1. Thangwe ranyi timbatambira malango? Ndipo thangwe ranyi tentsenefe timbafunikira malangoyo?

 MALANGO ngakufunika kwa ifepano. Nthawe zinango, ifepano ndife timbayamba kukumbira munthu omwe timbamuthemba kuti atipase malango, tsono nthawe zinango, m’bale omwe akucita nafe thupo angabwere acitiuza kuti tayamba kupambuka ndipo tikucita cinthu comwe tingadzakhumbule naco kutsogolo. (Agalatiya 6:1) Ndipo nthawe zinango, tikatsimulidwa thangwe rakuti tacita cinthu cakuphonyeka, timbakhala tikutambira malango. Bziribe basa kuti malangoyo yabwera tani, ifepano tin’funika kuyatetekera. Tikacita bzimwebzi, bzinthu bzin’dzatifambira bwino ndipo tingapulumuse moyo wathu.—Mimwani 6:23.

2. Mwakubverana na Mimwani 12:15, thangwe ranyi tin’funika kumbatetekera malango?

² Vesi lomwe likutsogolera nkhani yathuyi likutiuza kuti tin’funika ‘kumbatetekera mafala ya wanthu wanzeru.’ (Mimwani 22:17) Palibe munthu omwe ambadziwa bzentse, ndipo alipo wanthu omwe ambadziwa bzizinji kuposa ifepano. (Werengani Mimwani 12:15.) Ndipopa tikambatetekera malango timbalatiza kuti ndife wakubzicepesa. Ndipo timbalatizambo kuti timbadziwa kuti pana bzinthu bzomwe tingakwanise lini kucita ndipo timbafuna kuti anzathu atithandize. Mwakutsogoleredwa na mzimu wakucena, Mambo Salomau, omwe akhali wanzeru kwene-kwene, adanemba kuti: “Bzakulinga bzimbakwanisika . . . ‘alangizi’ akawanda.”—Mimwani 15:22.

3. Kodi ifepano tingatambire tani malango?

³ Ifepano tingagumane tekha malango, ayai tingapasidwe malangoyo. Kodi tin’funa kulewanyi na mafala yakuti tingagumane tekha malango? Tingawerenge nkhani inango m’Bibliya ayai m’mabukhu mwathu, yomwe ingatithandize kudziwa bzomwe tin’funika kucinja pa moyo wathu. (Ahebereu 4:12) Tingalewe kuti yamweya ni malango yakugumana tekha. Tsono tin’funa kulewanyi tikati malango yakucita kupasidwa? Mkulu wa  gwere ayai m’bale munango wakukhwima mwauzimu angatiuze cinthu cinango comwe tin’funika kucinja. Tingalewe kuti yamweya ni malango yakucita kupasidwa. Munthu omwe ambatifuna akatilatiza malango kucokera m’Bibliya tin’funika kulatiza kutenda mwa kumutetekera na kuphatisa basa malango yomwe watipasayo.

4. Mwakubverana na Mpalizi 7:9, n’ciyani comwe tin’funika lini kucita tikapasidwa malango?

⁴ Kulewa cadidi, bzingatinese kubvuma malango yakucita kupasidwa, ndipo tingakomedwe lini na malangoyo. Thangwe ranyi? Thangwe napo timbadziwa kuti ndife wakuperewera, bzingatinese kubvuma malango, munthu akatiuza kuti taphonya cakuti. (Werengani Mpalizi 7:9.) Tingayambe kubziwonesa ninga kuti tina lazau ndipo tingayambe kukumbukira kuipa munthu omwe watipasa malangoyo ayai kukalipa na momwe malangoyo yaperekedwera. Ndipo tingafike pakulewa kuipa omwe watipasa malangoyo ticiti: ‘Kodi ni mbani iye kuti andipase malango? Kodi iye ambaphonyambo lini?’ Ndipo cinthu cinango n’cakuti malangoyo yakasaya kutidekera, tingayaphatise lini basa, ayai tinganyang’ane munthu munango omwe an’tiuza bzinthu bzomwe bzin’tidekera.

