NTHAWE zinango anembi wa Bibliya akhabwerezera mafala yomwe yanembedwa kale ayai kulewedwa kale. Mbatiwoneni mathangwe matatu yomwe yadacitisa kuti anembiwo acite bzimwebzi:

Nthawe yomwe mafalayo yadanembedwa. Mu nthawe ya Ajirayeri, wanthu akhalibe bukhu lawo-lawo la Malamulo. Iwo akhambabva kuwerengedwa kwa Malamuloyo pomwe akhagwezekana mbuto ibodzi pa tendi la mkonkhano. (Deuteronomiyo 31:10-12) Nthawe zinango, mafala yomwe yakhawerengedwayo yakhabveka lini thangwe ra kuwanda kwa wanthuwo. (Nehemiya 8:2, 3, 7) Pa nthawe zimwezi, kubwerezera nfundo zikulu-zikulu kukhathandiza wanthuwo kukumbukira mafalayo na kuti ayaphatise basa. Kubwerezera mafala yanango kukhathandizambo wanthuwo kukumbukira nfundo zakufunika za Malamulo ya Mulungu. — Levitiko 18:4-22; Deuteronomiyo 5:1.

Kanembedwe ka mafala. Mbali zinango za m’Bibliya zidanembedwa ninga nyimbo. Mwa ciratizo, mabukhu ninga Masalimo, Nyimbo ya Salomau na Maliro yadanembedwa ninga nyimbo. Nthawe zinango nyimbo zikhakhala na mafala yomwe yakhabwerezeredwa. Bzimwebzi bzikhacitisa kuti nfundo ya nyimboyo ibveseseke. Mwa ciratizo, onani mafala yomwe yali pa Salimo 115:9-11. Mafalayo yambati: “Iwe Jirayeri, khulupira Yahova: Iye ndiye thandizo lako na cakukhotcera cako. Iwe nyumba ya Aroni, khulupira Yahova: Iye ndiye thandizo lako na cakukhotcera cako. Imwe omwe mumbagopa Yahova, khulupirani Yahova: Iye ndiye thandizo lanu na cakukhotcera canu.” Kubwerezera mafala yamweya kukhathandiza anyakuimba kumbakumbukira nfundo zimwezi.

Kuti nfundo zakufunika zibveseseke. Anembi wa Bibliya nthawe zinango akhabwerezera nfundo zakufunika. Mwa ciratizo, pomwe Yahova adauza Ajirayeri kuti aleke kudya mulopa, iye adacitisa kuti Mozeji abwerezere kulewa mathangwe yace kazinji-kentse. Mulungu akhafuna kubvekesa kuti moyo wa nyama uli m’mulopa, ayai kuti, mulopa umbaimira moyo. (Levitiko 17:11, 14) Pomwe apostolo na akulu ku Jeruzalemu adafotokoza bzinthu bzomwe akhafunika kutcenkha kucita kuti Mulungu akomedwe nawo, iwo adabvekesa pomwe nfundo yakuti akhafunika lini kudya mulopa. — Mabasa 15:20, 29.

Yahova akhafuna lini kuti kubwerezera mafala ya m’Bibliya kukhale ninga mwambo. Mwa ciratizo, Jezu adati: “Pomwe mukupemba, lekani kumbabwerezera-bwerezera mafala.” (Mateu 6:7) Tsono iye adalewa bzinthu bzomwe tingambabzilewe mu mpembo bzomwe bzimbabverana na kufuna kwa Mulungu. (Mateu 6:9-13) Tenepo, napo kuti timbabwerezera lini bzinthu bzibodzi-bodzi pa kupemba, ifepano tingabwerezere nfundo zomwe tafotokoza kale mu mpembo. — Mateu 7:7-11.

Pana mathangwe yabwino yomwe yambacitisa Bibliya kubwerezera mafala na nfundo zinango. Ni njira ibodzi yomwe Mpfunzisi wathu Mkulu ambatipfunzisira kuti tigumane phindu. — Zaiya 48:17, 18.