NKHANI YAKUPFUNZA 17
Imwepo Ndimwe Wakufunika kwa Yahova!
‘Yahova ambakomedwa na wanthu wace.’—PSALYMO 149:4.
NYIMBO 108 Lufoyi la Mulungu Ndakukhulupirika
BZOMWE TIN’PFUNZA *
Baba wathu wakudzulu ‘ambakomedwa’ na ali-wentse wa ifepano (Onani ndime 1)
1. Kodi n’ciyani comwe Yahova ambawona kwa atumiki wace?
YAHOVA MULUNGU ‘ambakomedwa na wanthu wace.’ (Psalymo 149:4) Mafala yamweya yambatikondwesa kwene-kwene! Yahova ambawona makhalidwe yathu yabwino, bzomwe tingakwanise kucita, ndipo ambatithandiza kuti tikhale axamwali wace. Tikapitiriza kukhala wakukhulupirika kwa iye, tin’dzakhala naye pa uxamwali kuyenda na kuyenda!—Juwau 6:44.
2. Thangwe ranyi wanthu winango bzimbawanesa kukhulupira kuti Yahova ambawafuna?
2 Wanthu winango angalewe kuti: ‘Ndikudziwa kuti Yahova ambafuna wanthu wace ninga thimu, tsono ningadziwe tani kuti iye ambandifuna pa ndekha?’ Kodi n’ciyani cingacitise wanthu kucita mbvunzo umweyu? Oksana *, omwe adakhala na moyo wakunesa pomwe akhali mwana, adalewa kuti: “Pomwe ndidabatizidwa, inepano ndidakomedwa kwene-kwene, ndipo ndidayamba kucita upainiya. Tsono, pomwe padapita magole 15, ndidayamba kukumbukira bzinthu bzakuipa bzomwe bzidandicitikira pomwe ndikhali mwana. Ndidakumbuka kuti ndikhadaluza uxamwali na Yahova, ndipo iye akhandifuna lini pomwe.” Mpfumakazi Yua, omwe ni mpainiya, adagumanambo na mabvuto pomwe akhali mwana. Iye adalewa kuti: “Ndidabzipereka kwa Yahova kuti ndimukondwese. Koma ndikhana citsimikizo centse cakuti iye cipo acidzandifuna.”
3. Kodi mu nkhani ino tin’pfunza ciyani?
3 Ninga Akristau wakukhulupirika omwe tawafotokoza kudzauluwa, imwepo mungafune kwene-kwene Yahova, tsono pa nthawe ibodzi-bodziyo mungapenukire kuti iye ambakufunani. Thangwe ranyi tin’funika kutsimikiza kuti iye ambatifunadi? Ndipo n’ciyani cingakuthandizeni mukayamba kukumbuka kuti Yahova ambakufunani lini? Mu nkhani ino tin’cezerana mitawiro ya mibvunzo imweyi.
KUPENUKIRA LUFOYI LA YAHOVA N’CINTHU CAKUGOPSWA
4. Thangwe ranyi kupenukira kuti Yahova ambatifuna n’cinthu cakugopswa?
4 Tikambatsimikiza kuti Yahova ambatifuna, ifepano tin’dzacita ciri-centse kuti timutumikire bziribe basa kuti tikugumana na mabvuto pa moyo wathu. Tsono tikambapenukira kuti Mulungu ambatisamalira, ‘mphanvu zathu zin’dzacepa.’ (Mimwani 24:10) Ndipo tikayamba kukumbuka kuti Mulungu ambatifuna lini, tin’dzakwanisa lini kupirira mayezo ya Sathani.—Wayefezo 6:16.
