Pitirizani Kukhala Wakukondwa Pomwe Mukudikhirira Yahova
KODI imwepo mukudikhirira nthawe yomwe Yahova an’dzacosa mabvuto yentse pa dziko la pantsi acikonza papsa bzinthu bzentse? (Apokalipse 21:1-5) Kulewa cadidi, imwepo mukudikhirira! Tsono mpsakunesa kudikhirira Yahova maka-maka tikakhala tikugumana na mabvuto. Cinthu comwe tikhacidikhirira cikasaya kucitika mtima umbawawa. — Mimwani 13:12.
Napo bziri tenepo, Yahova akufuna kuti ifepano tipitirize kumudikhirira mwa kupirira mpaka pa nthawe yomwe iye an’dzacita bzomwe adalewa. Thangwe ranyi iye akufuna kuti ticite bzimwebzo? N’ciyani comwe cingatithandize kuti tipitirize kukhala wakukondwa pomwe tikumudikhirira?
THANGWE RANYI YAHOVA AKUFUNA KUTI TIDIKHIRIRE?
Bibliya limbati: “Yahova akudikhirira mwakupirira kuti akulatizeni kudeka mtima, ndipo iye an’dzalamuka kuti akulatizeni ntsisi. Pakuti Yahova ni Mulungu wa cirungamo, wentse omwe animudikhirira an’dzakhala wakukondwa.” (Zaiya 30:18) Mafala ya Zaiyaya yadanembedwera Adjuda wakupanduka. (Zaiya 30:1) Tsono pakhana Adjuda winango wakukhulupirika, ndipo mafala yamweya yadawapasa cidikhiro. Mafala yamweya yambapasambo cidikhiro atumiki wa Yahova ntsiku zino.
Tenepo, tin’funika kudikhirira mwakupirira thangwe Yahova akudikhirirambo mwa kupirira. Iye adalinganiza kale nthawe yakuti adzapfudze dziko lakuipali, ndipo akudikhirira kuti nthawe na ntsikuyo bzifike. (Mateu 24:36) Nthaweyo ikadzakwana bzin’dzawoneka padeca kuti bzomwe Sathani adamulewa Yahova mpsakunama. Iye an’dzapfudza Sathani pabodzi na wentse omwe ali ku mbali yace, tsono iye ‘an’dzalatiza ntsisi’ kwa ifepano.
Pomwe nthawe imweyi ikanati kufika, Yahova angacose lini mabvuto yomwe tikugumana nayo, tsono iye akutitsimikizira kuti tingakhale wakukondwa pomwe tikudikhirira. Ninga momwe Zaiya adalewera, ifepano tingakhale wakukondwa pomwe tikudikhirira kuti cinthu cicitike. (Zaiya 30:18) a Kodi n’ciyani comwe cingatithandize kukhala wakukondwa? Pana bzinthu bzinai bzomwe bzingatithandize.
BZOMWE TINGACITE KUTI TIKHALE WAKUKONDWA POMWE TIKUDIKHIRIRA YAHOVA
Mbakumbukirani bzinthu bzabwino bzomwe bzikucitika pa moyo wanu. Mambo Davide adawona bzinthu bzizinji bzakuipa pa moyo wace. (Salimo 37:35) Napo bzikhali tenepo, iye adanemba kuti: “Khala wakunyamala pamaso pa Yahova, ndipo umudikhirire na mtima wako wentse. Leka kubva ciya na munthu ali-wentse omwe bzinthu bzikumufambira bwino pa bzakuipa bzomwe akucita.” (Salimo 37:7) Davide caiyeyo adaphatisa basa malango yamweya mwa kumbakumbukira bza cipulumuso cace. Iye adakumbukirambo bza bzisimbo bzomwe Yahova adamupasa. (Salimo 40:5) Ifepano tikambakumbukirambo bzinthu bzabwino bzomwe bzikucitika pa moyo wathu sikuti bzinthu bzakuipa, tin’dzakhala wakukondwa pomwe tikudikhirira Yahova.
Mbaphatisani basa mpata omwe munawo kuti muuze winango bza Yahova. Nyakunemba Salimo 71, omwe bzikuwoneka kuti akhali Davide, adauza Yahova kuti: “Inepano nin’dzadikhira imwepo nthawe zentse ndipo nin’dzakutumbizani mwakubwereza-bwereza.” (Salimo 71:14) Kodi iye angadatumbiza tani Yahova? Iye angadauza winango bza Yahova na kuimbira nyimbo Yahova. (Salimo 71:16, 23) Ninga Davide, ifepanombo tingakhale wakukondwa pomwe tikudikhirira Yahova. Ifepano tingatumbize Yahova pomwe tikucita basa la kupalizira, pomwe tikuceza na anzathu ntsiku na ntsiku na pomwe tikumuimbira nyimbo. Mukadzakhala mukuimba nyimbo ya Umambo nthawe inango, dzakumbukireni bwino-bwino mafala yace na momwe iyo yakukucitisirani kukhala wakukondwa.
Bvumani kulimbikisidwa na abale na mpfumakazi zanu. Pomwe Davide adagumana na mabvuto, iye adauza Yahova kuti: “Nin’dzathemba dzina lanu pamaso pa atumiki wanu wakukhulupirika.” (Salimo 52:9) Ifepanombo tingatambire cilimbikiso ca Akristau anzathu sikuti pa mitsonkhano na pomwe tikupalizira nawo pabodzi basi, koma pa nthawe yomwe tikucitambo bzinthu bzinango. — Aroma 1:11, 12.
Limbisani cidikhiro canu. Pa Salimo 62:5 pambati: “Ndikudikhiriradi Mulungu mwakuderekha, thangwe cidikhiro cangu cimbacokera kwa iye.” Mpsakufunika kuti tikhale na cikhulupiro cakulimba maka-maka tikawona kuti cimaliziro ciribe kubwera pa nthawe yomwe ifepano tikhaidikhirira. Tin’funika kutsimikizira kuti Yahova an’dzakwanirisa piciro lace bziribe basa kuti pangatenge nthawe ikulu kwene-kwene tikudikhirira. Tingalimbise cikhulupiro cathu kwa Mulungu mwa kumbapfunza mapolofesiya, kuwona bzinthu bzomwe bzidakwanisika kale na kuwonambo bzinthu bzinango bzomwe Yahova ambabzifotokoza pakulewa bza iye. (Salimo 1:2, 3) Ndipo tin’funika kupitiriza kupemba “mwa mzimu wakucena” kuti tikwanise kukhala pa uxamwali bwa kulimba na Yahova pomwe tikudikhirira mapiciro ya kutipasa moyo wa kusaya kumala. — Djuda 20, 21.
Ninga Mambo Davide, khalani na citsimikizo cakuti Yahova ambawona wentse omwe akudikhirira iye ndipo ambawalatiza lufoyi lace lakusaya kumala. (Salimo 33:18, 22) Pitirizani kudikhirira Yahova mwa kumbakumbukira bzinthu bzabwino bzomwe bzikucitika pa moyo wanu, mwa kumbatumbiza Yahova, mwa kumbabvuma kulimbikisidwa na abale na mpfumakazi zanu na mwa kumbalimbisa cidikhiro canu.
a Fala lomwe lidasanduliziridwa kuti “pitirizani kudikhirira” lingathandauzembo “kufunisisa ayai kudikhirira kuti cinthu cicitike.” Bzimwebzi bzikulatiza kuti mpsakuphonyeka lini kwa ifepano kufuna kuti Yahova amalise mabvuto yentse yomwe tikugumana nayoya.
