NKHANI YAKUPFUNZA 26
Kodi Mungakwanise Kupfunzisa Wanthu Acikhala Anyakupfunza?
‘Mulungu . . . [ambakupasani] mphanvu na cikhumbo kuti mucite bzomwe iye akufuna.’—WAFIRIPO 2:13.
NYIMBO 64 Kuphata Basa la Kubvuna Mwakukondwa
BZOMWE TIN’PFUNZA *
1. Kodi Yahova adakucitirani ciyani?
KODI imwepo mudakhala tani Mboni ya Yahova? Pinango pentse mudabva ‘bzipsa bzabwino’ na abereki wanu, mwanzanu wa ku basa, wa ku xikola, avizinyu wanu, ayai na upalizi bwa mui na mui bomwe Mboni za Yahova zimbacita. (Marko 13:10) Ndipo, munthu adapambula nthawe yace na mphanvu zace kuti akupfunziseni Bibliya. Ndipo pakupfunzapo, imwepo mudafika pakufuna Yahova ndipo mudapfunza kuti iye ambakufunani. Yahova adakukwewerani mu cadidi ndipo tsapano ndimwe nyakupfunza wa Jezu Kristu ndipo mukudikhirira kudzakhala na moyo wakusaya kumala kutsogolo. (Juwau 6:44) Kulewa cadidi, imwepo mumbatenda kwene-kwene Yahova thangwe rakuti iye adaphatisa basa munthu kuti akupfunziseni cadidi, ndipo adabvuma kuti mukhale m’bodzi wa atumiki wace.
2. Kodi mu nkhani ino tin’cezerana ciyani?
2 Tsapano ifepano timbadziwa cadidi ndipo tina mwayi wakuthandizambo wanthu winango kuti afambe nafe pa mseu omwe ukuyenda ku moyo. Ifepano bzingatipusire kupalizira mui na mui, tsono bzingatinese kuyambisa na kucitisa mapfunziro ya Bibliya. Kodi imwepo mumbabzibvambo tenepo? Penu mun’ti inde, mu nkhani ino mun’gumana njira zomwe zingakuthandizeni kwene-kwene. Tin’cezerana bzomwe bzimbaticitisa kuthandizira pa basa lakupfunzisa wanthu. Ndipo tin’cezeranambo momwe tingakundire mabvuto yomwe yangaticitise kuzeza kucitisa pfunziro la Bibliya. Cakuyamba, mbatiwoneni thangwe race ifepano tin’funika lini kundokhala apalizi, koma tin’funikambo kukhala apfunzisi wa bzipsa bzabwino.
JEZU ADATIUZA KUTI TIPALIZIRE NA KUPFUNZISA
3. Thangwe ranyi ifepano timbapalizira?
3 Pomwe Jezu akhali pa dziko la pantsi, iye adauza ateweri wace kuti acite mabasa mawiri yakusiyana. Basa lakuyamba, iye adawauza kuti apalizire bzipsa bzabwino bza Umambo ndipo adawalatiza momwe angacitire bzimwebzi. (Mateu 10:7; Luka 8:1) Pa bzinthu bzinango bzomwe Jezu adalewa, iye adauza anyakupfunza wace bzomwe angadacita penu wanthu angadalamba ayai kubvuma bzipsa bzabwino bza Umambo. (Luka 9:2-5) Iye adafotokozambo kuti anyakupfunza wace angadadzapalizira wanthu azinji na mbuto zizinji, pomwe adalewa kuti iwo an’dzacitira ‘umboni kwa mitundu yentse.’ (Mateu 24:14; Mabasa 1:8) Bziribe basa penu wanthu angadadzabvuma ayai ne, Jezu adauza anyakupfunza wace kuti apalizire bza Umambo bwa Mulungu na bzomwe Umambobo bun’dzacita kutsogolo.
4. Mwakubverana na Mateu 28:18-20, kuthimizira pa basa lakupalizira bza Umambo, kodi n’ciyani cinango comwe tin’funika kucita?
