1. Thangwe ranyi tin’funika kubvuma kutsogoleredwa na Yahova? Fotokozani.

 TIYEZEZERE kuti imwepo muli m’thengo. Muli pa ngozi thangwe m’thengomo muna bzirombo bzaukali, miti na tulombo twa ululu. Ndipo ngozi inango njakuti mungagwerembo m’bzidindi. Imwepo mungakhale wakusaya thupo mukakhala kuti muli pabodzi na munthu omwe ambakudziwa komwe muliko, thangwe angakuthandizeni kutcenkha ngozizo. Dziko lino liri ninga thengo lomwe talifotokozali. Iro lina bzinthu bzizinji bzakuipa bzomwe bzingadzonge uxamwali bwathu na Yahova. Tsono tina Mtsogoleri wakulungamiratu, omwe ni Yahova. Iye ambatikhotcerera ku ngozi ndipo ambatitsogolera mu dziko lakuipali na cakulinga cakuti tidzakwanise kutambira moyo wakusaya kumala mu dziko lipsa.

2. Kodi Yahova ambaphatisa basa ciyani kuti atitsogolere?

² Kodi Yahova ambaphatisa basa ciyani kuti atitsogolere? Cakuyamba, iye ambaphatisa basa Fala lace, Bibliya. Tsono iye ambaphatisambo basa wanthu. Mwa ciratizo, iye ambaphatisa basa “kapolo wakukhulupirika na wanzeru” kuti atipase cakudya cauzimu comwe cimbatithandiza kuti ticite bzakusankhula bza nzeru. (Mateu 24:45) Yahova ambaphatisambo basa amuna winango wanzeru kuti atitsogolere. Mwa ciratizo, iye ambaphatisa basa anyakunyang’anira dera na akulu wa gwere kuti atilimbikise na kutipasa malango yakuthandiza kuti tikwanise kupirira mabvuto yomwe timbagumana nayo. Timbatenda kwene-kwene Yahova thangwe ra kutitsogolera mu ntsiku zakumalizira zino zomwe n’zakunesa! Bzimwebzi bzimbatithandiza kuti tipitirize kukhala pa uxamwali bwakulimba na Yahova na kutithandizambo kukhala wakukondwa tsapano na kudzakhalambo wakukondwa kutsogolo.

3. Kodi tin’cezerana ciyani mu nkhani ino?

³ Tsono, nthawe zinango bzingakhale bzakunesa kuteweza malango ya Yahova maka-maka yakakhala kuti yaperekedwa na wanthu wakuperewera. N’thangwe ranyi? Pinango malango yomwe iwo angatipase yangatidekere lini ayai tingawone ninga kuti malangoyo nja nzeru lini ndipo njakucokera lini kwa Yahova. Pa nthawe ninga zimwezi tin’funika kukhala na citsimikizo cakuti Yahova ndiye  omwe akutsogolera wanthu wace ndipo kuteweza malango yace kumbabweresa bzisimbo bzizinji. Ndipopa kuti tipitirize kukhulupira malango yakucokera kwa Yahova, mu nkhani ino tin’cezerana nfundo zitatu izi: (1) Momwe Yahova adatsogolerera wanthu wace mu nthawe za m’Bibliya, (2) momwe iye ambatitsogolerera ntsiku zino na (3) phindu lomwe timbakhala nalo tikateweza malango yace.

MOMWE YAHOVA ADATSOGOLERERA AJIRAYERI

4-5. Kodi Yahova adalatiza tani kuti akhaphatisa basa Mozeji kuti atsogolere Ajirayeri? (Onani cithunzi-thunzi pa tsamba lakuyamba.)

⁴ Yahova adasankhula Mozeji kuti akacose Ajirayeri mu dziko la Edjipito. Ndipo iye adalatiza Ajirayeriwo bzizindikiro bzakucita kuwoneka na maso bzomwe bzikhalatiza kuti iye akhawatsogolera mwakuphatisa basa Mozeji. Masikati iye akhawatsogolera na mtambo ndipo usiku akhawatsogolera na moto. (Ekisodo 13:21) Mozeji adatewera mtamboyo, ndipo udawafikisa ku Nyanza Ifuira. Patsogolo pace, Aedjipito adatewera Ajirayeri. Pomwe Ajirayeri adawona Aedjipitowo, adabva mantha thangwe akhakumbuka kuti angadawapha. Iwo adawona ninga kuti Mozeji alibe kucita bwino kuwayendesa ku Nyanza Ifuira kule. Tsono Mozeji akhalibe kuphonyesa. Yahova ndiye adacitisa Mozeji kuti ayendese wanthu wace kumwekule. Iye adacita utowa bzimwebzire. (Ekisodo 14:2) Patsogolo pace, Mulungu adawapulumusa mu njira yakudabwisa kwene-kwene. — Ekisodo 14:26-28.