5. Kodi tin’pfunza ciyani mu nkhani ino?

⁵ Mu nkhani ino, tiniwona nkhani za m’Bibliya za wanthu omwe adalamba malango na omwe adayabvuma. Ndipo tiniwonambo kuti n’ciyani comwe cingatithandize kubvuma malango na kugumana phindu na malangoyo.

6. Kodi tikupfunza ciyani na bzomwe Mambo Robuwamu adacita pomwe adapasidwa malango?

⁶ Onani bzomwe bzidacitikira Robuwamu. Pomwe adakhala mambo wa Jirayeri, wanthu wace adabwera kudzamukumbira cinthu. Iwo adamukumbira kuti iye acepese basa lomwe pai wace, Salomau, akhadauza wanthuwo kuti ambacite. Mpsabwino kuwona kuti Robuwamu adakabvunza akulu-akulu wa Jirayeri kuti adziwe kuti angadawatawira tani wanthuwo. Akulu-akuluwo adauza mamboyo kuti iye akacita bzomwe wanthuwo akumbira, iwo an’dzapitiriza kumutumikira. (1 Wamambo 12:3-7) Bzikuwoneka kuti Robuwamu alibe kukomedwa na malango yawo, ndipopa iye adayenda kukabvunza wanthu wa msinkhu wace. Bzikuwoneka kuti amuna amwewa pinango-pentse akhana magole 40, ndipopa akhadziwa bzinthu bzinango pa moyo. (2 Nkhani 12:13) Tsono pa nthawe imweyo, iwo adapasa Robuwamu malango yakuipa. Iwo adamuuza kuti iye athumizire basa kwa wanthuwo. (1 Wamambo 12:8-11) Pakuti iye akhadapasidwa malango mawiri yakusiyana, bzingadakhala bwino kupemba kwa Yahova kuti amuthandize kudziwa bzakucita. Tsono iye alibe kucita bzimwebzo, koma adasankhula kuteweza malango yomwe yadamudekera, acicita bzomwe wanthu wa msinkhu wace adalewa. Tsono bzimwebzi bzidadzabweresa mabvuto kwa Robuwamu na Ajirayeri. Nthawe zinango, ifepano tin’dzatambira malango yomwe tin’dzakomedwa lini nayo, tsono yakakhala kuti ngakucokera m’Bibliya, tin’funika kuyabvuma.

7. Kodi tikupfunza ciyani na bzomwe bzidacitikira Mambo Uziya?

⁷ Mambo Uziya adalamba malango. Iye adapita m’cipinda ca mu templo ya Yahova, comwe ni antsembe okha omwe akhabvumizidwa kupita ndipo adayezera kupereka bzakununtcirisa. Tsono antsembe wa Yahova adamuuza kuti: “Mpsakubvumizika lini kwa imwepo a Uziya kutentha bzakununtcirisa kwa Yahova. Ni antsembe okha omwe an’funika kumbatentha bzakununtcirisa.” Kodi Uziya adacita ciyani? Iye angadabzicepesa acibvuma malangoyo na kucokeratu mu templomo, Yahova angadamulekerera. Tsono “Uziya . . . adakalipa.” Thangwe ranyi iye alibe kutetekera malangoyo? Thangwe iye akhawona kuti, pakuti akhali mambo, akhana ugo bwakucita ciri-centse comwe an’funa. Tsono Yahova akhawona lini tenepo. Pakuti Uziya adacita cinthu comwe akhalibe ugo bwa kucicita, iye adakhala na “mapere  mpaka ntsiku yakufa kwace.” (2 Nkhani 26:16-21) Bzomwe bzidacitikira Uziya bzikutipfunzisa kuti tikalamba malango yakucokera m’Bibliya tin’dzaluza uxamwali bwathu na Yahova, bziribe basa kuti ndife yani.