5. Kodi n’ciyani cidacitika na abale na mpfumakazi omwe akhapenukira kuti Yahova akhawafuna?
5 Akristau winango wakukhulupirika ntsiku zino ambatepa mwauzimu thangwe ra kupenukira kuti Yahova ambawafuna. Mkulu munango wa gwere wakucemeredwa James adalewa kuti: “Napo kuti ndikhatumikira pa Beteli ndipo ndikhathandizira gwere la cirewedwe ca kunja, koma ndikhabzibvunza penu Yahova akhakomedwa na nyongo yomwe ndikhacitayo. Mpaka ndidayamba kubzibvunza penu Yahova akhabva mipembo yangu.” Eva, omwe akucitambo utumiki bwa nthawe zentse adalewa kuti: “Ndidapfunza kuti ni ngozi kukumbuka kuti Yahova ambatifuna lini, thangwe bzingacitise kuti basa lomwe tikucitira Yahova lireke kufamba bwino. Ifepano tingaleke kufuna kucitira bzinthu Mulungu ndipo tingasiye kukhala wakukondwa pa kutumikira Yahova.” Michael, omwe ni mpainiya na mkulu wa gwere, adalewa kuti: “Imwepo mukasaya kukhulupira kuti Mulungu ambakusamalirani, pang’ono na pang’ono mun’dzasiya kumufuna.”
6. Kodi n’ciyani comwe tin’funika kucita makumbukidwe yakuti Mulungu ambatifuna lini yakatibwerera?
6 Bziratizo bza abalewa bzikulatiza kuti makumbukidwe yamweya yangadzonge cikhulupiro cathu. Tsono n’ciyani comwe tin’funika kucita makumbukidwe yakuti Mulungu ambatifuna lini yakatibwerera? Tin’funika kuyathamangisa mwakamfulumize! Kumbirani Yahova kuti akuthandizeni kucosa ‘makumbukidwe yomwe yakukusayisani mtendere’ muciikha ‘mtendere wa Mulungu omwe un’dzakoya mitima yanu pabodzi na luso lanu lakukumbuka.’ (Psalymo 139:23; Wafiripo 4:6, 7) Ndipo kumbukirani kuti muli lini mwekha. Abale na mpfumakazi zathu zinango wakukhulupirika akulimbanambo na makumbukidwe yakuphonyeka. Napo atumiki wa Yahova wa kale-kale adalimbanambo na makumbukidwe yakuphonyeka. Onani bzomwe tingapfunze na ciratizo ca mpostolo Paulo.
BZOMWE TINGAPFUNZE NA BZOMWE BZIDACITIKA NA PAULO
7. Kodi Paulo adagumana na mabvuto yaponi?
7 Kodi imwepo nthawe zinango mumbabzibva kuti mabasa yomwe munayo yakuwandirani, ndipo mukutazira kucita bzinthu bzinango bzomwe mumbafuna kucita? Penu mun’ti inde, imwepo mun’bvesesa bzomwe bzidacitikira Paulo. Iye akhambacita thupo kwene-kwene, sikuti na gwere libodzi, koma na ‘magwere yentse.’ (2 Wakolinto 11:23-28) Kodi imwepo mukugumana na bvuto la matenda lomwe likukucitisani kusaya kukhala wakukondwa? Paulo adabonera na ‘munga m’thupi’ yomwe pinango yakhali matenda yomwe akhatazira kuyamalisa. (2 Wakolinto 12:7-10) Kodi imwepo mumbabzibva kuti mudatepa thangwe ra khalidwe lanu? Bzimwebzi bzidacitikirambo Paulo. Iye adabzicemera kuti ‘nyakubonerane,’ thangwe rakuti akhacita nyongo yakuti acite bzinthu bzabwino, tsono bzikhamunesa.—Waroma 7:21-24.
