1. Kodi n’ciyani comwe Jezu adauza anyakupfunza wace, ndipo ni mcenjezo uponi omwe adawapasa?

 POMWE zikhadasala ntsiku zing’ono-ng’ono kuti Jezu aphedwe, anyakupfunza wace anai adamubvunza kuti: “[Kodi] cizindikiro . . . cakumala kwa dzikoli cin’dzakhala ciponi?” (Mateu 24:3) Pinango anyakupfunzawo adamubvunza thangwe akhafuna kudziwa kuti ni lini pomwe cimaliziro cingadadzafika mu nthawe yawo. Jezu alibe kundowauza bza cizindikiro cakumala kwa nthawe imweyire basi, koma adawauzambo bza cizindikiro “cakumala kwa dzikoli” mu nthawe yathu ino. Iye adalewa kuti: “Pakulewa bza ntsikuyo ayai nthawe yace palibe omwe akudziwa, ne anjo wa kudzulu ne Mwana, koma Baba yekha basi.” Ndipo patsogolo pace, iye adacenjeza anyakupfunza wace kuti ‘apitirize kukhala tceru na kupitiriza kukhala adapenya.’ — Marko 13:32-37.

2. Thangwe ranyi Akristau wakuyambirira akhafunika kubvera mcenjezo wa Jezu?

² Akristau wakuyambirira omwe akhali Adjuda akhafunika kukhala tceru kuti apulumuke. Jezu adauza ateweri wace bzizindikiro bzakulatiza kuti mzinda wa Jeruzalemu wasala pang’ono kupfudzidwa. Iye adawauza kuti: “Mukadzawona Jeruzalemu wazunguliridwa na acikunda, mudzadziwe kuti wasala pang’ono kupfudzidwa.” Pa nthawe imweyi, iwo akhafunika kudzacita bzomwe Jezu adawauza; iwo akhafunika “[kudzathawira] ku mapiri.” (Luka 21:20, 21) Wanthu omwe adabvera malango ya Jezuya adapulumuka pomwe Aroma adapfudza mzinda wa Jeruzalemu.

3. Kodi tin’cezerana ciyani mu nkhani ino?

³ Ifepano tikukhala mu ntsiku zakumalizira za dziko lakuipali. Ndipopa tin’funikambo kukhala na nzeru ndipo tin’funikambo  kukhala tceru. Mu nkhani ino, tin’cezerana bzomwe tingacite pomwe tikuwona bzomwe bzikucitika m’dzikoli, momwe tingakhalire wakucenjera na bzomwe tingacite kuti tiphatise basa bwino nthawe yathu.

4. Thangwe ranyi timbafunisisa kudziwa momwe mapolofesiya ya m’Bibliya yakukwanisikira ntsiku zino?

⁴ Ifepano timbafunisisa kudziwa bzinthu bzomwe bzikucitisa kuti mapolofesiya ya m’Bibliya yakwanisike. Pomwe Jezu akhali pa dziko lapantsi, iye adalewa bzinthu bzakusiyana-siyana bzomwe bzingadadzatithandiza kudziwa kuti dziko la Sathaniri liri kufika kuphampha. (Mateu 24:3-14) Mpostolo Pedru adatiuza kuti tikhale tceru pomwe mapolofesiya ya m’Bibliya yakukwanisika kuti cikhulupiro cathu cipitirize kukhala cakulimba. (2 Pedru 1:19-21) Bukhu lakumalizira la m’Bibliya limbayamba na mafala yakuti: “Jezu Kristu, adatumiza anjo wace kwa mtumiki wace Juwau kuti akamulatize bzinthu bzomwe bzin’funika kucitika mwakamfulumize kutsogolo.” (Apokalipse 1:1) Bzimwebzi bzikulatiza kuti ifepano timbafunisisa kudziwa kuti mapolofesiya ya m’Bibliya yakukwanisika tani. Ndipo timbafunisisambo kuuza anzathu bzinthu bzimwebzi.

