NKHANI YAKUPFUNZA 6
Kodi Imwepo Mumbakhulupira Bzinthu Bzomwe Yahova Ambacita?
“Iye ni Tsendwa, ndipo mabasa yace njakulungamiratu, pakuti njira zace zentse ni cirungamo. Iye ni Mulungu wakukhulupirika, ndipo si wakusaya kulungama. Iye ngwakulungama.”—BZAKUTONGA 32:4.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
BZOMWE TIN’PFUNZA *
1-2. (a) Thangwe ranyi wanthu azinji ntsiku zino bzimbawanesa kukhulupira omwe akuwatsogolera? (b) Kodi tin’cezerana ciyani mu nkhani ino?
NTSIKU zino wanthu azinji bzimbawanesa kukhulupira wanthu omwe ambawatsogolera. Iwo ambawona kuti maboma na malamulo kawiri-kawiri yambakhotcerera wanthu wakudala na wamphanvu yacilamba kuthandiza wanthu wakusauka. Bibliya limbalewa kuti: “Munthu ambapweteka munthu mwanzace pakumutonga.” (Mpalizi 8:9) Ndipo atsogoleri winango wa bzipembedzo ambacita bzinthu bzakuipa, bzomwe bzimbacitisa wanthu kuleka kukhulupira Mulungu. Ndipopa munthu akabvuma kupfunza nafe Bibliya, mpsakufunika kumupfunzisa kukhulupira Yahova na wanthu omwe iye ambawaphatisa basa pa dziko la pantsi kuti atitsogolere.
2 Ni anyakupfunza lini okha wa Bibliya omwe an’funika kupfunza kukhulupira Yahova na gulu lace. Napo ifepano omwe tikutumikira Yahova kuyambira kale-kale tin’funikambo kupitiriza kulimbisa cikhulupiro cathu, cakuti cinthu ciri-centse comwe Yahova ambacita n’cakulungama. Nthawe zinango, kuthemba kwathu Yahova kungayezedwe pa nkhani imweyi. Mu nkhani ino, tin’cezerana bzinthu bzitatu bzomwe bzingayeze kukhulupira kwathu Yahova: (1) tikambawerenga nkhani zinango za m’Bibliya, (2) tikambatambira malango ya gulu la Yahova, na (3) tikadzagumana na mabvuto kutsogolo.
MBAKHULUPIRANI YAHOVA POMWE MUKUWERENGA NKHANI ZA M’BIBLIYA
3. Kodi nkhani zinango za m’Bibliya zingatitazise tani kukhulupira Yahova?
3 Pomwe tikuwerenga Bibliya, tingabzibvunze kuti thangwe ranyi Yahova adacita bzinthu na munthu mwa njira inango ayai thangwe ranyi iye adasankhula kucita cinthu cinango. Mwa ciratizo, m’bukhu la Mirewengo timbawerenga kuti Yahova adatonga kuti Mjirayeri munango aphedwe thangwe ra kutcola nkhuni pa ntsiku ya Sabudu. Koma m’bukhu la Samuweri waciwiri timbawerenga kuti pomwe padapita magole mazinji Yahova adalekerera Mambo Davide napo kuti adacita upombo na kupha munthu. (Mirewengo 15:32, 35; 2 Samuweri 12:9, 13) Pinango tingabzibvunze kuti: ‘Thangwe ranyi Yahova adalekerera Davide omwe adapha munthu na kucita upombo koma adatonga kuti munthu omwe adacita pikado yomwe imbawoneka ninga kuti njing’ono aphedwe?’ Kuti titawire mbvunzo umweyu, mbatiwoneni bzinthu bzitatu bzomwe tin’funika kumbabzikumbukira pomwe tikuwerenga Bibliya.
