Yahova ambafuna kuti wanthu awiri omwe alowolana akhale wakukondwa nakuti akhale pa uxamwali bwabwino mpaka kale-kale. (Mateu 19:4-6) Penu imwepo mun’funa kulowola ayai kulowodwa, kodi n’kuponi komwe mungagumane mwanzanu wakuthemera kulowolana naye? Pakuti Yahova ni Mulengi wathu, iye ambadziwa bzomwe tin’funika kucita kuti tidzakhale na malowozi yabwino. Tenepo, imwepo mukaphatisa basa nfundo za m’Bibliya zomwe iye ambatipasa, bzinthu bzin’dzakufambirani bwino. Onani zinango mwa nfundozo.

Cakuyamba, tin’funika kubvesesa mafala yakuti: ‘Mtima umbapumpsa kwene-kwene kuposa cinthu ciri-centse.’ (Jeremiya 17:9) Wanthu awiri omwe akufuna kulowolana akambaceza kawiri-kawiri aciyamba kucita umakhadzi, iwo mwakamfulumize angayambe kufunana kwene-kwene. Bzimwebzi bzikacitika, bzingakhale bzakunesa kuna iwo kusankhula bzinthu mwanzeru. Tsono wanthu awiri akafuna kulowolana thangwe ra momwe akubvera, bzimwebzi bzingadzawabweresere mabvuto kutsogolo. (Mimwani 28:26) Ndipopa bzingakhale lini bza nzeru awiriwo kuyamba kulatizana lufoyi ayai kuuzana kuti anilowolana pomwe akanati kudziwana bwino-bwino.

Mimwani 22:3 ambalewa kuti: ‘Nyakucenjera ngule omwe akawona tsoka ambabisalika, tsono nyakusaya kudziwa bzinthu, ambandoyenda kutsogolo, acikalangidwa.’ Kodi ni ngozi iponi yomwe ingabwere thangwe ra kuphatisa basa mbuto zakugumanira makhadzi za pa interneti? Bzakupasa ntsisi mpsakuti, wanthu winango omwe akhaphatisa basa mbuto zimwezi, na kupita kwa nthawe, adadzazindikira kuti wanthu omwe akhacita nawo umakhadziwo akhawanamiza. Cinango n’cakuti, wanthu wakuipa ambaphatisa basa madzina yakunama kuti anamize nayo wanthu wabwino aciwabera kobiri zawo. Wanthu winango omwe adacitambo kale bzimwebzi akhanamiza anzawo kuti iwo ni Mboni za Yahova.

Onani ngozi inango. Mbuto zinango zakugumanira makhadzi za pa interneti zimbaphatisa basa njira yakucita kuvima kuti zicitise wanthu kuyamba umakhadzi. Tsono, palibe umboni bwakulatiza kuti kuphatisa basa njira zimwezi kumbathandiza wanthu kugumana munthu wabwino wakulowolana naye. Bzingakhale lini bza nzeru kukhulupira programa ya pa interneti, yomwe idakonzedwa na munthu, kuti itisankhulire munthu omwe tingadzalowolane naye. Programa za pa interneti zingakhale lini zakuthembeka pa kundendemezera na nfundo za m’Bibliya.—Mimwani 1:7; 3:5-7.

Nfundo ya m’Bibliya yakugumanika pa Mimwani 14:15 imbalewa kuti: ‘Munthu wakusaya kudziwa ambandokhulupira mafala yali-yentse, tsono nyakucenjera  ambawona bwino komwe akuyenda.’ Pomwe mun’funa kugumana munthu omwe mungadzalowolane naye, cakuyamba imwepo mun’funika kumudziwa bwino munthuyo. Tsono mungamudziwe lini bwino-bwino munthuyo, mukambandoceza naye na pa interneti. Napo penu imwepo mumbakwanisa kuwona bzinthu bzizinji pakulewa bza munthuyo na kumala nthawe ikulu mukuceza naye na pa interneti, kodi mungalewe kuti mumbamudziwa bwino munthuyo? Wanthu winango omwe akhakumbuka kuti agumana munthu wakuthemera kulowolana naye alibe kukomedwa pomwe adadzawonana na munthuyo maso na maso.