8. Kodi Djobi adacita ciyani pomwe adapasidwa malango?

⁸ M’Bibliya timbagumanambo nkhani za wanthu wabwino omwe akhali wakusiyana na wanthu omwe tawonawa. Iwo adasimbidwa thangwe ra kubvera malango. M’bodzi wa iwo ni Djobi. Napo kuti iye akhafuna Mulungu ndipo akhafuna kuti Mulunguyo akomedwe naye, iye akhali lini wakulungama. Pomwe adagumana na mabvuto, iye adalewa bzinthu bzomwe bzikhali lini bzabwino. Thangwe ra bzimwebzi, Elihu na Yahova adamupasa malango. Kodi iye adacita ciyani? Iye adabzicepesa acibvuma malangoyo. Iye adati: “Ndalalewa mwakusaya kukumbuka bwino, ndipopa ndikubweza bzomwe ndalewa bzire. Ndikukungula m’pfumbi na m’dotha.” Yahova adasimba Djobi thangwe ra kubzicepesa kwace.—Djobi 42:3-6, 12-17.

9. Kodi Mozeji adacita ciyani pomwe adapasidwa malango ndipo n’thangwe ranyi tin’funika kumutewezera?

⁹ Mozeji akhali munthu wabwino omwe tingamutewezere. Iye adabvuma malango pomwe adaphonya cinthu cikulu. Pa nthawe inango iye adakalipa ndipo alibe kulemekeza Yahova. Thangwe ra bzimwebzi, iye adaluza mwayi wakukapita m’dziko lomwe Mulungu adapasa Ajirayeri. (Mirewengo 20:1-13) Pomwe Mozeji adakumbira kuti Yahova aiwone pomwe nkhaniyo, Yahovayo adamuuza kuti: “Leka kudzandiuza pomwe nkhani imweyi.” (Bzakutonga 3:23-27) Mozeji alibe kukalipa na bzimwebzi. Iye adabvuma bzomwe Yahova adasankhula ndipo Yahovayo adapitiriza kumuphatisa basa pakutsogolera Ajirayeri. (Bzakutonga 4:1) Djobi na Mozeji ni wanthu wabwino omwe ifepano tingawatewezere pa nkhani ya kubvuma malango. Djobi adacinja nzeru zace ndipo akhakumbuka lini kuti ana lazau. Mozeji adalatiza kuti adabvuma malango ya Yahova mwa kupitiriza kumutumikira mwakukhulupirika napo pomwe adaluza mwayi omwe ukhali wakufunika kwene-kwene kwa iye.

10. (a) Kodi cinembo ca Mimwani 4:10-13 cimbalatiza tani phindu la kutambira malango? (b) Kodi abale winango adacita tani bzinthu bzabwino pomwe adatambira malango?

¹⁰ Bzinthu bzin’dzatifambira bwino kwene-kwene tikambatewezera wanthu wakukhulupirika ninga Djobi na Mozeji. (Werengani Mimwani 4:10-13.) Abale na mpfumakazi azinji akucita kale bzimwebzi. Onani bzomwe m’bale Emmanuel, omwe ambakhala ku Congo, adalewa pa nkhani ya malango yomwe adatambira. Iye adati: “Abale wakukhwima wa m’gwere mwathu adawona kuti ndikhacita cinthu comwe cingadadzonga uxamwali bwangu na Yahova ndipo adandithandiza. Ndidaphatisa basa malango yawo ndipo malangoyo yadandithandiza kutcenkha mabvuto makulu.” * Mpainiya munango wa ku Canadá, wakucemeredwa Megan, adalewa tenepa pa nkhani ya kutambira malango: “Ni nthawe lini zentse pomwe nimbapasidwa malango yomwe nimbakomedwa nayo, koma malangoyo yambakhala yakufunika kwa inepano.” Ndipo m’bale munango wa ku Croácia, wakucemeredwa Marko, adalewa kuti: “Ndidaluza udindo bomwe ndikhanabo, koma pomwe ndidakumbukira bwino-bwino, ndidawona kuti malango yomwe ndidatambira yadandithandiza kulimbisa uxamwali bwangu na Yahova.”