4. Kodi cinembo ca Ciyambo 18:20, 21 na ca Bzakutonga 10:17 bzimbalimbisa tani cikhulupiro cathu pakatongedwe ka Yahova?
4 Tin’funika kukumbukira kuti nthawe zinango Bibliya limbalewa lini bzentse pa nkhani yomwe tikuwerenga. Mwa ciratizo, ifepano timbadziwa kuti Davide adakunguladi na mtima wentse pa bzomwe adacita. (Salimo 51:2-4) Tsono tani pakulewa bza munthu omwe alibe kubvera lamulo lakulewa bza ntsiku ya Sabudu? Kodi iye adazindikira kuti bzomwe adacitabzo bzikhali bzakuphonyeka? Kodi iye akhalibe kale kubvera lamulo linango m’mbuyomo? Kodi iye alibe kucita bzimwebzo napo kuti akhadacenjezedwa kale? Bibliya limbalewa lini. Koma comwe tikudziwa n’cakuti Yahova “si wakusaya kulungama.” (Bzakutonga 32:4) Pomwe iye akutonga, ambaphatisa basa bzentse bzomwe akudziwa pa nkhaniyo, sikuti bzomwe wanthu angalewe, tsankhulo ayai cinthu cinango comwe cingacitise kuti nkhaniyo ileke kutongedwa bwino. (Werengani Ciyambo 18:20, 21; Bzakutonga 10:17.) Tikambapfunza kwene-kwene bza Yahova na mitemo yace, timbakhulupirambo katongedwe kace na mtima wentse. Napo kuti nkhani zinango za m’Bibliya zomwe tingawerenge zingaticitise kukhala na mibvunzo yomwe mitawiro yace tingaigumane lini tsapano lino, timbadziwa kuti Mulungu wathu “ngwakulungama mu njira zace zentse.”—Salimo 145:17.
5. Kodi kuperewera kwathu kumbaticitisa kuwona tani cilungamo? (Onani kwadru yakuti “ Kuperewera Kumbaticitisa Kuwona Bzinthu Mwakusiyana na Yahova.”)
5 Kuperewera kwathu kumbaticitisa kuwona bzinthu mwakusiyana na momwe Yahova ambawonera. Mulungu adatilenga m’cifanikiso cace, ndipopa timbawawidwa kwene-kwene tikambawona wanthu akucitiridwa bzinthu bzakuipa. (Ciyambo 1:26) Tsono pakuti ndife wakuperewera, tingawone nkhani mwakuphonyeka napo pomwe tikukumbuka kuti tikuidziwa bwino nkhaniyo. Kumbukirani kuti Djona adaipidwa pomwe Yahova adalatiza ntsisi kuna wanthu wa ku Ninive. (Djona 3:10–4:1) Tsono onani bzomwe bzidacitika thangwe ra ntsisi za Yahova. Wanthu wakupitirira 120 000 omwe akhakhala mu mzinda wa Ninive adakungula acipulumuka! Ndipo pakumalizira tikuwona kuti ni Djona omwe akhafunika kucinja nzeru zace sikuti Yahova.
6. Thangwe ranyi Yahova an’funika lini kutifotokozera thangwe lomwe acitira cinthu cinango?
6 Yahova ana ugo bwakusaya kuuza wanthu mathangwe yakucitira bzinthu. N’cadidi kuti Yahova adabvunzambo kale atumiki wace winango m’mbuyomu kuti alewe nzeru zawo pa bzinthu bzomwe akhafuna kucita. (Ciyambo 18:25; Djona 4:2, 3) Ndipo nthawe zinango iye akhambafotokoza kuti thangwe ranyi akufuna kucita cinthu cinango. (Djona 4:10, 11) Tsono Yahova ana ugo bwakuleka kutiuza kuti thangwe ranyi wasankhula kucita bzinthu bzinango. Pakuti iye ni Mulengi wathu an’funika lini kucita kutikumbira kuti acite cinthu.—Zaiya 40:13, 14; 55:9.
