Jezu adapfunzisa wanthu kuti ambakhale pa mtendere na anzawo. Tsono pa nthawe inango, iye adauza apostolo wace kuti: “Lekani kukumbuka kuti ndabweresa mtendere pa dziko la pantsi pano; ine ndiribe kubweresa mtendere, koma xipada. Pakuti ndabwera kudzacitisa mgawano pakati pa mwana wacimuna na pai wace, mwana wacikazi na mai wace, mulowola na amibzala wace wacikazi.” (Mateu 10:34, 35) Kodi Jezu akhafuna kulewanyi na mafala yamweya?

Jezu akhafuna kuti wanthu ambabverane pa ubale bwawo. Tsono iye akhadziwa kuti bzomwe akhapfunzisa bzingadacitisa kuti m’mii inango wanthu aleke kubverana. Ndipopa wanthu omwe an’funa kukhala anyakupfunza wa Kristu na kubatizidwa, an’funika kudziwiratu kuti nthawe zinango wanthu wa pa mui pawo angakomedwe lini na bzomwe iwo akufuna kucitabzo. Nthawe zinango, mwamuna ayai mkazi wawo ayai wanthu winango wa m’banja mwawo angawaletse kunamata Yahova ndipo bzimwebzi bzingawacitise kuneseka kupitiriza kuteweza bzomwe Kristu adapfunzisa.

Bibliya limbalimbikisa Akristau wentse kuti ‘akhale pa mtendere na wanthu wentse.’ (Aroma 12:18) Tsono bzomwe Jezu adapfunzisa bzingakhale ninga “xipada” m’mii inango. Comwe cimbanyosa nzou pa mthunzi n’cakuti m’bodzi wa pa banjapo abvuma kuteweza bzomwe Kristu adapfunzisa pomwe winango akulamba ayai akugaza. Bzimwebzi bzikacitika, omwe akulambawo, ambabzicitisa kukhala “anyamadulanthaka” wa ule omwe apfunza cadidi. — Mateu 10:36.

Nyakupfunza wa Kristu omwe ambakhala pa mui pomwe wanthu winango ambayenda ku gereja inango, nthawe zinango an’dzafunika kusankhula penu an’funa kukondwesa Yahova na Jezu ayai adzinza wace. Adzinza wa Mkristau omwe ni mtumiki wa Yahova, pinango angayezere kumungingimiza kuti acite nawo mafesta ya gereja yawo. Bzimwebzi bzikacitika, kodi iye an’funika kukondwesa mbani? Jezu adati: “Ali-wentse omwe ambafuna kwene-kwene babace ayai mai wace kuposa ine, an’themera lini kukhala nyakupfunza wangu.” (Mateu 10:37) N’cadidi kuti Jezu akhafuna lini kulewa kuti munthu akayamba kupfunza cadidi an’funika kusiya kufuna abereki wace. Koma akhafuna kupfunzisa bzomwe munthu angacite kuti awone cinthu cakufunika kwene-kwene pa moyo wace. Penu adzinza wathu akupitiriza kutiphingiza kunamata Yahova, ifepano tin’pitiriza kuwafuna, tsono timbadziwa kuti tin’funika kufuna kwene-kwene Mulungu kuposa iwo.

Adzinza wathu akambatinyoza bzimbatiwawa kwene-kwene. Tsono anyakupfunza wa Jezu an’funika kukumbukira mafala aya: “Ali-wentse omwe an’lamba muti wace wakuzunzidwira na kunditewera, an’themera lini kukhala nyakupfunza wangu.” (Mateu 10:38) Kulewa kunango tingati, Akristau an’funika kuwona kuti kunyozedwa na adzinza wawo ni mbali ya mabvuto yomwe Akristau an’funika kugumana nayo na kuyapirira. Ndipo pa nthawe ibodzi-bodziyo, iwo an’funikambo kukhulupira kuti makhalidwe yawo yabwino yangathandize adzinza wawo omwe ni Mboni lini za Yahova kucinja nzeru zawo aciyamba kupfunza Bibliya. — 1 Pedru 3:1, 2.