11. Kodi m’bale Klein adalewa ciyani pa nkhani ya kubvuma malango?

¹¹ Munthu munango omwe tingamutewezere pa nkhani ya kutambira malango ni m’bale Karl Klein, omwe adatumikira m’Bungwe Lakutonga. Mu nkhani ya moyo wace, m’bale Klein adalewa kuti pa nthawe inango, iye adatambira malango yamphanvu kucokera kwa m’bale Joseph Rutherford omwe akhabverana naye kwene-kwene. M’bale Klein adalewa kuti pakuyamba, iye alibe kukomedwa na malangoyo. Iye adati: “Pa  nthawe inango, m’bale Rutherford adandiwona ndipo adandimusa aciti: ‘Uli tani Karl?’ Pakuti ndikhadakalipa, ndiribe kumutawira. Tsono m’baleyo adati: ‘Karl, mphole! Dyabu an’funa kukupinga.’ Ndidacita manyazi ndipo ndidatawira kuti: ‘Ne m’bale Rutherford! Ndiribe kukalipa ine.’ Tsono iye akhadziwa kuti inepano ndikhadakalipa, ndipopa iye adalewa pomwe kuti: ‘Bzadeka, tsono ndati mphole, Sathani akufuna kukupinga.’ Iye akhalewa cadidi. Tikakalipa maka-maka thangwe ra kuti m’bale walewa cinthu comwe ana ugo bwakulewa, ifepano timbakhala tikupasa mpata Sathani kuti atipinge.” * (Aefezo 4:25-27) M’bale Klein adatetekera malango ya m’bale Rutherford ndipo adapitiriza kukhala pa uxamwali bwakulimba.

12. Kodi kubzicepesa kungatithandize tani kubvuma malango? (Salimo 141:5)

¹² N’ciyani comwe cingatithandize kubvuma malango? Tin’funika kumbabzicepesa mwa kumbakumbukira kuti ndife wanthu wakuperewera ndipo tingaphonye. Ninga momwe tapfunzira, Djobi adakhalambo na nzeru zakuphonyeka, tsono iye adacinja nzeru zace ndipo Yahova adamusimba. Thangwe ranyi? Thangwe Djobi akhali wakubzicepesa, ndipo iye adalatiza kubzicepesako mwa kubvuma malango yomwe Elihu adamupasa, napo kuti Elihuyo akhali mwana na iye. (Djobi 32:6, 7) Mpsibodzi-bodzimbo na ifepano, kubzicepesa kun’dzatithandiza kuphatisa basa malango, napo pomwe tikuwona kuti tikufunikira lini malangoyo, ayai omwe watipasa malangoyo ni mwana. Mkulu munango wa gwere wa ku Canadá adalewa kuti: “Ifepano timbakwanisa lini kubziwona tekha, ndipopa bzingakhale bzakunesa kuti tikhale wakukhwima tikasaya kupasidwa malango na anzathu.” Inde, tentsenefe tin’funika kukulisa cisapo ca mzimu kuti tikwanise kukhala apalizi na apfunzisi wabwino wa mafala ya Mulungu.—Werengani Salimo 141:5.

13. Kodi tin’funika kumbayawona tani malango yomwe timbapasidwa?

¹³ Mbawonani kuti malango ni lufoyi la Yahova. Yahova ambafuna kuti bzinthu bzitifambire bwino. (Mimwani 4:20-22) Iye akambatipasa malango mwakuphatisa basa Fala lace, mabukhu yomwe yambafotokoza bza Bibliya yomwe gulu lathu limbapereka ayai Akristau wakukhwima ambakhala akulatiza kuti ambatifuna. Ndipo pa Ahebereu 12:9, 10 pambalewa kuti “iye ambacita bzimwebzi kuti bzinthu bzitifambire bwino.”

