1. Kodi ifepano timbakomedwa kwene-kwene na kucita ciyani?

 YAHOVA ambafuna kuti tikhale wakukondwa. Ifepano timbadziwa bzimwebzi thangwe kukondwa kumbacita mbali ya makhalidwe ya bzisapo bza mzimu wa Mulungu. (Agalatiya 5:22) Kupasa kumbakondwesa kwene-kwene kuposa kutambira. Ndipopa ifepano timbakomedwa kwene-kwene tikambacita bzizinji pakutumikira Yahova na kucitambo bzinthu bzakusiyana-siyana pakuthandiza abale wathu.—Mabasa 20:35.

2-3. (a) Mwakubverana na Agalatiya 6:4, kodi ni bzinthu bziwiri bziponi bzomwe bzingatithandize kupitiriza kukhala wakukondwa pakutumikira Yahova? (b) Kodi tin’pfunza ciyani mu nkhani ino?

² Pa Agalatiya 6:4, mpostolo Paulo adalewa bzinthu bziwiri bzomwe bzingatithandize kupitiriza kukhala wakukondwa. (Werengani.) Cakuyamba, tin’funika kucitira Yahova bzomwe tingakwanise. Tikambamucitira bzomwe tingakwanise, tin’dzakhala wakukondwa. (Mateu 22:36-38) Caciwiri, tin’funika kutcenkha kumbabzindendemezera na anzathu. Bziribe basa kuti tina mphanvu, luso ayai bzinthu bzinango bzomwe timbadziwa bwino kucita, ifepano tingatende Yahova thangwe ra bzimwebzi. Ndipo tin’funikambo kukumbukira kuti cinthu ciri-centse comwe tinaco, adatipasa ndiye. Tsono tikawona kuti wanthu winango akutiposa pa mbali inango ya utumiki, tin’funika kukomedwa thangwe rakuti iwo akuphatisa basa luso lawo pakutumbiza Yahova, sikuti kufuna kubvekera. Ndipopa tin’funika kutcenkha kucita nawo mapici, koma tin’funika kupfunza na bzomwe iwo akucitabzo.

³ Mu nkhani ino, tin’pfunza bzomwe tingacite tikakhala tikugoboka m’mabondo thangwe ra kutazira kucita bzizinji pakutumikira Yahova. Ndipo tin’pfunzambo momwe tingaphatisire basa mphaso iri-yentse yomwe tinayo na bzomwe tingapfunze na anzathu.

4. Kodi n’ciyani comwe cingaticitise kugoboka m’mabondo? Fotokozani ciratizo.

⁴ Atumiki wa Yahova winango ambakwanisa lini kucita bzomwe akhacita kale-kale, thangwe rakuti akalamba ayai thangwe ra kuduwala-duwala. Ndipo bzimwebzi bzimbawasunamisa. Onani bzomwe bzidacitikira Carol. Iye akhatumikira komwe kukhafunikira apalizi azinji. Pa nthawe imweyi, iye adapfunzisa Bibliya wanthu wakukwana 35 ndipo azinji wa iwo adafika pakubatizidwa. Bzinthu bzikhamufambira bwino kwene-kwene Carol mu utumiki! Tsono iye adadzaduwala ndipo adamala nthawe izinji ali pamui. Iye adati: “Ndikudziwa kuti ningakwanise lini kucita bzinthu bzizinji thangwe ra kuduwala, ninga momwe ambacitira Akristau anzangu, tsono nimbawona kuti ndine lini pomwe Mkristau wakukhwima ninga momwe iwo aliri, thangwe tsapano ndikukwanisa lini pomwe kucita bzinthu bzomwe ndikhacita. Bzimwebzi bzimbandigobola m’mabondo.” Carol akhafuna kucita bzizinji pakutumikira Yahova! Ndipo tingakhale na citsimikizo centse cakuti Mulungu wathu ambakomedwa na bzimwebzi.

5. (a) Tikakhala tagoboka m’mabondo thangwe rakuti tatazira kucita bzizinji, n’ciyani comwe tin’funika kukumbukira? (b) Ninga momwe bzikulatizira bzithunzi-thunzibzi, kodi m’baleyu akulatiza tani kuti akupitiriza kucita bzomwe angakwanise pa kutumikira Yahova?