8. Kodi n’ciyani comwe cidathandiza Paulo kuti apirire mabvuto yomwe akhagumana nayo?
8 Napo kuti Paulo adagumana na mabvuto yentseneya, iye adapitiriza kutumikira Yahova. Kodi n’ciyani cidamupasa mphanvu kuti apitirize kumutumikira? Napo kuti Paulo akhadziwa kuti akhacita bzinthu bzinango bzakuphonyeka thangwe ra kuperewera, iye akhakhulupira kwene-kwene cakulombolera. Paulo akhayadziwambo mafala ya Jezu yakuti ‘ali-wentse omwe alatize cikhulupiro kuna Jezu an’dzakhala na moyo wakusaya kumala.’ (Juwau 3:16; Waroma 6:23) Inde, Paulo akhali m’bodzi wa wanthu omwe akhakhulupira ntsembe ya cakulombolera. Iye akhana citsimikizo centse cakuti Yahova ngwakukonzeka kulekerera wanthu omwe acita pikado ikulu akakungula.—Psalymo 86:5.
9. Kodi tikupfunza ciyani na mafala ya Paulo yomwe yali pa Wagalata 2:20?
9 Paulo akhakhulupira kuti Mulungu akhamufuna thangwe ra kuti Mulunguyo adatumiza Jezu kuti adzamufere. (Werengani Wagalata 2:20. *) Onani mafala yakumalizira ya vesiri yomwe yakutsimikizira bzimwebzi. Paulo adalewa kuti: ‘Mwana wa Mulungu . . . adandifuna ndipo adabzipereka thangwe ra ine.’ Paulo alibe kubzibva kuti akhali munthu wakuipa, mwakuti Mulungu angadamufuna lini. Ndipo iye alibe kukumbuka kuti: ‘Yahova ambafuna abale wangu, tsono inepano pinango pentse ambandifuna lini.’ Paulo adakumbusa Akristau wa ku Roma kuti: ‘Pomwe tikhana pikado, Kristu adatifera.’ (Waroma 5:8) Palibe cinthu comwe cingatazise Mulungu kutifuna!
10. Kodi tikupfunza ciyani na Waroma 8:38, 39?
10 Werengani Waroma 8:38, 39. * Paulo akhadziwa kuti lufoyi la Mulungu ndamphanvu kwene-kwene. Iye adanemba kuti palibe comwe ‘cin’dzakwanisa kutilekanisa na lufoyi la Mulungu.’ Ndipo iye adadziwa momwe Yahova adacitira bzinthu mwakupirira na mtundu wa Ajirayeri. Ndipo akhadziwambo momwe Yahova adamulatizira ntsisi. M’mafala yanango, Paulo akhalewa kuti: ‘Yahova adatumiza Mwana wace kuti adzandifere, ndipo nimbapenukira lini kuti iye ambandifuna.’—Waroma 8:32.
Bzinthu bzakufunika kwa Yahova ni bzomwe tikucita tsapano na bzomwe tin’dzacita kutsogolo, sikuti bzomwe tidaphonya kale-kale (Onani ndime 11) *
11. Napo kuti Paulo adacita pikado ninga zomwe zidanembedwa pa 1 Timotio 1:12-15, thangwe ranyi iye akhatsimikiza kuti Mulungu akhamufuna?
11 Werengani 1 Timotio 1:12-15. * Pa nthawe inango Paulo alibe kubzibva bwino thangwe ra kukumbukira bzinthu bzomwe adacita pomwe akhanati kukhala Mkristau. Ndipopa iye adabzicemera kuti ‘ndine nyapikado wakuyambirira.’ Pomwe Paulo akhanati kupfunza cadidi iye adaboneresa Akristau m’mizinda yakusiyana-siyana. Winango wa iwo adawaikha m’kawoko ndipo adatawiriza kuti winango aphedwe. (Mabasa 26:10, 11) Kodi mukukumbukira momwe Paulo angadabvera bzingadakhala kuti awona Mkristau tswaka, omwe abereki wace adaphedwa thangwe rakuti iye adabvuma kuti bzimwebzo bzicitike? Paulo adakhumbula thangwe ra bzinthu bzakuipa bzomwe iye adacitabzi, tsono iye akhadziwa kuti palibe comwe angadacita kuti acinje bzimwebzo. Pauloyo adabvuma kuti Kristu adafera iye, ndipopa iye adanemba mwakutsimikiza kuti: ‘Mwa kudeka mtima kukulu kwa Mulungu ndidakhala ninga momwe ndiririmu.’ (1 Wakolinto 15:3, 10) Kodi tikupfunza ciyani na nkhani imweyi? Bvumani kuti Kristu adakuferani, ndipo adacitisa kuti bzikwanisike kuti imwepo mukhale pa uxamwali na Yahova. (Mabasa 3:19) Bzinthu bzakufunika kwa Mulungu, ni bzomwe tikucita tsapano na bzomwe tin’dzacita kutsogolo, sikuti bzomwe tidaphonya kale-kale penu tikhali kale Mboni ya Yahova ayai ne.—Zaiya 1:18.