4 Kodi ndiponi basa laciwiri lomwe Jezu adapasa anyakupfunza wace? Iye adawauza kuti apfunzise wanthu azinji kubvera bzinthu bzentse bzomwe iye adalewa. Kodi Jezu akhafuna kuti basa lakupalizira na kupfunzisa wanthu licitike pa nthawe imweyire basi, ninga momwe wanthu winango ambakumbukirira? Ne n’tenepo lini. Jezu adalatiza kuti basa lakufunikali lingadadzapitiriza kucitika mu nthawe yathu ino ‘mpaka kuphampha kwa dziko lino.’ (Werengani Mateu 28:18-20. *) Pinango pentse Jezu adalewa mafalaya pomwe adawonekera kuna anyakupfunza wace wakupitirira 500. (1 Wakolinto 15:6) Ndipo mu bukhu la Cibvumbulutso, Jezu adathandiza Juwau kubvesesa kuti akufuna kuti anyakupfunza wace athandizembo wanthu winango kuti apfunze bza Yahova.—Cibvumbulutso 22:17.
5. Mwakubverana na 1 Wakolinto 3:6-9, kodi Paulo adalewa ciyani kuti atithandize kubvesesa kubverana komwe kulipo pakati pakupalizira na kupfunzisa?
5 Mpostolo Paulo adandendemezera basa lakupfunzisa wanthu na basa la kulima mbeu. Bzomwe bzikufuna kulewa kuti ifepano tin’funika kucita bzizinji sikuti kundobzala mbeu basi. Iye adakumbusa Akolinto kuti: ‘Ine ndidabzala, Apolo adathirizira . . . Imwepo ndimwe munda wa Mulungu omwe ukulimidwa.’ (Werengani 1 Wakolinto 3:6-9. *) Ninga alimi wa ‘munda wa Mulungu,’ ifepano timbandobzala lini mbeu koma timbazithirizira na kuwona momwe mbeuzo zikukulira. (Juwau 4:35) Ndipo nthawe ibodzi-bodziyo ifepano timbadziwa kuti ni Mulungu omwe ambakulisa mbeuzo.
6. Kodi basa lathu lakupfunzisa limbaphatanidza ciyani?
6 Ifepano tikunyang’ana wanthu omwe ana ‘makumbukidwe yabwino yomwe [yangawathandize] kukagumana moyo wakusaya kumala.’ (Mabasa 13:48) Kuti tithandize wanthu kuti akhale anyakupfunza, ifepano tin’funika kuwathandiza (1) kubvesesa, (2) kubvuma, na (3) kuphatisa basa bzinthu bzomwe akupfunza m’Bibliya. (Juwau 17:3; Wakoloso 2:6, 7; 1 Watesalonika 2:13) Wentse m’gwere angathandize anyakupfunza wa Bibliya mwakuwalatiza lufoyi na kuwatambira na manja mawiri pomwe iwo akubwera pa mitsonkhano. (Juwau 13:35) Omwe akucitisa pfunziro la Bibliya an’funika kumala nthawe izinji akuthandiza nyakupfunza wace wa Bibliya kuti asiye makhalidwe yakuipa, ayai bzinthu bzomwe ambakhulupira, bzomwe ‘bzamera mizi’ mu mtima mwace. (2 Wakolinto 10:4, 5) Pangatenge minyezi mizinji kuti tithandize munthu kucita bzimwebzi pa moyo wace acifika pa kubatizidwa. Tsono munthuyo akacinja ambagumana phindu.
TIMBAPFUNZISA WANTHU THANGWE RA LUFOYI
7. Thangwe ranyi timbapalizira na kupfunzisa wanthu kuti akhale anyakupfunza?
7 Thangwe ranyi ifepano timbapalizira na kupfunzisa wanthu kuti akhale anyakupfunza? Cakuyamba, ni thangwe rakuti timbafuna Yahova. Imwepo mukambacita nyongo kuti mubvere lamulo lakupalizira na kupfunzisa wanthu, mumbakhala mukulatiza kuti mumbafuna Mulungu. (1 Juwau 5:3) Kumbukirani ibzi: Lufoyi lanu kwa Yahova lidakucitisani kuti mumbapalizire mui na mui. Kodi bzidakupusirani kubvera lamuloli? Pinango pentse ne. Tani pomwe mudapalizira nyumba yakuyamba, kodi mudatetemera na mantha? Tikupenukira lini kuti mudatetemeradi. Tsono mudadziwa kuti limweri ni basa lomwe Jezu akufuna kuti mucite, ndipo mudabvera lamulolo. Ndipo na kupita kwa nthawe, bzidakhala bzakupusa kucita basa lakupalizira. Tsono tani pakulewa bza kucitisa pfunziro la Bibliya? Kodi mumbacita mantha mukambakumbukira bzimwebzi? Pinango pentse. Tsono mukapemba kwa Yahova kuti akuthandizeni kukhala wakukhwimika na kugumana munthu kuti mumucitise pfunziro, iye an’dzakuthandizani kufuna kukhala na anyakupfunza.
