Mibvunzo Yakucokera kwa Anyakuwerenga
Thangwe ranyi Jezu pomwe akhanati kufa adalewa mafala ya Davide yakugumanika pa Psalymo 22:1?
▪ Pomwe Jezu akhadasala pang’ono kumalizika, iye adalewa mafala ya pa Mateu 27:46, yomwe yambati: “Mulungu wangu, Mulungu wangu, thangwe ranyi mwandisiya ndekha ine?” Pomwe Jezu adalewa mafalaya, iye adakwanirisa mafala ya nyakunemba Psalymo, Davide, yomwe yali pa Psalymo 22:1. (Marko 15:34) Bzingakhale bzakuphonyeka kulewa kuti Jezu adalewa mafalaya, thangwe rakuti akhadakalipa ayai thangwe rakuti akhadasiya kukhulupira Mulungu. Jezu akhabvesesa thangwe ranyi iye akhafunika kufa ndipo akhali wakukonzeka kucita bzimwebzo. (Mateu 16:21; 20:28) Iye akhadziwambo kuti pa nthawe ya kufa kwace, Yahova ‘angadadzamukhotcerera lini’ pa cinthu ciri-centse comwe cingadadzamucitikira. (Djobi 1:10) Tenepo, Yahova alibe kukhotcerera Jezu, kuti Jezuyo alatize kuti angadapitiriza kukhala wakukhulupirika napo kuti angadagumana na mabvuto mazinji mpaka kufa kwace.—Marko 14:35, 36.
Tsono, thangwe ranyi Jezu adalewa mafala ya pa Psalymoya? Napo kuti tikudziwa lini bwino-bwino bzomwe bzidamucitisa kulewa mafalaya, koma mbaticezeraneni bzinthu bzomwe pinango bzidamucitisa kuyalewa. *
Pomwe Jezu adalewa mafala yamweya, kodi akhafuna kulatiza kuti Yahova akhadamulekerera? Jezu akhafunika kupagali cakulombolera mwakusaya kuthandizidwa na Yahova. Ndipo bzikhafunikira kuti iye afe ‘m’mbuto mwa wanthu wentse.’—Wahebereu 2:9.
Pomwe Jezu adalewa mafala ya m’vesiri, kodi iye akhafuna kuti wanthu wentse ambakumbukire kapitulo yentse ya Psalymoli? Mu ntsiku zimwezire, Adjuda akhana cizolowezi cakumbakoya mu msolo mafala ya m’bukhu la Psalymo. Mwakundobva mafala ya vesi libodzi lokha la Psalymo, iwo akhakwanisa kukumbukiriratu mafala ya mu Psalymo lentse. Penu bzimwebzi ni bzomwe Jezu akhafuna, iye adakwanisa kuthandiza ateweri wace kukumbukira mapolofesiya mazinji yakufotokozedwa mu Psalymoli, yomwe yakhalewa bza bzinthu bzomwe bzingadacitika iye atasala pan’gono kufa. (Psalymo 22:7, 8, 15, 16, 18, 24) Ndipo mavesi yakumalizira ya bukhu limweri, yambatumbiza Yahova ndipo yambafotokoza kuti Umambo bwace bun’dzatonga dziko lentse la pantsi.—Psalymo 22:27-31.
Pomwe Jezu adalewa mafala ya Davideya, kodi iye akhafuna kulatiza kusaya kwace mulandu? Pomwe akhadasala pang’ono kufa, Jezu adafunika kupirira pomwe akhanamiziridwa kuti akhanyoza Mulungu. (Mateu 26:65, 66) Ayeruzi adatsonkhana mwakamfulumize usiku bomwe iye adamangidwa ndipo adamutonga mulandu mwakusaya kuteweza malamulo. (Mateu 26:59; Marko 14:56-59) Pomwe Jezu adacita mbvunzo wakuti: “Mulungu wangu, Mulungu wangu thangwe ranyi mwandisiya ndekha ine?” iye pinango pentse akhafuna kulatiza kuti akhalibe kuphonya cinthu, ndipo iwo akhalibe mathangwe yakumuphera.