⁵ Pomwe padapita magole 40, Mozeji adapitiriza kuthemba mtambo kuti atsogolere wanthu wa Yahova mu dambo. a Pa nthawe inango, Yahova adaikha mtamboyo padzaulu pa tendi la Mozeji pomwe Ajirayeri wentse akhakwanisa kuuwona. (Ekisodo 33:7, 9, 10) Yahova akhalewalewa na Mozeji kucokera mu mtambomo. Patsogolo pace, Mozejiyo akhambauza wanthuwo bzomwe Yahova walewa. (Salimo 99:7) Ajirayeri akhakwanisa kuwona kuti Yahova akhaphatisa basa Mozeji kuti awatsogolere.

6. Kodi n’ciyani comwe Ajirayeri adacita pomwe adapasidwa malango ya Yahova? (Numero 14:2, 10, 11)

⁶ Bzakupasa ntsisi mpsakuti Ajirayeri winango alibe kubvuma kuti Mozeji akhaphatisidwa basa na Yahova kuti awatsogolere. (Werengani Numero 14:2, 10, 11.) Mwakubwereza-bwereza, iwo adalamba kubvuma kuti Yahova akhaphatisa basa Mozeji kuti awatsogolere. Ndipopa, Yahova alibe kulekerera kuti wanthu amwewa apite mu Dziko Lakupiciridwa. — Numero 14:30.

7. Fotokozani bziratizo bza wanthu omwe adabvuma kutsogoleredwa na Yahova. (Numero 14:24) (Onani cithunzi-thunzi.)

⁷ Tsono, Ajirayeri winango adabvuma kutsogoleredwa na Yahova. M’bodzi wa wanthu amwewa akhali Kalebe. Pakulewa bza iye, Yahova adati: “Kalebe . . . abvuma kunditewera na mtima wentse.” (Werengani Numero 14:24.) Mulungu adasimba Kalebe, mwakuti iye adacita kusankhula yekha komwe angadakhala mu dziko la Kanani. (Djoswa 14:12-14) Ajirayeri omwe adapita mu Dziko Lakupiciridwa mbale omwe adabvumambo kutsogoleredwa na Yahova. Pomwe Djoswa adapita mbuto ya Mozeji kuti atsogolere Ajirayeri, Ajirayeriwo “adamulemekeza kwene-kwene mu ntsiku zentse za moyo wace.” (Djoswa 4:14) Ndipopa, Yahova adawasimba mwa kuwapasa dziko lomwe akhadawapicira. — Djoswa 21:43, 44.

8. Kodi Yahova akhaphatisa basa yani kuti atsogolere wanthu wace mu nthawe za amambo? (Onani cithunzi-thunzi.)

⁸ Pomwe padapita magole mazinji, Yahova adasankhula atongi kuti ambatsogolere wanthu wace. Ndipo mu nthawe zomwe Ajirayeri akhatongedwa na amambo, Yahova adaikha apolofeta kuti ambapase malango wanthu wace. Amambo wakukhulupirika akhabvera malango yomwe akhapasidwa na apolofetawo. Mwa ciratizo, Mambo Davide adakhala wakubzicepesa ndipo adabvuma  malango yomwe adapasidwa na Natani. (2 Samuyeli 12:7, 13; 1 Nkhani 17:3, 4) Mambo Jewosafati adateweza malango yomwe adapasidwa na Jaaziyeri ndipo adalimbikisa wanthu wa ku Djuda kuti “akhulupire apolofeta wa Mulungu.” (2 Nkhani 20:14, 15, 20) Pomwe Mambo Ezekiya adagumana na mabvuto mu utongi bwace, iye adakumbira thandizo kwa mpolofeta Zaiya. (Zaiya 37:1-6) Amambo omwe akhabvuma kutsogoleredwa na Yahova akhasimbidwa ndipo wanthu wa Mulungu akhakhala wakukhotcerereka. (2 Nkhani 20:29, 30; 32:22) Bzikhacita kuwonekeratu padeca kuti Yahova akhaphatisa basa apolofeta kuti awatsogolere. Tsono amambo winango kuphatanidzambo Ajirayeri winango akhabvera lini apolofeta wa Yahova. — Jeremiya 35:12-15.