KHULUPIRANI YAHOVA MUKATAMBIRA MALANGO
7. Kodi n’ciyani comwe pinango cingatinese kucita, ndipo n’thangwe ranyi?
7 Ifepano timbakhulupira na mtima wentse kuti nthawe zentse Yahova ambacita bzinthu bzakulungama. Tsono pinango comwe cingatinese kukhulupira ni wanthu omwe iye adasankhula kuti atitsogolere. Ifepano tingambabzibvunze penu wanthu omwe ana udindo m’gulu la Yahova akucitadi bzinthu mwakubverana na bzomwe Yahova akufuna. Pinango atumiki winango wa Yahova m’mbuyomu akhakumbukambo tenepoyo. Kumbukirani bziratizo bzomwe bzalewedwa pa ndime 3. Pinango adzinza wa munthu omwe adaphedwa thangwe ra kusaya kubvera lamulo lakulewa bza ntsiku ya Sabudu adabzibvunza penu Mozeji adabvunzadi Yahova bza nkhaniyo akanati kuuza wanthu kuti munthuyo aphedwe. Ndipo pinango axamwali wa Uriya m’Hiti omwe mkazace adacita upombo na Davide adakumbuka kuti Davideyo adaphatisa basa ugo bwace ninga mambo kuti aleke kupasidwa nyathwa yomwe akhathemera. Nkhani njakuti, tingalewe lini kuti timbakhulupira Yahova penu timbakhulupira lini wanthu omwe iye adawaikha kuti atitsogolere pa dziko la pantsi pano, omwe mbanthu omwe iye ambawathemba.
8. Kodi ni kundendemerana kuponi komwe kulipo pakati pa bzomwe bzidanembedwa pa Mabasa 16:4, 5 na bzomwe bzikucitika m’magwere yacikristau ntsiku zino?
8 Ntsiku zino Yahova akutsogolera mbali ya pa dziko la pantsi ya gulu lace mwakuphatisa basa “kapolo wakukhulupirika na wanzeru.” (Mateu 24:45) Ninga bungwe lakutonga la Akristau wakuyambirira, kapolo umweyu akutsogolera wanthu wa Mulungu pa dziko lentse la pantsi na kupereka malango kuna akulu wa magwere. (Werengani Mabasa 16:4, 5.) Ndipo akuluwo ambaphatisa basa malango yomwe ambatambirayo mu gwere. Tingalatize kuti timbakhulupira bzinthu bzentse bzomwe Yahova ambacita mwa kubvera malango yomwe timbatambira ku gulu lace na kwa akulu.
9. Kodi ni pa nthawe iponi bzingatinese kuthandizira bzomwe akulu asankhula kucita, ndipo n’thangwe ranyi?
9 Nthawe zinango bzingatinese kuthandizira bzinthu bzomwe akulu asankhula kucita. Mwa ciratizo, madera na magwere yalinganizidwa mwakusiyana magole yapitaya. Pa kucinja kumweku, akulu adakumbira apalizi winango kuti akathandizire magwere manango, kuti magwere manango yaleke kukhala yakudzala kwene-kwene pomwe yanango yalibe wanthu azinji. Bzingakhale bzakunesa kusiya adzinza na axamwali wathu tikakumbiridwa kuti tikatsonkhane gwere linango. Kodi akulu ambacita kutsogoleredwa na Mulungu pakusankhula gwere lomwe mpalizi angakatsonkhane? Ne. Thangwe ra bzimwebzi bzingatinese kubvera bzomwe akuluwo atiuza. Tsono Yahova ambakhulupira akulu na bzinthu bzomwe asankhula kucita ndipo ifepano tin’funikambo kucita bzibodzi-bodzibzi. *
10. Mwakubverana na Ahebereu 13:17, thangwe ranyi tin’funika kumbabvera akulu?
10 Thangwe ranyi tin’funika kubverana na makonzedwe ya akulu napo kuti tiribe kukomedwa na bzomwe iwo asankhula kucita? Thangwe rakuti tikacita bzimwebzi tin’dzathandizira kuti wanthu wa Mulungu apitirize kukhala wakuphatana. (Aefezo 4:2, 3) Bzinthu bzimbafamba bwino m’gwere wentse akambabvera bzomwe bungwe la akulu lingasankhule kucita. (Werengani Ahebereu 13:17.) Ndipo kuposa bzentse tikambabvera wale omwe Yahova adawaikha kuti atithandize, timbalatiza kuti timbamuthemba.—Mabasa 20:28.