8. Mwakubverana na Marko 6:34, kodi ndiponi thangwe linango lomwe limbaticitisa kuti tipfunzise wanthu?
8 Caciwiri, kufuna wanthu kumbaticitisa kuwapfunzisa cadidi ca m’Bibliya. Pa nthawe inango, Jezu na anyakupfunza wace akhadaneta thangwe ra kupalizira kwene-kwene. Iwo adayenda ku mbuto inango kuti akapume, tsono pomwe adafika ku mbutoko thimu la wanthu likhali kale kumweko. Thangwe ra ntsisi, Jezu adayamba kuwapfunzisa wanthuwo ‘bzinthu bzizinji.’ (Werengani Marko 6:34. *) Iye adaphata basa na nyongo napo kuti akhadaneta. Thangwe ranyi? Thangwe Jezu akhadziwa momwe wanthuwo akhabvera. Iye adawona kubonera komwe wanthuwo akhacita, na mtsangalazo omwe wanthuwo akhafuna, tenepo iye akhafunisisa kuwathandiza. Umu ni momwe wanthu ntsiku zino aliri. Lekani kukumbuka kuti bzinthu bzikuwafambira bwino pa moyo wawo. Iwo ali ninga mabira yomwe yadzungaira, yomwe yalibe makabusa kuti ayatsogolere. Mpostolo Paulo adalewa kuti wanthu amwewa ambamudziwa lini Mulungu ndipo alibe mwayi wakudzakhala na moyo wakusaya kumala. (Wayefezo 2:12) Iwo ali pa mseu omwe ‘ukuyendesa ku infa.’ (Mateu 7:13) Tikakumbukira momwe wanthu akufunira kudziwa Mulungu ku mbuto komwe timbapalizira, lufoyi na ntsisi bzin’dzaticitisa kuti tiwathandize wanthuwo. Ndipo njira yabwino kwene-kwene yomwe tingawathandize nayo ndiko kupfunza nawo Bibliya.
9. Mwakubverana na Wafiripo 2:13, kodi Yahova angakuthandizeni tani?
9 Pinango mumbazeza kukhala na pfunziro la Bibliya thangwe ra kudziwa kuti bzin’dzafuna nthawe izinji kuti muyambe mwakonzekera mukanati mwacitisa pfunzirolo. Penu bziri tenepo kuna imwepo, mufotokozereni Yahova momwe mukubvera. Mukumbireni kuti akuthandizeni kukulisa mtima wakufuna kukhala na pfunziro la Bibliya mucimbalicitisa pfunzirolo. (Werengani Wafiripo 2:13. *) Mpostolo Juwau adatitsimikizira kuti Mulungu an’dzatawira mipembo yomwe ikubverana na bzomwe iye akufuna. (1 Juwau 5:14, 15) Tenepo, tsimikizani kuti Yahova an’dzakuthandizani kukulisa mtima wakufuna kupfunzisa wanthu.
KODI TINGAKUNDE TANI MABVUTO YANANGO?
10-11. Kodi n’ciyani comwe cingaticitise kuzeza kucitisa pfunziro la Bibliya?
10 Timbawona basa lathu lakupfunzisa kukhala lakufunika kwene-kwene napo kuti timbagumana na mabvuto yomwe yambatitazisa kucita bzizinji pakupfunzisa wanthu. Mbatiwoneni yanango mwa mabvutoyo na kuwonambo momwe tingayakundire.