5. N’ciyani comwe tin’funika lini kucita, ndipo n’ciyani comwe tin’funika kucita? (Onani bzithunzi-thunzi.)

⁵ Tsono pomwe tikuceza na anzathu bza mapolofesiya ya m’Bibliya, tin’funika lini kumbalewa bzinthu bza mu msolo mwathu. Thangwe ranyi? Thangwe bzimwebzi bzingacitise kuti gwere lireke kukhala lakubverana. Ifepano tingabve akulu-akulu wa boma akulewa bzinthu bzomwe angacite kuti abwerese mtendere na mkhomeko kuna wanthu wentse. Tikabva bzinthu bzimwebzi tin’funika lini kukumbukira kuti bzomwe akulewabzo bzikukwanirisa polofesiya ya pa 1 Atesalonika 5:3. Koma nthawe zentse tin’funika kumbaphatisa basa malango mapsa yomwe tapasidwa. Tikambaphatisa basa nfundo za m’mabukhu yakukonzedwa na gulu la Yahova pomwe tikuceza na anzathu, tin’dzacitisa kuti gwere likhale lakubverana ndipo tentse tin’dzakhala “na nzeru ibodzi.” — 1 Akolinto 1:10; 4:6.

6. Kodi n’ciyani comwe tingapfunze pa 2 Pedru 3:11-13?

⁶ Werengani 2 Pedru 3:11-13. Mpostolo Pedru akutithandiza kudziwa thangwe ranyi tin’funika kumbawona bzinthu bzomwe bzikucitisa kuti mapolofesiya ya m’Bibliya yakwanisike. Iye adaticenjeza kuti tipitirize “kukumbukira bza kubwera kwa ntsiku ya Yahova.” Thangwe ranyi? Sikuti thangwe rakuti tikufuna kuti tidziwe “ntsiku na nthawe” yomwe Yahova an’dzabweresa Armagedo, koma timbacita bzimwebzi thangwe tikufuna kuphatisa basa bwino nthawe yathu kuti tilatize ‘makhalidwe yakucena ticimbacita bzinthu bzomwe bzin’latiza kuti ndife wanthu wakubzipereka kwa Mulungu.’ (Mateu 24:36; Luka 12:40) Bzimwebzi bzin’funa kulewa kuti, timbakhala tin’funa kudziwa bza kubwera kwa ntsiku ya Yahova kuti ticite bzomwe Yahova ambafuna na kulatizambo kuti timbamufuna. Kuti bzimwebzi bzikwanisike, tin’funika nthawe zentse kukhala wakucenjera ayai kukhala wakupenya.

7. Kodi tingalatize tani kuti ndife wakucenjera? (Luka 21:34)

⁷ Jezu adauza anyakupfunza wace kuti akhale tceru sikuti pa bzinthu bzomwe bzikucitika m’dzikoli basi, koma akhalembo tceru pa bzomwe iwo ambacita. Timbabvesesa bwino nfundo imweyi pa mafala yomwe iye adayalewa pa Luka 21:34. (Werengani.) Pa vesiri, Jezu adalewa kuti: “Cenjerani.” Munthu omwe adacenjera ambakwanisa kuwona bzinthu bzomwe bzingadzonge uxamwali bwace na Yahova acibzitcenkha. Bzimwebzi bzimbamucitisa kuti  iye apitirize kufunidwa na Mulungu. — Mimwani  22:3; Djuda 20, 21.

8. Kodi n’ciyani comwe mpostolo Paulo adauza Akristau?

⁸ Mpostolo Paulo adauza Akristau kuti akhale wakucenjera. Iye adauza Akristau wa ku Efezo kuti: “Khalani tceru kuti muleke kufamba ninga wanthu wakusaya nzeru, koma ninga wanthu wanzeru.” (Aefezo 5:15, 16) Sathani akuyezera kudzonga uxamwali bwathu na Yahova, ndipopa Bibliya limbatiuza kuti: “Pitirizani kuzindikira kufuna kwa Yahova.” Bzimwebzi mpsakufunika kuti tikwanise kubzikhotcerera kwa Sathaniyo. — Aefezo 5:17.

