Lumbiro ni “mafala ayai cinthu comwe munthu abalewa na kutsimikizira kuti an’dzacita, ndipo nthawe zinango ambalewambo kuti Mulungu ni mboni . . . pakulewa mafalayo.” Munthu angacite kulewa lumbirolo ayai kucita kunemba.

Alipo wanthu omwe ambakumbuka kuti n’kuphonya kulumbira, thangwe Jezu adalewa kuti: “Lekani na kundolumbirako . . . Tsimikizirani kuti mukalewa kuti ‘Inde’ akhaledi inde, ndipo mukati ‘Ne’ akhaledi ne, pakuti mafala yanango yakapitirira pamwepa yambacokera kwa nyakuipayo.” (Mateu 5:33-37) Tsono Jezu akhadziwa kuti lamulo la Mozeji likhalewa kuti wanthu akhafunika kulumbira, ndipo akhadziwambo kuti pa nthawe inango atumiki wakukhulupirika wa Mulungu adalumbira kucita cinthu cinango. (Ciyambo 14:22, 23; Kufuluka 22:10, 11) Iye akhadziwambo kuti Yahova caiyeyo adalumbirambo. (Ahebereu 6:13-17) Ndipopa, Jezu akhalewa lini kuti wanthu an’funika kutcenkha kulumbira, koma akhalewa kuti an’funika kutcenkha kumbalumbirira nkhani zakusaya basa. Ifepano tin’funika kuteweza bzomwe talumbirabzo thangwe ni bzomwe Yahova akufuna kuti ticite.

Tsono mun’funika kucita ciyani munthu akakuuzani kuti mulumbire? Cakutoma, onani penu mun’kwanisa kucita bzomwe mwalumbirabzo. Penu mukuwona kuti mun’kwanisa lini bziri bwino kuleka kulumbirako. Fala la Mulungu limbati: “Bziri bwino kusaya kulumbira m’mbuto mwa kulumbira ucisaya kuteweza bzomwe walumbirabzo.” (Mpalizi 5:5) Caciwiri, pfunzani bzomwe Bibliya limbalewa pa nkhani ya kulumbira mukamala phatisani basa bzomwe mwapfunzabzo, ndipo sankhulani bzakucita mwakubverana na mtima wanu wakupfunzisidwa na Bibliya. Tsono mpsiponi bzomwe Bibliya limbalewa pa nkhani imweyi?

Malumbiro manango Mulungu ambakomedwa nayo. Kumbukirani bzomwe Mboni za Yahova zimbacita, pa ntsiku ya malowozi. Iwo ambacita malumbiro. Mafala yomwe iwo ambalewa pa ntsiku ya malowoziyo yambalatiza kuti iwo ambakhala akulumbira. Mwamuna na mkazi ambalumbira patsogolo pa Mulungu na pa wanthu kuti iwo an’dzafunana, an’dzafuwana na kulemekezana “ndipo an’dzacita bzimwebzi moyo wawo wentse.” (Nthawe zinango mwamuna na mkazi angalewe lini ndendende mafala ninga yomwe talewaya, tsono iwo ambalumbira basi kwa Mulungu.) Pa nthawe imweyi, mwamuna na mkazi ambakhala banja ndipo an’funika kukhala m’banjamo moyo wawo wentse. (Ciyambo 2:24; 1 Akolinto 7:39) Lumbiro lomwe limbacitidwa pa ntsiku ya malowozi ndabwino ndipo ndakubverana na kufuna kwa Mulungu.

Malumbiro manango Mulungu ambakomedwa lini nayo. Mkristau wacadidi an’funika lini kulumbira kucita cinthu comwe Mulungu ambakomedwa lini naco, ninga kuyenda ku nkhondo ayai kulamba kuti ambakhulupira Mulungu. Kucita bzimwebzi n’kuphonyera mitemo ya Mulungu. Akristau ‘ambacita lini mbali ya dziko,’ ndipopa iwo ambapitira lini nkhani zomwe zimbacitisa kuti wanthu mu dzikoli anesane,  ayai zomwe zimbayambisa nkhondo.—Juwau 15:19; Zaiya 2:4; Tiyago 1:27.