11 Tingabzibve kuti tin’kwanisa lini kucita bzizinji thangwe ra momwe bzinthu bziriri pa moyo wathu. Mwa ciratizo, apalizi winango mbakukalamba ayai alibe manungo yabwino. Kodi imwepo mukugumanambo na mabvuto ninga yamweya? Penu n’tenepo, onani cinthu cibodzi pa bzinthu bzomwe tapfunza na matenda ya COVID-19. Ifepano tawona kuti tingacitise mapfunziro mazinji na pa mtedwe ayai na mitcini ya nzeru. Tenepo, imwepo mungayambise na kucitisa mapfunziro ya Bibliya na kumui kwanu. Ndipo pana phindu pomwe linango. Wanthu winango angafune kupfunza Bibliya, tsono iwo ambakhala ali lini pamui pomwe abale wathu ambakhala akupalizira. Tsono iwo angakhale ali pamui macibese ayai usiku. Kodi imwepo mungakhale wakukonzeka kuti mupfunze nawo nthawe zimwezi? Jezu adapfunzisa Nikodemo usiku, yomwe ikhali nthawe yabwino kuna Nikodemoyo.—Juwau 3:1, 2.
12. Kodi mpsinthu bziponi bzomwe bzingatithandize kuwona kuti tingakwanise kupfunzisa munthu?
12 Tingakumbuke kuti tin’kwanisa lini kucitisa pfunziro la Bibliya. Pinango timbakumbuka kuti tin’funika kudziwa bzinthu bzizinji ayai kukhala na luso, ninga mpfunzisi, kuti tikwanise kupfunzisa munthu munango. Penu mumbakumbukambo tenepoyo, onani bzinthu bzitatu bzomwe bzingakuthandizeni kuwona kuti mungakwanise kupfunzisa munthu. Cakuyamba, Yahova ambakuwonani kuti mungakwanise kupfunzisa wanthu winango. (2 Wakolinto 3:5) Caciwiri, Jezu, omwe ‘adapasidwa utongi bwentse kudzulu na pa dziko la pantsi,’ ndiye adakuuzani kuti mupfunzise wanthu. (Mateu 28:18) Ndipo cacitatu, imwepo mungathembe wanthu winango kuti akuthandizeni. Pakulewalewa, Jezu akhathemba bzomwe Pai wace adamupfunzisa, ndipo imwepo mungacitembo bzibodzi-bodzi. (Juwau 8:28; 12:49) Kuthimizira bzimwebzi, imwepo mungakumbire nyakunyang’anira kagulu kanu ka utumiki bwakumunda, mpainiya waluso, ayai mpalizi wakukhwima kuti akuthandizeni kuyambisa na kucitisa pfunziro la Bibliya. Njira ibodzi yomwe ingakuthandizeni kuwona kuti mungakwanise kupfunzisa munthu ndiyo kukhala pabodzi na apalizi amwewa pomwe iwo akucitisa mapfunziro yawo ya Bibliya.
13. Thangwe ranyi tin’funika kukhala wakukonzeka kumbacinja njira zakupfunzisira?
13 Bzingatinese kuzolowera njira zipsa zakupfunzisira na bzinthu bzakupfunzisira. Njira yomwe ifepano timbacitisira mapfunziro ya Bibliya yacinja. Bukhu lathu lakucitisira pfunziro lakuti Khalani na Moyo Wakukondwa Mpaka Kale-kale!, limbafuna kuti tikonzekere pfunziro na kucitisa pfunzirolo mwakusiyana na momwe tikhacitira kale-kale. Timbawerenga ndime zing’ono-ng’ono ndipo nthawe ikulu imbakhala yakuceza na nyakupfunzayo. Pakupfunzisa timbaphatisa basa mavidiyo mazinji na bzinthu bzakupfunzisira ninga JW Library®. Penu mun’dziwa lini kuphatisa basa bzinthu bzimwebzi, kumbirani munthu kuti akuthandizeni kupfunza kubziphatisa basa. Wanthu ambabzibva bwino akambacita bzinthu mu njira yomwe adazolowera. Bziribe kupusa kuna ifepano kucinja njira zakucitira bzinthu. Tsono na thandizo la Yahova na la wanthu winango, bzin’dzakupusirani kucinja ndipo mun’dzakomedwa pakupfunzisa wanthu. Mpainiya m’bodzi adalewa kuti “njira imweyi yakupfunzisira njakudekeza kwa nyakupfunza na kwa mpfunzisi kubodzi.”