Nyakunemba Psalymo adalewa kuti: ‘Nimbakhala lini pabodzi na wanthu wakunama. Ndipo nimbabverana lini na wanthu omwe ambabisa unthu bwawo.’ (Psalymo 26:4) Wanthu azinji ambawona kuti bziribe kuipa kunemba bzinthu bzakunama pomwe akucita umakhadzi na pa interneti kuti munthu omwe akucita naye umakhadziyo akomedwe naye. Iwo angabise makhalidwe yawo yakuipa, ayai makhalidweyo yangawoneke lini pomwe iwo akutumizira mensaje wanthu winango. Mpsakufunika kwene-kwene kukumbukira mitawiro ya mibvunzo iyi: Napo kuti wanthu winango angalewe kuti ni Mboni za Yahova, kodi iwo ni Akristaudi wakubatizidwa? Kodi iwo mbakukhwima mwauzimu? Kodi iwo ali pa uxamwali bwakulimba na Yahova? Kodi iwo ambalemekezedwa m’gwere mwawo? Ayai iwo ana ciratizo cakuipa ndipo ‘[ambabverana] na wanthu wakuipa’? (1 Wakolinto 15:33; 2 Timotio 2:20, 21) Kodi iwo ana ufulu bwakulowola ayai kulowodwa mwakubverana na nfundo za m’Bibliya? Imwepo mun’funika kudziwa mitawiro ya mibvunzoyi. Tsono bzingakuneseni kudziwa mitawiroyo mukasaya kumbaceza na Mboni za Yahova zomwe zimbamudziwa bwino munthuyo. (Mimwani 15:22) Ndipo timbadziwa kuti mtumiki wakukhulupirika wa Yahova an’funika lini ‘kumangidwa pa djoki libodzi’ na munthu wakusaya kukhulupira.—2 Wakolinto 6:14; 1 Wakolinto 7:39.

Pakuti pana ngozi kuphatisa basa mbuto zakugumanira makhadzi za pa interneti, pana njira zabwino zakunyang’anira na kugumanira munthu omwe tingadzalowolane naye. Kodi tingawone kuponi mipata yakugumanira munthu omwe tingadzalowolane naye? Mpsakukwanisika kudziwana na munthu omwe tingadzalowolane naye tikambagumanika pa mitsonkhano ya gwere, ya dera, ya cigawo na pa mitsonkhano minango.

Penu mpsakukwanisika lini kucita mitsonkhano imweyi, ninga momwe bziriri pa nthawe ino ya matenda ya COVID-19, ifepano tikuphatisa basa interneti pakucita mitsonkhano ya gwere ndipo tingaphatisembo basa njira imweyi kuti tidziwane na Mboni za Yahova zinango zomwe zikanati kulowodwa ayai kulowola. Imwepo mungakwanise kuwona momwe iwo ambafotokozera nkhani na kuperekera mitawiro. (1 Timotio 6:11, 12) Imwepo mungakwanise kuceza, pomwe mitsonkhanoyo yamala. Mukambaceza m’tumagulu twa Mboni za Yahova mwakuphatisa basa interneti, mungakwanise kuwona momwe munthu omwe mukumufunayo ambacitira bzinthu na wanthu winango, tenepo mungakwanisembo kuwona makhalidwe yomwe munthuyo anayo. (1 Pedru 3:4) Na kupita kwa nthawe, mukamudziwa bwino munthuyo, mungakwanise kudziwa penu muna bzakulinga bzakundendemerana nakuti angadzakhale munthu wabwino kulowolana naye.

Wanthu omwe ambaphatisa basa nfundo za m’Bibliya pomwe akunyang’ana mwanzawo kuti alowolane naye, angadzakhale na banja lakukondwa, ninga momwe bukhu la Mimwani limbalewera. Iro limbati: ‘Munthu omwe agumana mkazi [ayai mwamuna] wabwino, agumana cinthu cabwino ndipo Yahova ambakomedwa naye.’—Mimwani 18:22.