9. Kodi n’ciyani comwe tin’funika kucita kuti tidziwe bzomwe Yahova ambafuna kuti ticite?

⁹ Bibliya limbalewa lini bzinthu bzentse bzomwe bzingadzonge uxamwali bwathu na Yahova. Ndipopa ifepano timbafunika kucita bzakusankhula pa bzinthu bzomwe bziribe kufotokozedwa m’Bibliya. Kuti timbasankhule bwino bzakucita, tin’funika kumbadziwa bzomwe “Yahova ambafuna.” Tingacite bzimwebzi mwa kumbawerenga Bibliya nthawe zentse ticimbakumbukira bzomwe tawerengabzo. Tikambadziwa bzomwe Yahova ambafuna na kucita nyongo yakukhala na “makumbukidwe ya Kristu,” ifepano tin’dzacita bzinthu “mwa nzeru,” napo pa bzinthu bzomwe bziribe kucita kunembedweratu m’Bibliya kuti tin’funika kubzicita ayai ne. (1 Akolinto 2:14-16) Bzinthu bzinango bzingakhale bzakupusa kubzizindikira ticibzitcenkha; tsono bzinango bzimbakhala bzakunesa kubzizindikira.

10. Kodi ni bzinthu bzinango bziponi bzakuipa bzomwe tin’funika lini kumbabzicita?

¹⁰ Bzinthu bzinango bzomwe tin’funika lini kumbabzicita ndibzo kumbaceza kwene-kwene na munthu omwe tin’funa lini kulowolana naye, kumwa kwene-kwene, kudya kwene-kwene, kumbalewa mafala yakuipa, kukhala na axamwali wakuipa, kuwona mavidiyo yakumenyana, kuwona pornografia na bzinthu bzinango bzakundendemera na bzimwebzi. (Salimo 101:3) Nyamadulanthaka wathu, Sathani, akunyang’ana manera kuti adzonge uxamwali bwathu na Yahova. (1 Pedru 5:8) Tikasaya kucenjera, iye angaticitise pang’ono na pang’ono kukhala wanthu wakusaya kulungama, wa ukali, wa ciwengo na wakukoyera anzathu cakumtima. (Agalatiya 5:19-21) Bzinthu bzimwebzi bzingakhale bziribe kuipiratu. Tsono tikasaya kucita cinthu kuti tibzimalise, ibzo bzingakule mu mtima mwathu ndipo bzingatidzonge. — Tiyago 1:14, 15.

11. Kodi ni ngozi iponi yomwe tin’funika kuitcenkha, ndipo thangwe ranyi?

¹¹ Ngozi inango yomwe tin’funika kuitcenkha ndiyo kucita uxamwali na wanthu wakuipa. Tiyezezere kuti imwepo mumbaphata basa pabodzi na munthu omwe ni Mboni lini ya Yahova. Imwepo mumbayezera kucita bzinthu bzabwino kuti iye ambawone kuti Mboni za Yahova mbanthu wabwino. Ntsiku inango iye akukumbirani kuti muyende naye kukadya, ndipo imwepo mwabvuma kuyenda nayeko. Tsono pang’ono na pang’ono, imwepo mukumbacita bzimwebzo nthawe zentse pabodzi na munthuyo. Nthawe zinango, nkhani zomwe iye akulewa zikukhala zakuipa. Bzimwebzi bzikukuipirani, tsono mukundobzisiyambo tenepoyo. Imwepo mukuyamba kuzizolowera nkhani zacezo ndipo zikukuipirani lini pomwe. Ndipo ntsiku inango, iye wakukumbirani kuti muyende naye pabodzi kukamwa, imwepo mwabvuma bzimwebzo. Imwepo mukuyamba kukhala na nzeru ninga za mwanzanuyo. Pan’dzapita lini nthawe ikulu. Imwepo mun’dzayamba kutewezera bzomwe mwanzanu wa ku basayo ambacita. N’cadidi kuti ifepano timbafuna kukhala wanthu wabwino ndipo timbafunambo kulemekeza wanthu wentse, tsono tin’funika kudziwa kuti bzingakhale bzakupusa kutewezera wanthu omwe timbamala nawo nthawe izinji tiri nawo pabodzi. (1 Akolinto 15:33) Tikakhala wanthu  wakucenjera ninga momwe Jezu adatiuzira, tin’dzatcenkha kumbaceza na wanthu omwe ambabvera lini mitemo ya Yahova. (2 Akolinto 6:15) Tin’dzakwanisa kuwona ngozi yomwe ingabwere ticiitcenkha.

