NKHANI YAKUPFUNZA 1
Pitirizani Kukhala Wakuderekha Ndipo Khulupirani Yahova
VESI LATHU LA GOLE LA 2021: ‘Mun’dzakhala wamphanvu mukapitiriza kukhala wakuderekha na wakukhulupirika.’—ZAIYA 30:15.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
BZOMWE TIN’PFUNZA *
1. Ninga Mambo Davide, kodi winango wa ifepano angabzibvunze mbvunzo uponi?
TENTSENEFE timbafuna kukhala na moyo wa mtendere ndipo palibe omwe ambafuna kukhala na thupo. Tsono nthawe zinango, ifepano tingakhale na thupo. Ndipopa atumiki winango wa Yahova angabzibvunze mbvunzo ninga omwe Mambo Davide adabvunza Yahova kuti: ‘Mpaka lini nin’dzakhala na thupo na msunamo mu mtima mwangu ntsiku zentse?’—Psalymo 13:2.
2. Kodi tin’cezerana ciyani mu nkhani ino?
2 Napo kuti nthawe zinango tingakhale na thupo, pana bzinthu bzinango bzomwe tingacite kuti tileke kumbakhala na thupo kwene-kwene. Mu nkhani ino tiniyamba kucezerana bzinthu bzinango bzomwe bzingaticitise kukhala na thupo. Tikamala, tin’cezerana bzinthu bzitanthatu bzomwe tingacite, kuti tipitirize kukhala wakuderekha pomwe tikugumana na mabvuto.
KODI CIYANI COMWE CINGATICITISE KUKHALA NA THUPO?
3. Kodi ni bzinthu bziponi bzomwe bzimbaticitisa kukhala na thupo, ndipo n’ciyani comwe ifepano tingakwanise lini kucita na bzinthu bzimwebzi?
3 Pana bzinthu bzizinji bzomwe bzingaticitise kukhala na thupo, ndipo ifepano tiribe mphanvu yakuletsa bzinthubzo kucitika. Mwa ciratizo, ifepano tingacitise lini kuti cakudya, bzakubvala na nyumba za aluge bzireke kuumira pa gole liri-lentse. Ndipo tingakwanisembo lini kucitisa kuti anzathu wa ku basa, ayai wa ku xikola aleke kutiyeza kuti tikhale wakusaya kukhulupirika ayai kuti ticite upombo ayai uputa. Ndipo tingacitisembo lini kuti bzinthu bzaukapondo bzireke kucitika kumbuto yomwe timbakhala. Ifepano timbagumana na mabvuto yamweya thangwe rakuti tikukhala mu dziko lomwe lina wanthu omwe ana makumbukidwe yomwe yambabverana lini na mitemo ya m’Bibliya. Sathani omwe ni mulungu wa dzikoli, ambadziwa kuti wanthu azinji an’dzatumikira lini Yahova thangwe rakuti ‘bzinthu bza m’dzikoli’ bzin’dzawacitisa kukhala na thupo kwene-kwene. (Mateu 13:22; 1 Juwau 5:19) Ifepano timbadabwa lini kuti dzikoli ladzala na mabvuto yomwe yambacitisa wanthu azinji kukhala na thupo.
4. Kodi n’ciyani comwe cingacitike ifepano tikakhala na thupo kwene-kwene thangwe ra mabvuto yathu?
4 Ifepano tingakhale na thupo kwene-kwene pa nkhani inango mwakuti tingakwanise lini kukumbukira cinthu cinango. Mwa ciratizo, ifepano tingakhale na thupo lakuti tin’dzakhala tiribe kobiri zakukwanira kuti tigulire bzomwe tin’funikira, ayai thupo lakuti tin’dzaduwala ticidzatazira kuphata basa ayai kuluza basa cairolo. Ndipo tingakhalembo na thupo lakuti pinango tin’dzakwanisa lini kukhala wakukhulupirika, tikadzayezedwa kuti tireke kubvera lamulo la Mulungu. Tsapanopapa Sathani an’citisa kuti wale omwe iye ambawaphatisa basa apfudze atumiki wa Mulungu. Tenepo, ifepano tingakhale na thupo lakuti, kodi tin’dzacita ciyani pa nthawe imweyo? Pinango tingabzibvunze kuti: ‘Kodi mpsakuphonyeka inepano kucita thupo na bzinthu bzimwebzi?’