⁵ Mukakhala mwagoboka m’mabondo thangwe rakuti mukukwanisa lini kucita bzizinji pakutumikira Yahova, bzibvunzeni kuti, ‘Kodi n’ciyani comwe Yahova akufuna kuna inepano?’ Kumbukirani kuti iye ambafuna kuti mumucitire bzomwe mungakwanise. Tiyezezere tenepa: Mpfumakazi yomwe ina magole 80 ikuwona kuti ikukwanisa lini kucita bzizinji mu utumiki ninga momwe ikhacitira pomwe ikhana magole 40. Iyo ikucita bzentse bzomwe ingakwanise, koma ikuwona ninga kuti Yahova akukomedwa lini nayo. Tsono, bziridi tenepoyo? Kumbukirani ibzi. Pomwe mpfumakaziyi ikhana magole 40, ikhacita bzentse bzomwe ingadakwanisa pakutumikira Yahova koma tsapano ina magole 80 ndipo ikupitiriza basi kucita bzimwebzo. Ndipopa iyo iribe kuleka kucita bzentse bzomwe ingakwanise pakutumikira Yahova. Tikayamba kukumbuka kuti bzomwe tikucita mpsakucepa kwene-kwene kuti Yahova akomedwe nabzo, tin’funika kukumbukira kuti iye ndiye ana ugo bwakulewa kuti bzomwe tikucitabzo akukomedwa nabzo ayai ne. Ndipo tikumbukirembo kuti tikacita bzentse bzomwe tingakwanise, Yahova an’dzalewa kuti: “Wacita bwino!”—Ndendemezerani na Mateu 25:20-23.

6. Kodi tingapfunze ciyani na bzomwe Maria adacita?

⁶ Tikambakumbukira kwene-kwene bzomwe tingakwanise kucita, sikuti bzomwe tingakwanise lini kucita, tin’dzakhala wakukondwa. Onani bzomwe bzidacitikira mpfumakazi yakucemeredwa Maria. Iye akhaduwala matenda yomwe yakhamutazisa kucita bzizinji mu utumiki. Pakuyamba, iye akhadagoboka m’mabondo, ndipo akhabzibva ninga kuti alibe na basalo. Tsono iye adawona mpfumakazi ya m’gwere mwawo yomwe ikhambandokhala idagona ndipo ikhakwanisa lini kumuka. Iye adafuna kuithandiza. Maria adati: “Ndidacita makonzedwe kuti timbapalizire pabodzi na mpfumakaziyo mwakuphatisa basa telefoni na kunemba matsamba. Nthawe zentse tikambapalizira pabodzi, ndikhambakhala wakukondwa thangwe ndakwanisa kuthandiza mpfumakazi yangu.” Mpsibodzi-bodzimbo na ifepano, tingakhale wakukondwa kwene-kwene tikambakumbukira bzinthu bzomwe tingakwanise kucita, sikuti bzomwe tingakwanise lini. Tsono, tani penu tingakwanise kucita bzizinji pakutumikira Yahova ayai tina luso linango?

7. Kodi ni malango yaponi yomwe mpostolo Pedru adapasa Akristau?

⁷ Mu tsamba lace lakuyamba, mpostolo Pedru adalimbikisa Akristau kuti ambaphatise basa mphaso iri-yentse yomwe angakhale nayo kuti alimbikise anzawo. Iye adanemba kuti: “Mwakubverana na luso lomwe ali-wentse adatambira, liphatiseni basa pakutumikira winango ninga nyakunyang’anira omwe adatambira kudeka mtima kukulu kwa Mulungu.” (1 Pedru 4:10) Tin’funika lini kuleka kuphatisa basa mphaso zentse zomwe Yahova adatipasa thangwe ra kugopa kuti wanthu winango angaticitire njiru ayai angagoboke m’mabondo. Tikacita tenepoyo, tin’dzakhala tikucitira lini Yahova bzentse bzomwe tingakwanise.