12. Kodi ni basa liponi lomwe Jezu adapasa anyakupfunza wace?

¹² Jezu akhafuna kuti anyakupfunza wace akhale na basa la kucita pomwe akudikhirira kumala kwa dzikoli. Ndipopa iye adawapasa basalo. Iye adawauza kuti apalizire mafala yabwino ya Umambo “ku Jeruzalemu, ku Djudeya kwentse na ku Samariya, mpaka mbuto zakutali za pa dziko la pantsi.” (Mabasa 1:6-8) Limweri ni basa likulu kwene-kwene lomwe ateweri wa Jezu adapasidwa! Iwo adalatiza kuti akhaphatisa basa bwino nthawe yawo mwa kuphata basalo na nyongo.

13. Thangwe ranyi tin’funika kuphatisa basa bwino nthawe yathu? (Akolose 4:5)

¹³ Werengani Akolose 4:5. Kuti tilatize kuti ndife wakucenjera, tin’funika kuwona kuti tikuphatisa tani basa nthawe yathu. “Bzinthu bzakusaya kudikhirika” bzingagwere ali-wentse wa ifepano. (Mpalizi 9:11) Ifepano tingafe nthawe iri-yentse.

14-15. Kodi tingaphatise tani basa bwino nthawe yathu? (Ahebereu 6:11, 12) (Onani cithunzi-thunzi.)

¹⁴ Kuti tiphatise basa bwino nthawe yathu tin’funika  kucita bzomwe Yahova ambafuna mwa kulimbisa uxamwali bwathu na iye. (Juwau 14:21) Bibliya limbati: “Khalani wakulimba, na wakusaya kutekenyeka, ndipo nthawe zentse khalani na bzakucita bzizinji pa basa la Mbuya.” (1 Akolinto 15:58) Tikacita bzimwebzi, tin’dzakhumbula lini cimaliziro cikafika ayai moyo wathu ukafika kuphampha pomwe dzikoli likanati kumala. — Mateu 24:13; Aroma 14:8.

¹⁵ Jezu akupitiriza kutsogolera anyakupfunza wace pa basa la kupalizira mafala yabwino ya Umambo pa dziko lentse la pantsi. Iye akucita mbali yace. Ndipo mwakuphatisa basa gulu la Yahova, Jezu ambatipfunzisa momwe tingapalizirire ndipo ambatipasa bzinthu bzomwe bzimbatithandiza kumwaza mafala yabwino ya Umambo. (Mateu 28:18-20) Ifepano timbalatiza kuti tikucita bzomwe Jezu adatiuza tikambacita nyongo pa basa la kupalizira na kupfunzisa wanthu na mwa kupitiriza kukhala tidapenya pomwe tikudikhirira kuti Yahova amalise dziko lakuipali. Tikaphatisa basa malango ya pa Ahebereu 6:11, 12, tin’dzaphatisisa cidikhiro cathu “mpaka kuphampha.” — Werengani.

16. N’ciyani comwe tentsenefe tin’funika kucita?

¹⁶ Yahova adaikha kale ntsiku na nthawe yakuti adzapfudze dziko la Sathaniri. Ntsikuyo ikadzafika, iye an’dzakwanirisa bzomwe bzidanembedwa mu polofesiya ya kulewa bza nkhani imweyi. Tsono, ifepano tingawone ninga kuti ntsikuyo ikucedwa. Koma, ntsiku ya Yahova ‘in’dzacedwa lini!’ (Habakuki 2:3) Ndipopa bwerani tentse ‘tipitirize kudikhirira Yahova, tipitirize kudikhirira Mulungu wa cipulumuso cathu.’ — Mikeya 7:7.