11. Kodi n’ciyani cingatithandize kumbakhulupira bzomwe akulu ambasankhula kucita?
11 Tikambakumbukira kuti akulu ambatsogoleredwa na mzimu wakucena pa kusankhula kucita bzinthu bzomwe bzingathandize gwere bzin’dzatithandiza kukhulupira malango yawo. Iwo ambafufudzambo nfundo za m’Bibliya na malango yakugumanika m’mabukhu yakukonzedwa na gulu la Yahova. Bzomwe iwo ambafuna na mtima wawo wentse ni kukondwesa Yahova na kuthandiza wanthu wace. Amuna wakukhulupirikawa ambadziwa kuti an’dzatawira mulandu kwa Mulungu akasaya kucita bwino basa lawo. (1 Pedru 5:2, 3) Kumbukirani ibzi: Mu dziko lomwe tikukhala lino wanthu mbakusaya kubverana thangwe ra kusiyana mtundu, cipembedzo na ndale, tsono wanthu wa Yahova mbakuphatana pakunamata Mulungu m’bodzi wacadidi. Bzimwebzi bzikukwanisika thangwe rakuti Yahova akusimba gulu lace!
12. Kodi n’ciyani comwe akulu an’funika kukumbukira bwino-bwino kuti awone penu munthu omwe wacita pikado wakunguladi?
12 Yahova adapasa akulu udindo bwakunesa bwakucitisa kuti gwere lipitirize kukhala lakucena. Mkristau akacita pikado ikulu, Yahova adapasa akulu udindo bwakuti awone penu munthuyo angathemere kupitiriza kukhala m’gwere ayai ne. Ndipo iwo an’funika kuzindikira penu munthuyo wakunguladi. Iye angalewe kuti wakungula, tsono iye akuipidwadi na bzomwe wacitabzo? Kodi iye an’dzabwerezera lini pomwe pikadoyo? Penu iye adacita pikadoyo thangwe ra kubverana na wanthu wakuipa, kodi iye adakonzeka kumalisa uxamwali na wanthuwo? Akulu ambapemba kwa Yahova, ambawona nkhani yentse na bzomwe Bibliya limbalewa pa nkhaniyo ndipo ambawonambo momwe nyakuphonyayo akubvera thangwe ra bzomwe wacitabzo. Patsogolo pace, ambawona penu nyakuphonyayo angapitirize kukhala m’gwere. Tsono nthawe zinango bzimbakhala bwino kucosa munthu mu gwere.—1 Akolinto 5:11-13.
13. Kodi ni thupo liponi lomwe tingakhale nalo xamwali ayai wadzinza wathu akacosedwa?
13 Thangwe ranyi nthawe zinango bzingatinese kukhulupira akulu? Penu munthu omwe wacosedwa m’gwere ni wadzinza lini wathu ayai xamwali wathu, bzimbakhala bzakupusa kubvuma bzomwe akulu kucita. Tsono tiyezezere kuti munthu omwe wacosedwayo ni xamwali wathu wapamtima. Pinango tingawone ninga kuti akulu akuidziwa lini bwino nkhaniyo, ayai tingabzibvunze penu Yahova angadatongambo tenepo nkhaniyo. Kodi n’ciyani comwe cingatithandize kuleka kuipidwa na bzomwe akulu acita?
