NKHANI YAKUPFUNZA 29
Kondwani na Bzomwe Mukukwanisa Kucita pa Kutumikira Yahova!
‘Ali-wentse . . . an’dzakhala na mathangwe yakukondwa na mabasa yace, sikuti mwakubzindendemezera na munthu munango.’—WAGALATA 6:4.
NYIMBO 34 Kufamba Mwakukhulupirika
BZOMWE TIN’PFUNZA *
1. Thangwe ranyi Yahova ambatindendemezera lini na wanthu winango?
YAHOVA ambakomedwa kuwona bzinthu bzakusiyana-siyana. Umboni bwa bzimwebzi ni bzinthu bzomwe iye adalenga, kuphatanidzambo wanthu. Ali-wentse wa ifepano adasiyana na mwanzace. Ndipopa Yahova ambakundendemezerani lini na wanthu winango. Iye ambawona mtima wanu na unthu bwanu. (1 Samuweri 16:7) Iye ambadziwa bzomwe mungakwanise kucita, bzomwe mungakwanise lini kucita na momwe imwepo mudaleredwera. Ndipo iye ambakukumbirani lini kuti mucite bzinthu bzomwe mungakwanise lini kucita. Ifepano tin’funika kutewezera Yahova mwa kumbabziwona ninga momwe iye ambatiwonera. Tikacita bzimwebzi, tin’dzabzikumbukira lini tekha ‘mwakunyanya’ ayai kubziwona ninga kuti tiribe na basalo.—Waroma 12:3.
2. Thangwe ranyi kubzindendemezera na wanthu winango kudaipa?
2 Ifepano tingapfunze na bziratizo bzabwino bza abale na mpfumakazi zathu wakukhulupirika omwe bzinthu bzikuwafambira bwino mu utumiki. (Wahebereu 13:7) Ndipo tingapfunze nawo momwe tingakulisire luso lathu lakupalizira mu utumiki. (Wafiripo 3:17) Tsono pana kusiyana pakati pa kutewezera bzinthu bzabwino bzomwe munthu akucita na kubzindendemezera na munthuyo. Kubzindendemezerako kungakucitiseni kukhala na njiru, kugoboka m’mabondo ayai kubziwona ninga kuti mulibe na basalo. Ninga momwe tidapfunzira mu nkhani idamala ire, kubzindendemezera na wanthu winango m’gwere kungadzonge uxamwali bwathu na Yahova. Ndipopa Yahova ambaticenjeza mwalufoyi kuti: ‘Ali-wentse apime mabasa yace kuti awone momwe yaliri, ndipo na tenepo iye an’dzakhala na mathangwe yakukondwa na mabasa yace, sikuti mwakubzindendemezera na munthu munango.’—Wagalata 6:4.
3. Kodi ni bzinthu bziponi bzomwe mwacinja pa kutumikira Yahova bzomwe bzikukucitisani kukhala wakukondwa?
3 Yahova akufuna kuti mukhale wakukondwa na bzinthu bzomwe mumbakwanisa kucita pa kumutumikira. Mwa ciratizo, penu ndimwe wakubatizidwa, mun’funika kukomedwa thangwe rakuti mudakwanirisa cakulinga cimweci! Imwepo mudacita kufuna mwekha kuti mubatizidwe. Mudacita bzimwebzi thangwe ra lufoyi lanu kuna Mulungu. Kumbukirani bzinthu bzomwe mwacita kale kuyambira pomwe mudabatizidwa. Mwa ciratizo, kodi mwakulisa lufoyi lanu la kuwerenga na kupfunza Bibliya pa mwekha? Kodi mipembo yanu mumbaicita na mtima wentse? (Psalymo 141:2) Kodi mwakulisa luso lanu lakuyambisa maceza na lakuphatisa basa bzinthu bzomwe timbapfunzisira mu upalizi? Penu muna banja, kodi Yahova akuthandizani kukhala mwamuna, mkazi ayai m’bereki wabwino? Imwepo mukukomedwa thangwe ra bzinthu bzentse bzomwe mwakwanisa kucinja pa moyo wanu.