14. Kodi n’ciyani comwe tin’funika kukumbukira penu tikupalizira ku mbuto yakunesa, ndipo cinembo ca 1 Wakolinto 3:6, 7 cimbatilimbikisa tani?
14 Pinango tingakhale ku mbuto komwe mpsakunesa kuyambisa mapfunziro ya Bibliya. Wanthu winango angafune lini kubva mafala yathu ayai angayanyoze. Kodi n’ciyani comwe cingatithandize kuti tileke kubwerera m’mbuyo? Kumbukirani kuti bzinthu pa moyo wa wanthu bzingacinje mwakamfulumize mu dziko lakuipali. Ndipo wanthu omwe pakuyamba akhafuna lini kutetekera mafala yathu angafike pakuwona kuti an’funika kutsogoleredwa na Mulungu. (Mateu 5:3) Wanthu winango omwe kale-kale akhalamba kutambira mabukhu yathu, na kupita kwa nthawe adabvuma pfunziro la Bibliya. Ndipo ifepano timbadziwambo kuti Yahova ni Mwenekaciro wa kubvuna. (Mateu 9:38) Iye akufuna kuti tibzale na kuthirizira, tsono ndiye omwe ambakulisa. (1 Wakolinto 3:6, 7) Ndipo mpsakulimbikisa kudziwa kuti napo penu tikukwanisa lini kucitisa pfunziro la Bibliya pakali pano, Yahova ambasimba nyongo yathu, sikuti bzomwe timbakwanisa kucita! *
KOMEDWANI POMWE MUKUPFUNZISA WANTHU
Onani momwe basa lathu lakupalizira na kupfunzisa lingathandizire munthu (Onani ndime 15-17) *
15. Kodi Yahova ambabzibva tani akawona kuti munthu abvuma pfunziro la Bibliya ndipo akuphatisa basa bzomwe apfunzabzo?
15 Yahova ambakomedwa munthu akabvuma cadidi ca m’Bibliya aciuzambo wanthu winango cadidico. (Mimwani 23:15, 16) Ndipo Yahovayo ambakomedwa kwene-kwene akawona bzomwe bzikucitika ntsiku zino! Mwa ciratizo, napo pa nthawe ya matenda ya Coronavírus mu gole la 2020, mapfunziro yakukwana 7.705.765 yadacitisidwa, bzomwe bzidathandiza wanthu wakukwana 241.994 kuti abzipereke kwa Yahova acibatizidwa. Anyakupfunza apsawa akucitisa mapfunziro ya Bibliya ndipo akuthandiza wanthu azinji kuti akhalembo anyakupfunza. (Luka 6:40) Mwakusaya kupenukira, ifepano timbacitisa Yahova kukhala wakukomedwa tikambacita mbali pa basa lakupfunzisali.
16. Kodi ni nyongo iponi yomwe ali-wentse wa ifepano an’funika kucita?
16 Basa lakupfunzisa wanthu lidanesa, tsono mwakuthandizidwa na Yahova, ifepano tingacite mbali pa basa lakupfunzisa wanthu kuti afune Baba wathu wa kudzulu. Penu bzimbakunesani kukhala na mapfunziro ya Bibliya, kodi mungacite nyongo kuti mukwanise kukhala na nyakupfunza m’bodzi yekha? Imwepo mukaphatisa basa mpata uli-wentse omwe mungakhale nawo kuti mukumbire wanthu kuti mupfunze nawo Bibliya, mungadabwe na bzomwe bzingacitike. Ifepano tingatsimikize kuti Yahova an’dzasimba nyongo yathu.
