Yahova adacenjeza Ajirayeri kuti akhale wanthu wakucena. Kuti bzimwebzi bzikwanisike, iye adawauza kuti: “Iwepo un’funika lini kumbafamba ucimwaza magunkha pakati pa wanthu wako. Iwepo un’funika lini kuphindukira moyo wa mwanzako. Ine ndine Yahova.”—Mwambo 19:2, 16.

Fala lakuti “kuphindukira” ndiro lomwe lidaphatisidwa basa mu Bibliya lakuyamba la Cihebereu, tsono kodi fala limweri limbathandauza ciyani? Referensiya yacidjuda ya bukhu la Mwambo imbalewa kuti: “Mbali imweyi ya vesi . . . njakunesa kuibvesesa thangwe rakuti mafala yace ya Cihebereu yomwe yambalewa kuti ‘leka kuphindukira pafupi’ yambabveseseka lini bwino-bwino.”

Wanthu winango omwe ambapfunza Bibliya adayezera kubvesesa vesi limweri mwa kulibveranisa na vesi la m’mbuyo lace lomwe limbalewa kuti: “Lekani kumbayeruza mwakusaya cirungamo. Lekani kumbasankhula nyakusauka ne kumbatawirira nyakudala. Mbayeruzani mwanzanu mwa cirungamo.” (Mwambo 19:15) Mwakucita bzimwebzi, lamulo lakugumanika pa vesi 16 lakuti mun’funika lini “kuphindukira” mwanzanu lingathandauze kuti wanthu wa Mulungu an’funika lini kucita bzinthu bzomwe bzingadzonge mwanzawo ku nyumba ya mphala, pa nkhani ya malonda, ayai pa nkhani za banja na kuleka kucita bzinthu bzomwe bzingandobwerese phindu kuna iwo okha basi. N’cadidi kuti tin’funika lini kucita bzimwebzi, tsono pana njira inango yakubvesesera bwino mafala yamweya pa vesi 16.

Onani mafala yakuyambirira ya vesiri. Mulungu akuuza wanthu wace kuti aleke kumbamwaza magunkha. Kumbukirani kuti magunkha yambathandauza lini kundolewa kuipa munthu, koma yambabweresambo mabvuto. (Mimwani 10:19; Mpalizi 10:12-14; 1 Timotio 5:11-15; Tiyago 3:6) Magunkha kawiri-kawiri yambalewedwa na cakulinga cakufuna kuipisa mbiri ya munthu. Munthu nyamagunkha anganamizire munthu munango napo kuti kucita bzimwebzo kungacitise moyo wa munthuyo kukhala pa ngozi. Kumbukirani kuti wanthu wa magunkha adanamizira Nabote ndipo bzimwebzi bzidacitisa kuti iye aphedwe. (1 Wamambo 21:8-13) Inde, munthu wa magunkha angaphindukire moyo wa munthu, ninga momwe mbali yaciwiri ya Mwambo 19:16 imbalewera.

Kuthimizira bzimwebzi, magunkha yakuipa kwene-kwene yangalatize ciwengo. Pa 1 Juwau 3:15, timbawerenga kuti: “Munthu ali-wentse omwe ambawenga m’bale wace ngwakupha, ndipo imwepo mukudziwa kuti munthu wakupha an’dzatambira lini moyo wakusaya kumala.” Ndipopa pambuyo pakulewa mafala ya pa vesi 16, Mulungu adalewa kuti: “Imwepo mun’funika lini kuwenga m’bale wanu na mu mtima.”—Mwambo 19:17.

Tenepo, mafala yomwe yadanembedwa pa Mwambo 19:16 yambacenjeza Akristau mwamphanvu. Tin’funika kucita ciri-centse comwe tingakwanise kuti titcenkhe nzeru za kumbafuna kucita magunkha. Mwacigwatira, tingalewe kuti, ‘tikaphindukira moyo wa mwanzathu’ mwa kubvuma kuti kuipidwa naye ayai njiru iticitise kumucitira magunkha, wanthu angawone bzimwebzi ayai bzingacitise kuti timuwenge. Akristau an’funika kutcenkha bzimwebzi.—Mateu 12:36, 37.