4. Kodi tin’funza ciyani mu nkhani ino?
4 Ifepano tingathandize wanthu winango kukhala wakukondwa pomwe akucinja bzinthu pa moyo wawo kuti ayende patsogolo. Ndipo tingawathandizembo kuti aleke kumbabzindendemezera na anzawo. Mu nkhani ino, tiniwona momwe abereki angathandizire wana wawo, momwe mwamuna na mkazi omwe ali pa banja angathandizirane, na momwe akulu wa gwere na wanthu winango angathandizire abale na mpfumakazi. Ndipo pakumalizira, tin’dzawona momwe mitemo ya m’Bibliya ingatithandizire kukhala na bzakulinga mwakubverana na luso lathu pabodzi na momwe bzinthu bziriri pa moyo wathu.
BZOMWE ABEREKI NA WANTHU WAKULOWOLANA AN’FUNIKA KUCITA
Abereki, mbawonani nyongo yomwe mwana wanu ali-wentse akucita (Onani ndime 5-6) *
5. Mwakubverana na Wayefezo 6:4, kodi abereki an’funika kutcenkha kucita ciyani?
5 Abereki an’funika kuwonesesa kuti aleke kundendemezera bzomwe mwana akucita na bzomwe mwanzace ambacita. Ayai kuuza mwana kuti acite bzinthu bzomwe angakwanise lini kucita. Abereki akacita bzimwebzi, mwanayo angagoboke m’mabondo. (Werengani Wayefezo 6:4. *) Mpfumakazi yakucemeredwa Sachiko * idalewa kuti: “Apfunzisi wangu akhafuna kuti ndikhale mdziwi kwene-kwene kuposa anzangu omwe ndikhapfunza nawo ku xikola. Kuthimizira bzimwebzi, mai wangu akhafuna kuti nimbadziwe ku xikola kuti ndikwanise kupalizira bwino apfunzisi wangu na pai wangu omwe ni Mboni lini ya Yahova. Maiwo akhafuna lini kuti ndiphonye ne kacinthu kabodzi, bzomwe bzikhali bzakunesa kuna inepano. Napo kuti papita magole mazinji kucokera pomwe ndidamaliza xikola, nthawe zinango nimbabzibva kuti Yahova ambakomedwa lini nande, napo kuti nimbacita bzomwe nimbakwanisa pa kumutumikira.”
6. Kodi abereki angapfunze ciyani na mafala ya pa Psalymo 131:1, 2?
6 Pfunziro lakufunika kwene-kwene kuna abereki likugumanika pa Psalymo 131:1, 2. (Werengani. *) Mambo Davide adalewa kuti iye ‘[akhalinga] lini bzinthu bza padzulu’ ayai kucita bzinthu bzomwe angadakwanisa lini kucita. Kubzicepesa kwace na kuzindikira malire ‘[kudaderekhesa]’ mtima wace. Kodi abereki angapfunze ciyani na mafala ya Davide? Abereki angakhale wakubzicepesa na wakuzindikira malire akambasaya kudikhirira kucita bzinthu bzomwe angakwanise lini kucita na kusaya kudikhirirambo kuti wana wawo acite bzinthu bzomwe angakwanise lini kucita. Abereki angathandize mwana wawo kuti abzibve kuti ngwakufunika mwakumbawona bzinthu bzomwe mwanayo ambakwanisa kucita na bzomwe ambakwanisa lini kucita bwino-bwino, na kumuthandizambo kucita bzomwe iye asankhula kucita. Mpfumakazi yakucemeredwa Marina, idalewa kuti: “Mai wangu akhandindendemezera lini na wana winango ne na azibale wangu ang’ono. Iwo adandiuza kuti munthu ali-wentse ana luso lace ndipo tentsene ndife wakufunika kwa Yahova. Nimbatenda maiwo, thangwe rakuti adandipfunzisa kuleka kumbabzindendemezera na wanthu winango.”
