NKHANI YA MOYO WANGU
“Tsapano Nimbafuna Kupalizira!”
NDIDAKULIRA mu mzinda wa dziko la Balclutha, ku Ilha do Sul ku Nova Zelândia. Pomwe ndikhali mwana, ndikhafuna Yahova ndipo ndikhafunambo kukhala Mboni ya Yahova. Ndikhakomedwa kuyenda ku mitsonkhano, ndipo gwere, ikhali mbuto yangu yomwe ndikhabzibva kukhala wakukhotcerereka na wakukondwa. Napo kuti ndikhana manyazi, tsono ndikhakomedwa kupalizira sumana iri-yentse. Ndikhabva lini mantha kupalizira anzangu wa ku xikola pabodzi na wanthu winango. Ndikhakomedwa kukhala m’bodzi wa Mboni za Yahova, ndipo pomwe ndidapfitsa magole 11 yakubadwa, ndidabzipereka kwa Mulungu.
NDIRIBE KUDZAKHALA WAKUKONDWA
Bzakupasa ntsisi mpsakuti, pomwe ndidapfitsa magole 13 kuyenda kutsogolo, uxamwali bwangu na Yahova budayamba kumala mphanvu. Bzikhawoneka ninga kuti anzangu wa ku xikola akhana ufulu bwa kucita cinthu ciri-centse comwe iwo akhafuna, ndipo inepano ndidakumbuka kuti ndikuluza. Ndidayamba kukumbuka kuti malamulo ya abereki wangu na mitemo ya Mulungu, bzikhali bzinthu bzakuuma. Ndipo ndidakumbukambo kuti bzidanesa kutumikira Yahova. Napo kuti ndikhapenukira lini kuti Yahova alipo, tsono ndikhabzibva kuti ndiri lini naye pa uxamwali.
Napo bzikhali tenepo, ndiribe kusiyiratu kupalizira. Ndikhapalizira ninga momwe ndikhakwanisira. Ndikhayenda kukapalizira uko ndiribe kukonzekera. Thangwe ra bzimwebzi, bzikhandinesa kuyambisa maceza ayai kupitiriza kuceza na wanthu. Ndipopa ndikhambakhala ndiribe maulendo yakubwereza ne mapfunziro ya Bibliya. Ndipo kupalizira kukhandidekera lini na pang’onopo. Bzimwebzi bzidandicitisa kuti ndireke kukomedwa na kupalizirako. Ndikhabzibvunza ndekhane kuti: ‘Kodi munthu angakwanise tani kucita bzimwebzi sumana iri-yentse, na mwezi uli-wentse?’
Pomwe ndipfitsa magole 17 yakubadwa, ndikhafuna lini kuthemba pomwe munthu. Tenepo, ndidacoka pamui ndiciyenda kukakhala ku Austrália. Pomwe ndidacoka pamuipo, abereki wangu alibe kukomedwa. Iwo adacita nande thupo, tsono akhakumbuka kuti nin’kapitiriza kukatumikira Yahova komwe ndikhayendako.
Pomwe ndikhali ku Austrália, ndiribe kupitiriza kutumikira bwino-bwino Yahova. Ndidayamba kumbalova mitsonkhano. Ndipo ndidacita uxamwali na maswaka yomwe yakhakomedwa kuyenda ku mitsonkhano, tsono yakacoka ku mitsonkhanoko yakhayenda ku discoteca kamwa na kubzina. Ndikakumbukira nthawe imweyire, ndikuwona kuti ndikhali m’cadidi, ndipo pa nthawe ibodzi-bodziyo ndikhafuna bzinthu bza m’dziko, tsono palibe mbuto na ibodziyo ndikhabzibva kukhala wakukondwa.
PFUNZIRO LAKUFUNIKA LOMWE NDIKHALIDIKHIRIRA LINI
Pomwe padapita magole mawiri, ndidadzagumana na mpfumakazi yomwe mwakusaya kudziwa idandithandiza kuwona momwe moyo wangu ukhafambira. Ndikhakhala nyumba ibodzi na mpfumakazi zixanu zakusaya kulowodwa. Ifepano tidacemera nyakunyang’anira dera na mkazi wace, Tamara, kuti adzakhale nafe kumui kwathu sumana ibodzi. Pomwe bayace akhacita bzinthu bzinango bza m’gwere, Tamara akhapambula nthawe yakuceza nafe, ndipo tidaseka naye kwene-kwene. Inepano ndidakomedwa kwene-kwene. Iye akhali munthu wakucezeka, ndipo akhatitetekera bwino-bwino pa kuceza nayepo. Bzidandidabwisa kwene-kwene kuwona munthu omwe ambaikha kunamata Yahova pa mbuto yakuyamba, akucezambo na wanthu acilewa nkhani zakusekesa.