MOMWE YAHOVA ADATSOGOLERERA AKRISTAU WAKUYAMBIRIRA

9. Kodi Yahova adaphatisa basa yani kuti atsogolere wanthu wace mu nthawe ya Akristau wakuyambirira? (Onani cithunzi-thunzi.)

⁹ Pa Pentekosite wa mu gole la 33 EC, Yahova adakhazikisa gwere lacikristau. Kodi iye adatsogolera tani Akristau wakuyambirira wale? Iye adasankhula Jezu kuti akhale msolo wa gwere. (Aefezo 5:23) Tsono Jezuyo akhalewalewa lini na Mkristau ali-yentse payekha-payekha kuti amuuze bzomwe iye akhafunika kucita. Iye adaphatisa basa apostolo na akulu ku Jeruzalemu kuti atsogolere wanthuwo. (Mabasa 15:1, 2) Ndipo akulu adaikhidwambo kuti ambatsogolere magwere. — 1 Atesalonika 5:12; Tito 1:5.

10. (a) Kodi n’ciyani comwe Akristau azinji adacita pomwe adapasidwa malango? (Mabasa 15:30, 31) (b) Thangwe ranyi wanthu winango akhalamba kubvera wale omwe akhadasankhulidwa na Yahova kuti awatsogolere? (Onani kwadru yakuti “ Thangwe Ranyi Wanthu Winango Akhalamba Kutsogoleredwa?”)

¹⁰ Kodi Akristau wakuyambirira wale adabvuma kutsogoleredwako? Mtawiro ngwakuti, inde. Akristau azinji akhakomedwa kwene-kwene kuphatisa basa malango yomwe akhapasidwa. “Iwo adakondwa kwene-kwene na mafala yakulimbikisa” yomwe akhapasidwa. (Werengani Mabasa 15:30, 31.) Tsono kodi Yahova ambatsogolera tani wanthu wace ntsiku zino?

MOMWE YAHOVA AMBATITSOGOLERERA NTSIKU ZINO

11. Fotokozani bzinthu bzomwe bzikulatiza momwe Yahova akuthandizira wale omwe ambatsogolera ntsiku zino.

¹¹ Yahova akupitiriza kutsogolera wanthu wace ntsiku zino. Iye akucita bzimwebzi mwakuphatisa basa Bibliya na Mwana wace, omwe ni msolo wa gwere. Kodi mukukwanisa kuwona kuti Yahova  akupitiriza kuphatisa basa amuna wakukhulupirika mu ntsiku zathu zino kuti atsogolere wanthu wace? Inde. Mwa ciratizo, onani bzomwe bzidacitika pambuyo pa gole la 1800. Charles Taze Russell na anzace adayamba kubvesesa kuti gole la 1914 lingadakhala gole lakufunika kwene-kwene pa kukhazikisidwa kwa Umambo bwa Mulungu. (Daniyeli 4:25, 26) Kuti iwo akwanise kubvesesa bzimwebzi, adafufudza polofesiya ya m’Bibliya yakulewa bza nkhani imweyi. Kodi Yahova adawatsogolera pa kufufudza kwawoko? Inde. Bzomwe bzidacitika mu 1914 bzidalatiza padeca kuti Umambo bwa Mulungu bukhadayamba kutonga. Nkhondo Yakuyamba ya pa Dziko Lentse idayambika ndipo kudabwerambo matenda yakusiyana-siyana, bziteke-teke na njala. (Luka 21:10, 11) Bzikuwonekeratu padeca kuti Yahova akhaphatisa basa Akristau wakukhulupirika wale kuti athandize wanthu wace.

12-13. Kodi ni makonzedwe yaponi yomwe Bungwe Lakutonga lidakhazikisa pa nthawe ya Nkhondo Yaciwiri ya pa Dziko Lentse?