7-8. Kodi mwamuna angalatize tani kuti ambalemekeza mkazace?
7 Mwamuna wacikristau an’funika kumbalemekeza mkazace. (1 Pedru 3:7) Fala lakuti kulemekeza limbathandauza kutetekera bwino-bwino wanthu akakhala akulewalewa. Mwa ciratizo, mwamuna ambalemekeza mkazace mwakumulatiza kuti ngwakufunika. Ndipo iye ambakumbira lini mkaziyo kuti acite bzinthu bzomwe angakwanise lini kubzicita. Ndipombo iye ambandendemezera lini mkazaceyo na akazi winango. Kodi mkazi ambabzibva tani mwamuna wace akambamundendemezera na wanthu winango? Mwamuna wa mpfumakazi yakucemeredwa Rosa, omwe ni Mboni lini ya Yahova, ambakhala acindendemezera mpfumakaziyo na akazi winango. Mpfumakazi Rosa imbabzibva lini bwino na mafala yakuipa yomwe bayaceyo ambalewa ndipo imbapenukira penu pana munthu omwe ambaifunambo. Mpfumakaziyo idati: “Nthawe zentse nimbafunika kutsimikiza kuti Yahova ambandiwona kuti ndine munthu wakufunika.” Mwakusiyana na bzimwebzi, mwamuna wacikristau ambalemekeza mkazace. Iye ambadziwa kuti kucita bzimwebzi kumbathandiza kuti banja lace likhale lakulimba ndipo kumbathandizambo kuti uxamwali bwawo na Yahova bukhalembo bwakulimba. *
8 Mwamuna omwe ambalemekeza mkazace ambamutumbiza, ambamuuza kuti ambamufuna na kumutenda. (Mimwani 31:28) Bzimwebzi ndibzo bzomwe bayace wa Katerina, omwe adafotokozedwa mu nkhani idamala ire adacita. Iye adathandiza mkazace pa nthawe yomwe akhabzibva kuti ni munthu wakusaya kufunika pakundendemezera na wanthu winango. Pomwe Katerina akhali mwana, mai wace akhambamunyoza, ndipo kawiri-kawiri akhambamundendemezera na atsikana anzace kuphatanidzambo na axamwali wace. Thangwe ra bzimwebzi, Katerina adayamba kumbandendemezera moyo wace na moyo wa wanthu winango. Napo pomwe adadzakhala Mboni ya Yahova, iye adapitiriza kucita bzimwebzi! Tsono bayace, omwe ni Mkristau, adamuthandiza kusiya kucita bzimwebzi, kuti ambabzikumbukire bwino. Iye adalewa kuti: “Abayangu ambandifuna, ambatenda bzinthu bzabwino bzomwe nimbacita ndipo ambandipempherera. Ndipo iwo ambandikumbusa makhalidwe yabwino ya Yahova na kundithandiza kuleka kukhala na makumbukidwe yakuipa.”
BZOMWE AKULU WALUFOYI PABODZI NA WANTHU WINANGO ANGACITE
9-10. Kodi akulu wa gwere wakudeka mtima adathandiza tani mpfumakazi yomwe ikhambabzindendemezera na wanthu winango?
9 Kodi akulu wa gwere angathandize tani wale omwe ana msambo wakumbabzindendemezera na wanthu winango? Onani bzomwe bzidacitika pa moyo wa mpfumakazi yakucemeredwa Hanuni, yomwe kawiri-kawiri ikhambatendedwa lini pomwe ikhali mwana. Mpfumakaziyo idalewa kuti: “Ndikhabva manyazi ndipo ndikhambawona kuti wana winango ambadziwa bzinthu kuposa inepano. Ndikukumbukira kuti ndidayamba kumbabzindendemezera na wanthu winango kuyambira pomwe ndikhali mwana.” Napo pomwe Hanuni adadzakhala Mboni ya Yahova, iye adapitiriza kumbabzindendemezera na wanthu winango. Thangwe ra bzimwebzi, iye akhambabziwona kuti alibe na basalo m’gwere. Tsapano iye akukomedwa thangwe ra kucita upainiya. Kodi n’ciyani cidamuthandiza kucinja makumbukidwe yace?