Jezu adakumbusa wanthu winango kuti napo Davide omwe adanemba Psalymo limweri adabonerambo, kodi bzimwebzi bzikhalatiza kuti Yahova akhadasiya kumufuna Davideyo? Mbvunzo wa Davide ukulatiza lini kuti cikhulupiro cace cikhadacepa. Pambuyo pakucita mbvunzo umweyu, iye adalewa kuti akhakhulupira kuti Yahova ambapulumusa wanthu wace, ndipo Yahova adapitiriza kumusimba. (Psalymo 22:23, 24, 27) Mpsibodzi-bodzimbo na Jezu, “Mwana wa Davide,” napo akhabonera pa muti wakuzunzidwira, bzin’funa lini kulewa kuti Yahova akhadasiya kumufuna.—Mateu 21:9.
Kodi kubva kuwawa kwa Jezu, kudalatiza kuti Yahova akhadasiya kumukhotcerera kuti iye alatize kukhulupirika kwace? Yahova alibe kucita kufuna kuti Mwana wace abonere mpaka kuphedwa. Bzimwebzi bzidacitika thangwe ra kuphonya kwa Adamu na Eva. Jezu alibe kuphonya cinthu, tsono iye akhafunika kubonera acifa, kuti mbvunzo wa Sathani utawiridwe, nakuti apereke pereso ya cakulombolera moyo omwe Adamu adauluza. (Marko 8:31; 1 Pedru 2:21-24) Kuti bzimwebzi bzikwanisike, Yahova akhafunika kusiya kukhotcerera Jezu. Ndipo pa moyo wace wentse, kamweka kangadakhala kakuyamba Yahova kusaya kumukhotcerera Mwana waceyo.
Kodi Jezu akhayeza kuthandiza ateweri wace kukumbukira thangwe lomwe lidacitisa Yahova kulekerera kuti iye afere pa muti wakuzunzidwira? * Jezu akhadziwa kuti kufa ninga kapondo pa muti wakuzunzidwira kungadasunamisa wanthu azinji. (1 Wakolinto 1:23) Bzingadakhala kuti ateweri Jezu adakumbukira thangwe lomwe lidacitisa kuti iye aphedwe, iwo angadabvesesa thandauzo lace. (Wagalata 3:13, 14) Iwo angadamuwona ninga mpulumusi sikuti ninga kapondo.
Napo kuti tikudziwa lini bwino-bwino thangwe lomwe lidacitisa Jezu kulewa mafalaya, koma iye akhadziwa kuti kufera pa muti wakuzunzidwira, kukhali kucita bzomwe Yahova akhafuna. Pomwe adamala kulewa mafala ya pa Psalymoya, Jezu adati: ‘Bzakwanisika!’ (Juwau 19:30; Luka 22:37) Inde, kuleka kukhotcerera Mwana wace mu ka nthawe kang’ono-ng’ono komwe Yahova adacita, kudacitisa kuti Jezu akwanirise bzomwe Yahovayo adamutumizira pa dziko la pantsi kuti adzacite. Ndipo bzidacitisambo kuti iye akwanirise bzinthu bzentse bzomwe bzidanembedwa pakulewa bza iye ‘mu Cakutonga ca Mozeji, mu Apolofeta na m’Mapsalymo.’—Luka 24:44.
^ ndi. 4 Onanimbo mu revista ino ndime 9, na 10 za mu nkhani yakupfunza ya msolo wakuti “Bzomwe Tingapfunze na Mafala Yakumalizira ya Jezu.”
^ ndi. 10 Jezu mu utumiki bwace, nthawe zinango iye adalewa mafala ayai adacita mibvunzo yomwe iribe kulatiza momwe iye akhabvera. Iye adacita bzimwebzi kuti apereke mpata kuna ateweri wace kuti afotokozembo makumbukidwe yawo.—Marko 7:24-27; Juwau 6:1-5; Onani Ntsanza ya Mulindiri ya 15 Outubro 2010, pa matsamba 4-5, Chichewa.