5. Kodi Jezu akhathandauza ciyani pomwe adalewa kuti ‘lekani kukhala na thupo’?
5 Ifepano timbadziwa kuti Jezu adauza ateweri wace kuti: ‘Lekani kukhala na thupo.’ (Mateu 6:25) Kodi pamwepa Jezu akhafuna kulewa kuti tileke kucita thupo na cinthu ciri-centse? Ne, n’tenepo lini. Kumbukirani kuti m’mbuyomu, atumiki winango wakukhulupirika wa Yahova adakhalambo na thupo, tsono napo bzikhali tenepo, Yahova adapitiriza kuwawona kuti akhali wanthu wakufunika. * (1 Wamambo 19:4; Psalymo 6:3) Jezu adalewa mafala ya pa Mateu kapitulo 6 pakufuna kutitsangalaza. Iye ambafuna lini kuti timbakhale na thupo kwene-kwene na bzinthu bzomwe bzingaticitise kuwona kutumikira Yahova kukhala kwakusaya kufunika pa moyo wathu. Tsono n’ciyani comwe tingacite tikakhala na thupo?—Onani kwadru yakuti: “ Kodi Tingacite Tani Bzimwebzi?”
BZINTHU BZITANTHATU BZOMWE BZINGATITHANDIZE KUKHALA WAKUDEREKHA
Onani ndime 6 *
6. Mwakubverana na Wafiripo 4:6, 7, kodi n’ciyani comwe cin’dzatithandiza kukhala wakuderekha tikakhala na thupo?
6 (1) Mbapembani kawiri-kawiri. Mukakhala kuti mukucita thupo na bvuto linango, mbapembani kwa Yahova kuti akuthandizeni. (1 Pedru 5:7) Ndipo Yahovayo angakutawireni mwakukupasani ‘mtendere omwe umbaposa makumbukidwe yentse [ya munthu].’ (Werengani Wafiripo 4:6, 7. *) Yahova ambatithandiza kukhala wakuderekha, mwakuphatisa basa mphanvu yace ya mzimu wakucena.—Wagalata 5:22.
7. Kodi n’ciyani comwe tin’funika kumbakumbukira pomwe tikupemba kwa Mulungu?
7 Mukakhala kuti mukupemba kwa Yahova, mbamufotokozerani momwe mukubvera mu mtima mwanu. Muuzeni bvuto lanulo ndipo mufotokozerenimbo momwe imwepo mukubvera. Ndipo penu mukuwona kuti pana njira yomwe ingakuthandizeni kumalisa bvutolo, mbakumbirani Yahova kuti akupaseni nzeru, kuti mudziwe bzomwe mungacite na mphanvu yakuti mucitire bzimwebzo. Tsono penu mukuwona kuti palibe comwe mungacite kuti mumalise bvutolo, mbakumbirani Yahova kuti akuthandizeni kuleka kukhala na thupo kwene-kwene. Mukambafokoza bzomwe bzikukunesani, mun’dzakwanisa kuwona momwe Yahova akutawirira mpembo wanu. Ndipo mukawona kuti mpembo wanu ukucedwa kutawiridwa, pitirizani kupembako. Yahova ambandofuna lini kuti timbamufotokozere bzomwe bzimbatinesa, koma iye ambafunambo kuti timbapitirize kuipempherera nkhaniyo.—Luka 11:8-10.
8. Kodi n’ciyani comwe ifepano tingambalewembo m’mipembo yathu?
8 Pomwe mukufotokozera thupo lanu Yahova mu mpembo, mbamutendanimbo. Mpsakufunika kumbakumbukira bzinthu bzabwino bzomwe tinabzo, napo kuti tikugumana na mabvuto mazinji. Tsono n’ciyani comwe mungacite mukakhala kuti mukudziwa lini momwe mungamufotokozerere Yahova momwe mukubvera? Kumbukirani kuti Yahova ambatawira mipembo, napo ire yomwe ifepano tingandolewe kuti: ‘Ndaphata minyendo, ndithandizeni.’—2 Nkhani 18:31; Waroma 8:26.