10 Hanuni adalewa kuti adathandizidwa na akulu wa gwere wakudeka mtima. Akuluwo adamuuza kuti ngwakufunika kwene-kwene m’gwere ndipo ni ciratizo cabwino. Mpfumakaziyo idanemba kuti: “Akuluwo adandikumbira kuti ndikalimbikise mpfumakazi zinango zomwe zikhafuna kuthandizidwa. Udindo bumwebu budandicitisa kubzibva kuti ndine wakufunika. Ndikukumbukira pomwe akulu wa gwere wakudeka mtima adanditenda pomwe ndidayenda kukalimbikisa mpfumakazi zacitswaka. Pomwe adamala, iwo adandiwerengera 1 Watesalonika 1:2, 3. Bzimwebzi ndidakomedwa nabzo kwene-kwene! Thangwe ra bzomwe akulu walufoyi adandicitira, tsapano nimbadziwa kuti ndine munthu wakufunika m’gwere.”
11. Mwakubverana na Zaiya 57:15, kodi ifepano tingathandize tani wanthu ‘wakuwawidwa mu mtima na wakunyozeka’?
11 Werengani Zaiya 57:15. * Yahova ambacita thupo na wanthu ‘wakuwawidwa mu mtima na wakunyozeka.’ Tentsenefe, sikuti akulu okha, tingalimbikise abale na mpfumakazi m’gwere. Njira ibodzi ya momwe tingacitire bzimwebzi ni kuwalatiza kuti timbawafuna. Yahova ambafuna kuti ifepano tilatize abalewo kuti iye ambawafuna kwene-kwene. (Mimwani 19:17) Ifepano tingathandizembo abale na mpfumakazi zathu mwa kukhala wakubzicepesa na wakuzindikira malire. Ifepano tin’funa lini kucita bzinthu bzomwe bzingacitise abale wathu kukhala na njiru. M’mbuto mwace, timbaphatisa basa luso na nzeru zathu kuti tilimbikisane.—1 Pedru 4:10, 11.
Jezu akhafendereredwa na anyakupfunza wace thangwe iye akhali munthu omwe akhacita lini bzinthu na mtima wa kubziwonesa. Iye akhakomedwa kukhala pabodzi na axamwali wace (Onani ndime 12)
12. Thangwe ranyi wanthu wakunyozeka akhambafuna kukhala pafupi na Jezu? (Onani cithunzi-thunzi pa tsamba lakuyamba.)
12 Ifepano tingapfunze momwe tingacitire bzinthu na wanthu winango mwa kuwona momwe Jezu adacitira na ateweri wace. Iye akhali Munthu mkulu omwe adakhala na moyo pa dziko la pansi. Napo bzikhali tenepo, iye akhali ‘wakuderekha na wakubzicepesa.’ (Mateu 11:28-30) Iye alibe kubziwonesa kuti akhana luso na nzeru kwene-kwene. Pomwe iye akhapfunzisa wanthu, akhaphatisa basa mafala yakusaya kunesa kubvesesa na bziratizo bzomwe bzikhadekera wanthu wakunyozeka. (Luka 10:21) Jezu akhali wakusiyana na atsogoleri wakubzikuza wa magereja thangwe iye akhambathandiza wanthu kubzibva kuti mbakufunika kwa Mulungu. (Juwau 6:37) Iye akhambalemekeza wanthu omwe akhawoneka kuti mbakusaya basa.
