LAMULO likhabvumiza kuti munthu apereke ntsembe kwa Yahova njiwa ayai nkhangaiwa. Njiwa na nkhangaiwa bzimbagumidwa pabodzi m’malamulo yakulewa bza kupereka ntsembe. Ndipo munthu omwe akhalibe njiwa akhabvumizidwa kupereka nkhangaiwa. (Mwambo 1:14; 12:8; 14:30) Thangwe ranyi bzikhali bwino tenepoyo? Thangwe libodzi ndakuti ni nthawe lini zentse pomwe njiwa zimbagumanika kumweko. Thangwe ranyi?

Njiwa zimbagumanika mu dziko la Jirayeri m’minyezi ya cirimo. Tsono gole liri-lentse mu mwezi wa Outubro, izo zimbayenda m’madziko yakupsa ndipo zimbabwerera m’cirimo. (Nyimbo ya Salomau 2:11, 12; Jeremiya 8:7) Thangwe ra bzimwebzi bzikhali bzakunesa kwa Ajirayeri kumbapereka ntsembe njiwa nthawe ya mainza.

Tsono nkhangaiwa zimbafuluka lini ndipopa zikhagumanika mu Jirayeri nthawe zentse. Ndipo cinthu cinango n’cakuti wanthu akhafuwa nkhangaiwazo. (Ndendemezerani na Juwau 2:14, 16.) Mwakubverana na bukhu linango, lomwe limbalewa bza miti na bzirombo bzakugumidwa m’Bibliya, “m’midzi na m’mizinda yentse ya ku Palestina wanthu akhafuwa nkhangaiwa. Mui uli-wentse ukhana thanga la nkhangaiwa ayai mubo pa parede omwe nkhangaiwa zikhakhala.”—Ndendemezerani na Zaiya 60:8.

Yahova adalatiza kuti ana lufoyi ndipo ambangingimira lini bzinthu mwa kubvuma kuti Ajirayeri apereke ntsembe cinthu comwe cikhalipo pa nthaweyo.