Onani ndime 9 *
9. Kodi n’ciyani comwe tin’funika kucita tikakhala na mantha?
9 (2) Mbathembani nzeru za Yahova, sikuti nzeru zanu. Mu nthawe za mpolofeta Zaiya, wanthu wa ku Djuda akhana mantha na Asiriya. Tsono pakuti Adjudawo akhagopa kukundidwa na Asiriya, iwo adayenda kukakumbira Aedjipito kuti awathandize. (Zaiya 30:1, 2) Tsono Yahova adawacenjeza kuti kukhulupira Aedjipito kungadawabweresera mabvuto. (Zaiya 30:7, 12, 13) Mwakuphatisa basa Zaiya, Yahova adauza Adjudawo momwe iwo angadakhalira wakukhotcerereka. Iye adati: ‘Mun’dzakhala wamphanvu mukapitiriza kukhala wakuderekha na wakukhulupirika kwa Yahova.’—Zaiya 30:15b.
10. Kodi ni pa nkhani ziponi zomwe tingalatize kuti timbathemba Yahova?
10 Kodi ni pa nthawe iponi yomwe tingalatize kuti timbathemba Yahova? Mbatiwoneni bziratizo ibzi: Tiyezezere kuti mwapasidwa basa lomwe lin’dzakupasani kobiri zizinji, tsono mun’dzafunika kuphata basalo kwa nthawe yakuthumizirika, koma lin’dzakutazisani kucita bzinthu bzauzimu. Ayai, tiyezezere kuti mwanzanu wa kubasa akulatiza kuti ambakufunani, tsono iye ni mtumiki lini wa Mulungu. Ayai, kodi n’ciyani comwe mungacite penu munthu wa m’banja mwanu omwe mumbafuna, acikuuzani kuti: “Sankhula omwe umbafuna pakati pa ine na Mulungu wako.” Pa nkhani ninga zimwezi, bzingakuneseni kusankhula bzakucita, tsono Yahova angakupaseni thandizo lomwe imwepo mungafunikire. (Mateu 6:33; 10:37; 1 Wakolinto 7:39) Tenepo mbvunzo nguyu, kodi imwepo mun’dzathemba Yahova na kubvera bzomwe iye ambalewa?
Onani ndime 11 *
11. Kodi ni nkhani ziponi za m’Bibliya zomwe tingapfunze kuti zitithandize kukhala wakuderekha pomwe tikuboneresedwa?
11 (3) Pfunzani na bziratizo bzabwino na bzakuipa. M’Bibliya muna nkhani zizinji zakulatiza kufunika kwa kupitiriza kukhala wakuderekha na kukhulupira Yahova. Tenepo, mukambapfunza nkhanizo, mbakumbukirani momwe atumiki wa Mulungu adapitirizira kukhala wakukhulupirika, napo kuti akhaboneresedwa na wanthu. Mwa ciratizo, pomwe nyumba ya mphala ya Adjuda idauza apostolo kuti asiye kupalizira, iwo alibe kubva mantha, koma mwakukhwimika iwo adalewa kuti: ‘Tin’funika kubvera Mulungu ninga mtongi, kuposa wanthu.’ (Mabasa 5:29) Ndipo napo pambuyo pakupfumbulidwa, apostolowo alibe kubva mantha. Thangwe ranyi? Thangwe iwo akhadziwa kuti Yahova akhali kumbali yawo. Yahovayo akhakomedwa nawo, tenepo iwo adapitiriza kupalizira bzipsa bzabwino. (Mabasa 5:40-42) Mpsibodzi-bodzimbo na Sitefano. Pomwe iye akhafuna kuphedwa, adapitiriza kukhala wakuderekha ndipo nkhope yace ikhawoneka ninga ‘nkhope ya anjo.’ (Mabasa 6:12-15) Thangwe ranyi? Thangwe iye akhadziwa kuti Yahova akhadekedwa naye.