14. Kodi tin’funika kukumbukira ciyani akulu akacosa m’gwere xamwali ayai wadzinza wathu?
14 Mpsabwino kukumbukira kuti kucosa munthu m’gwere ni makonzedwe ya Yahova ndipo bzimwebzi bzingathandize gwere na nyakuphonyayo. Kusaya kucosa m’gwere munthu omwe alibe kukungula, kungadzonge gwerelo. (Agalatiya 5:9) Ndipo iye angazindikire lini kuti waphonya kwene-kwene ndipo angadziwe lini kuti an’funika kucinja nzeru zace na bzicito bzace kuti akhale pomwe pa uxamwali na Yahova. (Mpalizi 8:11) Ndipopa penu munthu an’funika kucosedwa m’gwere, akulu ambacitadi bzimwebzo. Iwo ambadziwa kuti ali ninga atongi wa mu nthawe ya Ajirayeri omwe ‘akhatongera lini munthu koma akhatongera Yahova.’—2 Nkhani 19:6, 7.
KUKHALA WAKUKHULUPIRIKA NTSIKU ZINO KUN’DZATITHANDIZA KUTSOGOLO
Kodi n’ciyani cin’dzatithandiza kukhulupira na kubvera malango yomwe tin’dzatambira pa citsautso cikulu? (Onani ndime 15)
15. Thangwe ranyi tin’funika kukhulupira kwene-kwene malango yakucokera kwa Yahova ntsiku zino?
15 Pomwe dzikoli likuyenda kukamala, tin’funika kukhulupira kuti Yahova ambacita bzinthu bzakulungama nthawe zentse. Thangwe ranyi? Thangwe pa citsautso cikulu ifepano tin’dzapasidwa malango yomwe yan’dzawoneka ninga yakusaya basa. Yahova an’dzalewalewa lini nafe maso na maso. Bzikuwoneka kuti iye an’dzatipasa malango mwakuphatisa basa wanthu omwe adawasankhula. Nthawe imweyo tin’dzafunika kukhulupira malangoyo ticileka kukumbuka kuti: ‘Kodi malangoya yakucokeradi kwa Yahova ayai nga mu msolo mwawo?’ Kodi mun’dzakhulupira Yahova na gulu lace pa nthawe yakunesayi? Bzomwe imwepo mumbacita mukapasidwa malango na wanthu omwe akuphatisidwa basa na Mulungu kuti atitsogolere ntsiku zino, bzin’kuthandizani kudziwa mtawiro wa mbvunzoyu. Penu imwepo mumbakhulupira malango yomwe timbatambira ntsiku zino na kuyabvera mwakusaya kucedwa, mun’dzacitambo tenepoyo pa citsautso cikulu.—Luka 16:10.
16. Thangwe ranyi bzingadzatinese kukhulupira katongedwe ka Yahova kutsogoloku?
16 Ifepano tin’funikambo kukumbukira bwino-bwino bzomwe tin’funika kucita tikadzawona momwe Yahova atongera wanthu kuphampha kwa dzikoli. Mpaka pano, tikudikhirira kuti wanthu azinji omwe akutumikira lini Yahova na adzinza wathu asankhule kumutumikira pomwe Armagedo ikanati kufika. Tsono pa Armagedo, Yahova, mwakuphatisa basa Jezu, ndiye omwe an’dzasankhula bzakucita nawo. (Mateu 25:31-33; 2 Atesalonika 1:7-9) Ifepano tin’dzakhala tiribe ugo bwa kusankhula omwe an’dzathemera kucitiridwa ntsisi na Yahova na omwe an’dzathemera lini. (Mateu 25:34, 41, 46) Kodi tin’dzakhulupira katongedwe ka Yahova ayai tin’dzasiya kumutumikira thangwe rakuti tiribe kukomedwa na katongedwe kace? Bzikuwonekeratu kuti tin’funika kukhulupira kwene-kwene Yahova tsapano kuti tidzakwanise kumukhulupirambo kutsogolo.