Tamara akhali munthu wakupfantsa. Kufuna kwace cadidi, na utumiki bzidacitisa kuti winango afunembo kumutewezera. Iye akhakondwa thangwe ra kutumikira Yahova na mtima wentse, pomwe inepano ndikhakondwa lini, thangwe rakuti ndikhacita bzinthu bzing’ono-ng’ono pa kutumikira Yahova. Kacitidwe kace kabwino ka bzinthu na mpfantso wace, bzidatokonya moyo wanthu. Ciratizo cace cidandicitisa kukumbukira cadidi cakufunika kwene-kwene ca m’Bibliya cakuti: Yahova ambafuna kuti tentse timutumikire ‘mwakukondwa’ na ‘mwakukuwa mwakukondwa.’—Psalymo 100:2.
MOMWE NDIDAYAMBIRA KUFUNA POMWE KUPALIZIRA
Ndikhafuna kukhala wakukondwa ninga momwe Tamara akhaliri, tsono kuti bzimwebzi bzikwanisike, ndidafunika kucinja bzinthu bzizinji pa moyo wangu. Ndiribe kucinjiratu nthawe imweyo. Koma ndidayamba kucinja pang’ono-pang’ono. Ndidayamba kumbakonzekera ndikanati kuyenda kukapalizira, ndipo nthawe zinango ndikhambacita upainiya bwakuthandiza. Bzimwebzi bzidandithandiza kucepesa mantha, ndipo bzidandicitisa kubzibva kuti nin’kwanisa. Thangwe ra kuphatisa basa kwene-kwene Bibliya pakupalizira, ndikhakomedwa kwene-kwene na kupalizirako. Tenepo, ndidadzayamba kucita upainiya bwakuthandiza mwezi uli-wentse.
Ndidayamba kukhala na axamwali wa misinkhu yentse, omwe akhatumikira Yahova na mtima wentse, ndipo akhakomedwa na utumiki bwawobo. Bziratizo bzawo bzidandithandiza kucinja bzinthu pa moyo wangu na kuyamba kumbawerenga Bibliya ntsiku zentse. Ndidayamba kumbamala nthawe ikulu ndikupalizira, ndipo pomwe padapita nthawe pang’ono ndidadzayamba kucita upainiya bwakukhazikika. Pambuyo pa magole mazinji, ndidayamba kubzibva kukhala wakukondwa m’gwere.
NDIDADZIWANA NA M’BALEOMWE AKHALI MPAINIYA
Pomwe padapita gole libodzi, ndidadziwana na Alex, munthu wakudeka mtima na wakugwa mpfuwa, omwe akhafuna Yahova na utumiki. Iye akhatumikira ninga mtumiki wakuthandiza ndipo akhadatumikira kale ninga mpainiya wakukhazikika magole 6. Ndipo Alex, akhadatumikirambo kale ku Malawi, komwe kukhafunikira apalizi azinji. Pomwe akhali kumweko, iye akhambaceza na mamisiyonario yomwe yadamuthandiza kuti ambaikhe Umambo bwa Mulungu pa mbuto yakuyamba.
Mu 2003, inepano na Alex tidalowolana, ndipo kucokera pamwepo tikupitiriza kucita utumiki bwa nthawe zentse. Tapfunza bzinthu bzizinji bzabwino, ndipo Yahova atisimba mu njira zakusiyana-siyana.
YAHOVA ADATISIMBA KWENE-KWENE
Pomwe tikupalizira ku Gleno, m’dziko la Timor-Leste
Mu 2009, tidacemeredwa kuti tikatumikire ninga mamisiyonario ku Timor-Leste, lomwe ni dziko ling’ono ku arquipélago ya ku Indonésia. Pomwe tidabva bzimwebzi, ifepano tidadabwa kwene-kwene, tidakomedwa, ndipo tidabva mantha pa nthawe ibodzi-bodziyo. Pomwe padapita minyezi mixanu, ifepano tidafika ku likulu la dzikolo, ku Dili.