8. Mwakubverana na 1 Akolinto 4:6, 7, thangwe ranyi tin’funika kutcenkha kucita magayo na mphaso zomwe tinazo?

 ⁸ Ifepano tin’funika kuphatisa basa mphaso zentse zomwe tinazo, tsono tin’funika kucita mphole kuti tileke kucita magayo thangwe ra mphasozo. (Werengani 1 Akolinto 4:6, 7.) Tiyezezere kuti bzinthu bzikukufambirani bwino kwene-kwene pa nkhani ya kuyambisa mapfunziro ya Bibliya! Imwepo mun’funika kupitiriza kuiphatisa basa mphaso imweyi, tsono mun’funika kutcenkha kucita magayo. Tiyezezere kuti mwapalizira munthu ndipo iye wabvuma pfunziro la Bibliya, imwepo mukufunisisa kuuza nkhani imweyi abale wa grupo yanu ya utumiki. Tsono pomwe mwafika pa grupopo, mukubva mpfumakazi ikufotokozambo bzomwe yacita kuti ipereke revista kwa munthu. Pacitika bzinthu bziwiri, mpfumakaziyi yapereka revista ndipo imwepo mwayambisa pfunziro. Mungacite ciyani? Imwepo mukudziwa kuti mukafotokoza bzomwe bzakucitikiranibzo, abale na mpfumakazi wa grupo yanu anilimbikisidwa kwene-kwene. Tsono bzingakhale bwino kudikhira kuti mudzafotokoze bzimwebzi pa nthawe inango kuti muleke kusunamisa mpfumakazi yomwe yapereka revistayo. Mukacita bzimwebzi, mumbalatiza kuti ndimwe wakudeka mtima. Napo bziri tenepo, pitirizani kuyambisa mapfunziro ya Bibliya. Imweyi ni mphaso yomwe munayo ndipo iphatiseni basa!

9. Kodi tin’funika kuphatisa tani basa mphaso zomwe tinazo?

⁹ Tireke kuyebwa kuti luso liri-lentse lomwe ifepano tinalo ni mphaso yakucokera kwa Mulungu. Ndipo tin’funika kuiphatisa basa kuti tilimbikise abale na mpfumakazi zathu m’gwere, sikuti kucita magayo. (Afilipi 2:3) Tikambaphatisa basa mphanvu na luso lomwe tinalo kuti ticite bzomwe Mulungu akufuna, tin’dzakhala wakukondwa, sikuti thangwe rakuti timbacita bzinthu bzizinji kuposa anzathu ayai thangwe rakuti timbacita bwino bzinthu kuposa iwo. Koma tin’dzakhala wakukondwa thangwe rakuti tikuphatisa basa mphaso zomwe tinazozo kuti titumbize Yahova.

10. Thangwe ranyi bziri lini bwino kumbabzindendemezera na anzathu?

¹⁰ Tikasaya kuwona bwino, tingayambe kumbandendemezera bzomwe timbakwanisa kucita na bzomwe wanthu winango ambatazira kucita. Tiyezezere kuti m’bale ambafotokoza bwino nkhani ya wentse. Limweri ni luso lomwe analo. Tsono, na mu mtima mwace, iye angayambe kumbanyozera m’bale omwe ambaneseka kufotokoza nkhani. Koma comwe cingacitike n’cakuti, m’bale omwe ambaneseka kufotokoza nkhaniyo ambadziwa kutambira bwino alendo, kupfunzisa wana wace na kucita nyongo mu utumiki. Ndipopa timbakomedwa kwene-kwene thangwe tina abale na mpfumakazi omwe ambaphatisa basa  luso lawo pakutumikira Yahova na kuthandiza anzawo!

11. Thangwe ranyi tin’funika kumbatewezera bzomwe Jezu adacita?

¹¹ N’cadidi kuti tin’funika kutcenkha kumbabzindendemezera na anzathu, koma tingapfunze na bzomwe atumiki winango wa Yahova ambacita. Munthu wabwino kwene-kwene omwe tingamutewezere ni Jezu. Napo kuti iye akhali munthu wakulungama, makhalidwe yace na bzinthu bzomwe adacita bzingatipfunzise bzinthu bzizinji. (1 Pedru 2:21) Tikambacita nyongo kuti timutewezere, ifepano tin’dzakhala atumiki wa Yahova wabwino kwene-kwene ndipo tin’dzakhala waluso mu utumiki.

12-13. Kodi tingapfunze ciyani na Mambo Davide?

¹² Fala la Mulungu limbalewa bza amuna na akazi wakukhulupirika omwe ifepano tingawatewezere napo kuti akhaphonyambo. (Ahebereu 6:12) M’bodzi wa iwo ni Davide. Yahova adalewa kuti iye “ni munthu omwe ambakondwesa mtima wangu” ayai, ninga momwe Bibliya linango limbalewera, “mwamuna wa pa mtima pangu.” (Mabasa 13:22) Tsono Davide akhali wakuperewera ndipo akhaphonya. Nthawe inango, iye adacita pikado zikulu-zikulu. Napo bziri tenepo, iye ni munthu wabwino basi kuti timutewezere. Thangwe ranyi? Thangwe pomwe akhatsimulidwa, iye akhalamba lini kuphonya kwace. Koma adabvuma malango yamphanvu yomwe adapasidwa ndipo adakumbira kuti Mulungu amulekerere pikado zacezo. Ndipopa, Yahova adamulekerera.—Salimo 51:3, 4, 10-12.