12. Mwakubverana na 1 Pedru 3:14 na 4:14, thangwe ranyi tingapitirize kukhala wakukondwa pomwe tikuzunzidwa?
12 Apostolo akhana umboni bwakuti Yahova akhali kumbali yawo. Mwa ciratizo, iye akhadawapasa mphanvu kuti ambacite bzakudabwisa. (Mabasa 5:12-16; 6:8) Tsono, iye ambacita lini bzimwebzi na ife ntsiku zino. Koma napo bziri tenepo, Yahova ambatitsimikizira mwakuphatisa basa Fala lace, kuti tikakhala kuti tikuzunzidwa thangwe ra kucita bzinthu bzakulungama, iye ambakomedwa nafe ndipo mzimu wace umbakhala nafe. (Werengani 1 Pedru 3:14; * 4:14. *) Tenepo, tin’funika lini kucita thupo na bzomwe tin’dzacita kutsogolo tikadzazunzidwa, m’mbuto mwace, tin’funika kulimbisa cikhulupiro cathu, cakuti Yahova an’dzatithandiza na kutipulumusa. Ndipo ninga momwe adacitira anyakupfunza wakuyambirira m’mbuyomu, ifepanombo tin’funika kukhulupira mafala ya Jezu yakuti: ‘Ine nin’dzakuuzani mafala yakuti mudzalewe na nzeru, zomwe anyamadulanthaka wanu wentse an’dzakwanisa lini kuzilamba ne kuzinyoza.’ Ndipo Jezu adatitsimikizira kuti: ‘Mukapitiriza kupirira mun’dzagumana moyo.’ (Luka 21:12-19) Lekani kuyebwa kuti Yahova ambakumbukira napo kacinthu kang’ono-ng’ono, komwe atumiki wace wakukhulupirika omwe adafa adacita na cakulinga cakuti adzawalamuse.
13. Kodi ni pindu liponi lomwe tingaligumane, na bziratizo bza wale omwe alibe kupitiriza kukhala wakuderekha na kukhulupira Yahova?
13 Tingapfunzembo na bziratizo bza wale omwe adatazira kupiritiza kukhala wakuderekha na kukhulupira Yahova. Ndipo kupfunza bziratizobzo, kun’tithandiza kutcekha kucita bzinthu bzakuipa bzomwe iwo adacita. Mwa ciratizo, pomwe Aza adakhala mambo wa Adjuda, thimu likulu la anyankhondo lidabwera kudzamenyana naye, tsono iye adathemba Yahova kuti amuthandize kukunda anyamadulanthakawo. (2 Nkhani 14:9-12) Na kupita kwa nthawe, mambo Basa wa ku Jirayeri, adabwera na acikunda ang’ono-ng’ono kuti adzamenyane na Aza, tsono pa nthawe imweyi, Aza alibe kuthemba Yahova kuti amupulumuse ninga momwe iye akhadacitira pakuyamba pale, m’mbuto mwace, iye adathemba wanthu wa ku Siriya kuti amuthandize. (2 Nkhani 16:1-3) Pomwe akhaduwala ndipo akhadasala pang’ono kufa, Aza alibe kuthemba pomwe Yahova kuti amuthandize.—2 Nkhani 16:12.
14. Kodi n’ciyani comwe tikupfunza na kuphonya kwa Aza?
14 Pomwe Aza adagumana na mabvuto ulendo bwakuyamba, iye adathemba Yahova. Tsono na kupita kwa nthawe, iye alibe kuthemba Mulungu wace kuti amuthandize, m’mbuto mwace, iye adabzithemba yekha kuti amalise mabvuto yaceyo. Pakuyamba, nzeru ya Aza yakuyenda kukakumbira thandizo kwa wanthu wa ku Siriya kuti amuthandize ikhawoneka ninga kuti ingadaphata basa, tsono iribe. Ndipo mwakuphatisa basa mpolofeta wace, Yahova adauza Aza kuti: ‘Pakuti imwepo mwathemba mambo wa ku Siriya m’mbuto mwa kuthemba Yahova, Mulungu wanu, gulu la anyankhondo wa mambo wa Siriyayo lathawa m’manja mwanu.’ (2 Nkhani 16:7) Ifepano tin’funika lini kumbabzithemba tekha pomwe tikugumana na mabvuto, m’mbuto mwace, timbathembe Yahova kuti atitsogolere na kutithandiza mwakuphatisa basa Fala lace. Napo pa nthawe yomwe tingafunike kucita bzakusankhula mwakamfulumize, tin’funika kukhala wakuderekha na kuthemba Yahova, ndipo iye an’dzatithandiza kuti bzinthu bzitifambire bwino.