13. Kodi Jezu adalatiza tani kuti akhali wakudeka mtima na wa lufoyi pomwe akhacita bzinthu na anyakupfunza wace?
13 Kudeka mtima kwa Jezu na lufoyi lace bzikhawonekera pomwe akhambacita bzinthu na anyakupfunza wace. Iye akhadziwa kuti iwo akhadasiyana maluso na momwe adakulira. Tenepo, iwo akhambacita lini bzinthu bzibodzi-bodzi ayai kuphata basa mu utumiki mwakundendemerana. Napo bzikhali tenepo, Jezu akhambakomedwa na bzomwe wentse akhakwanisa kucita. Jezu adalatiza kuti akhatenda anyakupfunzawo pomwe adawafotokozera ciratizo ca matalento. Mu ciratizoco, mbuya adapasa basa akapolo wace ‘[mwakubverana na] nzeru’ za kapolo ali-wentse. Pa akapolo awiri, m’bodzi adagumana phindu kwene-kwene kuposa mwanzace. Tsono mbuyayo adatenda akapolo awiriwo na mafala mabodzi-bodzi, yakuti: ‘Wacita bwino, kapolo wabwino na wakukhulupirika!’—Mateu 25:14-23.
14. Kodi tingatewezere tani momwe Jezu akhacitira bzinthu na wanthu winango?
14 Nthawe zentse Jezu ambatilatizambo kuti ngwakudeka mtima na wa lufoyi. Iye ambadziwambo kuti ali-wentse wa ifepano ana luso lakusiyana na la mwanzace ndipo moyo wathu ngwakusiyana. Ndipo ambakomedwa akambatiwona tikucita bzentse bzomwe tingakwanise. Tin’funika kumbacitira bzinthu anzathu ninga momwe Jezu adacitira. Tin’funika lini kucitisa m’bale ayai mpfumakazi kubziwona ninga kuti alibe na basalo ayai kumucitisa manyazi thangwe rakuti akukwanisa lini kucita bzinthu ninga momwe anzace akucitira. Mwakusiyana na bzimwebzi, bwerani timbanyang’ane mipata yakuti timbatende abale na mpfumakazi zathu thangwe ra nyongo yomwe iwo akucita pa kutumikira Yahova.
KHALANI NA BZAKULINGA BZOMWE MUNGAKWANISE KUCITA
Khalani wakukondwa thangwe ra kukhala na bzakulinga bzomwe mungakwanise kucita (Onani ndime 15-16) *
15-16. Kodi mpfumakazi Midori idagumana tani phindu na bzinthu bzomwe idakwanisa kucita?
15 Tikambakhala na bzakulinga pa kutumikira Yahova moyo wathu umbakhala wabwino na wathandauzo. Tsono comwe cingatithandize ni kukhala na bzakulinga mwakubverana na luso lathu pabodzi na momwe bzinthu bziriri pa moyo wathu, sikuti kutewezera wanthu winango. Thangwe tikawatewezera, ifepano tingasuname ndipo tingamale mphanvu. (Luka 14:28) Onani ciratizo ca mpfumakazi yakucemeredwa Midori, yomwe ni mpainiya.
16 Pomwe Midori akhali mwana, pai wace omwe ni Mboni lini ya Yahova, akhamupasisa manyazi mwakumundendemezera na ang’ono wace pabodzi na anzace wa ku xikola. Midori adalewa kuti: “Ndikhabziwona kuti ndikhalibe na basalo.” Tsono adayamba kumbabzibvambo bwino pomwe iye adadzakula. Iye adalewa kuti: “Nimbawerenga Bibliya ntsiku zentse thangwe bzimbandithandiza kukhala na mtendere mu mtima mwangu na kubzibva kuti Yahova ambandifuna.” Kuthimizira bzimwebzi, iye adakhumba kucita bzinthu bzomwe angadakwanisa kucita, ndipo adapemba kuti akwanise kucita bzomwe akhafunabzo. Bzimwebzi bzidathandiza Midori kukhala wakukondwa thangwe ra bzinthu bzomwe akhakwanisa kucita pa kutumikira Yahova.