12. Kodi mafala yomwe yali pa 1 Juwau 3:19, 20, yangatithandize tani tikabzibva kuti tin’themera lini ayai timbafunidwa lini?
12 Imwepo mukakumbukira kuti Jezu adafa kuti ampsinkhe pikado zanu, pinango mungalewe kuti: ‘Ndiribe kuthemera mphaso imweyi.’ Thangwe ranyi mungakumbuke tenepoyo? Mtima wathu wakuperewera, ungatipumpse, uciticitisa kubzibva kuti tin’themera lini ayai timbafunidwa lini. (Werengani 1 Juwau 3:19, 20. *) Bzimwebzi bzikacitika, tin’funika kukumbukira kuti ‘Mulungu ni mkulu kuposa mitima yathu.’ Napo kuti nthawe zinango tingabzibve kuti Yahova ambatifuna lini, ayai an’dzatilekerera lini, tsono cadidi n’cakuti Baba wathu wakudzulu ambatifuna ndipo an’dzatilekerera tikamuphonyera. Tin’funika kupfunza kukhulupira kuti Yahova ambatifuna. Kuti tikwanise kucita bzimwebzi, tin’funika kumbapfunza Fala lace kawiri-kawiri, kumbapemba kwa iye nthawe zentse, na kumbatsonkhana na atumiki wace wakukhulupirika. Thangwe ranyi mpsakufunika kuti timbacite bzinthu bzimwebzi?
KODI PFUNZIRO LA BIBLIYA, MPEMBO, NA AXAMWALI WAKUKHULUPIRIKA BZINGATITHANDIZE TANI?
13. Kodi kupfunza Fala la Mulungu kungatithandize tani? (Onanimbo kwadru yakuti “ Kodi Fala la Mulungu Lidawathandiza Tani?”)
13 Mbapfunzani Fala la Mulungu ntsiku zentse. Mukacita bzimwebzi, imwepo mun’dzakwanisa kuwona makhalidwe mazinji yabwino ya Yahova. Ndipo mun’dzakwanisambo kubvesesa kuti iye ambakufunani kwene-kwene. Pa ntsiku iri-yentse mukambakumbukira bzomwe mukupfunza m’Fala la Mulungu, bzin’dzakuthandizani kukumbuka bwino, na ‘kulungamiza bzinthu’ m’makumbukidwe mwanu na mu mtima mwanu. (2 Timotio 3:16) Mkulu munango wa gwere wakucemeredwa Kevin, omwe akhalimbana na makumbukidwe yakubziwona kuti alibe basa, adalewa kuti: “Kuwerenga Psalymo 103 na kukumbukira bzomwe ndawerengabzo, kudandithandiza kucinja makumbukidwe yangu na kubvesesa kuti Yahova ambandiwona tani.” Eva, omwe tamufotokoza kale m’mbuyomu, adalewa kuti: “Kuphampha kwa ntsiku iri-yentse, nimbapambula nthawe yakukumbukira bzinthu bzomwe Yahova ambabziwona kuti mpsakufunika. Bzimwebzi bzimbandithandiza kukhala na mtendere mu mtima, ndipo cikhulupiro cangu cimbakhala cakulimba.”