Onani ndime 15 *
15. Kodi n’ciyani comwe tin’funika kucita pomwe tikuwerenga Bibliya?
15 (4) Mbakumbukirani mavesi ya m’Bibliya. Mukagumana mavesi ya m’Bibliya yomwe yakulatiza kufunika kwa kupitiriza kukhala wakuderekha na kukhulupira Yahova, mbayakoyani kuti mumbayakumbukire. Tsono kuti mubayakumbukire, mun’funika kumbayawerenga mwakukuwa ayai mungayanembe pa tsamba kuti mumbayawerenge kawiri-kawiri. Yahova adauza Djosuwe kuti ambawerenge bukhu la Cakutonga ntsiku zentse mwapantsi-pantsi, kuti limuthandize kucita bzinthu mwanzeru. Bzomwe iye akhawerengabzo, bzidamuthandiza kuleka kukhala na mantha, acikhala wakukhwimika kuti akwanise kutsogolera wanthu wa Mulungu. (Djosuwe 1:8, 9) Mavesi mazinji yakugumanika mu Fala la Mulungu, yangakuthandizeni kukhala wakuderekha pa nkhani zakusiyana-siyana, zomwe kawiri-kawiri zingakucitiseni kukhala na thupo.—Psalymo 27:1-3; Mimwani 3:25, 26.
Onani ndime 16 *
16. Kodi Yahova ambaphatisa basa tani abale na mpfumakazi, kuti atithandize kupitiriza kukhala wakuderekha na kuthemba iye?
16 (5) Mbatsonkhanani na Atumiki wa Mulungu. Yahova ambaphatisa basa abale na mpfumakazi zathu kuti atithandize kukhala wakukhulupirika na kumbathemba iye. Ndipo pa mitsonkhano yathu, timbagumana phindu na nkhani zomwe timbabva, mitawiro ya abale, pabodzi na maceza yakulimbisa yomwe timbakhala nayo na abale pabodzi na mpfumakazi zathu. (Wahebereu 10:24, 25) M’gwere, ifepano tingalimbisidwembo na axamwali wathu pomwe tikuwafotokozera bzomwe bzimbaticitisa thupo, ndipo ‘mafala yabwino’ yakucokera kwa axamwali wathuwo, yangatithandize nthawe zizinji kuti tireke kulemedwa kwene-kwene na thupo.—Mimwani 12:25.
Onani ndime 17 *
17. Mwakubverana na Wahebereu 6:19, kodi cidikhiro cathu pakulewa bza Umambo, cimbatithandiza tani kupitiriza kukhala wakuderekha pa nthawe zakunesa?
17 (6) Pitirizani kulimbisa cidikhiro canu. Cidikhiro cathu ca Umambo ciri ‘ninga ndangula ya moyo,’ yomwe imbatithandiza kukhala wakuderekha napo pa nthawe yomwe tikugumana na mabvuto ayai tikucita thupo. (Werengani Wahebereu 6:19. *) Kumbukirani bzomwe Yahova adalewa kuti bzin’dzacitika kutsogolo. Pa nthaweyo, palibe ne na m’bodziyo omwe an’dzacita thupo na cinthu ciri-centse. (Zaiya 65:17) Kumbukiranimbo mtendere omwe tin’dzakhala nawo m’dziko lipsa, momwe mun’dzacitika lini bzinthu bzakuipa. (Mikeya 4:4) Imwepo mungalimbisembo cidikhiro canu, mwakumbafotokozera anzanu bzomwe bzin’dzacitika m’dziko lipsa. Tenepo, citani bzentse bzomwe mungakwanise pa basa lakupalizira na kupfunzisa wanthu kuti akhale anyakupfunza. Mukacita bzimwebzi, mun’dzakhala na ‘citsimikizo cakukwana ca cidikhiro mpaka cimaliziro.’—Wahebereu 6:11.