14. Kodi n’ciyani comwe tin’funika kumbakumbukira kwene-kwene tikapasidwa malango?

¹⁴ Kumbukirani bwino-bwino malangoyo, sikuti momwe yaperekedwera. Nthawe zinango, ifepano tingawone kuti malango yomwe tapasidwa yalibe kuperekedwa bwino. N’cadidi kuti ali-wentse omwe an’funa kupereka malango, an’funika kucita ciri-centse kuti malango yaceyo yakhale yakusaya kunesa kuyabvuma. * (Agalatiya 6:1) Tsono penu tikutambira malango, tingacite  bwino kukumbukira bzomwe tingapfunze na malangoyo, napo penu tikuwona kuti yalibe kuperekedwa bwino. Bzibvunzeni kuti: ‘Kodi ciripo comwe ningapfunze na malango yamweya, napo kuti ndiribe kukomedwa na momwe yaperekedwera? Kodi ningaleke kundowona bzomwe ningapfunze na malangoya, sikuti kuphonya kwa omwe andipasa malangoyu?’ Bzingakhale bwino kwene-kwene kwa ifepano kucita ciri-centse kuti tigumane phindu na malango yomwe tapasidwa.—Mimwani 15:31.

15. Thangwe ranyi tin’funika kumbakumbira malango?

¹⁵ Bibliya limbatiuza kuti timbakumbire malango. Mimwani 13:10 ambati: “Wale omwe ambanyang’ana malango ambakhala na nzeru.” Bzimwebzi n’cadidi, wale omwe ambanyang’ana malango bzinthu bzin’dzawafambira bwino kusiyana na wale omwe ambacita kudikhira kupasidwa malango. Ndipopa, citani ciri-centse kuti mumbakumbire malango.

16. Kodi ni pa bzinthu bziponi bzomwe tingafunikire kukumbira malango?

¹⁶ Kodi ni pa nthawe iponi pomwe tingakumbire malango kwa Akristau anzathu? Kumbukirani ibzi: (1) Mpfumakazi ikukumbira mpfumakazi inango yomwe ina luso kuti acitise nayo pabodzi pfunziro la Bibliya. Pomwe amala kucitisa pfunziro la Bibliyalo, iyo ikukumbira mpfumakazi yomwe ina lusoyo kuti ifotokoze bzomwe angacite kuti akhale mpfunzisi wabwino. (2) Mpfumakazi yomwe iri lini pa banja ikufuna kugula bzakubvala, ndipopa, iyo ikukumbira mpfumakazi inango yomwe njakukhwima mwauzimu kuti imuthandize kuwona penu bzakubvalabzo mpsabwino ayai ne. (3) M’bale wauzidwa kuti akafotokoze nkhani ya m’Bibliya kakuyamba. Iye akukumbira m’bale omwe ana luso, kuti amutetekere bwino-bwino pomwe iye akufotokoza nkhani yace, nakuti akamala, amuuze bzinthu bzomwe an’funika kucita kuti ambafotokoze bwino nkhani. Napo m’bale omwe wamala magole mazinji akufotokoza nkhani, angacite bwino kumbakumbirambo abale winango omwe ana luso kuti amupase malango, aciphatisa basa malango yawoyo.

17. Kodi n’ciyani comwe tin’funika kucita kuti tigumane phindu na malango?

¹⁷ Kutsogoloku tentsenefe tin’dzatambira malango. Pinango tin’dzacita kupasidwa malangoyo ayai tin’dzayagumana tekha. Bzimwebzi bzikadzacitika, dzakumbukireni bzomwe tapfunza mu nkhani ino. Dzakhaleni wakubzicepesa, dzakumbukireni bwino-bwino malangoyo, sikuti omwe ayapereka ndipo dzaphatiseni basa malango yomwe mwapasidwayo. Palibe ali-wentse wa ifepano omwe adabadwa akudziwa kale bzinthu, ndipopa “[tikatetekera] malango” na “[kubvuma] kulangidwa,” Fala la Mulungu limbalewa kuti tin’dzakhala “wanzeru.”—Mimwani 19:20.