¹³ Kuti tipfunze na bzomwe Davide adacita, tingabzibvunze kuti: ‘Kodi nimbacita ciyani ndikapasidwa malango? Kodi nimbazindikira kuphonya kwangu, ayai nimbanyang’ana mathangwe kuti ndilambe malangoyo? Kodi nimbapasa mulandu wanthu winango? Kodi nimbacita nyongo kuti ndileke kudzabwerezera pomwe bzomwe ndaphonyabzo?’ Ndipo imwepo mungabzibvunze pomwe mibvunzo ninga imweyi mukambawerenga m’Bibliya nkhani za amuna na akazi wakukhulupirika. Kodi iwo adagumanambo na mabvuto ninga yomwe imwepo mukugumana nayo? Kodi ni makhalidwe yaponi yabwino yomwe iwo adalatiza? Mukambawerenga nkhani iri-yentse mbabzibvunzani kuti: ‘Kodi n’ciyani comwe ningacite kuti nditewezere mtumiki wakukhulupirika wa Yahovayu?’

14. Kodi tingagumane phindu liponi tikambawona bzomwe Akristau anzathu akucita?

¹⁴ Ifepano tingapfunzembo mwa kumbawona bzomwe Akristau anzathu akucita, bziribe basa kuti ni maswaka ayai mbakulu-akulu. Kodi imwepo mumbadziwa m’bale ayai mpfumakazi ya m’gwere mwanu omwe akupitiriza kukhala wakukhulupirika napo kuti wanthu ambayezera kumupumpsa, adzinza wace ambayezera kumuphingiza kutumikira Yahova ayai  ambaduwala-duwala? Kodi mumbadziwa m’bale ayai mpfumakazi omwe ana makhalidwe yabwino kwene-kwene yomwe imwepo mun’funambo kukhala nayo? Mukambawona bzinthu bzabwino bzomwe abale na mpfumakazi akucita, imwepo mungapfunze bzinthu bzakusiyana-siyana bzomwe bzingakuthandizeni kupirira pomwe mukugumana na mabvuto. Ifepano timbatenda kwene-kwene abale na mpfumakazi amwewa, omwe ambalatiza makhalidwe yabwino kuti ifepano tiwatewezere!—Ahebereu 13:7; Tiyago 1:2, 3.

15. Kodi ni malango yaponi yomwe mpostolo Paulo adapereka yomwe yangatithandize kupitiriza kukhala wakukondwa pakutumikira Yahova?

¹⁵ Ali-wentse wa ifepano an’funika kucita bzomwe angakwanise kuti gwere lipitirize kukhala pa mtendere na kubverana. Onani bzomwe Akristau wakuyambirira adacita. Iwo akhana mphaso zakusiyana-siyana ndipo akhacitambo mabasa yakusiyana-siyana. (1 Akolinto 12:4, 7-11) Tsono iwo akhacita lini mapici ayai kumbanesana. Ndipo Paulo adawalimbikisa kuti ambacite bzentse bzomwe bzikhafunikira kuti “alimbise thupi la Kristu.” Iye adanembera Akristau wa ku Efezo kuti: “Ciwalo centse cikaphata bwino basa, cimbathandizira kuti thupi likule bwino licilimba mu lufoyi.” (Aefezo 4:1-3, 11, 12, 16) Akristau omwe adateweza malango ya Pauloya, adacitisa kuti mu gwere mukhale na mtendere na ciphatano. Ndipo mpsimwebzi bzomwe timbawona m’magwere yathu ntsiku zino.

16. Kodi tin’funika kutsimikiza kucita ciyani? (Ahebereu 6:10)

¹⁶ Khalani wakutsimikiza kutcenkha kumbabzindendemezera na anzanu. Koma pfunzani na bzomwe Jezu adacita ndipo citani nyongo ya kutewezera makhalidwe yace. Mukambawerenga Bibliya, pfunzani na bzomwe atumiki wa Yahova wakale-kale adacita ndipo pfunzanimbo na bzomwe atumiki wa Yahova wa ntsiku zino akucita. Mukapitiriza kucita bzomwe mungakwanise, mungakhale na citsimikizo centse cakuti Mulungu omwe ‘ngwakulungama an’dzayebwa lini basa lanu.’ (Werengani Ahebereu 6:10.) Ndipopa pitirizani kukhala wakukondwa pa kutumikira Yahova, mucidziwa kuti iye ambawona nyongo yentse yomwe mumbacita kuti mumukondwese.