¹² Onanimbo bzomwe bzidacitika pa Nkhondo Yaciwiri ya pa Dziko Lentse. Pomwe abale wa udindo wa ku likulu lathu la pa dziko lentse adapfunza Apokalipse 17:8, iwo adakwanisa kubvesesa kuti nkhondo imweyi ingadacitisa lini kuti Armagedo icitike. Iwo adadziwa kuti pambuyo pa nkhondoyo, pangadakhala na nthawe ya mtendere yomwe Mboni za Yahova zingadaphatisa basa kuti zipalizire mwakukwanira mafala yabwino ya Umambo. Napo kuti bzikhawoneka ninga kuti bzikhali bzakusaya nzeru pa nthawe imweyire, abale adakhazikisa Xikola ya Jileyade kuti apfunzise amisiyonario momwe angadapalizirira na kupfunzisa wanthu pa dziko lentse la pantsi. Ndipo amisiyonariowo adatumizidwa ku madziko yanango, napo pa nthawe ya nkhondo. Kuthimizira bzimwebzi, kapolo wakukhulupirika na wanzeru adakhazikisa Xikola ya Utumiki bwa Mulungu b kuti apfunzise abale wentse m’magwere kuti akhale apalizi wabwino na apfunzisi wabwino. Bzimwebzi bzikhakonzekeresa wanthu wa Mulungu kuti adzacite basa lakupalizira lomwe lingadadzacitika kutsogolo.

¹³ Tikawona bza m’mbuyo, timbakwanisa kuwona kuti Yahova akhatsogolera wanthu wace mu nthawe imweyire napo kuti ikhali nthawe yakunesa. Kuyambira pa nthawe ya Nkhondo Yaciwiri ya pa Dziko Lentse, wanthu wa Yahova m’madziko mazinji ambapalizira mwakutsudzuka. Bzimwebzi bzacitisa kuti wanthu azinji afike pa kudziwa cadidi, ndipo iwo akupitiriza kupalizira wanthu pa dziko lentse la pantsi.

14. Thangwe ranyi tin’funika kukhulupira malango yomwe timbapasidwa na gulu la Yahova pabodzi na akulu? (Apokalipse 2:1) (Onani cithunzi-thunzi.)

¹⁴ Ntsiku zino, abale wa m’Bungwe Lakutonga ambathemba kutsogoleredwa na Jezu. Iwo ambafuna kuti malango yomwe ambapasa abale yawoneke kuti yambacokera kudzulu. Tsono iwo ambaphatisa basa anyakunyang’anira dera na akulu kuti apereke malango m’magwere. c Akulu wakudzozedwa pabodzi na akulu wentse m’magwere ali ku “boko . . . lamadidi” la Jezu. (Werengani Apokalipse 2:1.) Wanthu amwewa mbakuperewera ndipo ambaphonyambo. Mozeji, Djoswa na apostolo akhaphonyambo nthawe zinango. (Numero 20:12; Djoswa 9:14, 15; Aroma 3:23) Napo bziri tenepo, Kristu akupitiriza kutsogolera kapolo wakukhulupirika na wanzeru pabodzi na akulu wa gwere, ndipo iye an’pitiriza kucita bzimwebzi “ntsiku zentse mpaka kuphampha kwa dzikoli.” (Mateu 28:20) Ifepano tina mathangwe mazinji yomwe yambaticitisa kukhulupira malango yomwe iye ambatipasa mwakuphatisa basa amuna wakusankhulidwa omwe ambatitsogolera.

TIKATEWEZA MALANGO YA YAHOVA TIMBAGUMANA PHINDU

15-16. Kodi n’ciyani comwe abale winango adacita kuti ateweze malango, ndipo imwepo mwapfunza ciyani na bzimwebzi?