18. Kodi n’ciyani comwe cin’citika kutsogoloku, ndipo tingacite ciyani kuti bzinthu bzidzatifambire bwino?
18 Pakuti tiri ku phampha kwa ntsiku zakumalizira za dzikoli, ifepano tin’gumana na mabvuto mazinji yomwe yangaticitise kukhala na thupo. Tenepo, vesi lathu la gole la 2021 lingatithandize pomwe tikugumana na mabvutoyo ndipo lingatithandizembo kupitiriza kukhala wakuderekha, sikuti mwa ife tekha, koma mwakuthemba Yahova. Ndipo mwakubverana na mafala ya m’vesi la gole lino, mbatilatizeni mwa bzicito bzathu, kuti timbakhulupira mafala yomwe Yahova adalewa yakuti: ‘Mun’dzakhala wamphanvu mukapitiriza kukhala wakuderekha na wakukhulupirika.’—Zaiya 30:15.
NYIMBO 8 Yahova ni Pakuthawira Pathu
^ ndi. 5 Vesi lathu la gole la 2021, likutitsimikizira kuti mpsakufunika kwene-kwene kukhulupira Yahova pomwe tikugumana na mabvuto yomwe yambaticitisa kukhala na thupo. Nkhaniyi in’fotokoza bzinthu bzomwe tin’funika kucita kuti tiphatise basa malango yomwe yakugumanika mu vesi lathu la gole lino.
^ ndi. 5 Abale winango na mpfumakazi omwe mbakukhulupirika, ambabonera thangwe ra kukhala na thupo kwene-kwene. Tsono thupo limweri limbacitisidwa na bvuto la thanzi ndipo ndakusiyana kwene-kwene na thupo lomwe Jezu adalilewa.
^ ndi. 6 Wafiripo 4:6 Lekani kumbacita thupo na cinthu ciri-centse, koma pa ciri-centse na mpembo na kudandaulira pabodzi na kutenda, bzakukumbira bzanu bzidziwike kuna Mulungu; 7 ndipo mtendere wa Mulungu, omwe umbaposa makumbukidwe yentse un’dzakoya mitima yanu pabodzi na luso lanu lakukumbuka mwa Kristu Jezu.
^ ndi. 12 1 Pedru 3:14 Tsono, napo mucibonera thangwe ra cirungamo, ndimwe wakukondwa basi. Lekani kugopa bzomwe iwo wambagopa, ndipo lekanimbo kucita thupo kwene-kwene.
^ ndi. 12 1 Pedru 4:14 Penu mukunyozedwa thangwe ra dzina la Kristu, ndimwe wakukondwa, thangwe mzimu wa umbiri, inde, mzimu wa Mulungu uli pa imwepo.
^ ndi. 17 Wahebereu 6:19 Cidikhiro comwe tinacoci ciri ninga ndangula ya moyo, ico n’cakutsimikizika na cakulimba, ndipo cimbapita mpaka mkati, ku khonde kwa cinguwo cakutcingira.
^ ndi. 67 BZOMWE BZIKUCITIKA PA CITHUNZI-THUNZI: (1) Kuphampha kwa ntsiku, mpfumakazi ikupemba na mtima wentse ndipo ikufotokoza bzomwe bzaicitisa kukhala na thupo.
^ ndi. 69 BZOMWE BZIKUCITIKA PA CITHUNZI-THUNZI: (2) Pa nthawe yakupuma ku basa, mpfumakaziyo ikuwerenga Fala la Mulungu kuti igumane nzeru.
^ ndi. 71 BZOMWE BZIKUCITIKA PA CITHUNZI-THUNZI: (3) Mpfumakaziyo ikukumbukira bziratizo bzabwino na bzakuipa bza m’Bibliya.
^ ndi. 73 BZOMWE BZIKUCITIKA PA CITHUNZI-THUNZI: (4) Mpfumakaziyo yanemba pa katsamba cinembo comwe ikufuna kuti imbacikumbukire.
^ ndi. 75 BZOMWE BZIKUCITIKA PA CITHUNZI-THUNZI: (5) Mpfumakaziyo ikukondwa thangwe ra kupalizira pabodzi na azixamwali wace.
^ ndi. 77 BZOMWE BZIKUCITIKA PA CITHUNZI-THUNZI: (6) ndipo ikulimbisa cikhulupiro cace, mwakukumbukira bzomwe bzin’dzacitika kutsogolo.