17. Kodi ifepano tin’dzabzibva tani tikakwanisa kucitisa pfunziro la Bibliya?
17 Tina mwayi ukulu kwene-kwene wa kupalizira na kupfunzisa wanthu cadidi ca m’Bibliya. Basa limweri limbatidekera kwene-kwene. Mpostolo Paulo, omwe adathandiza wanthu azinji ku Tesalonika kuti akhale anyakupfunza, adafotokoza momwe iye akhabvera pomwe adalewa kuti: ‘Kodi n’ciponi cidikhiro cathu, cikondweso ayai korowa yakusekerera kubwera kwa Mbuya wathu Jezu? Kodi ndimwepo lini? Kulewa cadidi, imwepo ndimwe mbiri na cikondweso cathu.’ (1 Watesalonika 2:19, 20; Mabasa 17:1-4) Ntsiku zino abale azinji ambabzibvambo tenepoyo. Mpfumakazi yakucemeredwa Stéphanie, yomwe pabodzi na bayace idathandiza wanthu azinji mpaka kubatizidwa, idalewa kuti: “Palibe bzomwe bzimbatikondwesa kwene-kwene kuposa kuthandiza wanthu kuti abzipereke kwa Yahova.”
NYIMBO 57 Kupalizira Wanthu wa Mtundu Uli-wense
^ ndi. 5 Yahova alibe kundotipasa mwayi wakupalizira wanthu winango, koma adatipasambo mwayi wa kuwapfunzisa kubvera bzinthu bzentse bzomwe Jezu adalewa. Kodi n’ciyani cimbaticitisa kufuna kupfunzisa wanthu winango? Kodi ni mabvuto yaponi yomwe ifepano timbagumana nayo pakupalizira na pakupfunzisa wanthu? Ndipo mabvutoyo tingayakunde tani? Nkhani ino in’tawira mibvunzo imweyi.
^ ndi. 4 Mateu 28:18 Jezu adawafenderera aciwauza kuti: “Ndidapasidwa utongi bwentse, kudzulu na pa dziko la pantsi. 19 Tenepo, ndokoni mukapfunzise wanthu wa mitundu yentse, muciwabatiza m’dzina la Baba, na la Mwana, na la mzimu wakucena, 20 na kuwapfunzisa kubvera bzinthu bzentse bzomwe ndidakuuzani. Ndipo dziwani kuti ine ndiri pabodzi na imwe ntsiku zentse mpaka kuphampha kwa dziko lino.”
^ ndi. 5 1 Wakolinto 3:6 Ine ndidabzala, Apolo adathirizira tsono Mulungu ndiye akhakulisa. 7 Pakuti omwe ambabzala ayai omwe ambathirizira n’cinthu lini, koma Mulungu omwe ambakulisa. 8 Tenepo, omwe ambabzala na omwe ambathirizira mbabodzi, tsono munthu ali-wentse an’dzatambira mabaibai yace mwakubverana na basa lace. 9 Pakuti ndife anyabasa anzace wa Mulungu. Imwepo ndimwe munda wa Mulungu omwe ukulimidwa, nyumba ya Mulungu.
^ ndi. 8 Marko 6:34 Pakubuluka m’ngalawa mule, adawona thimu likulu la wanthu, ndipo iye adawabvera ntsisi, thangwe wanthuwo akhali ninga mabira yakusaya makabusa. Ndipo iye adayamba kuwapfunzisa bzinthu bzizinji.
^ ndi. 9 Wafiripo 2:13 Pakuti Mulungu ambacita bzinthu mu njira yomwe imbakudekerani, acikupasani mphanvu na cikhumbo kuti mucite bzomwe iye akufuna.
^ ndi. 14 Kuti mudziwe bzizinji pa nkhani yakuti ali-wentse m’gwere angathandize tani nyakupfunza, onani nkhani yakuti “Ali-wentse M’gwere Angathandize Nyakupfunza wa Bibliya Kuti Ayende Patsogolo” mu revista ya Ntsanza ya Mulindiri yakupfunza ya Março, 2021.
^ ndi. 57 BZOMWE BZIKUCITIKA PA CITHUNZI-THUNZI: Onani momwe pfunziro la Bibliya lingathandizire munthu kucinja moyo wace: Munthu omwe ambadziwa lini Yahova akubzibva kuti moyo wace ulibe na basalo. Tsono Mboni za Yahova zagumana naye pomwe zikupalizira, ndipo iye abvuma pfunziro la Bibliya. Bzomwe iye apfunzisidwa bzamucitisa kuti abzipereke acibatizidwa. Ndipo na kupita kwa nthawe, iye akuthandizambo wanthu winango kuti akhale anyakupfunza. Pakumalizira, wentse akukomedwa na moyo m’Paraizo.