Kumweko, moyo wathu ukhali wakusiyana kwene-kwene na omwe tikhanawo pomwe tikhanati kuyenda. Tikhafunika kuzolowera cikhalidwe ca kumweko, cirewedwe, cakudya, na bzinthu bzinango. Mu upalizi, tikhagumana na wanthu wakusauka, wanthu omwe adapfunza pang’ono, ayai omwe alibe na kupfunzako, na omwe akhaboneresedwa. Ndipo tikhawonambo wanthu omwe akhabonera thangwe ra nkhondo. *
Utumiki bukhadekeza kwene-kwene! Mwa ciratizo, ndidagumana na mtsikana wa magole 13 yakubadwa, omwe akhacemeredwa Maria. * Iye akhadadodoma. Mai wace akhadasaika magole mang’ono-ng’ono m’mbuyomo, ndipo iye akhambawonana lini na pai wace kawiri-kawiri. Ninga wana azinji wa msinkhu wace, Maria akhadziwa lini kuti angadacita ciyani pa moyo wace. Ndikukumbukira nthawe yomwe iye adalira pomwe akhandifotokozera momwe akhabvera. Tsono inepano ndikhabvesesa lini bzomwe iye akhalewabzo, thangwe rakuti ndikhakwanisa lini kulewalewa bwino-bwino cirewedwe cace. Ndidapemba kwa Yahova ndicimukumbira kuti andithandize kumulimbisa. Tenepo, ndidayamba kumuwerengera bzinembo kuti bzimutsangalaze. Pomwe padapita magole mang’ono-ng’ono, ndidawona cadidi cikucinja makhalidwe, mawonekedwe na moyo wentse wa Maria. Iye adabatizidwa, ndipo tsapano ambacitisa mapfunziro yace ya Bibliya. Ntsiku zino, Maria akucita mbali ya banja likulu la atumiki wa Yahova ndipo ambabzibva kuti ambafunidwa kwene-kwene.
Yahova akusimba basa lakupalizira ku Timor-Leste. Apalizi azinji adabatizidwa magole 10 yapitaya, ndipo azinji wa iwo akutumikira ninga apainiya, atumiki wakuthandiza, ayai akulu wa gwere. Abale anango akucita basa lakusandulizira na kutali, ndipo akuthandizira kusandulizira mabukhu yakusiyana-siyana yakulewa bzomwe Bibliya limbapfunzisa mu bzirewedwe bza kumweko. Nimbakomedwa kwene-kwene kubva abalewo akuyimba pa mitsonkhano, kuwona nkhope zawo zantsangala na kuwawonambo kuti akukhala axamwali wa Yahova.
Ndiri pabodzi na Alex, ndipo tamaliza kugawira micemo ya cikumbuso ku gawo lomwe liribe apalizi azinji
NDIDAKHALA WAKUKONDWA KWENE-KWENE NA MOYO OMWE NDIKHANAWO
Ku Timor-Leste moyo wathu ukhali wakusiyana kwene-kwene na omwe tikhanawo ku Austrália. Tsono moyo omwe tikhanawo ukhatidekera kwene-kwene. Nthawe zinango, tikhapakira ka machibombo komwe kakhana wanthu tolo, ntsomba zakuuma, miriwo, kucokera kubazali. Ntsiku zinango, tikhambacitisa mapfunziro ya Bibliya m’kanyumba kang’ono kakupsa komwe kakhana pantsi pa kupswipa, ndipo nkhuku zikhandokhala zikuthamanga-thamanga m’kanyumbamo. Napo kuti tikhagumana na mabvuto, inepano thangwe zentse ndikhakumbuka kuti: ‘Bzimwebzi mpsakudekeza kwene-kwene!’
Tiri mu njira ndipo tikuyenda kukapalizira
Ndikanyang’anisa m’mbuyo, nimbatenda kwene-kwene abereki wangu thangwe ra nyongo yomwe adacita yakundipfunzisa njira za Yahova, na kundithandiza, napo pomwe ndikhakwanisa lini kucita bzinthu bzizinji pakutumikira Yahova. Mafala ya pa Mimwani 22:6 yadandithandiza pa moyo wangu. Mai na pai ambakomedwa nande pabodzi na Alex, ndipo iwo ambakondwa thangwe ra kutiwona tikutumikira Yahova. Kucokera mu 2016 ndife anyakunyang’anira dera mu gawo lomwe limbanyang’aniridwa na nthambi ya ku Australasia.
Ndikulatiza vidiyo ya Kalebe na Sofiya kuna tuwana twakukondwa twa ku Timor-Leste
Mpsakunesa kubvuma kuti basa lakupalizira likhandidekera lini pakuyamba. Tsapano nimbafuna basa lakupalizira. Ndidafika pakuzindikira kuti tingagumane na mabvuto pa moyo wathu, tsono kukondwa kwacadidi kumbabwera thangwe ra kutumikira Mulungu na mtima wentse. Inde, magole 18 yomwe ndakhala ndikutumikira na Alex, tidakhala wakukondwa kwene-kwene. Tsapano nimbabvesesa cadidi comwe nyakunemba bukhu la Psalymo, Davide adauza Yahova. Iye adati: ‘Wentse omwe an’dzathawira kwa imwepo an’dzakhala wakukondwa; nthawe zentse an’dzakuwa mwakukondwa. . . . Ndipo omwe ambafuna dzina lanu an’dzakomedwa thangwe ra imwepo.’—Psalymo 5:11.
Tikukomedwa kupfunza Bibliya na wanthu wakupfantsa!
