya revista iri-yentse ya Ntsanza ya Mulindiri. Ndipo Bibliya la Dziko Lipsa lidabwezeresa dzina la Mulungu m’mbuto zentse zomwe likhadacosedwa. Bzimwebzi mpsakusiyana kwene-kwene na bzomwe magereja yacikristau yadacita. Iyo yadacosa dzina la Mulungu m’Mabibliya yawo!

13. Kodi n’ciyani cimbakutsimikizirani kuti Jezu akuphatisa basa “kapolo wakukhulupirika na wanzeru” ntsiku zino? (Juwau 6:68)

¹³ Mwakuphatisa basa “kapolo wakukhulupirika na wanzeru,” Jezu akukonzekeresa gulu lakuwoneka na maso pa dziko la pantsi kuti wanthu anamate Mulungu mwacadidi. Kodi imwepo mumbaliwona tani gulu limweri? Pakutawira, pinango mwakumbukira mafala ya mpostolo Pedru, omwe adauza Jezu kuti: “Kodi tiniyenda kuna yani? Imwepo ndimwe muna mafala ya moyo wakusaya kumala.” (Juwau 6:68) Kodi ifepano tingadakhala tiri kuponi tingadasaya kukhala m’gulu la Yahova? Mwakuphatisa basa gululi, Kristu akucita ciri-centse kuti tipasidwe cakudya cauzimu cakukwana bwino kuti tipitirize kukhala wakukhulupirika kwa Mulungu. Iye ambatipfunzisa kuti tikwanise kucita bwino basa lathu la kupalizira. Ndipo ambatithandizambo kubvala “unthu bupsa,” kuti tikondwese Yahova. — Aefezo 4:24.

14. Kodi mwagumana phindu liponi thangwe ra kucita mbali ya gulu la Yahova pa nthawe ya matenda ya COVID-19?

¹⁴ Jezu ambatipasa malango yanzeru pa nthawe zakunesa. Phindu la malangoya lidawonekera pa nthawe yomwe matenda ya COVID-19 yadayambika. Pomwe wanthu azinji m’dzikoli akhasaya muti wakuphata, Jezu adacita ciri-centse kuti tipasidwe malango yakubveka bwino yomwe yangadatithandiza kukhala wakukhotcerereka. Tidauzidwa kuti timbabvale maskra tikafuna kucoka  pamui nakuti timbakhale patali na patali na wanthu winango. Akulu adauzidwa kuti ambaligariri abale wa m’gwere mwawo kawiri-kawiri kuti adziwe kuti moyo wawo uli tani ndipo bzinthu bzikuwafambira tani pakutumikira Yahova. (Zaiya 32:1, 2) Ndipo tidatambirambo malango manango na kulimbikisidwa na nkhani zipsa za Bungwe Lakutonga.

15. Kodi tidauzidwa kuti timbacite tani mitsonkhano na upalizi, ndipo tidakhala na phindu liponi?

¹⁵ Pa nthawe ya matendaya, tidatambirambo malango yakubveka bwino ya momwe tingacitire mitsonkhano ya gwere na kucita basa la kupalizira. Ndipo mwakusaya kucedwa, tidayamba kucita mitsonkhano ya gwere, mitsonkhano ya dera na mitsonkhano ya cigawo mwakuphatisa basa videoconferência. Ndipo tidayambambo kucita upalizi mwakucita kumbanemba matsamba na telefoni. Yahova adasimba nyongo yathu. Marelatoriyo ya mthambi zizinji yadalatiza kuti mbogo ya apalizi idathimizirika. Ndipo apalizi azinji adafotokoza bzinthu bzakulimbikisa bzomwe adagumana nabzo pomwe akhacita basa la kupalizira pa nthawe ya matendaya. — Onani kwadru yakuti  “Yahova Akusimba Basa Lathu la Kupalizira.”

16. Kodi n’ciyani comwe tin’funika kutsimikizira?

¹⁶ Wanthu winango akhawona ninga kuti gulu la Mulungu likhakhwimisa malamulo pomwe likhafotokoza bzomwe tikhafunika kucita pa nthawe ya matendaya. Tsono pomwe malangoyo yakhaperekedwa, bzikhadzawoneka kuti nganzeru. (Mateu 11:19) Ndipo tikambakumbukira momwe Jezu akutsogolerera wanthu wace mwalufoyi, ifepano timbakhala na citsimikizo cakuti bziribe basa bzomwe bzingadzaticitikire kutsogoloku, Yahova na Mwana wace Jezu an’dzakhala nafe. — Werengani Ahebereu 13:5, 6.

17. Kodi imwepo mumbabva tani thangwe ra kutsogoleredwa na Jezu?

¹⁷ Ifepano timbakomedwa kwene-kwene kudziwa kuti Jezu ni mtsogoleri wathu! Timbakomedwa kucita mbali ya gulu lomwe liribe kugawanika thangwe ra kusiyana bzikhalidwe, madziko ayai bzirewedwe. Tentse timbapasidwa malango kucokera m’Fala la Mulungu ndipo timbapfunzisidwa momwe tingacitire basa lathu la kupalizira. Ndipo timbapfunzisidwambo momwe tingabvalire unthu bupsa na momwe tingalatizire lufoyi kuna anzathu. Kulewa cadidi, ifepano tin’funikadi kukhala wakukondwa thangwe ra kutsogoleredwa na Jezu!