14. Kodi mpembo ungatithandize tani?
14 Mbapembani nthawe zentse. (1 Watesalonika 5:17) Kuti mukhale pa uxamwali bwakulimba na mwanzanu, bzimbafunika kuceza naye na kumufotokozera bza mu mtima mwanu. Mpsibodzi-bodzimbo na uxamwali bomwe tinabo na Yahova. Ifepano timbafunika kumufotokozera momwe tikubvera, bzomwe tikukumbuka, na thupo lathu pomwe tikupemba. Tikambacita bzimwebzi timbakhala tikulatiza kuti timbamukhulupira ndipo timbadziwa kuti iye ambatifuna. (Psalymo 94:17-19; 1 Juwau 5:14, 15) Yua, omwe agumidwa kumayambiriro ule, adalewa kuti: “Pa kupemba, nimbauza lini Yahova bzinthu bzomwe bzandicitikira pa ntsikuyo basi. Koma nimbakhala wakutsudzuka, ndicimufotokozera Yahovayo bzomwe ndikukumbuka na momwe ndikubvera. Ndipo pang’ono na pang’ono ndikukwanisa kuwona Yahova, sikuti ninga patrau wa empreza, koma ninga Baba omwe ambafuna kwene-kwene wana wace.”—Onani kwadru yakuti “ Kodi Imwepo Mudawerenga Kale Bukhuli?”
15. Kodi Yahova ambalatiza tani kuti ambafuna ali-wentse wa ifepano?
15 Mbacitani tsantsa na axamwali wakukhulupirika. Axamwali wakukhulupirika ni mphaso yakucokera kwa Yahova. (Tiyago 1:17) Baba wathu wakudzulu ambalatiza kuti ambafuna ali-wentse wa ifepano, mwakutipasa abale na mpfumakazi, omwe ‘[ambatifuna] nthawe zentse.’ (Mimwani 17:17) Mu tsamba lomwe mpostolo Paulo adanembera Akoloso, iye adaguma Akristau omwe adamuthandiza, ndipo adalewa kuti ‘iwo ni mtsangalazo ukulu kuna [iye].’ (Wakoloso 4:10, 11) Napo Jezu Kristu adakomedwa ndipo adatenda thandizo lomwe adalitambira kucokera kuna axamwali wace, omwe akhali wanjo, na wanthu kubodzi.—Luka 22:28, 43.
16. Kodi axamwali wathu wakukhulupirika angatithandize tani kufenderera Yahova?
16 Kodi imwepo mumbanyang’ana axamwali kuti akuthandizeni, ndipo mumbabvuma thandizo lomwe axamwali wanu wa m’gwere ambakupasani? Tikambaceza na Mkristau wakukhwima ticimufotokozera mabvuto yathu, bzikuthandauza lini kuti tina cikhulupiro cakusaya kulimba. M’mbuto mwace, bzimwebzi bzimbatikhotcerera. Onani bzomwe James, omwe afotokozedwa kumayambiriro ule adalewa. Iye adati: “Kukhala pa uxamwali bwabwino na Mkristau wakukhwima kumbandithandiza kwene-kwene. Ndikabzibva kuti ndamala mphanvu thangwe ra makumbukidwe yakuphonyeka, axamwali wakufunikawa ambanditetekera bwino-bwino ndipo ambandiuza kuti ambandifuna. Iwo akambacita bzimwebzi, inepano nimbawona kuti Yahova ambandifuna ndipo ambacita nande thupo.” Kulewa cadidi, mpsakufunika kwene-kwene kuti ifepano tikulise uxamwali bwathu na abale na mpfumakazi zathu!
PITIRIZANI KUFUNA YAHOVA
17-18. Kodi tin’funika kumbabvera yani, ndipo n’thangwe ranyi?
17 Sathani akufuna kuti tibwerere m’mbuyo pa nkhondo yakucita bzinthu bzabwino. Iye akufuna kuti ifepano tikhulupire kuti Yahova ambatifuna lini, ndipo akufunambo kuti timbabziwone kuti tiribe kuthemera kukhala atumiki wa Yahova. Tsono ninga momwe tapfunzira mu nkhani ino, bzimwebzi mpsacadidi lini.