PITIRIZANI KUCITIRA YAHOVA BZOMWE MUNGAKWANISE
17. Kodi tingapitirize tani ‘kukhala [wanthu] wapsa mu mphanvu yakutsogolera makumbukidwe [yathu],’ ndipo tin’dzagumana phindu liponi?
17 Pambatenga nthawe kuti ticinje momwe ifepano timbabvera. Ndipopa Yahova akutiuza kuti: ‘Mupitirize kukhala wapsa mu mphanvu yakutsogolera makumbukidwe yanu.’ (Wayefezo 4:23, 24) Tenepo kuti tikwanise kucita bzimwebzi, tin’funika kumbapemba, kupfunza Fala la Mulungu na kumbakumbukira bzomwe tapfunzabzo. Phatisani basa bzinthu bzimwebzi, ndipo kumbirani Yahova kuti akupaseni mphanvu. Mzimu wace wakucena un’dzakuthandizani kumalisa makumbukidwe yentse yakumbabzindendemezera na wanthu winango. Yahova an’dzakuthandizani kudziwa penu mwayamba kukhala wanthu wa njiru ayai wakubzikuza ndipo iye an’dzakuthandizanimbo kucinja mwakamfulumize.
18. Kodi mafala yomwe yali pa 2 Nkhani 6:29, 30 yangakutsangalazeni tani?
18 Werengani 2 Nkhani 6:29, 30. * Yahova ambaidziwa mitima yathu. Ndipo ambadziwambo kuti tikucita nyongo yakuleka kutewezera makhalidwe yakuipa ya dzikoli, pabodzi na kuperewera kwathu. Pakuti Yahova ambawona nyongo yomwe tikucita kuti tileke kukhala na makhalidwe yakuipa, iye ambatifuna kwene-kwene.
19. Kodi Yahova ambaphatisa basa ciratizo ciponi kuti atithandize kubvesesa momwe iye ambabvera na ifepano?
19 Kuti Yahova atithandize kubvesesa momwe ambabvera na ifepano, iye ambaphatisa basa ciratizo ca lufoyi lomwe liripo pakati pa mai na mwana wace. (Zaiya 49:15) Onani ciratizo ca mai m’bodzi wakucemeredwa Rachel. Iye adalewa kuti: “Mwana wangu wacikazi wakucemeredwa Stephanie adabadwa na minyezi yakuperewera. Pomwe ndidamunyang’anisa ndidawona kuti akhali mtete. Tsono dotolo adandibvumiza kuti nimbam’kumbatire mwanayo ntsiku zentse, pa mwezi omwe ndidakhala naye ku nyumba ya ulapi. Pa nthawe imweyire inepano na mwanayo tidazolowerana kwene-kwene. Tsapano iye ana magole matanthatu ndipo ni mfupi kwene-kwene kusiyana na wana wa msinkhu wace. Napo bziri tenepo, inepano nimbamufuna kwene-kwene mwananguyo thangwe rakuti iye adacita nyongo kuti akhale na moyo, ndipo adandicitisa kuti ndikhale wakukondwa pa moyo wangu!” Mpsakutsangalaza kudziwa kuti Yahova ambabvambo bzibodzi-bodzi akatiwona tikucita nyongo kuti timutumikire na mtima wathu wentse!
20. Ninga atumiki wakubzipereka wa Yahova, kodi ni thangwe liponi lomwe limbakucitisani kukhala wakukondwa?
20 Ninga mtumiki wakukhulupirika wa Yahova, imwepo ndimwe wakufunika m’banja lace ndipo ndimwe wakusiyana na munthu ali-wentse. Yahova alibe kukukwewerani kwa iye thangwe rakuti mumbadziwa bzinthu bzizinji kuposa anzanu. Iye adakukwewani thangwe rakuti pomwe adanyang’anisa mu mtima mwanu adawona kuti ndimwe wakuderekha nakuti mukapfunzisidwa mungacinje. (Psalymo 25:9) Tsimikizani kuti iye ambakomedwa imwepo mukacita ciri-centse comwe mungakwanise kuti mumutumikire. Kupirira na kukhulupirika kwanu kumbalatiza kuti imwepo muna ‘mtima wabwino.’ (Luka 8:15) Tenepo, pitirizani kucita ciri-centse comwe mungakwanise pa kutumikira Yahova. Mukacita bzimwebzi, imwepo mun’dzakhala wakukondwa.