Yalipo malumbiro yomwe munthu an’funika kubzisankhulira yekha kuti angayacite ayai ne. Nthawe zinango timbafunika kukumbukira bwino mafala ya Jezu yakuti “mun’funika kupereka kwa Seza bzinthu bza Seza, koma mupereke kwa Mulungu bzinthu bza Mulungu.”—Luka 20:25.

Tiyezezere kuti Mkristau akukumbira kuti akhale nzika ya dziko linango ayai akufuna kukonzesa passaporte, tsono wauzidwa kuti penu akufuna kukhala nzika ya dzikolo ayai kukonzesa passaporte an’funika kulumbira. Penu malumbiro yanango yomwe an’funika kucita, yakulewa bzinthu bzomwe, mpsakusiyana na mitemo ya Mulungu, iye an’bvuma lini kucita bzimwebzo thangwe ra bzomwe adapfunzisidwa m’Bibliya. Tsono pinango boma lingamubvumize kuleka kucita bzinthu bzinango bzomwe bzimbabverana lini na bzomwe adapfunzisidwa m’Bibliya.

Kucinja mafala yomwe tingalewe pakulumbira ku boma kumbabverana na bzomwe Bibliya limbapfunzisa pa Aroma 13:1, pomwe pambalewa kuti: “Tin’funika kubvera wale omwe akutonga pakati pathu.” Ndipopa Mkristau an’funika kuwonesesa kuti bzomwe akulumbira kucitabzo bzikusiyana lini na bzomwe Mulungu akufuna kuti iye acite.

Tin’funikambo kumbakumbukira bzomwe timbapfunzisidwa Bibliya tikakhala tauzidwa kuti pakulumbira, ticite gesto ayai tiphatise basa cinthu cinango. Kumbukirani kuti kale-kale wanthu wa ku Roma na Asita, akhaphatisa basa xipada pakulumbira acimbacemera dzina la mulungu wa nkhondo ndipo bzimwebzi bzikhatsimikizira kuti munthuyo akulewa cadidi. Agerego akhambaimisa manja yawo m’dzaulu pakulumbira. Pakucita bzimwebzi iwo akhakhulupira kuti kudzulu, alipo mulungu omwe akhabva lumbirolo na kuwona bzomwe bzikhacitika ndipo penu munthuyo akunama angadadzatawira mulandu kwa mulunguyo.

N’cadidi kuti atumiki wa Yahova an’funika lini kulumbirira cizindikiro ciri-centse ca dziko comwe cimbabverana na kunamata kwakunama. Tsono tani penu imwepo muli mu nyumba ya mphala ndipo mwauzidwa kuti mulumbire uko mudatsanzika boko lanu pa Bibliya, kuti mutsimikizire kuti bzomwe mukulewabzo mpsacadidi? Bzimwebzi bzikacitika imwepo mun’funikadi kucita tenepoyo, thangwe rakuti Bibliya limbalewambo kuti atumiki wakukhulupirika wa Mulungu adaphatisambo basa gesto pakulumbira. (Ciyambo 24:2, 3, 9; 47:29-31) Ndipo mpsakufunikambo kukumbukira kuti mukalumbira tenepo, imwepo mumbakhala mukulumbira patsogolo pa Mulungu kuti mun’lewa cadidi. Ndipopa mun’funika kukhala wakukonzeka kutawira cadidi pa mibvunzo yentse yomwe mun’bvunzidwa.

Uxamwali bwathu na Yahova n’cinthu cakufunika kwene-kwene kwa ifepano, ndipopa pomwe tikanati kucita lumbiro liri-lentse tin’funika kumbapemba kwa iye kuti tiwonesese kuti lumbiro lathulo lin’phonyera lini mtima wathu ayai kuphonya bzomwe timbapfunzisidwa m’Bibliya. Mukakhala kuti mwalumbira, mun’funika kuteweza bzomwe mwalumbirabzo.—1 Pedru 2:12.