¹⁵ Tikapitiriza kuteweza malango ya Yahova timbagumana phindu, napo tsapano. Mwa ciratizo, Andy na Robyn adaphatisa basa malango yomwe adabva yakukhala na moyo wakusaya kufuna bzizinji. (Mateu 6:22) Bzimwebzi bzidacitisa kuti iwo akwanise kuthandizira basa lakumanga Nyumba za Umambo na nyumba zinango za gulu lathu. Mpfumakazi Robyn idati: “Nthawe zinango tikhakhala m’kanyumba kang’ono kwene-kwene, komwe ne kakhalibe mbuto yakuphikira. Ndipo ndidagulisa kamera zangu zakucosera mafoto napo kuti ndikhafuna kwene-kwene kucosa foto. Inepano ndidalira kwene-kwene thangwe ra bzimwebzi. Tsono ndidawona kuti bzikhali bwino kutewezera mkazi wa Abalahamu, Sara, mwakuleka kukumbukira bzinthu bza m’mbuyo. Ndikhafunika kukhala wakukondwa na bzinthu bzomwe ningadacitira Yahova.” (Ahebereu 11:15) Kodi ni phindu liponi lomwe banjali lidakhala nalo thangwe ra kubzipereka kwawoko? Mpfumakazi Robyn idati: “Ndife wakukondwa kwene-kwene thangwe ra kudziwa kuti tikupasa Yahova bzinthu bzentse bzomwe tinabzo. Inepano na abayangu tikambacita basa lomwe Yahova adatipasa timbakwanisa kuwona momwe moyo un’dzakhalira mu dziko lipsa.” Ndipo bayace, Andy, adatawiriza bzimwebzi mwa kulewa kuti: “Ndife wakukondwa kwene-kwene thangwe ra kuphatisa basa nthawe yathu na mphanvu zathu kuti tithandizire Umambo.”

 ¹⁶ Kodi ni phindu linango liponi lomwe timbakhala nalo tikambateweza malango ya Yahova? Pomwe Marcia adamaliza kupfunza, iye akhafunisisa kuteweza malango yomwe adabva, ndipo adafuna kucita upainiya. (Mateu 6:33; Aroma 12:11) Iye adati: “Ndidapasidwa mwayi wakuti ndipfunze ku universidade magole manai. Tsono ndikhafuna kucita bzizinji pa kutumikira Yahova. Ndipopa, ndiribe kubvuma kupfunza ku universidade, koma ndidasankhula kupfunza basa la nthawe yakucepa, lomwe lingadandithandiza kugumana kobiri pomwe ndikucita upainiya. Cimweci cidakhala cakusankhula cabwino kwene-kwene comwe ndidacita. Ndikukondwa kwene-kwene pa basa langu la upainiya thangwe nimbabzitongera ndekha, ndipo nimbakwanisambo kuthandizira pa Beteli na kucita bzinthu bzinango pa kutumikira Yahova.”

17. Kodi ni phindu liponi lomwe timbakhala nalo tikapitiriza kuteweza malango ya Yahova? (Zaiya 48:17, 18)

¹⁷ Nthawe zinango, timbatambira malango ya gulu la Yahova, yomwe yambatikhotcerera. Timbacenjezedwa kuti timbaleke kufuna kwene-kwene kobiri na kucita bzinthu bzomwe bzingaticitise kuleka kubvera malamulo ya Yahova. Tikateweza malango yamweya timbagumana phindu. Timbakhala na cikumbu-mtima cakucena ndipo timbatcenkha mabvuto mazinji. (1 Timotio 6:9, 10) Bzimwebzi bzimbaticitisa kuti titumikire Yahova na mtima wathu wentse, ndipo bzimbaticitisambo kuti tikhale wakukondwa na wa mtendere. — Werengani Zaiya 48:17, 18.

18. N’thangwe ranyi imwepo mukufuna kupitiriza kuteweza malango ya Yahova?

¹⁸ Yahova an’dzapitiriza kuphatisa basa amuna omwe iye ambawasankhula kuti atipase malango pa citsautso cikulu na mu Utongi bwa Magole 1000 bwa Kristu. (Salimo 45:16) Kodi tin’dzapitiriza kubvera malangoyo napo kuti yakubverana lini na bzomwe ifepano tikufuna? Bzin’dzakhala bzakupusa kwene-kwene kucita bzimwebzi penu timbabvuma kutsogoleredwa na Yahova ntsiku zino. Tenepo, mbatipitirizeni nthawe zentse kuteweza malango ya Yahova, kuphatanidza yale yomwe iye ambayapereka mwakuphatisa basa amuna omwe adawasankhula kuti atinyang’anire. (Zaiya 32:1, 2; Ahebereu 13:17) Tikacita bzimwebzi, timbalatiza kuti timbathemba Mtsogoleri wathu, Yahova, omwe akutitsogolera kuti tileke kugumana na mabvuto nakuti tidzatambire moyo wakusaya kumala m’dziko lipsa.