NYIMBO 38 Yahova An’dzakulimbisa
^ ndi. 5 Yahova ambatindendemezera lini na wanthu winango. Tsono napo bziri tenepo, ifepano tingabzindendemezere na wanthu winango ticibziwona ninga kuti tiribe na basalo. Mu nkhani ino tiniwona kuti thangwe ranyi bzidaipa kubzindendemezera na wanthu winango. Ndipo tiniwonambo momwe tingathandizire wanthu wa m’banja mwathu na abale wa m’gwere kuti ambabziwone ninga momwe Yahova ambawawonera.
^ ndi. 5 Wayefezo 6:4 Imwepombo azibabamunthu, lekani kumbakalipisa wana wanu, koma mumbawalere m’malango ya Yahova na kuwapfunzisa kakumbukidwe kace.
^ ndi. 5 Madzina yanango yacinjidwa.
^ ndi. 6 Psalymo 131:1 Imwe Yahova, mtima wangu ngwakubzikuza lini, maso yangu njakusamwa lini; ndipo nimbalinga lini bzinthu bza padzulu, ayai kukhumba bzinthu bzomwe ningabzikwanise lini kubzigumana. 2 Koma ndakhazika pantsi mtima wangu ndipo ndauderekhesa, ndiri ninga mwana wakuleka kumama omwe ali kumbuyo kwa mai wace; ndine wakukondwa ninga mwana wakuleka kumama.
^ ndi. 7 Napo kuti ndimeyi ikulewa maka-maka bza amuna, tsono nfundo zizinji zimbaphatambo basa kuna akazi.
^ ndi. 11 Zaiya 57:15 Ibzi ni bzomwe akulewa ule omwe Ngwakulemekezeka na Wapadzulu, omwe ambafa lini ndipo dzina lace ndakucena: ‘Inepano nimbakhala pa mbuto yomwe iri padzaulu na yakucena, ndipo nimbakhalambo na munthu wakuwawidwa mu mtima na wakunyozeka, kuti ndilimbise mitima ya wanthu wakunyozeka nakuti nditsangalazembo wale omwe akuwawidwa mu mtima.’
^ ndi. 18 2 Nkhani 6:29 Ndipo munthu akambapereka mpembo, mpembo uli-wentse wakukumbira kucitiridwa ntsisi omwe munthu ayai Ajirayeri wentse angacite (thangwe ra kudziwa tsoka lace na kuwawidwa kwace) ndipo akafuthulira manja yawo nyumba ino, 30 imwepo mubve kudzuluko, pomwe muli pa mbuto yanu yakukhala, mucilekerera, na kusimba ali-wentse mwakubverana na njira zace, pakuti mumbadziwa mtima wace (ndimwe mwekha omwe mumbadziwa mtima wa munthu).
^ ndi. 62 BZOMWE BZIKUCITIKA PA CITHUNZI-THUNZI: Pakunamata kwa pa banja, abereki akulatiza kuti akukomedwa na cinthu comwe mwana ali-wentse akukonza kuti aikhe m’cingalawa ca Nowa.
^ ndi. 66 BZOMWE BZIKUCITIKA PA CITHUNZI-THUNZI: Mpfumakazi yomwe ikufuwa yokha mwana ikukonza ndandanda kuti icite upainiya bwakuthandiza, ndipo mpfumakaziyo ikukomedwa thangwe ra kukwanisa kucita upainiyabo.