18 Yahova ambakufunani kwene-kwene. Mukapitiriza kumubvera, imwepo mun’dzakhala ‘mu lufoyi lace’ mpaka kale-kale, ninga momwe Jezu adacitira. (Juwau 15:10) Tenepo, lekani kubvera Sathani ayai kubvera mtima wakuti ndimwe lini wakufunika kwa Yahova. M’mbuto mwace, mbabverani Yahova, omwe ambawona cinthu cabwino kwa ifepano. Ndipo tsimikizani kuti Yahova ‘ambakomedwa na wanthu wace,’ kuphatanidzambo imwepo!
NYIMBO 141 Moyo ni Cinthu Cakudabwisa
^ ndi. 5 Abale wathu winango bzimbawanesa kukhulupira kuti Yahova ambawafuna. Mu nkhani ino tiniwona mathangwe yomwe yambatitsimikizira kuti Yahova ambafuna ali-wentse wa ifepano payekha-payekha. Ndipo tiniwonambo bzomwe tingacite, tikayamba kupenukira kuti Yahova ambatifuna.
^ ndi. 2 Madzina yanango yacinjidwa.
^ ndi. 9 Wagalata 2:20 Ndidakhomereredwa pa muti pabodzi na Kristu. Ndine lini pomwe ule omwe ndina moyo koma ni Kristu omwe ana moyo mwa ine. N’cadidi, moyo omwe ndinawo tsapano, ni thangwe ra kukhulupira Mwana wa Mulungu, omwe adandifuna ndipo adabzipereka thangwe ra ine.
^ ndi. 10 Waroma 8:38 Pakuti ndikutsimikiza kuti ne infa, ne moyo, ne wanjo, ne maboma, ne bzinthu bzomwe bziripo, ne bzinthu bzomwe bzikubwera, ne mphanvu, 39 ne msinkhu, ne kuzika, ne cakulengedwa ciri-centse cin’dzakwanisa kutilekanisa na lufoyi la Mulungu lomwe liri mwa Kristu Jezu, Mbuya wathu.
^ ndi. 11 1 Timotio 1:12 Ndikutenda Kristu Jezu Mbuya wathu, omwe adandipasa mphanvu pakuwona kuti ndine wakukhulupirika acindipasa utumiki, 13 napo kuti inepano kale-kale ndikhanyoza Mulungu na kuboneresa atumiki wace. Tsono iye adandibvera ntsisi thangwe ndikhacita bzinthu mwakusaya kudziwa ndipo ndikhalibe cikhulupiro. 14 Koma kudeka mtima kukulu kwa Mbuya wathu kudakhala kukulu kwene-kwene pabodzi na cikhulupiro na lufoyi lomwe liri mwa Kristu Jezu. 15 Mafalaya ngacadidi, ndipo ngakuthemera kuyabvuma: Jezu Kristu adabwera pa dziko la pantsi kuti adzafere wanthu wa pikado. Kwa wanthu amwewo, inepano ndine wakuyambirira.
^ ndi. 12 1 Juwau 3:19 Mwa njira imweyi tin’dzadziwadi kuti ndife wakucokera m’cadidi ndipo tin’dzaderekhesa mitima yathu pamaso pa Mulungu 20 pa ciri-centse comwe mitima yathu ingatipase mulandu, thangwe Mulungu ni mkulu kuposa mitima yathu ndipo ambadziwa bzinthu bzentse.
^ ndi. 71 BZOMWE BZIKUCITIKA PA CITHUNZI-THUNZI: Pomwe Paulo akhanati kukhala Mkristau, akhaboneresa Akristau azinji na kuwafungira m’kawoko. Tsono pomwe iye adabvuma bzomwe Jezu adamucitira, Pauloyo adacinja unthu bwace. Iye adalimbisa Akristau anzace ndipo winango wa iwo, akhaphatanidzambo adzinza wa wale omwe iye adawaboneresa.