17. Kodi ni phindu liponi lomwe tin’dzagumana thangwe ra momwe Yahova an’tongera dzikoli?
17 Kumbukirani kuti mun’dzabva tani mu dziko lipsa mukadzawona bzomwe bzacitika thangwe ra katongedwe ka Yahova. Kun’dzakhala kulibe pomwe bzipembedzo bzakunama, anyamalonda wakuipa, ayai anyandale omwe akuboneresa wanthu. Matenda, kukalamba na kufedwa bzin’dzacita lini mbali ya moyo wathu. Ndipo Sathani na madimonyo yace an’dzamangidwa acikhala m’kawoko magole 1000. Bzinthu bzentse bzomwe bzikhacitika thangwe ra kupanduka kwawo bzin’dzacitika lini pomwe. (Apokalipse 20:2, 3) Tin’dzakomedwa kwene-kwene thangwe ra kukhulupira momwe Yahova ambacitira bzinthu!
18. Kodi n’ciyani comwe tikupfunza na bzomwe Ajirayeri adacita, bzomwe bzidanembedwa pa Mirewengo 11:4-6 na 21:5?
18 Kodi pana bzinthu bzinango bzomwe bzingadzatitazise kukhulupira Yahova mu dziko lipsa? Mwa ciratizo, kumbukirani bzomwe Ajirayeri adacita pomwe adandoti cokeni ku Edjipito komwe akhali akapolo. Winango wa iwo adayamba kudandaula kuti asuwa cakudya comwe akhambadya ku Edjipito acimbanyozera cakudya comwe Yahova adawapasa cakucemeredwa mana. (Werengani Mirewengo 11:4-6; 21:5.) Kodi tin’dzakumbukambo tenepoyo citsautso cikulu cikadzamala? Tikudziwa lini kukula kwa basa lomwe tin’dzakhala nalo kuti ticenese dziko lentseneli kuti likhale paraizo. Pinango tin’dzakhala na basa likulu kuti ticite ndipo pinango pan’dzawoneka bzinthu bzomwe tingadzakomedwe lini nabzo. Kodi tin’dzadandaula na bzinthu bzomwe Yahova an’dzatipasa pa nthawe imweyo? Tikudziwa lini. Tsono comwe tikudziwa n’cakuti: Tikambatenda bzentse bzomwe Yahova ambaticitira tsapano, tin’dzatendambo bzomwe iye an’dzaticitira kutsogolo.
19. Fotokozani mwacigwatira nfundo zikulu-zikulu za nkhani ino.
19 Bzomwe Yahova ambacita nthawe zentse mpsakulungama. Tin’funika kumbakhulupira bzimwebzi. Ndipo tin’funikambo kumbakhulupira kwene-kwene wanthu omwe Yahova adawaikha kuti atitsogolere. Lekani kuyebwa mafala yomwe Yahova adalewa mwakuphatisa basa mpolofeta Zaiya. Iye adati: “Mun’dzakhala wamphanvu mukapitiriza kukhala wakuderekha na wakukhulupirika.”—Zaiya 30:15.
NYIMBO 98 Bibliya ni Mphaso ya Mulungu
^ ndi. 5 Mu nkhani ino tiniwona kuti thangwe ranyi mpsakufunika kulimbisa cikhulupiro cathu kwa Yahova na kwa wanthu omwe iye akuwaphatisa basa pa dziko la pantsi pano kuti atitsogolere. Ndipo tiniwonambo phindu lomwe tin’khala nalo tikacita bzimwebzi tsapano na bzomwe tingadzacite tikadzagumana na mabvuto kutsogolo.
^ ndi. 9 Nthawe zinango pangakhale na mathangwe yakubveka kuti munthu ayai banja lireke kucinja gwere lakutsonkhana. Onani “Bokosi la Mafunso” mu Utumiki Bwathu bwa Umambo bwa Novembro 2002 (Chichewa).
