MU NTHAWE ya Ajirayeri, mkuwasa ayai famidya ya mkuwasayo akhapagali kobiri kwa amibzala akafuna kuseula. Ntseuloyo ikhakhala bzinthu bzakufunika, bzifuwo ayai kobiri. Nthawe zinango mkuwasa akhapagali ntseuloyo mwakucita kuphatira basa amibzala, ninga momwe Djakobo adacitira pomwe adaphatira basa amibzala wace magole 7 kuti alowole Rakeli. (Ciyambo 29:17, 18, 20) Thangwe ranyi mkuwasa akhatcadjiwa akafuna kulowola?

Mpfunzi munango wa Bibliya wakucemeredwa Carol Meyers adalewa kuti: “Ntseulo ikhapagali basa lomwe mwanayo angadacita kuna abereki wace, lomwe likhali lakufunika kwene-kwene maka-maka kwa mabanja yomwe yakhaphata basa la kulima.” Ntseuloyo ikhalimbisambo mbverano pakati pa adzinza wa mkazi na adzinza wa mwamuna. Adzinzawa angadakwanisa kumbathandizana pa nthawe yakunesa. Ndipo cinthu cinango n’cakuti ntseuloyo ikhalatiza kuti mkaziyo akhafunika kucoka pamui pa abereki wace aciyenda kukakhala na mwamuna wace.

Kupagali ntseulo kukhafuna lini kulewa kuti mkazi ali ninga combo comwe munthu angacigule ayai kucigulisa. Bukhu linango lomwe limbafotokoza bza moyo wa Ajirayeri wakale lidalewa kuti: “Mtemo wa kupagali kobiri ayai cinthu cinango kwa amibzala ukhacitisa kuti Ajirayeri ambawone malowozi yawo ninga kuti adacita kuyagula. Tsono ntseulo ikhandowoneka ninga kobiri ya kupagali basa lomwe mkaziyo akhacita sikuti kumugula.”

Ntsiku zino m’madziko manango wanthu akupitiriza kuteweza mtemo umweyu wakumbapagali ntseulo. Akristau akafuna kutcadja ntseulo an’funika kuwonesa padeca kuti iwo ‘ambangingimira lini’ nzeru zawo mwa kuleka kutcadja kobiri zizinji kwene-kwene. (Afilipi 4:5; 1 Akolinto 10:32, 33) Akacita bzimwebzi, iwo ambalatiza kuti ni wanthu lini “wakufunisisa kobiri.” (2 Timotio 3:2) Ndipo cinthu cinango n’cakuti Akristau akasaya kutcadja kobiri zizinji za ntseulo, mkuwasa wawoyo aningingimizidwa lini kucedwa kucita malowozi kuti akontceze kobiri za ntseulo. Ayai mkuwasayo an’dzafunika lini kucita kusiya basa ninga la upainiya kuti ambaphate basa nthawe izinji kuti akwanise kugumana kobiri zakupagaliri ntseulo.

M’madziko manango liripoletu lamulo la nkhani ya ntseulo. M’madziko yamweya Akristau an’funika kubvera malamuloyo. Thangwe ranyi? Thangwe Fala la Mulungu limbatiuza kuti Akristau an’funika “kubvera wale omwe akutonga pakati [pawo]” na kubvera malamulo yomwe yambapitana lini na malamulo ya Mulungu.—Aroma 13:1; Mabasa 5:29.